Damdawi Lama Inenkawlna In Pawm Em?

Pawm e, Jehova Thuhretute chuan damdawi leh damdawi lama inenkawlna an pawm a. Kan taksa leh hrisêlna theih tâwp chhuaha kan enkawl chung pawhin, ‘dâktawr kan ngaih’ châng a awm a ni. (Luka 5:31) A nihna takah chuan, kum zabi khatnaa Kristian Luka angin, Jehova Thuhretu ṭhenkhatte chu dâktawr an ni.—Kolossa 4:14.

Mahse, inenkawlna ṭhenkhat chu Bible thu bulte nên a inkalh a, chûng inenkawlnate chu kan hnâwl a ni. Entîr nân, Bible-in thisen ei, a nih loh leh taksaa lâk luh a khap avângin thisen inthun chu kan pawm lo va. (Tirhkohte 15:20) Chutiang bawkin, Bible chuan ramhuai nêna inkûngkaihna nei damdawi lama inenkawlna chu a khap a ni.—Galatia 5:19-21.

Mahse, damdawi lama inenkawlna a tam zâwkte chu Bible thu bulte nên a inkalh lo. Chutiang chî inenkawlna chu mi mal duh thlanna a ni. Thuhretu pakhatin damdawi pakhat, a nih loh leh inenkawlna pakhat chu pawm mah se, Thuhretu dang chuan chu inenkawlna tho chu a hnâwl pawh a ni thei.—Galatia 6:5.