Tsa tsín si̱kuindaa yaoná kʼoajin koaan jokoan ti jebi. Kʼiatsa ʼya xi koa̱njngijée tsakui nichxin kʼoakuitso nga toxijña kʼoakoan kʼoa nga tsín majinle jókoannile nga jée kiskajinni. Koa̱nchoyajinle jókoanni nga kʼoakisʼin tsa sikjaʼaitsjenjin jméni xi kisʼin nga tongini nga kjesa jée kajinjin. Tsakui nichxin je kisimiyo xi tsín nda sʼín, tsa tsín ndatjín xi kiskotsenle ya Internet kʼoa tsa ya kije̱ jñani be nga jée ska̱jin. Tsa tsín titsakʼétsʼoani, tsa tsín titsakʼéxkiani Biblia, tsa tsín tikini kjoajtín kʼoa tsa tsín tikitsoyasonni. Tojo koan je ti xi síkʼaxki̱ ya Proverbios, alikui toxijña nga jée kajin jngo chjota. Jebi kui bakóyaná nga tsín koa̱n kui kʼoasʼiaan jmeni xi jée ska̱nijinná. Kui xi kitsoya je Salomón kʼianga kisikʼaxki̱ ti jebi (Mat. 5:​29, 30). w24.07 16 párr. 10, 11

Jmé xi kinchja̱ni kʼianga “kjoa xi nʼio nda” kitso. Kui kinchja̱ni je én xi ʼmiyasoán tʼatsʼe Chjotaxále Niná nga̱ kui xi kuinyakao chjota nga kuitjontjaile yaole (2 Cor. 4:1). Kʼoa jmé xi kinchja̱ni nga tii niʼnde kisikʼaxki̱. Jé tsoyanile choʼndale Niná nga tsoyason. Kʼianga tsakʼejna Pablo, je chjota xi tsojmi tsakaténa tii niʼnde tsakinyá je vino, tsojmi xi ma chine kao tao̱n. Nichxin xi tiyoaa ndʼai, kʼoati nʼio chjíle je xá xi títsjoáná Jeobá kʼianga ʼmiyasoán je Énle. Tijé Jeobá koasenkaoniná nga kuitjosonná je xá xi tíbánená. Tsa chjota nokjonlee kʼoa tsa kʼoasʼin nikjaʼaitsjeen nga tsín ʼya xi kjuinrʼoéná, si̱kjaʼaitsjenjiaan jokitso je pastrole Jesús nga tsakʼétsʼoale Niná kʼianga kʼoatsakʼinle nga tsín tikatabakóyasonni. ʼNdele nga tso̱kjon tosaa kui kisijéle Niná nga katabasenkao nga nʼiojin katama nga tosi tonda kuitsoyason. Kʼoa je Jeobá kinrʼoéle (Hech. 4:​18, 29, 31). Kʼiatsa chjota nokjonlee kʼoakʼuínlee Jeobá nga katabasenkaoná nga tsjoachaa koaan chjota kʼoa nga tsín kuinókjonlee. w24.04 16 párr. 8, 9

Nga tsjoachaa Jeobá kui xi mená nga katabitjotsje jaʼaínle nga énndiso tsakáne je Na̱i (Gén. 3:​1-5; Job 2:4; Juan 8:44). ʼMiyalee chjota xi binyáñoná jokjoantjínni xi tʼatsʼe Niná. Kui xi mená nga katamajinle je chjota nga nʼio tsjoakená je Jeobá kʼoa nga nʼio nda batéxoma. Kʼoa kʼianga jekoatexoma Chjotaxále i̱ Sonʼnde nda kuiyoaa nga̱ tsín tisʼe̱ni kjoañʼai (Sal. 37:​10, 11, 29; 1 Juan 4:8). Kʼianga ʼmiyasonlee chjota chʼasjetsjeñá je jaʼaínle Niná kʼoa tsjoa satío tokoán nga nitjosoán je xá xi kjinená nga testigole Jeobá maa. w24.05 18 párr. 12