Thleng Dik Lo Tam Tak Kâra A Dik Ṭhenkhat

I hma lam hun tûr hriat i duh em? Hei hi mi tam takte rilru hîp tak leh duhzâwng tak a ni. Mite’n thil lo thleng tûr chu an sawi lâwkin a rah chhuah erawh a inang lo hlawm hle. A hnuaia mi hi han ngaihtuah teh:

• SCIENTIST-TE chuan tui leh boruak bawlhhlawhnain a tâwpa kan awmna lei a nghawng dân tûr aṭanga naktûka sik leh sa awm dân tûr ang chi thil chi hrang hrang chu an zir chiangin an sawi chhuak ṭhîn a. Chutiang atân hmanraw changkâng tak tak leh sum tam tak an hmang a ni.

• THIL CHHUITU MI THIAMTE chuan politics leh sumdâwnna lam thilte chu an sawi lâwk ṭhîn a. Khawvêla mi hausa berte zînga pakhat, Warren Buffett-a chu sum peipunna lama a hlawhtlin êm avângin ṭhenkhat chuan sumdâwnna man thiam tak zâwlnei angin an sawi hial a ni. Thil chhui thiam dang, Nate Silver-a erawh chuan U.S. politics aṭanga Hollywood film award dawngtu tûrte thlenga sawi lâwk thei tûra ṭanpui tûrin number-te chu a hmang thung a ni.

• HMANLAI ṬOBUL hrilh lâwkna anga hrilhfiahna neih a ni a. Kum zabi 16-naa chiang mang lova Michel de Notredame-a (Nostradamus) ziah chu mi ṭhenkhat chuan tûn laiah a thlen famkimna an hmu a ni. Mayan calendar pakhatah chuan December 21, 2012 tâwp lama thil lo thleng tûr râpthlâk tak chhinchhiahna anga thil ṭhenkhat chu hrilhfiah a ni tawh.

• SAKHAW HRUAITUTE chuan an hnungzuite ko khâwma mite vaukhânin khawvêl puma thil thleng tûr râpthlâk tak sawi lâwk châng an nei a. Thil râpthlâk lo thleng tûr hrilh lâwktu Harold Camping-a leh a hnungzuite chuan kum 2011-ah khawvêl tihboral a ni tûr thu an puang a. Mahse, sawi kher ngai lovin, khawvêl chu a la awm reng a ni.

• THLARAU ZAWL MITE chuan nakin hun tûr hrilh lâwk theih bîkna neiin an insawi a. Edgar Cayce leh Jeane Dixon-a te’n kum zabi 20-na chungchânga hrilh lâwkna an neih ṭhenkhat chu a dik ve ve a ni. Hrilh lâwkna tam tak an neih pawh a dik lo bawk. Entîr nân, Dixon-a chuan kum 1958-ah khawvêl indopui pathumna a thleng ang tih a sawi lâwk a, Cayce-a chuan New York hi kum 1970 khân tuifinriatah a tawlh lût ang tiin a lo sawi lâwk a ni.

Nakin hun hriat theih nân rinchhan tlâk engemaw a awm tak tak ang em? He zawhna hi zawh âwm tak a ni. Thil lo thleng tûrte i hre lâwk thei a nih chuan, chu chuan i nun a tidanglam thei hle ang. (w14-E 05/01)