Isua Hnen Aṭanga Kan Thil Zir
Krista Hnung Zui Dân Tûr
Mite’n Isua an han rin hian, ani chuan: “Mi rawn zui rawh,” tiin a sâwm ṭhîn a. (Matthaia 9:9; 19:21) Krista hnung zuina, a nih loh leh Kristian nihnaah chuan eng nge tel? Zawhna pawimawh tak pathumte chhânna chu i lo ngaihtuah ang u.
Engtin nge mi dangte i cheibâwl ang?
▪ Isua zirtîrte chuan mi dangte cheibâwl dân tûr chungchânga kaihhruaina chu an zui tûr a ni a. Entîr nân, Isua chuan: “Chutichuan, thil engkim miin in chunga an tiha in duh tûr ang apiang chu, mi chungah pawh ti ve rawh u,” tiin a sawi a. Tuemawin i thin ti ur ta se engtin nge ni ang? Isua chuan: “I khingpui chu . . . rem thuai rawh,” tiin a sawi a ni. A hnungzuite hnênah pawh: “Mite in ngaihdam si loh chuan, in Pain in bawhchhiatte a ngaidam bîk lo vang,” tiin a hrilh bawk a ni.—Matthaia 5:25; 6:15; 7:12.
Nupui pasal neite hnênah Isua chuan he fuihna hi a pe a: “‘I uirê tûr a ni lo,’ an ti tih in hre tawh. Kei erawh chuan, tupawh ngaih châka hmeichhe melh apiang chu, a thinlungah a uirê tawh reng a ni tih ka hrilh a che u,” tih chu. Kristian dik chuan Isua zirtîrna chu a rilru leh a thinlung a thununtîr a ni.—Matthaia 5:27, 28.
Kristian dikte chuan mi dangte ṭanpui nân mahni hrehawm pawh an pawisa lo. Isua pawh khân mahni inphatna rilru put hmang a nei a ni. Entîr nân, Isua leh a tirhkohte chu thu hrilin an zin hah hle a, chaw takngial pawh an ei hman lo va. Chuvângin, Isua chuan an chawlh hahdam theih nân lawngin hmun fianrialah a hruai a. Mahse, mipui chuan a kal tumna an hriat avângin an lehkhalh a ni. Bible thuziak chuan: “Vaukama a chhuah chuan mipui tam tak a hmu a, vêngtu nei lo berâmte ang an nih avângin a khawngaih ta êm êm a, thu tam tak a zirtîr ta a,” tiin a sawi a ni. (Marka 6:30-34) Harsatna i hmachhawn chung pawha Pathianin ti tûra a tih che chu tiin, Isua i entawn thei a ni.
Engvângin nge mi dangte hnêna chanchin ṭha i hrilh ang?
▪ Isua chuan a hnungzuitute chu mi dangte hnêna chanchin ṭha hril tûrin a zirtîr a. Tirhkohte hnênah: “In kalin, ‘Van ram chu a lo hnai ta,’ tiin hril zêl ang che u,” tiin a hrilh a ni. (Matthaia 10:7) Isua hnungzuitute chuan thuchah hlu tak chu an nei a. Isua chu: “Hei hi chatuana nunna a ni, nang Pathian tak chauh leh i tirh Isua Krista hriat hi,” tiin a ṭawngṭai a ni.—Johana 17:3.
Isua chuan a hnungzuitu mi maktaduai tam takte la thawh tûr hna pakhat chungchâng a lo sawi lâwk a ni: “He ram chanchin ṭha hi hnam zawng zawng hriattîrna tûrin khawvêl zawng zawngah hrilhin a awm ang,” tiin. (Matthaia 24:14) Pathian Ram chanchin i zira Bible sawite i rin bawk chuan, nang pawhin mite hnêna i thil hriatte hrilh chhâwn chu nuam i ti ngei ang. Isua hnungzuitu tam tak chuan an chhûngkhatte aṭanga ṭanin Pathian Ram chanchin an hril ṭan ṭhîn a ni.—Johana 1:40, 41.
Engvângin nge baptisma i chan ang?
▪ Isua’n Jordan luia baptisma a chan khân, a ṭawngṭainaah: “Aw Pathian, . . . i duhzâwng ti tûrin ka lo kal e,” tia a sawi ngei a rinawm a ni. (Hebrai 10:7) Pathian duhzâwng tih i duh a nih chuan, nang pawhin baptisma i chang ve ngei tûr a ni. Isua chuan: “Hnam tina mi zirtîrahte siam ula, . . . baptis ula,” tiin thu a pe si a.—Matthaia 28:19.
Baptisma channa chuan eng ang mawhphurhna leh hlâwknate nge a ken tel? Baptisma chang tawh Isua hnungzuitute chuan Pathian rawng chu rilru zawng zawngin an bâwl a ni. Isua chuan: “Lalpa i Pathian chu i thinlung zawng zawngin, i thlarau zawng zawngin . . . i hmangaih tûr a ni,” tih Pathian Dân thupêk chu a sawi chhâwng a. (Matthaia 22:37) “Tupawhin mi zui a duh chuan mahni hrehawm pawisa lovin . . . mi zui rawh se,” tiin a sawi bawk a ni. (Matthaia 16:24) Baptisma channa chuan miin Pathian ta a nih theih nâna mahni hrehawm a pawisak lohna, a nih loh leh mahni a inphatna a entîr a. Pathian nêna he inlaichînna danglam bîk tak neitute chuan a hnênah an sualte ngaihdamna dîlin, chhia leh ṭha hriatna thiang tak an nei thei a ni.—1 Petera 3:21. (w10-E 05/01)
Hriat belh nân, he lehkhabu Jehova Thuhretute tihchhuah bung 18-na hi en ang che.