V-Anga Lang Phêngphehlep Vâr

Phêngphehlepte hian thlâwk thei tûrin an tihrâwlte chu ni sâah an hem lum hmasak a ngai a. Mahse, chhûm zîn nîahte chuan phêngphehlep dangte aiin phêngphehlep vârte hi an thlâwk chhuak hmasa zâwk ṭhîn. Engvângin nge chutiang an thlawh theih?

Ngaihtuah rawh: Phêngphehlep chi hrang hrangte chuan an thlawh chhuah hmain an thla tichîp, a nih loh leh zâr pharhin ni lum an ai ṭhîn a. Mahse, phêngphehlep vârte chuan an thla chu V-angin an dah thung a ni. Hêng phêngphehlepte hian lumna a tam thei ang ber dawng tûrin an thlate chu degree 17 vêla âwnin an dah reng a ngai tih hmuh chhuah a ni a. Hetianga V-anga an inpho hian thlawh nâna an hman an âwm bâwr tihrâwl tilum tûrin direct-in ni zung chakna an dawng a ni.

England rama University of Exeter-a mi thiamte chuan phêngphehlep thla V-anga awm dân entawnin solar kil li nei siam ni ta se, ni zung chakna nasa zâwkin a dawng thei ang em tih an zir chiang a. Chutianga an tihchhinna aṭangin power a pêk chhuah tam lam chu zaa 50 dâwn laiin a pung tih an hmu chhuak a ni.

Mi thiamte chuan phêngphehlep thla pâwn lamin nasa takin êng a kâp lêt thei tih an hmu chhuak tel bawk. Phêngphehlep thla V-anga lang leh êng kâp lêt thei chu entawnin solar kil li nei zâng zâwk leh ṭha zâwk an siam chhuak a ni. He an thil hmuh chhuah avâng hian research team-a tel Professor Richard ffrench-Constant-a chuan phêngphehlep vâr chu “ni zung chakna la khâwm thiam bîk” tiin a ko a ni.

Engtin nge i ngaih? V-anga lang phêngphehlep vâr hi chanchhâwnna avânga lo awm nge ni a, siam a ni zâwk?