“ Thlamuanna Zawng Zawng Pathian” Hnên Aṭangin Inzir Rawh

1. Engvângin nge mi dangte kan thlamuan ang?

KAN za hian ‘harsatna chi hrang hrang avânga lungngaihna’ kan neih avângin, thlamuanna leh fuihna mamawh châng kan nei ṭheuh va. (1 Pet. 1:6) Mi dangte hnên aṭanga thlamuanna kan dawnte kan ngaihlu ang bawkin, harsatna tâwkte thlamuan tûrin kan inpeih reng tûr a ni. (Mt. 7:12) “Thlamuanna zawng zawng Pathian” Jehova chuan ‘fiahna tinrêng tâwktute kan thlamuan theih’ dân min zirtîr a. ‘Inthlamuan tawnna’ hmangin a entawn tûr siam chu kan zui thei a. (2 Kor. 1:3, 4; 1 Thes. 4:18) Kan tih a ngaih vâng ni lovin, kan Kristian unaute kan hmangaih avângin chutiang chuan kan ti a ni. He thuziakah hian (1) Bible-a târ lan a nih anga thlamuanna awmzia, (2) mi dangte kan thlamuan theih dân leh, (3) thlamuan kan mamawh huna kan tih theihte chu sawiho a ni ang.

BIBLE-A TAR LAN A NIH ANGA THLAMUANNA

2. Bible-a “thlamuanna,” tia lehlin thu mal hian eng awmze hrang hrang nge a neih theih?

² Bible-a “thlamuanna,” tia lehlin Grik thu mal hian a chung leh a hnuaia thu azirin, awmze hrang hrang a nei thei a. Chu chuan “fuih,” “tur,” a nih loh leh “ngên,” tih awmzia a nei thei a. (Rom 12:8) A ngial a ngana a awmzia chu “a bul hnaia ko,” tihna a ni. Chuvângin, harsatna tâwk mêk a ṭhian hnêna a mamawh ṭanpuina pe tûra a bul hnaia va kal vat tu emaw kan mitthla thei a. A ṭanpuina pêk chu eng pawh ni se, thlamuanna dik tak chuan hrehawm tuartu chu a ti zângkhai a, a ti chak reng ṭhîn a ni.

3. Engtin nge Barnaba chuan mi dangte thlamuan kawngah entawn tûr a siam? (Milem en bawk rawh.)

³ Bible-a entîrna pakhat hi han ngaihtuah teh. Kristian pakhat Josefa chu mite fuih leh thlamuan thiam tak a nih avângin, tirhkohte chuan ani chu “Mi Dangte Fuihtu,” tih awmze nei hming Barnaba tiin an ko va. (Tirh. 4:36) Chumi hming chu a put zawh êm avângin, Bible chuan a hming pângngaiin a ko tawh ngai lo. Dinhmun hrang hrangah, Barnaba chuan a Kristian unaute chu ṭanpui an mamawh hun apiangah a ṭanpui a; chutiang chuan a hming phûin a nung a ni. Entîr nân, tûn hnai lawka Kristian rawn ni zirtîr Saula chuan Jerusalem khua a thlen khân, zirtîr dangte hmuh a duh a. Amaherawhchu, zirtîrte chuan ani chu ti duhdahtu nia an lo hriat ṭhin avângin an hlau va. Mahse, Barnaba erawh chuan Saula chu ring tlatin, tirhkohte hnênah a hmêlhriattîr a ni.—Tirh. 9:26-28.

MI DANGTE THLAMUAN DAN TUR

4. Mi dangte thlamuan theih dân kawng ṭha ber zînga pakhat chu eng nge ni? (Rom 1:11, 12)

⁴ A theih chuan tlawh ṭhîn rawh. Jehova’n a chhiahhlawhte chu mi dangte thlamuan tûrin a hmang ṭhîn a. Entîr nân, zâwlnei Elija beidawng taka a awm lai khân, Jehova’n ani chu thlamuan tûrin vântirhkoh a hmang a. (1 Lal. 19:4-7) Tirhkoh Paula pawhin a unaute thlamuan tûra hmaichhan ngeia va tlawh a ṭhatzia a hria a ni. (Rom 1:11, 12 chhiar rawh.) Tu emaw thlamuan tûra i va tlawh hunah, tîtîna tâwi tê neih mai aia tam hun pe ang che. (1 Kor. 16:7) Mahse, ṭanpui ngai tu emaw i va tlawh thei lo a nih pawhin, amah ti chak tûra phone call te, lehkha thawn leh card ziah te, message thawntein thil a tih theihzia chu ngai nêp ngai suh. A nih chuan, mi dangte thlamuan tûra Jehova mi hman nih i duh ang em?

5. Eng harsatnate nge hmachhawn kan inbeisei theih?

⁵ He hun hnuhnûng chhûnga dinhmunte chu a khirh telh telh avângin, kan Kristian unaute thlamuan an mamawh huna hmaichhan ngeia va tlawh chu a harsa lehzual thei a. Rom khuaa Paula tân ina khung a nih lai khân, Ephesi khuaa Onesiphora chuan tân ina khung emaw, tih hlum hial emaw theih dinhmunah awm mah se, Paula chu a zawng chhuak a ni. (2 Tim. 1:16-18) Russia rama Thuhretute pawhin rinna avânga an Kristian unaute’n tih duhdah an tawh hunah chutiang rilru put hmang chu an lantîr a. An unaute thu zâwt fiah tûra hruai an nih hunah, anni chuan an zalênna chân thei dinhmunah awm mah se, an unaute an thlâwpzia lantîr nân rorêlna inahte an va kal a ni. Hmân lai leh tûn laia Pathian mite an inthlâwp tawn dân leh tihduhdahna kâra hlimna an neih theih dân chungchâng zir chianna hmangin, huaisenna lantîrna kawnga an entawn tûr siam chu zui tûrin engvângin nge tûn aṭanga i lo inbuatsaih loh vang?

6. Engtin nge mi dangte kan thlamuan hunah Jehova kan entawn theih? (Milem en bawk rawh.)

⁶ An thusawi ngaithla rawh. Zâwlnei Elija’n dinhmun hlauhawmah a awm tih a inhriat khân, Jehova hnênah a thinlung a leih bua a. Hmangaihna ngah tak kan Pathian chuan a zâwlnei rilru ti hrehawmtu chu lo hre sa mah se, a lungkhamnate a sawi chhuah chuan a ngaihthlâksak a. Thu ngai a sawi nawn fo pawhin, dawhthei takin a ngaihthlâksak a ni. (1 Lal. 19:9, 10, 14) Chutiang bawkin, zâwlnei Habakuka chu a lungkhamna leh a rinhlelhnate Jehova thuneihna cho zâwnga sawi anga a lan pawh khân, thinrim lovin a ngaihthlâksak a. (Hab. 1:2, 3) Tûn laiah pawh, Jehova chuan kan mamawhte chu hre sa mah se, kan ṭawngṭainate chu ngun takin min ngaihthlâksak a. Kan Kristian unaute’n thu an sawi hunah ngun tak leh zah taka ngaihthlâksakin Jehova kan entawn thei a ni. Ngaihtuah chiang lo leh thu ngai sawi nawn anga an lan hunah pawh ti buai lo leh thinrim lovin, an thusawite chu ‘ngaihthlâk chuh’ ang che.—Jak. 1:19; Thur. 7:9.

7. Engtin nge rilru hah taka awmte mamawh chu kan hriat theih ang?

⁷ An mamawh chu hriat tum rawh. Jehova anga mite thinlung kan hriat theih loh avângin, an thusawite ngun taka kan ngaihthlâk chauhvin, eng ang thlamuanna nge an mamawh tih kan hre thei dâwn a. An mamawhte chu hre nghâl angah inngai mai lo la, i mamawh ang chu an mamawh lo pawh a ni thei a ni. Kan za hian kan inang lo ṭheuh va. Chuvângin, mite thusawi chu hmanhmawh lovin, ngun takin ngaihthlâksak la, an rilrua awmte sawi chhuak thei tûrin fing thiam takin zawhnate zâwt ang che.—Thuf. 20:5.

8. Engtin nge Isua’n Lazara thih hnuah Marthi leh Mari a thlamuan? (Milem en bawk rawh.)

⁸ Isua’n Marthi leh Mari nuṭa Lazara a thih hnua anmahni a thlamuan dân kha han ngaihtuah teh. Marthi leh Mari chu an nuṭa an chân avângin lungngai takin an awm ve ve a; mahse, Isua thlamuan dân erawh a inang lo. Marthiin Isua a biak hnu chuan, Isua’n ani chu thawhlehna chungchânga thutak hrilhin chu beiseinaa a rinna ti nghet tûrin a ṭanpui a. Mahse, Mari erawh ṭap chunga Isua a va pan khân, ani chuan thawhlehna chungchâng a sawi lang lo. Chu aiin, Mari chu ṭahpuiin Lazara an phûmna hmun chu a zâwt a ni. (Joh. 11:20-35) Eng nge kan zir theih? Hrehawm tuarte kan thlamuan hunah, tih dân pakhat chauh zui aiin, an mamawh takte hriat kan tum zâwk tûr a ni.

9. Engtin nge mi dangte thlamuan tûra Bible kan hman theih? (Rom 15:4, 5)

⁹ Bible hmang rawh. Mi tu emaw hnêna ‘Pathian Lehkha Thua thlamuanna’ thu kan hrilh hian, beiseina nei tûra ṭanpui kan ni a. (Rom 15:4, 5 chhiar rawh.) Chu beiseina chuan thlamuanna leh Jehova’n a ngaihsak ang tih rinna nei tûrin a ṭanpui thei a ni. (Is. 40:31) A nih leh, tu emaw fuih tûra i hman theih Bible châng chu engtin nge i zawn hmuh theih ang? Mi ṭhenkhat chuan Kristian Nun Atâna Bible Chângte tih lehkhabua “Thlamuanna,” tih thupui hnuaia Bible chângte ang chi an mamawh huna an en theih mai tûr Bible chângte chu hmun khatah an chhinchhiah a ni. Mite i fuih huna a ṭha thei ang bera Bible hmang thiam tûrin Jehova hnênah ṭanpuina dîl bawk ang che. Thlarau thianghlim chuan i mamawh Bible chângte hre chhuak tûrin a ṭanpui thei che a ni.—Joh. 14:26.

10. Engvângin nge tu emaw fuih kan tum hunah ngilnei taka thu kan sawi ang?

¹⁰ Ngilnei takin thu sawi rawh. “Thlamuanna,” tih thu mal atâna a tîra ṭawngkam hman chu “tur,” a nih loh leh “ngên,” tia lehlin theih a ni a. Thlamuan i tum tu emaw chu a ngaihtuahna siamrem tûra i tur emaw, i ngen emaw a ngaih châng a awm thei a ni. Chutianga tih a ngai a nih chuan, i ṭawngkam chhuakte chu rilru ti natu ni lo va, ti damtu a nih zâwk theih nân thu i sawi hmain, ngun takin ngaihtuah hmasa ang che. (Thuf. 12:18) A rawngbâwlna hlutna leh Israel mi kalpêng zâtte chungchânga thlîr dân dik lo neitu Elija hnênah Jehova’n thu a sawi khân, entawn tûr ṭha famkim a siam a. Jehova’n Elija dik lohnate chu sawi lang kher lovin, a ngaihtuah dân chu ngilnei takin a siamremsak a ni. (1 Lal. 19:15-18) Ngilneihna lantîrin leh ngun taka ngaihtuahna hmangin, chutiang chuan i ti ve thei a. Inkhâwmnaa thu i sawi hunah leh chhânnate i pêk hunah, i Kristian unaute fuih tûr leh ti chak tûrin ngilnei tak leh hmangaihna nei takin sawi ṭhîn ang che.

11. Rilru hah taka awmte chuan eng nge an mamawh ṭhin? (1 Johana 3:18)

¹¹ An mamawh ṭanpuina pe rawh. Rilru hah taka awmte chuan thlamuanna thu mai aia tam an mamawh fo ṭhîn a. (1 Johana 3:18 chhiar rawh.) Barnaba chuan baptisma chang thar ṭanpui ngai a Kristian unaute chhawmdâwl nân a thil neih ṭhenkhatte hralhin, thawhlâwmte a thawh a, chutiang chuan entawn tûr ṭha a siam a ni. (Tirh. 4:36, 37) Tûn laia kan unau tam takte pawhin ṭanpui ngai an unaute chu an mamawh ṭanpuinate pein, Barnaba entawn tûr ṭha siam chu an zui a. Poland rama unaunu Gabriela-i chu tui lianin a in a tih chhiat chuan a lungngaiin a rilru a hah hle a. Ani chuan: “Ka hlauthâwngin ka lungngai tak zet a, min awmpuitu ka nu leh pate pawh an thlabâr hle. Hma lâk dân tûr ber pawh ka hre lo. Mahse, kan bul hnaia kohhran unaute chu lo kalin, ni khat chhûng lekin hna tam tak min thawhsak a. Chu thiltawn chuan Jehova’n harsatna tâwkte thlamuan tûrin a mite chu a kaihruai tih ka rinna a ti nghet lehzual a ni,” tiin a sawi.

12. Rinawm tak leh chhel taka fiahnate i hmachhawnna chuan engtin nge i Kristian unaute chu a ṭanpui theih?

¹² I fiahna tawhte chu chhel takin tuar rawh. Paula chuan Thessalonika khuaa a unaute hnênah rinawm taka chhelna an lantîr thu a hriat avânga thlamuanna leh chakna thar a neih thu a hrilh a. An zînga a awm laia a thawhrimna chu a thlâwn lo tih a hria a ni. (1 Thes. 3:5-8) A unaute tâna chhel taka a tawrhna chuan a la hmuh ngai loh unaute pawh tiamin, anni chu a tih chak ve a beisei a. (Kol. 2:1, 2) Chutiang bawkin, kan Kristian unaute’n kan fiahna tawhte chhel taka hmachhawn tûra Jehova min ṭanpui dânte an hmuh hian an chak phah sawt a ni.

13. Mi dangte kan fuih hunah eng nge kan tih zawm zêl ang?

¹³ Dawh thei rawh. Lunghnuala awm kan unaute chuan thlamuan tuma kan ṭan lâknate chu an chhâng lêt nghâl lo pawh a ni thei a. Mahse, Bible chuan ‘infuih tawn reng’ tûrin min hrilh a ni. ‘Infuih tawn reng,’ tih ṭawngkam chuan thil tih chhunzawm zêlna a kâwk a. (1 Thes. 5:11) I ṭanpuina mamawh unaute i thlamuan zawm zêl rualin dawh theihna lantîr ang che. (1 Thes. 5:14) Ni e, mi tinte hian thlamuanna kan mamawh chângte a awm zêl dâwn a. Chutiang hunah chuan eng nge kan tih theih?

THLAMUAN I MAMAWH HUNAH

14-15. Lungkhamnate leh rilru hahnate kan hmachhawn hunah eng nge kan tih ang?

¹⁴ Jehova hnênah ṭawngṭai rawh. Lungkhamnate leh rilru hahnate i neih hunah thlamuan tûr chein a ṭanpuina dîl la. (Sâm 94:19) A hnênah thinlung leih buain dîl bîk neiin ṭawngṭai ang che. (Sâm 62:8) Ni e, Jehova chuan i ṭawngṭai hma aṭang pawhin i rilru awm dânte chu a hria a. Mahse, i thinlung chhûngrila i ngaihtuahnate i hrilhna chuan amah i rinzia a lantîr a ni. Chu bâkah, Jehova’n rinna nghet tak nêna ṭawngṭainate chu a duh dân nêna inmilin chhâng lêt lovin a awm ngai lo. (Mk. 11:24) Philippi 4:6, 7-na chuan: ‘In dîlnate chu Pathian hnênah hriattîrin awm zâwk rawh se. Tichuan, hriatthiam phâk rual loh Pathian thlamuanna chuan in thinlung leh in rilrute chu a vênsak ang che u,’ tiin min fuih a ni.

¹⁵ Mi dangte ṭanpuina dîl rawh. I rilru awm dânte chu ṭhian puitling tak, a nih loh leh rinchhan tlâk kohhran upa hnênah hrilh ang che. I Kristian unaute chuan nasa takin an thlamuan thei che a; mahse, i rilru awm dânte leh i mamawhte i hrilh loh chuan, an hre kher lo thei a ni. (Thuf. 14:10) I thusawite hriatthiamna nei taka ngaihthlâksak tûr che leh anmahni ti chaktu Bible châng leh thuziak hrilh tûr chein i dîl thei a ni.

16. Mi dangte’n fuih che an tum hunah eng nge thleng thei a; mahse, eng nge i hriat reng ngai?

¹⁶ Dawh thei la, ngaihdam peih rawh. I Kristian unaute’n fuih che an tum hunah thil an ti sual palh thei a. Entîr nân, an thusawi leh thil tihte chuan thlamuan che ahnêkin i rilru a ti na mah zâwk thei a ni. Chutiang a nih chuan, an chungah dawhtheihna lantîr la. (1 Kor. 13:4, 7) Jakoba 3:2-naa: ‘A thusawia ti sual ngai lo mi chu mi ṭha famkim a ni,’ tih thu hi hre reng bawk ang che. I Kristian unaute chuan thinlung takin ṭanpui che an duh tih theihnghilh lo la. “Thlarau zawngin a peih ngei mai; nimahsela, tisa erawh a chak lo a ni,” tih hi rilru-ah vawng tlat ang che.—Mt. 26:41.

17. Eng nge tih kan tum tlat ang?

¹⁷ Kan za hian thlamuanna leh fuihna kan mamawh ṭheuh va, he hun hnuhnûnga dinhmunte a khirh telh telh a, Pathian hmêlmate dodâlna a nasat telh telh rualin, thlamuanna leh fuihna kan mamawh lehzual sauh dâwn a ni. Chuvângin, inthlamuan tawnna kawngah theih tâwp chhuah i tum tlat ang u.