Jehova’n A Hmangaih Che Tih Pawm Rawh

1. Engvângin nge Jehova hnêna i inpumpêk? (Milem en bawk rawh.)

JEHOVA hnêna i inpumpêk lai kha i la hre thei em? Amah i rawn hriat a, i hmangaih avânga chu thu tlûkna siam chu i ni a. I nuna a duh zâwng dah hmasa tûr leh i thinlung, i thlarau, i rilru leh, i chakna zawng zawnga amah hmangaih zawm zêl tûrin i tiam a. (Mk. 12:30) Chuta ṭang chuan, amah i rawn hmangaih chho telh telh a ni. A nih leh, tu emawin “Jehova i hmangaih tak zet em?” tia a zawh che chuan engtin nge i chhân ang? “Tu dang leh thil dang zawng aiin ka hmangaih!” tiin hrehna nei hauh lovin i chhâng ngei ang.

2-3. Eng nge Jehova’n pawm tûra min duh a, he thuziakah hian eng nge kan sawiho vang? (Jeremia 31:3)

² Mahse, tu emawin, “Jehova’n a hmangaih che tih i chiang em?” tiin zâwt ta che se, engtin nge i chhân ang? Jehova hmangaihna dawn phû lo nia inhriain chhân i hreh ang em? A naupan laia hmangaihna nei taka enkawl hlawh lo unaunu pakhat chuan: “Jehova ka hmangaih a, chu chu ka chiang a ni. Mahse, ‘Jehova’n min hmangaih em?’ tih chungchângah erawh rinhlelhna ka nei fo,” tiin a sawi a ni. A nih leh, Jehova’n eng angin nge a thlîr tak zet che?

³ Jehova chuan a hmangaih che tih i rin ngheh a duh a. Jeremia 31:3 chuan: “Hmânah ka hnêna LALPA lo lang chuan, heti hian a ti: A ni, hmangaih tâwp lovin ka hmangaih chia; chuvângin, hmangaihna rinawmin ka lamah ka hîp tawh che,” tiin a sawi a ni. (NWT) Ni e, Jehova’n a lamah a hîp che a. A hnêna inpumpêka baptisma i chan khân, thil hlu tak—a hmangaihna rinawm—chu i dawng a ni. Chu chu hmangaihna thûk tak leh zung kaih nghet tak a ni a. Chu chuan nangmah pawh tiamin, amah betu rinawmte chu a “rochuam” anga thlîr tûrin a chêttîr a ni. (Mal. 3:17) Tirhkoh Paula’n a chian ang bawkin, Pathian Jehova chuan a hmangaih che tih i chian a duh a. Paula chuan: “Thihna te, nunna te, vântirhkoh te, thuneihna te, thil awm mêk te, thil lo la awm tûr te, thiltihtheihna te, sânna te, thûkna te, thil siam dang rêng rêngte pawhin kan Lalpa Krista Isuaa awm Pathian hmangaihna ata chu min ṭhen thei lo vang tih chiang takin ka hre si a,” tiin inrintâwkna nei takin a ziak a ni. (Rom 8:38, 39, NWT) He thuziakah hian, Jehova’n min hmangaih tih kan rinna tih ngheh a ngaih chhan leh chutianga ti tûra min ṭanpui theitu chu kan sawiho vang.

JEHOVA’N MIN HMANGAIH TIH KAN PAWM A NGAIH CHHAN

4. Setana thiltih verther takte zînga pakhat chu engtin nge kan do theih ang?

⁴ Jehova’n min hmangaih tih kan pawm chuan, Setana “thiltih verther takte” zînga pakhat kan do thei ang. (Eph. 6:11, NWT) Setana chuan Jehova rawngbâwl thei lova min siam tumin eng thil pawh a ti dâwn a. A thiltih verther takte zînga pakhat chu Jehova’n min hmangaih lo tih dâwt thu theh darh hi a ni. Hun remchâng châng rengtu a ni tih theihnghilh ngai suh. Ani chuan tûn hmaa kan thiltawnte, tûna kan tawh mêk, a nih loh leh hma lam hun atâna lungkhamna avânga rilru chau taka kan awm hunah te min bei fo ṭhîn a. (Thuf. 24:10) Setana chu a sa chân mahni inhumhim thei lo seh tum rengtu sakeibaknei ang a ni. Chuvângin, ani chuan min tih beidawn tumin rilru lama kan chauh lai ber chu a châng ṭhîn a. Mahse, Jehova’n min hmangaih tih kan rinna kan tih ngheh reng chuan, Setana leh vêrvek taka a thiltihte chu ṭha lehzualin kan “do” thei ang.—1 Pet. 5:8, 9; Jak. 4:7.

5. Engvângin nge Jehova hmangaih leh ngaihhlut nia inhriatna neih chu a pawimawh?

⁵ Jehova’n min hmangaih tih kan pawm chuan, amah kan hnaih lehzual thei ang. Chutianga kan sawi theih chhan chu lo ngaihtuah ta ila. Jehova chuan hmangaihna pêk leh dawn mamawhin min siam a. Hmangaihna chu hmangaihna vêkin kan chhâng lêt ṭhîn a ni. Chuvângin, Jehova hmangaih leh ngaihhlut nia inhriatna kan neih tam poh leh, amah chu kan hmangaih lehzual ang. (1 Joh. 4:19) Chutianga amah kan hmangaih nasat poh leh kan chunga a hmangaihna chu a nasa lehzual dâwn a. Bible chuan: “Pathian hnaih rawh u; tichuan, anin a hnaih ang che u,” tiin a sawi a ni. (Jak. 4:8) A nih leh, Jehova’n min hmangaih tih kan rinna chu engtin nge kan tih ngheh theih ang?

ENGIN NGE JEHOVA’N MIN HMANGAIH TIH PAWM TURA MIN ṬANPUI THEI?

6. Jehova’n a hmangaih che tih pawm harsa i tih chuan, eng nge i tih theih?

⁶ Dîl bîk neiin ṭawngṭai fan fan rawh. (Lk. 18:1; Rom 12:12) A ṭûl a nih chuan, ni khatah pawh vawi tam tak a thlîr dân che anga inthlîr thiam tûrin Jehova ṭanpuina dîl ang che. Ni e, inthiam lohna neih chu awlsam taka tih bo theih a ni lo va. Mahse, Jehova chu i thinlung aiin a ropui zâwk tih hre reng ang che. (1 Joh. 3:19, 20) I inhriat aiin a hre chiang zâwk che a; mize ṭha i neih i hmuh loh chu a hmuhsak che a ni. (1 Sam. 16:7; 2 Chro. 6:30) Chuvângin, i rilru vei zâwngte chu a hnêna ‘leih buak’ hreh lo la; a hmangaih che tih pawm thei tûrin a ṭanpuina dîl rawh. (Sâm 62:8) Tichuan, a hnuaia thurâwnte hi zâwmin i ṭawngṭaina milin thil ti ang che.

7-8. Engtin nge Sâm bu-a thute chuan Jehova’n min hmangaih tih min rin nghehtîr?

⁷ Jehova thusawi chu ring rawh. Bible ziaktute chu a nihna dik tak târ lang tûrin a chêttîr a. Sâm ziaktu Davida’n Pathianin min ngaihsakzia mawi taka a târ lan dân hi han ngaihtuah teh. “LALPA chuan thinlunga lungchhiate chu a hnaih ṭhîn a, rilrua inchhîr apiangte chu a chhandam ṭhîn.” (Sâm 34:18) Lunghnual taka i awm hian mal niin i inhre thei a. Mahse, chutiang hunah chuan, ṭum dang zawng aiin amah i mamawh zâwk tih a hriat avângin, Jehova’n hnaih tlat che a tiam a ni. Davida chuan: “Ka mittuite hi i savun pengah chuan thun ang che,” tiin a ziak bawk a. (Sâm 56:8) Jehova chuan lungchhia leh rilru naa i awm hian a hmu che a. A ngaihsak tak zet chein a tawrhpui tak zet che a ni. Thlalêra zin mi tân a savun penga tui far khat lek pawh a hlu angin, Jehova chuan i mittui far tinte chu a ngaihluin a khâwl khâwm a ni. Sâm 139:3-ah chuan: “[Jehova,] ka awm dân zawng zawng hi i hre vek a,” tiin kan chhiar a. Pathian chuan i awm dân zawng zawngte chu hmu mah se, i thil tih ṭhatte chauh a thlûr bing a ni. (Heb. 6:10) Engvângin nge? Amah ti lâwm tûra i ṭan lâkna zawng zawng chu a ngaihhlut vâng a ni.a

⁸ Jehova chu a Thu-a chûng min thlamuan thei Bible chângte hmanga: “Ka hmangaihzia che leh ngaihsakzia che hi i hriat ka duh,” tia sawi ang a ni. Mahse, kan hriat tawh angin, Setana chuan Pathianin a hmangaih lo che tih dâwt thu chu a theh darh a. Chuvângin, Pathianin a hmangaih che tih rinhlelh châng i neih chuan, heti hian inzâwt ang che: ‘Tu nge ka rin zâwk ang—“dâwt pa” nge “thutak Pathian”?’ tiin.—Joh. 8:44, NWT; Sâm 31:5.

9. Jehova’n amah hmangaihtute chu eng nge a tiam? (Exodus 20:5, 6)

⁹ Jehova’n amah hmangaihtute a thlîr dân chu ngaihtuah rawh. Mosia leh Israelte hnêna a thusawi hi han ngaihtuah teh. (Exodus 20:5, 6 chhiar rawh.) Amah hmangaihtute chunga hmangaihna rinawm lantîr zawm zêl a tiam a. Chûng thute chuan, kan Pathian rinawm tak chuan amah hmangaiha betute chu a hmangaih lêt ngei dâwn tih min tiam a ni. (Neh. 1:5) Chuvângin, Jehova’n a hmangaih che tih hriat nawntîr mamawh châng i neih chuan, ‘Jehova ka hmangaih em?’ tiin inzâwt ang che. Amah i hmangaiha a thinlung ti lâwm tûra theih tâwp i chhuah chuan, a hmangaih tak zet che tih i chiang thei a ni. (Dan. 9:4; 1 Kor. 8:3) Thu danga sawi chuan, Pathian i hmangaih tih rinhlelhna i neih loh chuan a hmangaih che tih chu engvângin nge i rinhlelh ang? I chunga a hmangaihna leh rinawmna chu rinhlelh rual a ni si lo.

10-11. Jehova’n tlanna chu eng anga thlîr tûrin nge a duh che? (Galatia 2:20)

¹⁰ Tlanna chu chhût ngun rawh. Isua Krista tlanna inthawina chu mihringte hnêna Jehova thilpêk ropui ber a ni a. (Joh. 3:16) Mahse, chu chu i tân mi mal taka thilpêk a ni em? Ni e! Tirhkoh Paula chungchâng hi han ngaihtuah teh. Kristian a nih hmain sual pawi takte a ti a, a hnuah pawh a ṭhat famkim lohnate a do chhunzawm zêl a ngai a ni. (Rom 7:24, 25; 1 Tim. 1:12-14) Chuti chung chuan, tlanna chu Pathian hnên aṭanga mi mal thilpêk angin a thlîr a. (Galatia 2:20 chhiar rawh.) Chumi chungchâng chu Bible-a ziak tûrin Pathianin a thâwk khum tih leh Bible-a chuang zawng zawng hi kan inzirna tûr a ni tih kan hria a ni. (Rom 15:4) Paula thusawite chuan Jehova’n tlanna chu a hnên aṭanga mi mal thilpêk anga thlîr tûrin a duh che tih a târ lang a. Tlanna chu chutianga i thlîr theih hunah, Jehova’n mi mal takin a hmangaih che tih i rinna chu i ti nghet thei dâwn a ni.

¹¹ Isua chu kan aia thi tûra leia a rawn tirh avângin Jehova chungah kan lâwm hle. Mahse, Isua leia a rawn kal chhan dang chu mi dangte hnêna Pathian chungchânga thutak hrilh tûrin a ni a. (Joh. 18:37) Chu thutakah chuan Pathianin a fate a thlîr dân chungchâng pawh a tel a ni.

JEHOVA’N MIN HMANGAIH TIH PAWM TURA ISUA’N MIN ṬANPUI DAN

12. Isua’n Jehova chungchâng a sawite chu engvângin nge kan rin theih?

¹² Leia a awm lai khân, Isua’n mi dangte hnêna Jehova miziate hrilh chu nuam a ti a. (Lk. 10:22) Pathian chungchânga a thusawite chu rin nachhan tûr ṭha tak kan nei a ni. A nihna takah chuan, leia a lo kal hmain vânah Jehova bulah kum chhiar sên loh a lo awm tawh a. (Kol. 1:15) Ama tawnhriat ngei aṭangin, Pathianin a fapa leh fanu rinawmte a hmangaihzia chu Isua’n a hria a ni. A nih leh, engtin nge Isua’n mi dangte chu Pathianin a hmangaih tih pawm tûra a ṭanpui?

13. Isua’n Jehova chu eng anga thlîr tûrin nge min duh?

¹³ Isua chuan Jehova chu a thlîr anga thlîr thiam tûrin min duh a. Chanchin Ṭha bu-ahte chuan, Pathian chu “Pa” tiin vawi 160 chuang a ko a ni. A hnungzuitute hnêna thu a sawi hunah “in Pa,” tih leh “in Pa vâna mi,” tih ṭawngkamte chu a hmang a. (Mt. 5:16; 6:26, NWT) Isua leia a lo kal hma chuan, betu rinawmte chuan Jehova chu ‘Engkimtithei,’ ‘Chungnungber,’ ‘Siamtu Ropui’ tih leh, a nihna dangtein an ko ṭhîn a ni. Mahse, Isua chuan Jehova chu kan ‘Pa’ tiin a ko fo va. Chu thu mal chuan, Pathianin a chhiahhlawhte chu fain a pa duh tak a pawh anga amah pawh tûrin a duh tih a târ lang a. Chuvângin, Isua’n Pathian chu A fate hmangaih êm êmtu Pa hmangaihna ngah tak anga thlîr tûrin min duh a ni. Tûnah, Isua’n “Pa,” tih thu mal a hmanna pahnih i lo bih chiang ang u.

14. Kan Pa vâna mi ngaihah mi mal tinte hi kan hlu tih engtin nge Isua’n a târ lan? (Matthaia 10:29-31) (Milem en bawk rawh.)

¹⁴ A hmasain, Matthaia 10:29-31-a Isua thusawi hi lo ngaihtuah ta ila. (Chhiar rawh.) Chawngzawngte chu Jehova hmangaiha be ngai lo tûr sava te reuh tê an ni a. Mahse, kan Pa chuan chawngzawng pakhat tê pawh a ngaihhlut avângin leia a tlâk hun a hria a ni. Amah an hmangaih avânga rinawm taka a rawngbâwltute chu a ngaihluin a va ngaihsak lehzual dâwn êm! Kan Pa chuan kan lua sam ṭo zât a hria tih Isua’n a sawi bawk a. Kan chungchânga chutiang thil tê tham pawh a hriat avângin, min ngaihsak tak zet tih kan chiang thei a ni. Kan Pa vâna mi ngaihah mi mal tinte hi kan hlu tih pawm tûrin Isua’n min duh tih a chiang hle.

15. Johana 6:44-a Isua thusawite chuan i Pa vâna mi chungchâng eng nge a hriattîr che?

¹⁵ Isua’n “Pa,” tih thu mal a hmanna dang hi lo chhiahchhiah ang che. (Johana 6:44 chhiar rawh.) I Pa vâna mi chuan mi mal takin—a nih loh leh, ngilnei takin—thutakah a hîp che a ni. Engvângin nge? Rilru dik tak i pu tih a hmuh vâng a ni a. (Tirh. 13:48) Isua’n Johana 6:44-a thute a sawi khân, Jeremia 31:3-a Jehova thusawite chu a sawi chhâwng a ni thei a. Chutah chuan Pathianin a mite hnênah: “Hmangaihna rinawmin ka lamah ka hîp tawh che,” tiin a sawi a ni. (Jer. 31:3, NWT; Hosea 11:4 nên khaikhin rawh.) Chumi awmzia chu han ngaihtuah teh. Kan Pa vâna mi chuan nangmaha ṭhatna awm i hmuh loh chu a hmu chhunzawm zêl tihna a ni.

16. (a) Isua’n eng nge min hrilh a, engvângin nge a thusawi chu kan awih ang? (b) Jehova chu i tâna Pa ṭha ber a ni tih i rinna chu engtin nge i tih ngheh theih ang? (“Kan Tâna Pa Ṭha Ber,” tih bâwm chu en rawh.)

¹⁶ Isua’n Jehova chu kan Pa tia a koh khân: “Jehova chu ka Pa mai a ni lo va; i Pa pawh a ni. A hmangaih chein mi mal takin a ngaihsak che tih i hriat ka duh,” tia sawi ang a ni. Chuvângin, Jehova’n a hmangaih che tih rinhlelh châng i neih chuan, ‘Kan Pa hre chiang bertu leh thu dik sawi reng ṭhîntu Fapa thusawi chu ka ring lo vang maw?’ tiin inzâwt ang che.—1 Pet. 2:22.

I RINNA CHU TI NGHET ZAWM ZEL RAWH

17. Jehova’n min hmangaih tih kan rinna chu engvângin nge kan tih ngheh zawm zêl a ngaih?

¹⁷ Jehova’n min hmangaih tih kan rinna chu kan tih ngheh zawm zêl a ngai a. Kan hriat tawh angin, kan hmêlma vervêk tak Setana chuan Pathian rawngbâwl kan bânsan theih nân a tih theih apiang a ti dâwn a. Thlarau lama min tih chak loh tumin, Pathianin min hmangaih tih kan rinnghehna chu min tih chhiatsak a tum reng dâwn a ni. Setana chu hnehna a chan kan phal ngai tûr a ni lo!—Job. 27:5.

18. Jehova’n a hmangaih che tih i rinna chu engtin nge i tih ngheh theih?

¹⁸ Pathianin a hmangaih che tih i rinna ti nghet tûr chuan a thlîr dân ang chea i inthlîr a ngai a. Chutianga ti thei tûr chuan a hnênah ṭawngṭai zawm zêl ang che. Bible ziaktute’n thlarauva thâwk khuma a hmangaihna duhawm tak an târ lan dân chu ngun takin ngaihtuah la. Jehova’n amah hmangaihtute chu hmangaih lêt lovin a awm ngai lo tih hre reng ang che. Tlanna chu i tâna mi mal thilpêk anga i thlîr theih chhan chu chhût ngun la. Jehova chu i Pa vâna mi a nih thu Isua’n a sawi chu ring bawk ang che. Tichuan, tu emawin, “Jehova’n a hmangaih che tih i chiang em?” tia a zawh hunah che, “Aw, min hmangaih tih ka chiang! Chuvângin, amah ka hmangaih tih lantîr tûrin nî tin theih tâwp ka chhuah,” tiin inrin tâwkna nei takin i chhâng thei dâwn a ni.