Mwakwendesela Ciwano ca Buyoye Bwetu Baka-Kristu na Cipangi Cetu

Byuma Bilimo

1. Ebi biñanda bili muno mu fomu bikwasa boshe baje bali na mutamba mu Mukanda wa Biwano bya Buyoye Bwetu Baka-Kristu na Cipangi Cetu. Boshe baje bali na mitamba banapande kwituluka mu biñanda bimwesa mwakwendeselamo biñanda bili mu Mukanda wa Biwano bya Buyoye na Cipangi Cetu nebi bili muno mu fomu simbu kanda balibwaesele biñanda byabo. Shongangeyeni baka-kwambulula boshe balisonekese kwana biñanda mu sikola. Baje bakakukunguluka simbu yoshe nabo basa kulisonekesa nga banakulahela byuma biilongesa Mbimbiliya na kuyoya mu kulitombola na binangulo bya mu Bisoneka. Kanyungi wa Ciwano ca Buyoye na Cipangi Cetu napande kusimutwiya na baje bashaka kulisonekesa mu sikola baje kanda bapwe baka-kwambulula bakujeneka kumbwitika na kubaleka byuma bibanapande kulinga. Co lalo napande kulinga ngoco oku bisemi bendi ha bali (baje bapwa bakaleho nambe munu uje akamulongesa Mbimbiliya). Ebi binangulo bipanga na kuli baje bashaka kupwa baka-kwambulula bakujeneka kumbwitika.—od-SK capi. 8 para. 8.

MAJWI A KUZIMBULA

2. Munutu umo. Calumingo na calumingo, munima ya mwaso na lilombelo lya kushokolola, muka-citwamo wa Ciwano ca Buyoye na Cipangi azimbula bibalikuwa mu ciwano. Muka-citwamo napande kutala ha bisimpi bije bikwasa manene cikungulukilo.

BISIMPI BYA SEHO BYA MU LIJWI LYA NJAMBI

3. Ñanda: Minutu 10. Mutwe wa ñanda na bisimpi bibali nambe bitatu bije bimusimutwiya, banabimwesa mu Mukanda wa Biwano wa Buyoye na Cipangi Cetu. Eyi ñanda bayendeka kuli mukulunu nambe ngamba wa cikungulukilo wa kukola ku sipilitu. Nga oco calumingo mushangumuka kutanda mukanda wauha wa mu Mbimbiliya, co kukala vidio izimbula owo mukanda. Ndolome endeka eyi ñanda asimutwiyako ha bisimpi bimo bili mu vidio bije bilitombola na bije bili mu ñanda yendi. Oloni napande kwendeka ha bisimpi byoshe bibanamwesa mu mukanda wa biwano. Napande kwendeka ha bikupulo mangana akanyamese bisimpi byakama. Nasa kwendekako biñanda bimo bya mu mabulu eka bije bilitombola na bisimpi bya mu ñanda yendi.

4. Kutondesesa Bisimpi bya Seho: Minutu 10. Eyi inapu ñanda ya bihula na bikumbululo, co kuyesi na majwi a kuzimbula nambe majwi a mamaneselelo. Eyi ñanda bayendeka kuli mukulunu nambe ngamba wa cikungulukilo wa kukola ku sipilitu. Co napande kwihula mbunga bihula byoshe bibali. Co lalo napande kumona indi bisoneka byoshe bibanamwesa banapande kubitanda. Baje bakumbulula, banapande kukumbulula lika mu masekondi 30 na kwiluka mwisi.

5. Kutanda Mbimbiliya: Minutu iwana. Eyi ñanda bayendeka kuli muna sikola wa munalume. Muna sikola napande kutanda lika mukanda ubanamwana. Keti endeke majwi a kuzimbula nambe majwi a mamaneselelo. Muka-citwamo napande kukwasa muna sikola atande mu kusungama na kuzibisisa na kujeneka kusebukasebuka na kukanyamesa bisimpi na kutengulula ku lijwi na kwimanena haje ha napande na kutanda mu lijwi lyendi lya cisemwa. Mizimbu ibakatanda bana ba sikola imo yaihi, ikwabo yailaha. Ngeci kanyungi wa Ciwano ca Buyoye na Cipangi napande kunanguka cashu ca muna sikola umo na umo omwo abana biñanda bya kutanda.

AKENI MBUNGE KU CIPANGI CA KWAMBULULA

6. Minutu 15. Ou mutamba wa ciwano unapu wa kukwasa boshe balilongese mwakwendekela mu lihya na kubwezelela ku cashu cabo ca kwambulula na kulongesa. Nga citaba bakulunu nabo basa kubana biñanda bya mu sikola. Muna sikola napande kupangela ha simpi ili mu broshuwa ya Aka Mana ku Kutanda na Kulongesa nambe broshuwa ya Zemeni Banu ije inalyata na mutamba ubanamwana uli mu Mukanda wa Biwano wa Buyoye na Cipangi Cetu. Simbu imo ha mutamba ou hakalakala ñanda ya kusimutwiya. Eyi ñanda bayendeka kuli mukulunu nambe ngamba wa cikungulukilo wa kukola ku sipilitu.—Taleni paragirafu 15 mumwasa kwendekela biñanda bili na mutamba wa kusimutwiya.

7. Kushangumuka Kusimutwiya na Banu: Ei ñanda banapande kuyendeka kuli muna sikola wa munalume nambe wa munakazi. Babenya ñanda na mukwasi wendi banapande kupwa ba bushwamwa bumo nambe kuyendeka na muka-naanga yendi. Muna sikola na mukwasi wendi basa kwimana nambe kutumama.—Nga mushaka kuzibuka byabingi taleni, paragirafu 12 na 13.

8. Kwilukilako: Ei ñanda banapande kuyendeka kuli muna sikola wa munalume nambe wa munakazi. Babenya ñanda na mukwasi wendi banapande kupwa ba bushwamwa bumo. (km-SK 5/97 p. 2) Muna sikola na mukwasi wendi basa kwimana nambe kutumama. Muna sikola napande kumwesa mwa kwendekela omwo elukila kuli munu uje yanasimutwiyiye nendi ha bungezi bunahu.—Nga mushaka kuzibuka byabingi, taleni paragirafu 12 na 13.

9. Kupwisa Banu Bandongesi: Ei ñanda banapande kuyendeka kuli muna sikola wa munalume nambe wa munakazi. Babenya ñanda na mukwasi wendi banapande kupwa ba bushwamwa bumo. (km-SK 5/97 p. 2) Muna sikola na mukwasi wendi basa kwimana nambe kutumama. Omwo muna sikola amwesa ngwendi nashangumuka laja kutwamenena cilongesa ca Mbimbiliya, kapandele kwendeka majwi a kuzimbula nambe majwi a mamaneselelo, kubanga nga ali na kupangela ha cilongesa cije cimwesa ngwaco napande kulinga ngoco. Kubapandele kutanda mapalagilafu oshe oloni, basa kulinga ngoco nga citaba.

10. Lumbununeni Byuma Bimwakulahela: Ou mutamba banapande kuwendeka kuli muna sikola wa munalume nga banamwesa ngwabo unapu ñanda. Nga banamwesa ngwabo ou mutamba unapu cimweso, co banapande kuwendeka kuli muna sikola wa munalume nambe wa munakazi. Babenya ñanda na mukwasi wendi banapande kupwa ba bushwamwa bumo nambe kuyendeka na muka-naanga yendi. Muna sikola napande kukumbulula mwamubwa cihula ca mutwe wa ñanda kupangesa biñanda bili mu mabulu abanamwesa. Muna sikola nasa kwangula kupangesa nambe kujeneka kupangesa biñanda bili mu mabulu abanamwesa ha simbu yendeka ñanda yendi.

11. Ñanda: Ei Ñanda banapande kuyendeka kuli muna sikola wa munalume mu cikungulukilo. Nga ñanda inemana ha biñanda bikwabo A mu broshuwa ya Zemeni Banu, co muna sikola napande kumwesa mwakupangesela owo mavesi mu lihya. Cakumwenako, nasa kulumbununa simbu ya napande kupangesa owo ma vesi, bialumbununa na kukwasa munu yali na kusimutwiya nendi kuazibisisa. Nga ñanda inemana ha simpi ili mu cilongesa ca mu broshuwa ya Zemeni Banu, muna sikola napande kwaka mbunge mwapangesela obyo biñanda mu lihya. Asa kwendeka cakumwenako cibanendeka ha simpi 1 omwo mu cilongesa nambe kwendeka mavesi akwabo abanamwesa omwo mu cilongesa nga kulinga ngoco kukwasa.

12. Mwakwanena Biñanda: Biñanda bili muno mu paragilafu nei inatako, binatalesa ku “Kushangumuka Kusimutwiya na Banu” na “Kwilukilako”. Cilengo ca muna sikola cinapu ku simutwiya bya busunga bwa mu Mbimbiliya buje bwasa kukwasa babenya njibo na kusimutwiya nendi mungila ije imukwasa kwilukilako lalo. Muna sikola napande kwangula kusimutwiya ha byuma bibali na kuliwana nabyo banu mu citingitingi cabo. Nasa kwangula kupangesa nambe kujeneka kupangesa libulu nambe vidio ili mu Cikasha ca Bikwata bya Kupangesa mu Kulongesa. Kutubakana kwendeka biñanda bibanakwata mumutwe, banapande kulizilisa kusimutwiya mwamubwa na banu ha kubamwesa ngwabo babaka mbunge na kwendeka nabo mu cisemwa.

13. Mwakwambulwilamo: Muka-kwambulula napande kupangesa bingila bya kwambulwilamo kwesekesa nomu mubinafwila byuma omwo mu citingitingi. Cakumwenako:

(1) Kwambulwila ha Njibo na Njibo: Ei ngila ya kwambulwilamo inambateselela kwambulwila ha Njibo na Njibo—nambe kuya ha njibo ya munu, kwendeka nendi ha foni, nambe kumusonekela mukanda—na kwilukila ku kasimutwiya na munu itunawanene mutunakala na kwambulwila ha njibo na njibo.
(2) Kwambulula mu Kutulukwa: Oku kulumbununa kushakezeka bingila byoshe-byoshe mangana twambulwile munu uje itunakala na kusimutwiya nendi biñanda byeka. Kunambateselela kusimutwiya byuma bili mu Mbimbiliya na banu baje batukapanga nabo, batukakobela nabo sikola, banu batwatunga nabo, kusimutwiya na banu nga tuli mu bungezi, nambe kwoshe-kwoshe kutuli.
(3) Kwambulwila ku mbunga: Oku kunambateselela kwambulwila ha katambo, kwambulwila kumitambela ya kulandesela, mu bitapalo, mu myela ya kulishubulwisila nambe ha myela ya kwimikila bimota nambe koshe-koshe kutunasa kuwana banu.

14. Kupangesa Mavidio na Mabulu: Kwesekesa nomu mubinafwaila byuma, muna sikola nasa kupangesa vidio nambe libulu. Nga cimweso cimwesa ngwaco muna sikola napande kupangesa vidio nambe nga ikeye babenya alyangwila kuipangesa, co napande kuzimbula vidio na kusimutwiyaho, oloni keti aimwese.

YOYESI YA BAKA-KRISTU

15. Munima ya mwaso, kukala mutamba wa minutu 15. Ou mutamba ukala na ñanda imo nambe biñanda bibali bije bikwasa mbunga kupangesa Lijwi lya Njambi mu kuyoya kwabo. Ebi biñanda babyendeka kuli bakulunu nambe bangamba ba cikungulukilo ba kukola ku sipilitu. Oloni ñanda ya bujene bwa cikungulukilo banapande kuyendeka kuli bakulunu lika. Nga oyo ñanda banaimwesa ngwabo inapu ya kusimutwiya, co muka-kwendeka oyo ñanda asa kubwezelelako ku bihula. Kapandele kwendeka manene byuma byabingi kumashangumukilo a ñanda yendi mangana endeke bisimpi na kuwana simbu yaingi ya kusimutwiya na mbunga. Nga kuli munu yanapande kusimutwiya nendi, napande kuya ha butenda kutubakana kusimutwuya nendi oku natutuma ha citwamo mu mbunga, nga kulinga ngoco citaba.

16. Cilongesa ca Mbimbiliya ca Cikungulukilo: Minutu 30. Bakulunu ba kukola ku sipilitu bakebo batwamenena eci cilongesa. (Mu bikungulukilo muje muli bakulunu babandondo, mwasa kupangesa bangamba ba cikungulukilo ba kukola ku sipilitu.) Cibunga ca bakulunu cinapande kwangula bandolome ba kukola ku sipilitu baje basa kutwamenena mwamubwa Cilongesa ca Mbimbiliya ca Cikungulukilo. Baje bamwangula banapande kutwamenena cilongesa mwamubwa, kunyunga simbu, kukanyamesa bisoneka byakama na kukwasa boshe bamone bisimpi byakama bili mu cilongesa. Baje babanangula bawana bukwasi nga betuluka mu mashiko aje amwesa mwakwendesela mitamba ya bihula na bikumbululo. (w23.04 p. 24, cipalo) Nga munamanesa bwasi kusimutwiya ha mapalagilafu a mu calumingo oco, co keti mwishwalese cilongesa. Nga citaba, pangeseni baka-kutwamenena na baka-kutanda ba kulisezaseza mu calumingo na calumingo. Nga muka-citwamo wa Ciwano ca Buyoye na Cipangi Cetu aleka muka-kutwamenena cilongesa ngwendi ehise ku simbu ya cilongesa, co muka-kutwamenena napande kuwana ngila ya kulingilamo ngoco. Asa kuleka muka-kutanda ajomboke kutanda mapalagilafu amo.

MAJWI A MAMANESELELO

17. Minutu itatu. Muka-citwamo wa Ciwano ca Buyoye na Cipangi Cetu etuluka mu bisimpi byakama bibanalilongesa mu ciwano. Nga simbu imutabesa, asa kulinga ngoco kwitila mu kwihula mbunga bendeke bisimpi bije binabakwasa. Napande lalo kwendeka ha biñanda bya calumingo cinatako. Nasa kutumbula mazina a bana ba sikola baje bali na biñanda mu calumingo cinatako nga simbu kuicili. Nasa lalo kutanda mitambi nambe kutanda mikanda ije itondeka kutanda ku cikungulukilo. Mizimbu ya bundambo, ya kufwa ngwe mitambi ya kulibwahesela kuya mu lihya na mitambi ya kujelesa, kumwapandele kuyendekela ha butenda, oloni yakeni ha libaya lya mizimbu. Nga kucitaba kutanda mitambi nambe kutanda mikanda mu minutu ya kushoka ciwano, co muka-citwamo napande kulomba bandolome baje bali na biñanda mu mutamba wa Yoyesi ya Baka-Kilistu behiseko simbu ya biñanda byabo mangana kusale simbu ya mitambi na kutanda mikanda. (Taleni paragirafu 16 na 19.) Ciwano cinapande kuhwa na mwaso na lilombelo.

KUSHANGALA NA KUNANGULA

18. Munima ya ñanda na ñanda ya muna sikola, muka-citwamo wa Ciwano ca Buyoye na Cipangi Cetu napande kushangala na kunangula muna sikola mu munutu umo kupangesa cilongesa cibamutalelaho. Nga muka-citwamo asana muna sikola, kapandele kwendekela cimweja cilongesa cali na kupangelaho. Oloni nga muna sikola namanesa kwendeka ñanda yendi na munima ya kumushangazala, co muka-citwamo asa kwendeka cilongesa canakele na kupangelaho. Asa lalo kwendekako ha byuma bimo byanalingi muna sikola nga amona ngwendi byasa kumukwasa nambe kukwasa cikungulukilo. Muka-citwamo asa lalo kunangula muna sikola ku bushweke kupangesa broshuwa ya Zemeni Banu na broshuwa ya Aka Mana ku Kutanda na Kulongesa nambe libulu lya Sikolo sa Bukombwa munima ya biwano nambe ha simbu yeka. Nasa kunangula muna sikola kupangesa cilongesa cibanamwangwilile nambe kupangesa cilongesa ceka. Nga mushaka kuzibuka biñanda bije bimwesa cipangi ca muka-citwamo wa Ciwano ca Buyoye na Cipangi Cetu na muka-kukwasa kunangula, co taleni paragirafu 19, 24, na 25.

SIMBU

19. Biñanda kubyapandele kutubakana simbu yabyo, co lalo muka-citwamo wa Ciwano ca Buyoye na Cipangi Cetu napande kunyunga simbu. Nameme ngwabo Mukanda wa Biwano bya Buyoye na Cipangi Cetu unamwesa simbu ibanapande kwendeka mutamba na mutamba, co nga munamanesa bwasi ñanda yeni kumwapandele kubwezelelako biñanda bikwabo mukushaka lika kupwisamo simbu ibanamwesa. Nga baje bendeka biñanda batubakanesa simbu yabo, co Muka-Citwamo wa Ciwano ca Buyoye na Cipangi Cetu na muka-kukwasa kunangula napande kubanangwila ku bushweke. (Taleni paragirafu 24 na 25.) Ciwano coshe, hamolika na myaso na kulombela binapande kuhwa mu ola imo na minutu 45.

BUNGENZI BWA KANYUNGI WA KUZENGULUKA

20. Nga kanyungi wa kuzenguluka endela cikungulukilo ceni, co mwendesa ciwano ngwe mubananonekela mu Mukanda wa Biwano bya Buyoye na Cipangi Cetu. Oloni Cilongesa ca Mbimbiliya ca Cikungulukilo cije cili ha mutamba wa Yoyesi ya Baka-Kristu mucingisa na ñanda ya bipangi ya kanyungi wa kuzenguluka ya minutu 30. Simbu kanda kanyungi wa kuzenguluka endeke ñanda ya bipangi, muka-citwamo wa Ciwano ca Buyoye na Cipangi etuluka mu byuma bimunalilongesa, byuma bimukalilongesa calumingo cijaho, kwana mitambi nga kuili na kutanda mikanda ije inapande. Kutundaho, asana kanyungi wa kuzenguluka akwendeke ñanda yendi. Munima ya ñanda ya bipangi, kanyungi wa kuzenguluka ashoka ciwano na mwaso wanalyangwila babenya. Co nasa kusana ndolome weka a kushoke na lilombelo. Ha bungenzi bwa kanyungi wa kuzenguluka, kukwesi bana ba sikola banapande kwendekela biñanda mu mulili wa mu cibali nga bakapangesa ndaka yomwo mu cikungulukilo. Oloni cibunga cije cikapangesa ndaka yeka casa kukala na biwano byaco. Nga banamanesa, co beluke mu mulili wakama bakutolilile ku ñanda ya bipangi ya kanyungi wa kuzenguluka.

CALUMINGO CA CIWANO CA CITINGITINGI NAMBE CA MUTAMBELA

21. Mu calumingo ca ciwano ca citingitingi nambe ca mutambela kukwesi cikungulukilo cikala na biwano. Bandolome na bandokazi mu cikungulukilo banapande kubanukisa kukalinga bilongesa bibananoneka mu calumingo oco ku binjibo byabo nambe ha kapandi.

CALUMINGO CA CANUKISO

22. Nga Canukiso cikalako ha litangwa lya mukati ka calumingo, co kukukala Ciwano ca Buyoye na Cipangi Cetu.

KANYUNGI WA CIWANO CA BUYOYE NA CIPANGI CETU

23. Cibunga ca bakulunu cinapande kwangula mukulunu uje apwa kanyungi wa Ciwano ca Buyoye na Cipangi Cetu. Ou mukulunu napande kumona ngwendi ciwano cili na kwenda mwamubwa, co baje bali na biñanda bali na kukabangeya awa mashiko. Napande kusimutwiya-simutwiya na muka-kukwasa kunangula mubali na kulingila baka-kwendeka biñanda. Mucitambula lika Mukanda wa Buyoye Bwetu Baka-Kristu na Cipangi Cetu, co kanyungi wa Ciwano ca Buyoye na Cipangi napande kusonekela cimweja baje bali na mitamba ha bingonde bibali. Oku kunambateselela boshe baje bali na mitamba mu biwano hamolika na muka-citwamo uje icinangula cibunga ca bakulunu. (Taleni paragirafu 3-16 na 24.) Nga wana muna sikola ñanda, unapande kwaka mubisinganyeka myaka yendi, cashu cendi nambe indi asa kupwa wa kuzituka kwendeka oyo ñanda. Unapande kulinga byuma bya kulifwa omwo wana mitamba ikwabo ya biwano. Boshe baje bali na mitamba banapande kutambula biñanda byabo oku kucinasala byalumingo bitatu kweta ku litangwa lya biñanda byabo. Pangeseni fomu ya Ñanda ya mu Biwano bya Buyoye Bwetu Baka-Kristu na Cipangi Cetu (S-89) ku biñanda bili ha mutamba wa akeni mbunge ku cipangi ca kwambulula. Kanyungi wa Ciwano ca Buyoye na Cipangi Cetu napande kwaka cinoneko cije cimwesa mubyendela biwano bya mukati ka calumingo. Cibunga ca bakulunu casa kwangula mukulu nambe ngamba wa cikungulukilo mangana akwase Kanyungi wa Ciwano ca Buyoye na Cipangi Cetu. Oloni, bakulunu lika bakebo banapande kwangula baje bendeka biñanda bije kubyesi mu mutamba wa akeni mbunge ku cipangi ca kwambulula.

MUKA-CITWAMO WA CIWANO CA BUYOYE NA CIPANGI CETU

24. Calumingo na calumingo, kukala mukulunu umo uje apwa muka-citwamo wa Ciwano ca Buyoye na Cipangi Cetu. (Mu bikungulukilo muje muli bakulunu babandondo, mwasa kupangesa bangamba ba cikungulukilo ba kukola ku sipilitu.) Napande kulibwahesela majwi a kuzimbula na majwi a mamaneselelo. Ikeye lalo azimbula mitamba yoshe ha ciwano, co kwesekesa na bujene bwa bakulunu, nasa kwana biñanda bimo ha ciwano. Asa kwendeka biñanda bimo ha ciwano maneneni bije bili na mavidio, kwakujeneka kubwezelelako byakwendeka. Napande kwendeka mu kwihisa ha kuzimbula mitamba ya ha ciwano. Cibunga ca bakulunu cikeco cangula baje basa kulinga eci cipangi. Aba bakulunu babanangula, batwamenena biwano ha byalumingo bya kulisezaseza. Kwesekesa na bwingi bwa bakulunu bamunangula, munasa kupangesa kanyungi wa Ciwano ca Buyoye na Cipangi Cetu kutwamenena biwano bisimbu byabingi kutubakana boshe. Nga mukulunu asa kutwamenena Cilongesa ca Mbimbiliya ca Cikungulukilo, co asa lalo kupwa muka-citwamo. Zibukeni ngweni mukulunu uje apwa muka-citwamo, napande kushangazala bana ba sikola baje bendeka biñanda na kubanangula mu cizemo. Muka-citwamo napande kumona ngwendi ciwano kucitubakana simbu inapande. (Taleni paragirafu 17 na 19.) Nga ha butenda hali mwela wa kupwamo, co muka-citwamo munasa kumwimikila maikulofoni yendi nga ashaka endekeleko, co maikolofoni ikwabo ipwa ya baje bendeka biñanda. Muka-citwamo asa lalo kutumama ha butenda ha simbu ya ñanda ya Kutanda Mbimbiliya na ha simbu ya biñanda bya mu mutamba wa Akeni Mbunge ku Cipangi ca Kwambulula. Oku kumukwasa anyunge simbu.

MUKA-KUKWASA KUNANGULA

25. Muka-kukwasa kunangula akala na cipangi ca kunangula bakulunu na baka-kupangela baje bendeka biñanda mu Ciwano ca Buyoye na Cipangi Cetu, baje bendeka biñanda bya Mbimbiliya, baje batwamenena nambe kutanda Kaposhi ka Kukengela na Cilongesa ca Mbimbiliya ca Cikungulukilo. Co napande kubanangwila ku bushweke. Taleni paragirafu 19.

MASIKOLA AKWABO

26. Bikungulukilo byasa kukala na masikola akwabo kwesekesa na bwingi bwa bana ba sikola. Sikola na sikola inapande kukala na muka-kunangula wa kukola ku sipilitu, maneneni napande kupwa mukulunu. Nga mukulunu wahi, co ngamba wa cikungulukilo wa kukola ku sipilitu asa kupwa muka-kunangula. Cibunga ca bakulunu cinapande kwangula ou ndolome na kumona indi napande kulicapa na bakwabo indi embwe. Muka-kunangula napande kukabangeya byuma bibanendeka mu palagirafu 18. Nga muli na sikola ikwabo, co bana ba sikola banapande kuya mu mulili wabo munima ya ñanda ya Bisimpi bya Seho ije ili mu mutamba wa Bisimpi bya Seho bya mu Lijwi lya Njambi. Co banapande kwiluka mu mulili wakama munima ya kwana ñanda ya mamaneselelo.

MAVIDIO

27. Mavidio abanangula baamwesa ku Ciwano ca Buyoye na Cipangi Cetu. Awa mavidio muwawana ha JW Library^® app, co mwasa kuwambata kupangesa makina a kulisezaseza.

S-38-MBD 9/25