Kohhran Rawngbawl Tura Ruat Mipate U​—Timothea Hnen Aṭangin Zir Rawh U

KALTA kum khân, khawvêl pum huapa unaupa a sâng têlte chu kohhran upa leh kohhran rawngbâwltu nia ruat an ni a. Chûng zînga mi i nih chuan, Jehova leh i unaute tân kawng thara rawng i bâwl theih dâwn avângin i hlim ngei ang.

I thlaphâng deuh a nih pawhin, chu chu thil pângngai tak a ni a. Kohhran upaa ruat Jason-a chuan: “Kohhran upaa ruat ka nih ṭantîrh chuan, ka mawhphurhna thar avângin ka hlauthâwng deuh,” tiin a sawi. Mosia leh Jeremia pawhin Jehova hnên aṭang chanvo thar an dawn khân tling lo niin an inngai a. (Exodus 4:10; Jeremia 1:6) Chutianga i inngai a nih chuan, inrintâwkna nei tûr leh hmasâwn chho zêl tûrin engin nge ṭanpui thei che? Timothea entawn tûr siam aṭangin thil tam tak i zir thei a ni.—Tirhkohte 16:1-3.

TIMOTHEA ENTAWN TUR SIAM CHU ENTAWN RAWH

Timothea chu tirhkoh Paula nên khual an zin khân kum 20 mi vêl a nih a rinawm. Chu sâwmna a dawn hmasak ber ṭum chuan, a la naupan êm avângin mite zirtîr tûr leh fuihna pe tûrin tling lo niin a inngai a ni mai thei. (1 Timothea 4:11, 12; 2 Timothea 1:1, 2, 7) Mahse, hma a sâwn chho zêl a, kum sâwm hnuah Paula’n Philippi khuaa mite hnênah: “Rei lo tê chinah Timothea hi in hnêna rawn tirh Lalpa Isuaah chuan ka beisei,” tiin a hrilh a. Engvângin nge Paula’n chutianga a ngaih? “Hetiang rilru pu, . . . tu mah ka nei si lo,” tiin a hrilhfiah a ni.—Philippi 2:19, 20.

Engvângin nge Timothea chu kohhran upate tân entawn tûr ṭha tak a nih? A chhan paruk kan sawiho vang.

1. Mite a ngaihsak tak zet. Paula’n Philippi khuaa unaute hnênah Timothea chu anmahni “tih tak zeta ngaihtuahsaktu” tûr a ni dâwn tih a hrilh a. ( Philippi 2:20) Timothea chuan unaute chu Jehova hnaih tlat tûrin a duh a, anmahni ṭanpui tûrin a hun leh thate pawh pêk a inhuam bawk.

Kohhran upa a nihna kum 20 chuang tawh William-a chuan kohhran upa ni tharte hnênah: “Unaute hmangaih rawh u. An chanvo chelhte aṭanga thlîr lovin, an mamawhte chu ngaihsak zâwk rawh u,” tiin a hrilh fo va. Bus-a passenger-te chuantîr aia bus chawlhna hmun thlen chauh ngaihsak zâwktu bus driver ang ni suh ang che u.

2. Jehova rawngbâwlna a dah hmasa. Paula chuan Timothea chu ‘Isua Krista tân zawng lovin, mahni tân zawng ṭhînte’ lakah a danglam hle tiin a sawi a. ( Philippi 2:21) Paula’n a chhehvêla awm unaute chu mahni tân chuah an ngaihsaktute an ni tih a hria a. A châng chuan, Jehova rawngbâwlna aiin mahni ṭhatna tûr an dah pawimawh zâwk a ni. Mahse, Timothea chu chutiang a ni ve lo! Pathian rawngbâwlnaah tam lehzuala thawh theihna hun remchâng a awm veleh, “Kei heta hi ka awm, mi tîr ta che” tia sawitu Isaia angin a chhâng lêt a ni.—Isaia 6:9.

Mi mal mamawhte leh kohhran mamawhte chu engtin nge inbûk tâwk taka i ngaihsak theih? A hmasain, Paula fuihna: “Thil ṭha bîkte chu ṭha in ti thei ang,” tih hi zâwm ang che. (Philippi 1:10) Chuvângin, Jehova rawngbâwlna chu dah hmasa ang che. Pa hnihnaah, i hun leh tha tam zâwk khawhraltîrtu thiltihte chu pumpelh rawh. Paula chuan Timothea hnênah: “Tleirâwl châknate chu tlânsan la, . . . felna te, rinna te, hmangaihna te, remna te ûm ve rawh,” tiin a hrilh a ni.—2 Timothea 2:22.

3. Jehova rawngbâwlnaah theih tâwp a chhuah. Paula’n Timothea chungchâng heti hian a sawi a: “Fain a pa rawng a bâwl angin, Chanchin Ṭha tihdarh kawngah rawng mi bâwlpui ṭhin kha,” tiin. (Philippi 2:22) Timothea chu mi thatchhia a ni lo. Paula nên theih tâwp chhuahin rawng an bâwl dûn a, chu chuan an inṭhian ṭhatna a tinghet lehzual a ni.

Tûn laiah pawh, Jehova inawpna pâwlah thawh tûr tam tak a awm a. He hna hi hna lungawithlâk tak a ni a, unaute hnaih lehzual tûrin a ṭanpui ang che. Chuvângin, ‘Lalpa hna ṭhahnemngai takin i thawk’ reng tih chian ang che.—1 Korinth 15:58.

4. A thil zirte chu a nunpui. Paula chuan Timothea hnênah: “Nang erawh chuan ka zirtîrna te, ka awm dân te, ka thil tum te, ka rinna te, ka dawhtheihna te, ka hmangaihna te, ka chhelna te . . . i hre hle mai,” tiin a ziak a. (2 Timothea 3:10-11) Timothea chuan a thil zirte a nunpui avângin mawhphurhna tam lehzual a dawng a ni.—1 Korinth 4:17.

Engvângin nge i entawn tûr atân thiltawn ngah tak kohhran upa pakhat i zawn loh vang? Kum tam tak kohhran upa lo ni tawh Tom-a chuan thiltawn ngah tak kohhran upain mi mal ngaihsakna lantîr a, ṭha taka a zirtîr chu a la hre reng a ni. Ani chuan: “A hnênah thurâwnte ka dîl fo va, tichuan, chu chu ka nunpui a. Chu chuan inrintâwkna min neihtîr nghâl a ni,” tiin a sawi.

5. A insawizawi ṭhîn. Paula chuan Timothea chu: “Pathian ngaihsak tûrin in sawizawi rawh,” tiin a fuih a. (1 Timothea 4:7) Infiam mi chuan zirtîrtu nei mah se, amaha a insawizawi a la ngai a ni. Paula chuan Timothea hnênah: “Chhiar te, thu hrilh te, zirtîr te bei uar rawh . . . mi zawng zawng hnêna i sâwtna a lan theih nân chûng thilahte chuan taima la, chûngah chuan inhmang zo rawh,” tiin a fuih a ni.—1 Timothea 4:13-15.

Nang pawh i thiamnate i tihhmasâwn zêl a ngai a. Bible zirlai taima tak ni la, inawpna pâwlin a pêk kaihhruaina hnuhnûng berte chu zui ang che. A lutuka inrintâwkna nei suh. Zir bingna ṭha tak nei lêm lovin, dinhmun engpawh chingfel thei tûrin thiltawn nghah lutuk anga inngaih chu a dik lo a ni. Timothea angin, “i zirtîrnaah chuan fîmkhur” ang che.—1 Timothea 4:16.

6. Pathian Jehova thlarau thianghlim a rinchhan. Timothea rawngbâwlna chungchâng a sawinaah, Paula’n: “Thil ṭha i hnêna kawltîra awm kha, kan chhûnga thlarau thianghlim awm hian vawng ṭha rawh,” tiin a hriatnawntîr a. (2 Timothea 1:14) Timothea chuan Pathian thlarau thianghlim a rinchhan a ngai a ni.

Kum tam tak kohhran upa lo ni tawh Donald-a chuan: “Kohhran upaa ruatte chuan Pathian nêna an inlaichînna chu an ngai pawimawh tûr a ni. ‘Chakna aṭangin chak lehzuala’ kalte an ni tûr a ni. Pathian thlarau thianghlim dawng tûra an ṭawngṭai a, an nuna thlarau rahte an lantîr chuan, unaute tâna malsâwmna an ni tak zet ang,” tiin a sawi a ni.—Sâm 84:7; 1 Petera 4:11.

I CHANVO CHU HLUT RAWH

Nangmah ang a, Jehova rawngbâwlna hmasâwn chhunzawm zêl kohhran upate leh kohhran rawngbâwltu tharte kan hmu chu a phûrawm hle. A tîr lama kan sawi tâk Jason-a chuan: “Kohhran upa ka nih chhûng hian, thil tam tak ka zir a, mahni inrintâwkna pawh ka nei chho a ni. Tûnah chuan, ka chanvo neihah hian ka hlim tak zetin, chanvo hlu tak niin ka ngai!” tiin a sawi.

Hma i sâwn chhunzawm zêl ang em? Timothea entawn tûr siam i entawn chuan unaute tân malsâwmna i ni ngei ang.