Thu Hrilhnaa Isua Ṭhahnemngaihna Chu Entawn Rawh

1. Kristian nia inchhâlte laka Jehova mite tidanglamtu pakhat chu eng nge ni?

KRISTIAN nia inchhâlte laka Jehova chhiahhlawhte tidanglamtu pakhat chu thu hrilhna atâna an ṭhahnemngaihnaa hi a ni. (Tit. 2:14) Mahse, thu hril tûra phûrna neih harsa tih châng kan nei thei a. “Thu hrilh châkna neih loh châng ka nei ṭhîn,” tia sawitu upa thawk rim tak pakhat ang chuan i awm ve thei a ni.

2. A châng chuan, engin nge thu hrilhna atâna ṭhahnemngaihna neih tiharsa thei?

² Thu hrilh rawngbâwlna aiin kawng danga Jehova rawngbâwl chu nuam kan ti zâwk thei a ni. Engvângin nge? Biakna atâna in saknaah te, thawm ṭhatnaah te, chhiat tâwkte ṭanpuinaah te leh, unaute kan fuih hunahte chuan a rah chhuah chu kan hmu nghâl thei a. Unaute nên inrem taka thawkhovin hmangaihna kan inlantîr tawn a. An tâna kan tihsakte chu an ngaihlu tih kan hre bawk. Kawng leh lamah chuan, kum tam tak thu kan lo hrilh tawhna bialah chhân lêtna ṭha tlêm tê chauh kan dawng emaw, mite’n kan thuchah chu an hnâwl emaw pawh a ni thei. Chu bâkah, tâwpna kan hnaih zêl rual hian dodâlnate chu a pun zêl kan beisei thei bawk. A nih leh, thu hrilhna atâna kan ṭhahnemngaihna chu nei reng tûrin, a nih loh leh tipung tûrin engin nge min ṭanpui thei?

3. Luka 13:6-9-na chuan Isua ṭhahnemngaihna chu engtin nge a târ lan?

³ Isua entawn tûr siam chu ngaihtuahin thu hrilhna atâna ṭhahnemngaihna neih dân kan zir thei a. Rawng a bâwl chhûng khân, mite hnêna thu hril tûrin a thawk rim reng a. A hnuah phei chuan a rawngbâwlna chu a zauh hial a ni. (Luka 13:6-9 chhiar rawh.) Theipui kûng rah neilo kum thum chhûng enkawltu grêp huan enkawltu angin, Isua chuan Judate hnênah kum thum chhûng thu a hril a, a tam zâwkin an lo hnâwl a ni. Amaherawhchu, grêp huan enkawltu chu theipui kûng chunga a beidawng lo angin, Isua pawh mite chungah a beidawng lo. Chu aiin, an thinlung thleng tûrin ṭan a la nasa lehzual sauh zâwk a ni.

4. Isua entawn tûr siam aṭangin eng thil pali nge kan zir theih?

⁴ He thuziakah hian a bîk takin, Isua’n a nun tâwp lam thla ruk chhûnga rawngbâwlnaa ṭhahnemngaihna a lantîr dân chu kan sawiho vang a. A thu zirtîrte chhût ngunna leh amah entawnna chuan thu hrilhnaa ṭhahnemngaihna nei reng tûrin min ṭanpui ang. Tûnah chuan, kawng lia Isua entawn tûr siam chu i lo sawiho vang u. (1) Jehova duh zâwng a ngaihtuah tlat a, (2) Bible hrilh lâwknate a ngaihven a, (3) Jehova ṭanpuina a rinchhan a; tichuan, (4) mite’n a thu hrilh an ngaithla ang tiin a êng zâwngin a thlîr tlat.

JEHOVA DUH ZAWNG A NGAIHTUAH TLAT

5. Isua’n Pathian duh zâwng a ngaihtuah tlat tih engtin nge a lantîr?

⁵ Pathian duh zâwng a ni tih a hriat avângin, Isua’n “Pathian Ram chanchin ṭha” chu ṭhahnemngai takin a hril a. (Lk. 4:43, NWT) Thu hrilhna chu a nunah a dah pawimawh ber a ni. A rawngbâwl tâwp lamah pawh mi dangte zirtîrin, “khaw lian leh khaw tête a fang zêl a.” (Lk. 13:22, NWT) Amah anga thu hril tûrin a zirtîrte chu zirtîrna a pêk belh bawk a ni —Lk. 10:1.

6. Thu hrilhna chu chanvo dang kan dawnte nên engtin nge a inzawm tlat? (Milem en bawk rawh.)

⁶ Tûn laiah pawh, chanchin ṭha hrilh chu Pathian Jehova leh Isua’n thawk tûra hna min pêk ber a ni a. (Mt. 24:14; 28:19, 20) Thu hrilhna leh theocratic chanvo dangte chuan inzawmna nghet tak an nei a ni. Entîr nân, rawngbâwlna biala mamawhte phuhru tûrin biakna atâna in saknaah te leh Bethel-ah te kan thawk a, chhiat tâwk unaute hnênah chhawmdâwlna kan pe ṭhîn bawk. Chhiat tâwk unaute hnêna chhawmdâwlna kan pêk chhan chu an tisa lam mamawhte ṭanpui nân a nih bâkah, thu hrilhna pawh tiamin thlarau lam hun duante an bawhzui leh vat theih nân a ni. Thu hrilh a pawimawhzia leh, chu chu thawk tûra Jehova hna min pêk ber a ni tih kan hriat reng chuan, chumia tel ziah tûra chêttîrin kan awm ang. Hungary rama kohhran upa János-a chuan: “Thu hrilhna hi eng theocratic hna dang mahin a thlâk thei lo vang tih ka inhriat nawntîr reng a, hei hi kan chanvo dawn pawimawh ber a ni,” tiin a sawi.

7. Engvângin nge Jehova chuan thu hril zawm zêl tûra min duh? (1 Timothea 2:3, 4)

⁷ Mite chu Jehova thlîr anga thlîrin rawngbâwlna atâna kan ṭhahnemngaihna chu kan tizual thei a. Ani chuan mi a tam thei ang berte’n chanchin ṭha an hriat a, an chhân lêt chu a duh a ni. (1 Timothea 2:3, 4 chhiar rawh.) Chuvângin, he nun chhanhim thei thuchah hriltu thiam lehzual ni tûrin min zirtîr a. Entîr nân, Mite Hmangaih La—Zirtîrahte Siam Rawh tih brochure-ah chuan mite zirtîra siam tuma tîtîna neih ṭanpui theih dân tûr thurâwn ṭangkai takte a chuang a. Mite chuan an chhâng lêt nghâl lo a nih pawhin, hrehawm nasa tak tâwp hmain chhân lêt theihna hun remchâng an nei thei ang. Tûna an hnêna kan thusawite chu nakina chhâng lêt tûra chêttîrtu a ni thei a. Mahse, thu kan hrilh chauhvin chutiang chuan an ti thei dâwn a ni.

HRILH LAWKNATE CHU A NGAIHVEN TLAT

8. Isua’n a hun neih chu a ṭha thei ang bera hmang tûrin eng Bible hrilh lâwknate’n nge ṭanpui?

⁸ Isua chuan Bible hrilh lâwknate thlen famkim dân tûr chu a hria a. Entîr nân, kum thum leh a chanve chhûng chauh rawng a bâwl dâwn tih a hria a. (Dan. 9:26, 27) A thih hun tûr leh a thih dân tûr chungchânga hrilh lâwknate pawh a hre bawk a ni. (Lk. 18:31-34) Hrilh lâwknate a hriat chian avângin a hun neih chu a ṭha thei ang berin a hmang a. A hna thawk zo tûrin ṭhahnemngai takin thu a hril a ni.

9. Engvângin nge Bible hrilh lâwknate chuan ṭhahnemngai taka thu hril tûra min chêttîr?

⁹ Bible hrilh lâwknate hriatthiamna chuan ṭhahnemngai taka thu hril tûrin min chêttîr thei a. He kalhmang hi a tâwp ṭêp tawh tih kan hria a ni. Bible chuan ni hnuhnûng chhûnga mite awm dân tûr leh thil tih tûrte chu a sawi lâwk a, chûngte chu tûnah kan hmu mêk a ni. Anglo-American Khawvêl Thuneitu leh Russia leh a ṭanrualpuite inkâra awm inhmêlmâkna chuan ‘tâwpna huna’ chhim lam lal leh hmâr lam lal chungchânga Bible hrilh lâwkna chu a thlen famkimtîr tih kan hre thiam a. (Dan. 11:40) Daniela 2:43-45-a târ lan milim kephah chuan Anglo-American Khawvêl Thuneitu hi a entîr tih kan hre thiam bawk a ni. Hrilh lâwknain a sawi angin, rei lo têah—kan hma lawkah—Pathian Ram chuan mihring sawrkârte hi a rawn tichhe dâwn tih kan ring nghet tlat a. Hêng hrilh lâwkna zawng zawngte hian tâwpna kan hnaih tawh hle tih a târ lan avângin, hmanhmawhna rilru pua thu hril tûrin min chêttîr a ni.

10. Bible hrilh lâwknate chuan eng kawng dangtein nge kan ṭhahnemngaihna chu a tihzual theih?

¹⁰ Bible hrilh lâwknaahte chuan mite hnêna hrilh nuam kan tih tak thute a tel bawk a. Dominican Republic-a awm unaunu Carrie-i chuan: “Hma lam hun ṭha zâwk chungchânga Jehova thutiam phûrawm takte chuan mi dangte hnêna thutak hrilh tûrin min chêttîr a. Tûn laia mite dinhmun tawnte ka ngaihtuah hian chûng thutiamte chu keima tân chauh ni lovin an tân pawh a ni tih ka hria,” tiin a sawi. Bible hrilh lâwknate chuan Jehova’n min ṭanpui dâwn tih a târ lan avângin thu hril zawm zêl tûra tihchakin kan awm a. Hungary rama awm Leila-i chuan: “Isaia 11:6-9-a thute chuan chanchin ṭha pawm duh lo tûr anga langte hnênah pawh thu hril tûrin min chêttîr a. Jehova ṭanpuinain tu pawh an inthlâk danglam thei tih ka hria,” tiin a sawi a ni. Zambia rama unaupa Christopher-a pawhin: “Marka 13:10-a hrilh lâwk angin, chanchin ṭha chu khawvêl puma hrilh chhuah mêk a ni a, he hrilh lâwkna thlen famkimnaa ka ṭanpui ve thei hi chawimawina angin ka ngai,” tiin a sawi bawk. Thu hril zawm zêl tûrin eng Bible hrilh lâwknate’n nge chêttîr che?

JEHOVA ṬANPUINA CHU A RINCHHAN

11. Engvângin nge Isua chuan ṭhahnamngai taka thu hril zawm zêl thei tûra Jehova a rinchhan a ngaih? (Luka 12:49, 53)

¹¹ Isua chuan ṭhahnemngai taka thu hril zawm zêl tûrin Jehova ṭanpuina chu a rinchhan a. Fing thiam takin thu hril mah se, Lalram chanchin ṭha chuan inhnial buaina leh dodâlna nasa tak a awmtîr dâwn tih a hria a. (Luka 12:49, 53 chhiar rawh.) Sakhaw hruaitute chuan Isua thu hrilhna chu an duh loh avângin vawi tam tak tihhlum an tum a ni. (Joh. 8:59; 10:31, 39) Mahse, Pathianin a awmpui tih a hriat avângin thu a hril zawm zêl a. ‘Keimah chauh ka ni lo, Pa mi tîrtu chuan min awmpui a. Englai pawha a lâwm zâwng ka tih ṭhin avângin, min thlahthlam lo,’ tiin a sawi a ni.—Joh. 8:16, 29, NWT.

12. Isua’n a zirtîrte chu tihduhdahna an tawrh hun pawha thu hril zawm zêl tûrin engtin nge a buatsaih?

¹² Isua’n a zirtîrte chu Jehova ṭanpuina an rinchhan thei tih a hriat nawntîr a. Tihduhdahna an tawrh hunah pawh Pathianin a ṭanpui ang tih vawi tam tak a tiam nawn a ni. (Mt. 10:18-20; Lk. 12:11, 12) Mi tam takin an dodâl dâwn tih a hriat avângin, fîmkhur tûrin a fuih a. (Mt. 10:16; Lk. 10:3) Ngaithla duh lote hnêna thu hril lui lo tûrin a hrilh a. (Lk. 10:10, 11) Tihduhdahna an tawrh hunah tlân chhe tûrin a hrilh bawk. (Mt. 10:23) Isua chuan Jehova rinchhanin ṭhahnemngai hle mah se, dinhmun hlauhawmte chu a theih phawt chuan a pumpelh ṭhîn a ni.—Joh. 11:53, 54.

13. Engvângin nge Jehova’n a ṭanpui ang che tih i chian theih?

¹³ Tûn laiah pawh, tihduhdahna kâra ṭhahnemngai taka thu hril zawm zêl thei tûrin Jehova ṭanpuina kan mamawh a. (Thup. 12:17) A ṭanpui ang che tih engvângin nge i chian theih? Johana 17-a chhinchhiah Isua ṭawngṭaina hi lo ngaihtuah ta ila. Isua’n ṭawngṭainaa a dîl angin Jehova chuan tirhkohte chu a vênghim a. Tirhkohte bu chuan tihduhdahna kârah pawh ṭhahnemngai taka thu hril tûra Pathianin a ṭanpui dân chu a târ lang a ni. Chu bâkah, Isua’n a ṭawngṭainaah chuan tirhkohte thu hrilh lo pawmtute pawh vênghim tûrin a dîl bawk. An zîngah chuan nang pawh i tel a ni. Jehova chuan Isua ṭawngṭaina chu a chhâng zêl a, tirhkohte a ṭanpui angin nang pawh a ṭanpui ang che.—Joh. 17:11, 15, 20.

14. Engtin nge ṭhahnemngai takin thu kan hril zawm zêl thei ang tih kan hriat? (Milem en bawk rawh.)

¹⁴ Tâwpna a hnaih zêl rual hian chanchin ṭha hril tûra ṭhahnemngaihna neih chu a harsa lehzual a nih pawhin, kan mamawh ṭanpuina zawng zawng chu kan dawng ang. (Lk. 21:12-15) Isua leh a zirtîrte angin, mite chu kan thu hrilh ngaithla tûrin kan tilui lo va, kan inhnialpui lo bawk. Kan rawngbâwlna khapbeh a nih hunah pawh kan unaute chuan mahni chakna ni lovin, Jehova an rinchhan avângin chanchin ṭha chu an hril zawm zêl thei a. Pathian chuan kum zabi khatnaa a chhiahhlawhte hnêna a chakna a pêk ang bawkin, tûn laiah pawh ‘a duh anga chanchin ṭha hrilh kim’ a nih theih nân a chakna chu min pe a ni. (2 Tim. 4:17) Chuvângin, Jehova i rinchhan chuan ṭhahnemngai takin thu i hril zawm zêl thei ang tih i ring nghet tlat thei a ni.

A ENG ZAWNGIN A THLIR TLAT

15. Isua’n rawngbâwlna chu a êng zâwngin a thlîr tlat tih engin nge târ lang?

¹⁵ Isua chuan thu hrilhna chu a êng zâwngin a thlîr tlat a. Chu chuan phûr taka rawngbâwl zêl tûrin a ṭanpui a ni. Entîr nân, C.E. 30 tâwp lamah chuan mi tam takin a thu hrilhna chu an chhâng lêt tih a hria a, anni chu buh hmin tawh nên a tehkhin a ni. (Joh. 4:35) Kum khat hnu vêlah a zirtîrte chu: “Buh seng tûr a tam hle,” tiin a hrilh a. (Mt. 9:37, 38, NWT) A hnuah pawh: “Buh seng tûr a tam hle a . . . Buh Neitupa hnênah chuan buh sengtu tûrte tîr chhuak tûrin ngên rawh u,” tiin a sawi nawn leh bawk. (Lk. 10:2, NWT) Isua’n chanchin ṭha chu mite’n an chhâng lêt thei tih a hria a, an chhân lêt chuan a hlim hle a ni.—Lk. 10:21.

16. Engtin nge Isua tehkhin thu sawite chuan a zirtîrte chu a êng zâwnga an rawngbâwlna thlîr tûra a ṭanpui? (Luka 13:18-21) (Milem en bawk rawh.)

¹⁶ Isua’n a zirtîrte chu an thuchah ken chungchânga a êng zâwnga thlîr tlat tûra zirtîrin ṭhahnemngaihna nei zêl tûrin a ṭanpui a. Entîr nân, a tehkhin thu sawi pahnih hi han ngaihtuah teh. (Luka 13:18-21 chhiar rawh.) Anṭam chi tehkhin thu hmangin Lalram thuchah chu mak taka darh zauvin dan rual a ni lo vang tih a zirtîr a. Tichuan, dawidim tehkhin thu hmangin Lalram thuchah chu zau taka hrilh a ni ang tih leh a rah chhuah chu hriat mai theih a ni lo vang tih a hrilh bawk. Chutiang chuan, an thu hrilhna chu a hlawhtling ngei ang tih hre thiam tûrin a zirtîrte chu a ṭanpui a ni.

17. Rawngbâwlna chu a êng zâwnga thlîr chhan tûr engte nge kan neih?

¹⁷ Tûna khawvêl puma hlen chhuah tawhte ngaihtuahna chuan ṭhahnemngai taka thu hril zawm zêl tûrin min chêttîr a. Kum tin hian, ngaihventu mi maktaduai têlte chu Hriatrengna inkhâwma rawn telin Bible an zir a. Mi sâng tam tak chuan baptisma changin thu hrilhnaah an rawn tel a. Mi eng zâtin nge kan thu hrilhna chu la rawn chhâng lêt ang tih kan hre lo; mahse, Pathianin hrehawm nasa taka dam khawchhuak tûr mipui tam tak chu a la khâwm mêk tih kan hria a. (Thup. 7:9, 14) Buh Neitupa chuan mi tam takin chanchin ṭha chu an chhâng lêt zêl dâwn tih a rin ngheh tlat avângin, thu hrilh zawm zêlna tûr chhan ṭha tak kan nei a ni.

18. Mite’n min hmuh hunah eng nge an hriat kan duh?

¹⁸ Isua zirtîrte chuan ṭhahnemngai taka thu an hrilh avângin hriat an hlawh a. Tirhkohte’n huaisen takin thu an hril tih an hmuhin, mite chuan “Isua hnênah an awm ṭhîn tih an lo hre ta a.” (Tirh. 4:13, NWT) Rawngbâwlnaa mite’n min hmuh hunah, keini pawh Isua ṭhahnemngaihnaa chêttîrin kan awm tih an hriat kan duh a ni.