Ṭhen 11
Khawvêl Thar Lungphûm Chu Tûnah Din A Ni
1, 2. Bible hrilhlâwkna tihpuitlin nân, kan mithmuh ngeiah eng thil nge lo thleng?
SETANA khâwvel hlui a tlahniam zêl chung pawha Pathian khawvêl thar lungphûm tûnah ngei hian din mêk a nih thu hi thil mak tak dang chu a ni. Kan mithmuh ngeiah hian, Pathianin hnam tin aṭanga mite la khâwmin tûn laia inpumkhatna awm lo khawvêl hi thlâk thuaitu tûrin lei pâwl thar lungphûmah a siam a ni. Bible ah, 2 Petera 3:13 ah chuan, he pâwl thar hi “lei thar” tiin a vuah a ni.
2 Bible hrilhlâwkna chuan: “Ni hnuhnûngahte chuan [tûna kan chênna hun hi] . . . chi tam takte chu an kal ang a; ‘Lo haw ula, Jehova tlângah [a biakna dik takah] i chho vang u; tichuan ani’n a kawng chanchinte min zirtîr ang a, a kalkawngahte chuan kan kal ang,’ an ti ang,” tiin a lo sawi bawk a ni.—Isaia 2:2, 3.
3. (a) Isaia hrilhlâwkna hi tute zîngah nge tihpuitlin a nih? (b) Hemi chungchâng hi Bible bu tâwp berin engtin nge a sawi?
3 Chu hrilhlâwkna chu tûnah hian ‘Pathian kawng leh a kalkawnga kal’ te zîngah tihpuitlin a ni. Bible bu tâwp ber chuan he remna ngainatu khawvêl pum huap pâwl hi “mipui nasa tak . . . hnam tin zînga mi te, chi tin zînga mi te, mitin zînga mi te, ṭawngtin zînga mi te,” tiin a sawi a, lungrual taka Pathian rawngbâwla khawvêl pumpuia inunauna dik tak nei an ni. Bible vêkin: “Hêng hi hrehawm nasa tak ata chhuakhote kha an ni,” tiin a sawi bawk a. Chumi awmzia chu, he ramhuai khawvêl tâwpnaah hian an dam khawchhuak dâwn tihna a ni.—Thu Puan 7:9, 14; Matthaia 24:3.
Khawvêl Puma Inunauna Dik Chu
4, 5. Engvângin nge khawvêl pumpuia Jehova Thuhretute inunauna hi a awm theih?
4 Jehova Thuhretu nuai tam takte chuan Pathian zirtîrna leh kawng te mila nun hi tihtak zetin an tum a. Chatuana nun an beiseina chu Pathian khawvêl tharah a innghat tlat a ni. An nitin nuna Pathian dân zâwma awmin, tûnah leh khawvêl tharah pawh a rorêlna hnuaia intukluh an duhzia an entîr a ni. Khawi hmunah pawh, eng hnam leh chi pawh ni se, tehkhâwng thuhmun—Pathianin a Thua a târlan hi an zâwm a ni. Chu chu Pathian siam khawvêl thar pâwl, khawvêl puma inunauna dik nei an nihna chhan a ni.—Isaia 54:13; Matthaia 22:37, 38; Johana 15:9, 14.
5 Jehova Thuhretute chuan khawvêl puma an inunauna mak danglam tak avânga hmingṭhatna chu an inbel lo va. Hei hi chu Pathian thlarau chak tak, a dân zâwmtute hnêna a thawh vâng a ni tih an hria a ni. (Tirhkohte 5:29, 32; Galatia 5:22, 23) Pathian thiltih a ni. Isuan: “mihring tih rual loh hi Pathian tih theih a ni,” tia a lo sawi ang hian. (Luka 18:27) Tichuan lei leh vân zawng zawng awmtîr reng theitu Pathian chu khawvêl thar pâwl awm rengtîr theitu Pathian pawh a ni.
6. Engvângin nge Jehova Thuhretute inunauna hi tûnlai huna thlarau hnathawh mak a ni kan tih theih?
6 Tichuan, khawvêl thara Jehova rorêl dân tûr kawng chu khawvêl thar lungphûm tûna din, a rawn siamchhuahah hian a hmuh theih reng tawh a ni. A Thuhretute hmanga a thiltih awmzia hi tûn lai hunah thil mak tak a ni. Engvângin maw? A chhan chu Jehova Thuhretute hi hnam inṭhen hranna, chi, leh sakhaw ngaihsak bîknaten an tihkeh theih ngai loh, khawvêl pum huap inunauna dik tak neia a siam avângin a ni. Thuhretu nuai tam takte ram 200 aia tama an awm chung hian, inzawmna tihchhiat theih loha awm ang maiin an inhlâwmkhâwm tlat a ni. He khawvêl pumpuia inunauna, thil thleng tawh zawng zawnga la mak danglam hi, tûn lai huna thlarau hnathawh mak—Pathian thil tih chu a ni teh meuh mai.—Isaia 43:10, 11, 21; Tirhkohte 10:34, 35; Galatia 3:28.
Pathian mite Thliar Hran
7. Isuan a hnungzuitu dik takte kha engtiangin nge thliar hran an ni ang a tih?
7 Pathianin khawvêl thar lungphûm atâna a mi hmante chu engtin nge a sawifiah lehzual theih ang? E le, tuten nge Johana 13:34, 35-a Isua thu hi tipuitling le? “Thupêk thar ka pêk che u hi, inhmangaih ula; keiin ka hmangaih ang che u hian nangni pawh inhmangaih ula. In inhmangaih chuan mi zawng zawngin ka zirtîrte in ni tih chu miah chuan an hria ang,” a ti a ni. Jehova Thuhretute chuan Isua thusawi hi ringin an zâwm a. Pathian Thuin a zirtîr angin, “inhmangaih tawn an uar” a ni. (1 Petera 4:8) Chumi bâkah chuan, “hmangaihna [an] inbel a, phuar famkimna a nih avângin.” (Kolossa 3:14) Tichuan unaute hmangaihna chu khawvêl pumpuia phuarkhâwmtu “gawm” chu a ni.
8. 1 Johana 3:10-12 hian engtiangin nge Pathian mite a thliar hran lehzual?
8 1 Johana 3:10-12 chuan: “He miah hian Pathian fate leh Diabola fate a hriat a ni; tupawh felna ti lo chu Pathiana chhuak a ni lo, a unau hmangaih lova pawh chu Pathiana chhuak a ni hek lo. Hei hi atîr ata thuchah in hriat kha a ni si a, kan inhmangaih tawn ṭheuh tûr a ni, tih hi; Kaina, misual laka mi, mahni unau thattu ang khân awm lovin,” tiin a sawi bawk a. Tichuan, Pathian mite chu khawvêl pum huapa inunauna nei, tharum thawh duh lo mi an ni.
Thliar Hranna Thil Dang
9, 10. (a) Pathian chhiahhlawhte chu ni hnuhnûngah eng hnaa hriat hran nge an nih ang? (b) Jehova Thuhretute hian Matthaia 24:14 hi engtiangin nge an tihpuitlin?
9 Pathian chhiahhlawhte thliar hran dân kawng dang a la awm a. Khawvêl tâwp chungchâng a hrilhlâwknaah khân Isuan tûn hun chhûng hi ni hnuhnûng a ni tih chhinchhiahna tûrin thil tam tak a lo sawi a ni. (He lehkhabutê ṭhen 9-na hi en rawh.) He hrilhlâwkna hmêlhmang bulpui ber chu Matthaia 24:14-a a thusawiah hian târlan a ni: “He ram Chanchin Ṭha hi hnam zawng zawng hriattîrna tûrin khawvêl zawng zawngah hrilhin a awm ang; chu mi zawhah chuan tâwpna chu a lo thleng ang,” tih hi.
10 Chu hrilhlâwkna thleng famkim chu kan lo hmu em? Hmu e. 1914 a ni hnuhnûng a inṭan aṭang khân, Jehova Thuhretute hian Pathian Ram chanchin ṭha chu khawvêl pumah, Isua thu lo pêk tawh angin, mi inah te an hril a ni. (Matthaia 10:7, 12; Tirhkohte 20:20) Thuhretu nuai tam takte chuan khawvêl thar chanchin sawipui tûrin hnam tin amite an tlawh a ni. Hemi avâng hian he lehkhabutê pawh hi i lo hmu a ni, Jehova Thuhretute hnathawhah hian Pathian Ram chanchin ziakna lehkhabu maktaduai tam tak chhut leh sem chhuah hi a tel avângin. Khawvêl pumpuiah Pathian Ram chanchin hrila in tina kal ṭhîn mi dang hriat i nei em le? Marka 13:10 chuan, tâwpna lo thlen hmain, he thu hril leh zirtîrna hna hi tih “hmasak” tûr a nih thu a târlang a ni.
Setana Dâwttheihzia An Tifiah
11. Pathian rorêlna hnuaia an intukluh avângin Jehova Thuhretuten eng thil dang nge an hlenchhuah?
11 Pathian dân leh thuah intulûtin, Jehova Thuhretute chuan thil dang pawh an hlen chhuak a. Setanan mihringte hi fiahna hnuaiah Pathian lakah an rinawm thei lo vang tia a lo chhâl khân dawthei tak a ni tih an lantîr a ni. (Joba 2:1-5) Hnam zawng zawng zînga mi mipui nuai tam tak awmna pâwl a nih avângin, Thuhretute chuan Pathian rorêlna laka an rinawmna chu, thukhat vuain thiltihin an lantîr a ni. Mihring ṭha famkim lo ni mah sela, ramhuai nêkna kârah pawh, lei leh vâna lalber nihna thil sawifel tûrah pawh Pathian lamah an ṭang tlat a ni.
12. An rinnain, Thuhretute hian tute nge an entawn?
12 Tûn laiah, hêng Jehova Thuhretu nuai tam takte hian hun kal tawha Pathian laka an rinawmna lo entîr tawh thuhretu dang tam tak lo awm tawhte zîngah an chanchin an telh ve a ni. Chûng zînga ṭhenkhat, tlêmtê chauh sawi dâwn chuan, Abela, Nova, Joba, Abrahama, Sari, Isaka, Jakoba, Debori, Ruthi, Davida leh Daniala te an ni. (Hebrai bung 11) Bible-in a lo sawi angin, “chhûmpui nasa tak ang thuhretute” an ni. (Hebrai 12:1) Hêng mite leh mi dangte, Isua leh a zirtîrte pawhin Pathian laka an rinawmna an vawng tlat a ni.
13. Setana chungchânga Isua thusawi eng kha nge a dikzia lo lang fiah?
13 Hei hian Setana chungchâng thu Isuan sakhaw hruaitute hnêna a lo sawi kha a dik tih a rawn tifiah a ni: “Nimahsela tûnah mi thah in tum si. Pathian hnêna thutak ka hriat hrilhtu che u ka ni asin . . . Nangni zawng in pa Diabola hnêna chhuak in ni a, in pa duhzâwng tih in duh a ni. Ani chu atîr ata tualthat a ni, thutakah a awm lo, a chhûngah thutak rêng a awm loh avângin. Dâwt thu a sawiin ama tihchhuah a sawi a ni ṭhîn; dawthei a ni si, dâwt pa pawh a ni,” tih hi.—Johana 8:40, 44.
I Duhthlanna Eng Nge Ni?
14. Khawvêl thar lungphûm chungah tûnah hian eng thil nge thleng mêk?
14 Khawvêl thar lungphûm Pathianin khawvêl pum huap pâwl Jehova Thuhretute tûna a din chu a chak tial tial a. Kum tinin mi nuai tam takte chuan Pathian rorêlna pawm tûrin, zalên taka an duhthlan theihna, hriatna dika innghat chu an hmang a ni. Khawvêl thar pâwl zînga mi an lo ni ta a, lei leh vâna lalber nihna thil sawifel tûrah pawh Pathian lama ṭang tlatin, Setana chu dawthei a nihzia an tifiah a ni.
15. Keini hun lai hian Isuan eng hlîrna hna nge a thawh mêk?
15 Pathian rorêlna an thlan avângin, “kêl” leh “berâm” a hlîr naah Krista “dinglama” awm tûrin an tling a ni. Ni hnuhnûng chungchâng a hrilhlâwknaah, Isua chuan: “A hmaah chuan hnam tin an inkhâwm ang a; berâm vêngtuin kêl zîng ata a berâmte a hlîr angin anniho chu a hlîr ang a; berâmte chu a dinglamah a dah ang a, kêlte erawh chu a vei lamah a dah ang,” tiin a lo sawi bawk a ni. Berâmte chu mi inngaitlâwm, Krista unaute kawp leh ṭawiâwma Pathian rorêlna hnuaia intulûtte an ni a. Kêlte erawh chu mi luhlul, Krista unaute pawh hnâwla Pathian rorêlna thlâwpa engmah ti ve lo te an ni. Eng nge a rah chhuah? Isua chuan: “Chûng [kêlte] chu kumkhaw hremnaah an kal ang a; mi felte [berâmte] erawh chu kumkhaw nunnaah an kal ang,” a ti a ni.—Matthaia 25:31-46.
16. Paradis lo thleng tûra chên ve i duh chuan eng nge i tihtûr?
16 Pathian hian min ngaihsak tak meuh a ni! Reilo têah lei paradis nuam leh hlimawm tak min pe dâwn a ni. Chu Paradis-a chên ve chu i duh em? I duh chuan, Jehova ruahman lâwknate leh ama chanchin zirin i ngaihhlutzia tilang rawh. “Hmuh awla a awm lai hian Jehova chu zawng ula, a hnaih lai hian ko rawh u: mi suaksual chuan a awmdân chu bânsan sela, mi fel lo chuan a ngaihtuahte chu bânsan bawk rawh se. Jehova hnênah kîr leh rawh se, tichuan anin a lo khawngaih ang.”—Isaia 55:6, 7.
17. Engvângin nge a rawng kan bâwlsak tûr thlan nân dâwngdahna hun a awm loh?
17 Dâwngdahna hun a awm tawh lo. He khawvêl hlui tâwpna hi a hnai tawh êm êm a ni. Pathian Thu chuan: “Khawvêl hi hmangaih suh ula, khawvêla thil awmte pawh hi hmangaih hek suh u. Mi tupawhin khawvêl hi a hmangaih chuan Pa a hmangaihna amahah a awm lo . . . Khawvêl hi a châknate chawpin a boral mêk a ni, Pathian duhzâwng titu erawh chu kumkhuain a awm reng ang,” tiin thu min râwn a ni.—1 Johana 2:15-17.
18. Pathian khawvêl thar mak taka chên ve chu eng thilin nge ringhlel lova nghâkhlel taka thlîrtîr thei che?
18 Pathian mite chu khawvêl thara chatuana nunna atân tûnah hian zirtîr an ni a. Paradis tiṭhang zêl tûra mamawh thlarau lam leh thiamna chi dang dangte an zir mêk a ni. Pathian hi Rorêltua thlang ve tûr leh lei pumpuia nun chhanhimna hna a thawhtîr hi ṭawiâwm ve tûrin kan han ngên che a ni. Jehova Thuhretute nên Bible zir la, ngaihsak êm êmtu che leh tuarna rêng rêng titâwptu tûr Pathian chu han hre ve teh. Hetiang hian nang pawh khawvêl thar lungphûm pêng pakhat i lo ni ve thei ang a. Tichuan Pathian duhsakna dawnga chu khawvêl thar mak tak maia chatuana chên ve chu ringhlel hauh lovin nghâkhlel takin i thlîr thei dâwn a ni.
[Phêk 31-naa milem]
Jehova Thuhretuten khawvêl pumpuiah inunauna dik tak an nei
[Phêk 32-naa milem]
Pathian khawvêl thar lungphûm chu tûnah hian din a ni