“Mi Zawng Zawng Hnênah Engkim” Ka Ni Tawh

HE THIL a thlen hma hian, thutak ka ngaihven tawh a. Ka nu chuan Bible thu leh hla chhuah ṭhenkhat a dawng a, chûng chu ka tuipui hle a ni. A bîk takin chuta milemte chu ka duh a. Ka nuin a thil zirte min hrilh chu ka pa’n a duh lo va. Mahse, ka ngaihven êm avângin zawhnate ka zâwt a, tichuan, ka pa awm loh hunah min zirtîr ṭhîn a ni. Chuvângin, ka nun chu Jehova hnêna inpumpêk ka duh ve ta a. Kum 1943-ah, kum sâwm mi niin, England ram, Blackpool-ah baptisma ka chang ta a ni.

JEHOVA RAWNG KA BAWL ṬAN

Chu mi hun aṭang chuan, ka nu nên thlawhhma rawngbâwlnaah kan chhuak ziah ṭhîn. Chutih hun lai chuan, thu hrilh nân thingremzaithei kan hmang a. A lianin a rit hle a, kg li leh a chanve (pound 10) vêl a ni. Mipa naupangin, theih tawp chhuaha chu thingremzaithei a khai chu han mitthla teh u!

Kum 14 ka nih aṭang tawhin, pioneer thawh duhna ka nei a. Ka nu chuan unaute tâna rawngbâwltu (tûna bial kantu tia koh) be hmasa phawt tûrin min hrilh a. Bial kantuin pioneer hna thawhnaa min ṭanpui thei thiamna zir tûrin min fuih a, tichuan ka zir ta a. Kum hnih hnuah, pioneer thawh chungchâng chu bial kantu dang ka zâwt leh a. Ani chuan, “Thawk rawh!” tiin min hrilh a ni.

Chuvângin, kum 1949 April thlaah, ka nu nên inchhûng bungrua zawng zawng chu kan tiral vek a, Manchester bula Middleton-ah kan insawn a, chutah chuan pioneer kan thawk ṭan ta a ni. Thla li hnuah, pioneer thawhpui atân unaupa pakhat ka thlang a. Branch office chuan Irlam khuaa kohhran din thara insawn tûrin min ti a. Ka nu chu unaunu pakhat nên kohhran dangah pioneer an thawk a ni.

Kum 17 mi chauh ni mah ila, kohhran tharah chuan mawhphurhna la thei unaupate an tlêm êm avângin ka thawhpui pioneer nên chuan kohhran inkhâwmnate chu kan kaihruai a. A hnuah, thuchhuahtu tlêm tê awmna, ṭanpui ngai tak Buxton Kohhranah ka insawn leh a. Chûng ka thiltawnte chuan nakin huna ka chanvo dawn tûrte atân min buatsaih a ni.

Kum 1951-ah, Watchtower Bible School of Gilead kal tûrin lehkha ka theh lût a. A hnu kum 1952 December thlaah, sipai ṭang tûra koh ka ni a. Hun kima rawngbâwl ka nih avângin sipaia ṭang lo tûrin ka dîl a; mahse, court chuan min pawmsak lo va, lung inah thlaruk chhûng tâng tûra tih ka ni ta a ni. Tân ina ka awm lai chuan, Gilead school vawi 22-na kal tûra sâwm ka ni a. Tân in aṭanga ka chhuah hnu lawk, 1953 July thlaah, Georgic lawngpuiah chuangin, New York lam ka pan ta a ni.

Ka thlen veleh, 1953 kuma neih New World Society Inkhâwmpuiah ka tel a. Tichuan, school awmna hmun New York khawpuia South Lansing chu rêlin ka pan leh a. Tân in aṭanga chhuak hlim ka nih avângin pawisa ka nei tlêm hle. Rêl aṭanga ka chhuk hnuah, South Lansing lam pan bus-ah ka chuang leh a; mahse, chuan man cent 25 chu passenger dang hnên aṭangin ka pûk a ngai a ni.

RAM DANGA RAWNGBAWLNA

Gilead School-ah chuan “mi zawng zawng hnênah engkim” ni tûrin zirtîrna ṭha tak kan dawng a. (1 Korinth 9:22) Kei leh Paul Bruun-a, leh Raymond Leach-a te chu Philippines-a rawngbâwl tûra ruat kan ni a; mahse, kan visa hmu tûrin thla eng emaw zât kan nghah a ngai a ni. Tichuan, Netherlands rama Rotterdam chu lawngin kan pan a. Chu mi hnuah chuan, Mediterranean Tuipui, Suez Canal, leh India Tuipui te aṭangin Malaysia-ah, chuta ṭangin Hong Kong-ah, kan kal zêl a. A tâwpah chuan, tuifinriata ni 47 kan awm hnuin, kum 1954, November 19-ah Manila kan thleng ta a ni.

Chuta kan thlen chuan hnam dân thar, ram thar, leh ṭawng thar te mila kan insiamrem a ngai a. Mahse, a tîr chuan mi tam zâwkin Sâp ṭawng an hmanna hmun Quezon Khawpuia kohhran tharah kan pathum chuan tirh kan ni. Thla ruk a liam hnu chuan, Tagalog ṭawng tlêm azâwng kan hre ve a. Kan rawngbâwlna chu a hnuah a inthlâk leh ta a ni.

Kum 1955 May thla engtik nî emawa thlawhhma rawngbâwlna aṭanga kan hâwn chuan, Unau Leach-a nêna bial kantu ni tûra ruatna lehkha thawn chu kan hmu a. Kum 22 chauh ka la ni a; mahse, he hna aṭang hian “mi zawng zawng hnênah engkim” nih dânte ka zir ṭan ta a ni.

Entîr nân, bial kantu nia vântlâng thusawina ka neih hmasak berna hmun chu khawte pakhata dâwr pâwnah a ni a. Chutih hun lai chuan Philippines ramah vântlâng thusawi chu vântlâng hmun ngeia neih a ni! Bial chhûnga kohhran hrang hrang ka tlawh chuan, vântlâng chawlhna hmunah te, bazârah te, vântlâng hall hmaah te, basketball infiamna hmunah te, park-ah te, khawpui kawngsîrahte vântlâng thusawina ka nei a. Ṭum khat chu, ruah a sûr nasat êm avângin San Pablo Khawpuia bazârah chuan thu ka sawi thei ta lo va. Chuvângin, Kingdom Hall-a thusawina nei tûrin mawhphurna nei unaupate chu ka râwn a. A hnuah, ka thusawi kha vântlâng hmuna sawi a nih loh avângin chu chu vântlâng thusawi anga report pêk theih a ni ang em tiin unaupate chuan min zâwt a!

Unaute inah ka thleng ṭhîn a. An inte chu ṭha lutuk lo mah se, a thianghlim hle a ni. Thing chhuatah pher pan tê phahin ka mu fo ṭhîn a. Inbualna hmun awmchhun chu mi zawng zawng hmuh theihna in pâwna a awm avângin, tualchhûng mite anga inbual dân pawh ka zir ta a. Bus-in ka zin ṭhîn a, thliarkâr dangah lawnga zin châng pawh ka nei a. Ka rawngbâwl chhûng zawng hian, motor pakhat pawh ka nei ngai lo.

Ṭawng zirna school-ah kal lo mah ila, Tagalog ṭawng ka zir thei a. Thlawhhma rawngbâwlna leh inkhâwmnaa unaute thusawi ka ngaihthlâkna aṭangin ka inzir a. Unaute chuan min zirtîr an duh a, an dawhtheihna leh rilru dik tak pua min faknate avângin ka lâwm hle a ni.

Hunte a liam zêl chuan, chanvo tharte avângin insiamremna ka neih a ngai lehzual a. Kum 1956-a Unau Nathan Knorr-a’n min rawn tlawh ṭum chuan, ram pum huap inkhâwmpui kan nei a. Chanchin theh darhtute be pawh tûra ruat ka ni. He thilah hian thiltawn ka la nei lo va; mahse, mi dangte chuan tih dân tûr min zirtîr a ni. Kum khat a liam hmain, ram pum huap inkhâwmpui dang kan nei leh a, chutah chuan inkhâwmpui huaihawttu mawhphurhna ka dawng a ni. Unau Frederick Franz-a chuan world headquarter aṭangin min rawn tlawh a, a hnên aṭangin thil tam tak ka zir. Ani chuan vântlâng thusawina a nei a, Filipine mite thawmhnaw barong Tagalog a ha a. Chu chuan tualchhûng unaute chu a tihlim hle a, kei pawh mite mila insiamrem duhna min neihtîr a ni.

District overseer ka nih chuan insiamremna tam tak ka neih a ngai a. Chûng hun lai chuan, The Happiness of the New World Society tih film chu kan chhuah ṭhîn a. Vântlâng hmunahte kan chhuah deuh ber ṭhîn a, ran nungin min zar buai châng pawh a awm. Ran nungin projector êng chu an pan duh hle a, a chhûngah an tâng ṭeuh ṭhîn a ni. A hnuah tihfai leh vak a ngai ṭhîn! Chutiang thil han huaihawt chu a awl lo va; mahse, mite lo kal a, khawvêl pum huapa Jehova inawpna pâwl chungchâng an zir hmuh chu a hlimawm hle.

Hmun ṭhenkhata Catholic puthiamte chuan inkhâwmpui kan hman phal lo tûrin thuneitute chu an nawr a. Mite’n thusawi an hriat theih loh nân, an biak in kianga thu kan sawi apiangin an biakin dâr chu ring takin an vaw ri ṭhîn bawk. Chutiang a ni chung pawhin, mite chuan thutak an zir zawm zêl a, chûng hmuna mi tam tak chu tûnah Jehova betu an ni tawh.

CHANVO THARTE LEH INSIAMREM BELHNATE

Kum 1959-ah, branch office-a rawngbâwl tûra koh ka ni a. Chuta ka thiltawnte aṭangin thil tam tak ka zir a ni. Chu mi hnuah, zone overseer niin ram dang dang tlawh tûra tirh ka ni a. Ka zinna pakhatah chuan, Thailand-a missionary thawk Janet Dumond-i nên kan intawng a. Hun engemaw chen lehkha kan inthawn hnuah kan innei ta a. Kum 51 chhûng hlim takin Jehova rawng kan bâwl dûn tawh a ni.

Ram 33-a awm Jehova mite tlawh chu nuam ka ti hle a. Tûn hmaa ka chavo neihte khân hnam dân hrang hrangte leh ṭobul in ang lote cheibâwl dân hre tûra min ṭanpui avângin ka lâwm tak zet a ni! Chutianga ka zin kualnate chuan Jehova’n mi zawng zawng a hmangaih tih hre thiam tûrin min ṭanpui bawk.—Tirhkohte 10:34, 35.

INSIAMREMNA KAN LA NEI ZEL

Janet-i nên chuan Philippines rama unaute nêna rawngbâwl chu nuam kan ti hle a, Quezon Khawpuia branch office-ah rawng kan bâwl zawm zêl a. Kum 60 kal taa rawng ka bâwl ṭan lai aiin, tûnah chuan thuchhuahtute chu a lêt sâwmin an tam tawh a ni. Kum tam tak a liam hnuah pawh, Jehova thil phûtte mila insiamrem ka la inpeih reng a. Entîr nân, tûn hnaia inawpna pâwla inthlâk danglamna a awm avângin, insiamrem duhna kan neih lehzual a ngai a ni.

Jehova kaihhruaina zâwm tûra theih tâwp kan chhuahna chuan nun lungawithlâk ber min neihtîr a. Kan unaute tâna ṭha taka rawngbâwl thei tûr pawhin insiamrem a ngaihna apiangah insiamrem kan tum tlat bawk. Jehova’n ti tûra min duh chhûng chu, “mi zawng zawng hnênah engkim,” nih kan tum tlat a ni. (ws16.12-E)