Kawppui A Rinawm Loh Hunah

“Ka pasalin hmeichhe naupang zâwk a kawp duh avânga min chhuahsan tûr thu a sawi chuan thih hial ka duh a. Thil hi a dik lo lutuk avângin awih harsa ka ti, a bîk takin, a tâna ka inpêkna zawng zawng ka hriat chhuah hian a ni lehzual.”—Maria-i, Spain.

“Ka nupuiin min chhuahsan thut chuan, chhûngrilah thil engemaw kim tawh lo ang mai a ni. Kan duhthusâm te, kan beiseina te, leh kan thiltumte chu a chhe vek a. Lungkhamna nei tawh lo nia inhriat châng nei mah ila, a hnuah ka beidawng leh hle ṭhîn.”—Bill-a, Spain.

NUPA inkâra rinawm lohna chu tawrh har tak a ni a. Ni e, ṭhenkhat chuan inchhîrna nei an kawppuite chu an ngaidam theiin, inlaichînna ṭha an nei leh thei a ni.a Mahse, an inṭhen emaw, inṭhen lo emaw pawh ni se, kawppuite rinawm lohna tuartu chuan mi hriat lohvin rilru natna a nei reng thei a. Chutiang mi chuan a rilru natna chu engtin nge a tawrhchhuah theih?

MIN ṬANPUI THEI BIBLE CHANGTE

Thil tisual lotu zâwk kawppui tam tak chuan rilru natna nei mah se, Bible-ah thlamuanna an hmu a. Pathianin an mittui chu a hmuin, an mangannate chu a tawrhpui tih an hria a ni.—Malakia 2:13-16.

“Ka rilrua ngaihtuah tam tak ka neih lai chuan i thlamuannate chuan ka nunna hi a tihlim ṭhîn.”—Sâm 94:19.

“He Bible châng ka chhiar hian, hmangaihna nei tak pain a tih angin, Jehova chuan ka rilru natna chu khawngaihna nei takin min tihdamsak ni hian ka hria,” tiin Bill-a chuan a sawi.

“I laka rinawmte tân i rinawm a, mi ṭhate tân i ṭha êm êm.”—Sâm 18:25 C.L. Re-edited.

Thla tam tak chhûng a pasal rinawm lohna tuartu Carmem-i chuan: “Ka pasal chu a rinawm lo va. Mahse, Jehova rinawmna chu ka ring nghet tlat a. Ani chuan min tibeidawng ngai lo vang,” tiin a sawi.

“Engah mah mangang suh u; engkimah ṭawngṭai leh dîlin, . . . in duhnate chu Pathian hnênah hriattîrin awm zâwk rawh se. Tichuan Pathian thlamuanna, rilru rêng rênga hriat sên loh khân, in thinlung leh in ngaihtuahnate chu Krista Isuaah chuan a vênsak ang che u.”—Philippi 4:6, 7.

Sasha-i chuan, “He Bible châng hi ka chhiar nawn fo va. Ka ṭawngṭai chhunzawm zêl a, Pathianin thlamuanna min pe a ni,” tiin a sawi.

A chunga kan sawi tâkte chuan beidawn châng an nei ṭheuh va. Mahse, Pathian Jehova an rinchhan a, a Thu, Bible aṭangin chakna an hmu a ni. Bill-a chuan, “Engkim hi a chhe zo vek anga a lan hunah ka rinna avângin ka nun hian awmzia a nei a ni. ‘Thihna hlim kawr ruam zawh’ châng awm ṭhîn mah se,’ Pathian chu ka hnênah a awm a ni,” tiin a sawi.—Sâm 23:4.

a Ngaihdam dâwn leh dâwn loh chungchâng hriat belh nân, Awake! April 22, 1999 chhuak, “When a Mate Is Unfaithful,” tih thuziak inzawm chu en rawh.

Mi Ṭhenkhatte Tawrh Chhuah Dân

Mi thlamuan thei tak Bible chângte chu chhût ngun rawh.

Bill-a chuan: “Joba bu ka chhiar hnuah Sâm bu ka chhiar leh a, ka dinhmun nêna inmil Bible chângte chu rînin ka chhinchhiah a. Chûng Bible ziaktute chuan ka tawrh ang rilru natna leh lungkhamnate an nei ve tih ka hria,” tiin a sawi.

Rimawi ngaithlain, i rilru tihahdam rawh.

Carmen-i chuan: “Zâna ka mut theih loh hian rimawi ka ngaithla ṭhîn a. Chu chu rilru tihhahdamna ṭha tak a ni,” tiin a sawi. Daniel-a chuan: “Ṭingṭang perh ka zîr a, ka rimawi tumte chuan rilrua thlamuanna min pe a ni,” tiin a sawi.

I rilru vei zâwngte sawi chhuak rawh.

Daniel-a chuan: “Ka rilru vei zâwngte chu ka sawi chhuak ngai lo va. Mahse, ṭhian ṭha ṭhenkhat ka nei a, anni chu nî tin ka be ṭhîn. Ka rilrua awmte chu ziakin leh ṭawngkain an hnênah ka hrilh ṭhîn a ni. Chu chuan min ṭanpui tak zet a ni,” tiin a sawi. Sasha-i chuan: “Ka chhûngte min ṭanpuina chu ka tân a pawimawh hle a. Ka nu chu ka tân a inpeih reng ṭhîn. Thu ka sawi duh apiangin, min ngaihthlâksak a. Ka pa pawhin hmangaih leh him nia inhriatna min neihtîr bawk,” tiin a sawi.

Ṭawngṭai fan fan rawh.

Carmen-i chuan: “Ka ṭawngṭai fo ṭhîn a. Pathianin min hnaih a, min ngaihthlâksakin, min ṭanpui ni hian ka hria. He hun hrehawm takah hian, Pathian chu ka hnaih lehzual a ni,” tiin a sawi.