Davida Chuan A Hlau Lo

I hlauh hian eng nge i tih ṭhin?— I nu leh pate ṭanpuina i dîl pawh a ni thei. Mahse, nangmah ṭanpui theitu mi dang tuemaw a awm bawk. Ani chuan mi dang zawng aiin thil a ti thei zâwk a ni. Chu chu tu nge ni, i hria em?— Pathian Jehova a ni. Bible-a râwlthar pakhat chanchin lo sawi ta ila, a hming chu Davida a ni. Jehova chuan engtik lai pawhin a ṭanpui dâwn tih a hriat avângin a hlau ngai lo.

Davida chu a nausên lai aṭangin a nu leh pate’n Jehova hmangaih dân an zirtîr a. Chu chuan Davida chu hlauhawm a tawh hunah pawh hlau lo tûrin a ṭanpui a ni. Jehova chu a Ṭhian a ni a, Ani chuan a ṭanpui dâwn tih a hria. Ṭum khat chu, Davida’n berâm rual a enkawl laiin, sakeibaknei lian tak chuan berâm pakhat a rawn seh ta mai! Davida’n eng nge a tih i hria em? Sakeibaknei chu ûmin, hriamhrei tel lovin a that ni berin a lang! Chu bâkah, savawmin berâm a rawn seh pawh khân, Davida chuan a lo tihlum leh bawk! Davida ṭanpuitu chu tu nge ni?— Ni e, Pathian Jehova a ni.

Davida a huaisen lehzualna ṭum dang pawh a awm a. Israel mite chu Philistia mite nên an indo va. Philistia sipai zînga pakhat chu a sâng êm êm a, mi hrawl a ni ringawt! A hming chu Goliatha a ni a. Chu mi hrawl chuan Israel sipaite leh Jehova chu a deusawh a. Israel sipaite chu amah bei tûrin a cho a ni. Mahse, Israelte zîngah chuan amah bei ngam an awm lo. Chu chu Davida’n a hriat chuan, Goliatha hnênah: ‘Keiman ka bei ang che! Jehova’n min ṭanpui ang a, ka hneh dâwn che!’ a ti a. Davida chu a huaisen i ti em?— Aw, a huaisen hle a ni. A hnuah eng nge thleng, i hre duh em?

Davida chuan a virvawm leh lung mûm mâm tak panga a lâk hnuah, mi hrawl bei tûrin a va chhuak a. Golaitha’n Davida naupanzia a han hmuh chuan, a nuihsawh a ni. Mahse, Davida chuan: ‘Nang zawng khandaih kengin i lo thawk a, kei zawng Jehova hmingin ka lo thawk a nih hi!’ a ti a. Tichuan a virvawmah lung a dah a, Goliatha lamah tlân pheiin a han vawm a. Lung chuan Goliatha mit inkâr takah chuan a fuh ta! Chu mi hrawl chu a tlu a, a thi ta der mai! Philistia mite chu an hlauh êm avângin an tlân chhe vek a ni. Engtin nge Davida ang tleirâwl mai chuan mi hrawl tak chu a hneh theih?— Jehova’n a ṭanpui vâng a ni, chu mi hrawl aiin Jehova chu a chak zâwk hle si a!

Davida chanchin aṭangin eng nge i zir theih?— Jehova chu mi dang zawng zawng aiin a chak zâwk a. Ani chu i Ṭhian a ni. Chuvângin, hlauhna i neih leh hunah, Jehova chuan huaisen tûrin a ṭanpui thei che tih hre reng ang che!