A KAWM THU | SETANA A AWM TAK TAK EM?
Setana Chu Kan Hlau Tûr A Ni Em?
Carbon monoxide ang bawkin, Setana chu hmu theih lo hlauhawm tak a ni
Hei hi chhui chhuah harsa tak mai a ni. Rawng leh rim a nei lo va, an hriat loh laiin mite nun a la ṭhîn. Khawvêl puma tûr avânga thi zawng zawng zâtve vêl chu he thil pakhat—carbon monoxide—avânga thi an ni. Mahse, thlabâr lutuk a ngai lo. Chu boruak hriat theih dân leh a laka invên theih dân a awm a. Mi tam tak chuan chu boruak hre thei khâwlte vuahin, a vaukhânna chu an zâwm a ni.
Carbon monoxide ang bawkin, Setana chu hmuh theih loh, mihringte tâna chhui chhuah harsa tak leh hlauhawm tak a ni a. Mahse, Pathian chuan min thlahthlam lo. A hnuaia Pathian thilpêkte i hman ṭangkai chuan Setana chu i hlauh a ngai lo vang.
Duhthlan theihna. Jakoba 4:7 chuan : “Diabola dodâl rawh u, tichuan a tlân bosan ang che u,” tiin min hrilh a. Setana chuan thiltithei hle mah se, i thiltih duh lohte ti tûrin a tilui thei lo che a. Duhthlan tûr i nei a ni. Petera thawn khat 5:9 chuan: “Ring nghet taka awmin [Diabola] chu do rawh u,” tiin a sawi. Isua’n Setana thlêmna vawi thum lai a hnâwl ṭhak hnuah Setana chuan a kalsan tih hre reng rawh. (Matthaia 4:11) Chutiang bawkin, Setana beihna do chu i thlang thei a ni.
Pathian nêna inṭhianna. Jakoba 4:8 chuan “Pathian hnaih” tûrin min fuih a. Pathian Jehova ngei chuan amah nêna inṭhianna ṭha tak nei tûrin a sâwm che a ni. Engtin nge a ṭhian i nih theih ang? Kawng ṭha ber chu Bible aṭanga a chungchâng tam lehzuala zir hi a ni. (Johana 17:3) Jehova chungchâng i zirna chuan amah hmangaih tûrin a chêttîr ang che a, chu hmangaihna chuan a duhzâwng ti tûrin a chêttîr lehchhâwng ang che. (1 Johana 5:3) I Pa vâna mi i hnaih chuan, engtin nge a chhân lêt ang che? Jakoba chuan: “[Pathianin] a hnaih ang che u,” tiin a sawi zawm a ni.
Jehova chuan kan himna turin thlarau lam châwmnate min pe
Vênghim tûra tiamna. Thufingte 18:10-ah chuan: “[Jehova] hming chu kulhpui a ni a, mi fel chu a tlân lût ṭhîn a, a him ṭhîn,” tiin kan chhiar a. Mahse, chu chu Pathian hming chu vânneihna thil tlereuh tihna erawh a ni lo. Pathian hming zahtu dik takte chuan engtik hunah pawh a vênhimna an dîl thei tihna a ni.
Bible entîrna. Tirhkohte 19:19 chuan Ephesi khuaa Kristiana inlet tharte chungchângah thu bengvârthlâk engemaw tak min hrilh a: “Dawihmang a ṭhen tam tak pawhin an lehkhabute an rawn la khâwm a, mi zawng zawng mithmuhah an hâl ta a, tin, a man an chhût a, chêng sîngnga niin an hria,” tiin.a Chûng Kristiante chuan dawithiamna nêna inkûngkaih an thil neih engpawh chu eng ang khawpa man to pawh ni se, an tiboral vek a ni. Chu entîrna chu tûn laiah kan tân a ṭangkai hle thei ang. He khawvêl hi thlarau khawvêl lam thil leh dawithiamna nên a inchiahpiah hle a. Pawina nei lo tûra lang dawithiamna hmanrua leh thiltihte pawhin mi chu ramhuai thununna hnuaiah a awmtîr thei a. Engpawh huama chutiang thilte i nun ata i dah bo chu a pawimawh hle a ni.—Deuteronomy 18:10-12.
Thuziak hmasa bera a chanchin kan sawi tâk Rogelio-a chuan kum 50 mi a nih thlengin Diabola a awm tih a ring lo va. Mahse, a thlîr dân chu a ngaihtuah nawn leh a ni. Engvângin nge? Ani chuan: “Ka dam chhûnga a vawikhatna atân Bible ka lei a. Bible thu hriatthiamna chuan Diabola a awm tak tak tih min rin nghehtîr a. Chu hriatna chuan, a thununna thang lakah min vênghim a ni,” tiin a sawi a ni.
“Bible thu hriatthiamna chuan Diabola a awm tak tak tih min rin nghehtîr a. Chu hriatna chuan, a thununna thang lakah min vênghim a ni”
Setana a awm tawh loh hun tûr chu hmuh i châk em? I hmu thei dâwn a ni. Bible chuan mi tam tak bumtu Diabola nakin hun tûr chu ‘mei leh kât dîlah chuan paih’ a ni ang tih a sawi lâwk a. (Thu Puan 20:10) Mahse, mei alh tak tak leh kât chuan hmuh theih loh thlarau thil siamte chu a kâng thei lo va. Chuvângin, mei dîl chuan chatuanna tihboralna a entîr a ni. Setana chu chatuan atân a boral hlen tawh ang a. Pathian hmangaihtute tân chuan a va hlimawm dâwn tak êm!
Chu mi hun a lo thlen hma chuan, Jehova leh a kawng chanchinte a tam thei ang berin zir zêl rawh.b A tâwpa, “Sentana chu a awm tak tak lo!” tia sawi theih huna i awm dân tûr chu mitthla ang che. (w14-E 11/01)
a Chu tangka chu Rom mite denarius ni ta se chuan, a hlutzâwng chu kut hnathawktu mi pângngai 50,000 laite ni khat hlawh belhkhâwm a ni ang a—a tam tham hle ngei ang!
b Setana leh dawithiamna chungchâng hriat belh nân, Bible Zirtîrna Dik Tak Chu Eng Nge Ni? tih lehkhabu bung 10-na en ang che. He lehkhabu hi Jehova Thuhretute tupawh hnênah i dîl thei a, a nih loh leh, www.jw.org/lus-ah online-in chhiar ang che.