“Lei Chung Zawng Zawng Rorêltu” Zahngaihna Chu Rinchhan Rawh!

1. Eng zir tûr thlamuanthlâk tak nge Jehova’n Abrahama a zirtîr?

HEI hi Abrahama theihnghilh ngai loh tûr inbiakna a ni. Pathianin vântirhkoh pakhat hmangin Abrahama hnênah Sodom leh Gomorra khawpui a tihboral tûr thu a hrilh a. Chu thu chuan chu mi rinawm ngaihtuahna chu a tibuai hle a. Ani chuan: “Mi felte chu mi sualte zîngah i tiboral ve dâwn em ni? . . . Lei chung zawng zawng Rorêltu chuan fel takin a ti dâwn lâwm ni?” tiin a zâwt a. Jehova chuan dawhthei takin a mihring ṭhian duh tak chu kan vaia kan hlâwkpui theih tûr leh kan thlamuanpui theih tûr thu a zirtîr a ni: Pathianin mi felte chu a tiboral ngai lo vang tih chu.—Gen. 18:23-33.

2. Jehova chuan engtik lai pawhin dik tak leh zahngaihna nei takin ro a rêl ṭhîn tih engtin nge kan chian theih?

² Engtin nge Jehova’n mihringte chunga ro a rêl hian a dikin, zahngaihna a nei tih kan chian theih? “[Jehova] erawh chuan thinlung lam a en zâwk ṭhîn,” tih kan hriat vâng a ni. (1 Sam. 16:7) Dik takin, ani chuan “mihring fa zawng zawng thinlung” a hria a. (1 Lal. 8:39; 1 Chro. 28:9) Chu chu thu dik ropui tak a ni. Jehova rorêl dikna chu kan hriatthiam phâk a ni lo va. Chuvângin, Pathianin tirhkoh Paula chu: ‘Pathian rorêlnate chu chhui theih rual a va ni lo êm!’ tia ziak tûrin a thâwkkhum a ni!—Rom 11:33.

3-4. Eng nge ngaihtuah châng kan neih mai theih a, he thuziakah hian eng nge kan sawiho vang? (Johana 5:28, 29)

³ Chuti chung pawhin, Abrahama anga zawhna neih châng kan nei thei a. Heti hian kan ngaihtuah thei a ni: ‘Sodom leh Gomorra khuaa mite anga Pathianin a tihboralte chu an tho leh ang em? Chûng zînga mi ṭhenkhat chu ‘mi fel lote thawhlehnaah’ an tel thei ang em?’ tiin.—Tirh. 24:15.

⁴ Thawhlehna chungchâng kan hriatthiamnate chu i lo ennawn ang u. Tûn hnai lawk khân, ‘nunna changa thawhlehna’ leh ‘thiam loh changa thawhlehna’ chungchânga hrilhfiahna chiang zâwk kan dawng a.a (Johana 5:28, 29 chhiar rawh.) Chu hriatthiamna chiang zâwk avânga siamrem ngai dangte chu he thuziakah leh a dawta thuziakah sawiho a ni ang. Jehova rorêl felna chungchânga kan hriat lohte leh kan hriatte kan sawiho hmasa ang.

KAN HRIAT LOHTE

5. Tûn hmain kan thu leh hla chhuahte chuan Sodom leh Gomorra khuaa tihboralte chungchângah engtin nge a lo sawi?

⁵ Tûn hmain kan thu leh hla chhuahahte chuan Jehova’n mi fel lote nia a ruatte chunga thil thleng tûr chungchânga zawhna chu târ lan a ni tawh a. Sodom leh Gomorra khuaa mite ang tân nakin huna thawhlehna beisei tûr a awm lo tiin kan lo sawi tawh a ni. Mahse, ṭawngṭaia chumi chungchâng ngun taka zir chianna chuan, chutiang chuan chiang takin kan sawi thei ang em? tih zawhna a tichhuak a ni.

6. Mi fel lote chunga Jehova rorêlna chungchânga entîrna ṭhenkhat chu eng nge ni a, kan hriat loh chu eng nge ni?

⁶ Chumi nêna inkûngkaih zawhnate chu lo ngaihtuah ta ila. Bible-ah hian Tuilêt laia an zât hriat loh mi tam tak thihna, a nih loh leh Jehova’n a mite hnêna thu pea Ram Tiama hnam pasarihte tihboralna leh zan khata Jehova vântirhkoh pakhatin Assuria sipai mi 1,85,000 a tihboralna ang chi Jehova’n mi fel lote chunga a rorêlna târ lanna tam tak a chuang a. (Gen. 7:23; Deut. 7:1-3; Is. 37:36, 37) Chutiang dinhmuna thi zawng zawngte chu Jehova’n thawhlehna beiseina nei lovin, chatuana boral tûrin a duh tih Bible-ah târ lanna chiang tak a awm em? Awm lo, chutiang chuan a sawi lo. Engvângin nge chutianga kan sawi theih?

7. Tuilêta tihboralte leh Israel mite’n Kanaan ram an hneh ṭuma an tihboralte chungchângah eng nge kan hriat loh? (A kâwma milem en rawh.)

⁷ Jehova’n mi tinte chunga ro a rêl dân kan hre lo va; tihborala awmte chuan Jehova chungchâng zirna leh inchhîrna hun remchâng an neih leh neih loh kan hre lo a ni. Tuilêt hun lai chungchângah Bible chuan Nova chu “felna thu hriltu” tiin a sawi a. (2 Pet. 2:5) Mahse, chu lawng lian tak a tuk lai chuan Tuilêta tihboralna hmachhawn tûr leia mi zawng zawngte hnênah theih tâwp chhuahin thu a hril chhuak tih Bible-ah târ lanna a awm lo. Chutiang bawkin, Kanaan rama chêng mi suaksual zawng zawngte pawhin, Jehova chungchâng zirna leh an nun kawng thlâk danglamna hun remchâng an neih leh neih loh kan hre lo a ni.

8. Sodom leh Gomorra khuaa mite chungchângah eng nge kan hriat loh?

⁸ Sodom leh Gomorra khuaa tihboralte chungchâng hi eng nge ni ve? An zînga mi fel awmchhun chu Lota chauh a ni si a. Mahse, Lota chuan mi zawng zawng hnênah thu a hril tih kan hria em? Hre lo. Mi suaksual tak erawh an ni a; mahse, an vaiin thil dik leh dik lo an hre vek ang em? Chu khawpuia mipuite’n Lota mikhualte pâwngsual an tum kha han ngaihtuah lêt teh. Bible chuan vêng tina mipui ‘apui apangte’ an tel tih a sawi a. (Gen. 19:4; 2 Pet. 2:7) Zahngaihna nei tak Pathian Jehova chuan chûng mite chu thawhlehna beiseina nei lovin an thi tih a nemnghehna chiang tak kan hria em? Ani chuan Abrahama hnênah chu khuaah chuan mi fel sâwm pawh an awm lo tih a hrilh a ni. (Gen. 18:32) Chuvângin, mi fel lo an ni a, Jehova’n an thiltihte avânga thi tlâk an nih avângin a tiboral mai a ni. Chuvângin, ‘mi fel lote thawhlehnaah’ an zînga mi tu mah an tho leh tawh lo vang tih chiang takin kan sawi thei em? Kan sawi thei lo!

9. Solomona chungchângah eng nge kan hriat loh?

⁹ Kawng leh lamah chuan, Bible-ah mi fel ni a, a hnua mi fel lo ni tate chungchâng tam tak a chuang a. Entîrna pakhat chu Lal Solomona a ni. Ani chuan Pathian kawng chungchâng chipchiar taka zirtîrna dawngin, malsâwmna nasa tak a dawng a; mahse, a hnuah pathian dik lote a bia a ni. Chu chuan Jehova a tithinur hle a, Solomona sualna avâng chuan kum za tam tak chhûng Israel mite’n hrehawm an tawrh phah a ni. Ni e, Bible chuan Solomona chu Lal Davida anga mi rinawm “a pute hnênah chuan a muhîl,” tiin a sawi ngei mai. (1 Lal. 11:5-9, 43; 2 Lal. 23:13) Mahse, phûm a nih dân chu a tho leh ngei ang tihna a ni em? Bible chuan a sawi lo. Mi ṭhenkhat chuan “tu pawh thi tawh chu sual lakah a chhuak tawh,” tiin an ngaihtuah mai thei a. (Rom 6:7) Mahse, chu chu mitthi zawng zawngte an tho leh ang tihna a ni lo va, an thih avâng maiin tho leh tûrin dikna an nei tihna a ni hek lo. Thawhlehna chu hmangaihna Pathian hnên aṭanga thilpêk a ni. Chu chu kumkhuaa A rawngbâwl tûra a duhte hnênah a pe a. (Job. 14:13, 14; Joh. 6:44) Chu thilpêk chu Solomona’n a dawng ang em? Chu chhânna chu keini chuan kan hre lo va; Pathian Jehova chauhvin a hria a. Mahse, ani chuan dik takin thil a ti reng ṭhîn tih kan hria a ni.

KAN HRIATTE

10. Engtin nge Jehova chuan mihringte tihboralna chungchâng chu a ngaih? (Ezekiela 33:11) (Milem en bawk rawh.)

¹⁰ Ezekiela 33:11 chhiar rawh. Jehova chuan mihringte chunga a rorêl dân chungchânga a rilru awm dân chu min hrilh a. Tirhkoh Petera chu zâwlnei Ezekiela ziah ang bawka ‘Jehova chuan tu ma boral a duh lo,’ tia ziak tûra thâwkkhum a ni. (2 Pet. 3:9) Chu thu thlamuanthlâk tak aṭang chuan Pathianin mite chu chhan ṭha tak awm lovin chatuan atân a tiboral mai lo tih kan hria a ni. Ani chu zahngaihnaa khat a ni a, a theih phawt chuan mite chungah zahngaihna a lantîr ṭhîn a ni.

11. Tute nge kaihthawh ni lo vang a, chu chu engtin nge kan hriat?

¹¹ Thawhlehna chang lo tûrte chungchângah eng nge kan hriat? Bible chuan entîrna tlêm tê chauh a târ lang a. Isua chuan Juda Iskariota chu a tho tawh lo vang tih a sawi a ni. (Mk. 14:21; Joh. 17:12b) Juda chuan Pathian Jehova leh A Fapa chu hre reng chunga dodâlin thil a ti a. (Mk. 3:29 leh w07 8/1 p. 13.) Chutiang bawkin, Isua chuan amah dodâltu sakhaw hruaitu ṭhenkhat chuan thawhlehna beiseina an nei lo tih a sawi a ni. (Mt. 23:33) Chu bâkah, tirhkoh Paula pawhin inchhîrna nei lo kalpêngte chu kaihthawh an ni lo vang tih a vaukhân bawk.—Heb. 6:4-8; 10:29.

12. Jehova zahngaihna chungchâng eng nge kan hriat? Entîrna pe rawh.

¹² A nih leh, Jehova zahngaihna chungchâng eng nge kan hriat? Engtin nge ani chuan ‘tu ma boral a duh lo,’ tih a lantîr? Sual lian tak titu mi ṭhenkhat chunga zahngaihna a lantîr dân hi han ngaihtuah teh. Lal Davida chuan uirêna leh tualthahna ang chi sual pawi tak a ti a. Mahse, ani chu a inchhîr avângin Jehova chuan zahngaihna nei takin a ngaidam a ni. (2 Sam. 12:1-13) Lal Manasea chuan a dam chhûng hun tam zâwk chu thil sual râpthlâk tak takte tih nân a hmang a. Mahse, chutiang dinhmunah pawh a inchhîr avângin Jehova chuan a ngaidamin, a chungah zahngaihna a lantîr a ni. (2 Chro. 33:9-16) Chûng entîrnate chuan Jehova’n zahngaihna lantîrna tûr chhan ṭha a hmuh apiangin zahngaihna a lantîr ṭhîn tih min hriatnawntîr a. Ani chuan chutiang mite chu an sualnate pawm a, sima an inchhîr tih a hriat avângin a kai tho leh ang.

13. (a) Engvângin nge Jehova’n Ninevi khuaa mite chungah zahngaihna a lantîr? (b) Isua’n a hnuah Ninevi khuaa mite chungchâng eng nge a sawi?

¹³ Jehova’n Ninevi khuaa mite chunga zahngaihna a lantîrna chungchâng kan hre bawk. Ani chuan Jona hnênah: “An suahsualna chu ka hmâah a lo thleng chho ta si a,” tiin a hrilh a. Mahse, an sualte sima an inchhîr chuan Jehova’n ngilneihna lantîrin a ngaidam a ni. Ani chuan Jona aiin zahngaihna nasa tak a nei si a. Pathianin a zâwlnei thinrim tak chu chûng Ninevi khuaa mite chu “an ding leh vei pawh thliar thei lote” an ni tia a hriatnawntîr a ngai a. (Jon. 1:1, 2; 3:10; 4:9-11) A hnuah, Isua chuan chu entîrna chu Jehova rorêl dikna leh zahngaihna chungchâng zirtîr nân a hmang a. Ninevi khuaa inlamlêtte chu “rorêlna nîah chuan . . . kaihthawh an ni ang,” tiin a sawi a ni.—Mt. 12:41, NWT.

14. Ninevi khuaa mite tân ‘thiam loh changa thawhlehna’ chuan eng awmzia nge a neih ang?

¹⁴ Ninevi khuaa mite chu “rorêlna nîah chuan . . . kaihthawh an ni ang,” tih a sawi awmzia chu eng nge ni? Isua chuan nakina ‘thiam loh changa thawhlehna’ chungchâng a zirtîr a. (Joh. 5:29) Ani chuan “mi felte leh fel lote” thawhleh hun tûr a Kum Sâng Rorêlna chungchâng a sawi a ni. (Tirh. 24:15) Chu chu mi fel lote tân ‘thiam loh changa thawhlehna’ a awm ngei ang a tihna a ni a. Jehova leh Isua’n an nungchang leh Pathian zirtîrnate an chhân lêt dân chu ngun taka thlîr rengin an enfiah ang. Ninevi khuaa tho lehte chuan biakna dik an hnâwl a nih chuan Pathianin anni chu nun chhunzawm a phal lo vang. (Is. 65:20) Mahse, rinawm taka Jehova biak thlangtu zawng zawngte chuan rorêlnaah duhsakna an dawng ang a. Anni chuan chatuana nun beiseina an nei ang!—Dan. 12:2.

15. (a) Engvângin nge Sodom leh Gomorra khuaa tihboralte chu tu mah kaihthawh an ni lo vang tia kan sawi loh vang? (b) Engtin nge Juda 7-a thute chu kan hriatthiam mai theih? (“Juda Sawi Tum Chu Eng Nge Ni?” tih bâwm chu en ang che.)

¹⁵ Isua’n “Rorêlna Nîah chuan” Sodom leh Gomorra khuaa mite dinhmun chu amah leh a zirtîrna hnâwltute dinhmun aiin a ṭha zâwk ang tih a sawi a. (Mt. 10:14, 15, NWT; 11:23, 24; Lk. 10:12) Eng a sawi duhna nge? Chumi ṭum chuan Isua’n sawi uar nân a hmang mai niin kan ngai thei a. Mahse, Isua’n Ninevi khuaa mite chungchâng a sawi ang bawkin, thil lo thleng tûr a sawina niin a lang. Isua sawi awmzia chu a inang a. Chûng “Rorêlna Nî” a sawite chu thil thuhmun a ni. Ninevi khuaa mite ang bawkin, Sodom leh Gomorra khuaa mite chuan thil sual an ti a. Mahse, Ninevi khuaa mite chuan inchhîrna hun remchâng an nei a ni. Chuvângin, Isua’n ‘thiam loh changa tho lehte’ chungchâng a sawi kha hre reng ang che.Chutah chuan “thil sual titute” pawh an tel ang. (Joh. 5:29) Chuvângin, Sodom leh Gomorra khuaa mite tân beisei tûr a awm niin a lang. Chûng mite zînga ṭhenkhat chu rawn tho lehin, Jehova leh Isua Krista chungchâng zirtîr theihna hun remchâng kan nei thei a ni!

16. Jehova’n tho leh tûrte a ngaihtuah dân chungchângah eng nge kan hriat? (Jeremia 17:10)

¹⁶ Jeremia 17:10 chhiar rawh. He Bible châng hian Jehova chu engtik lai pawhin, “rilru en chhuaktu, thinlung fiahtu” a ni tih kan hriatte chu khaikhâwm tûrin min ṭanpui a. Ani chuan tho leh tûrte chungchâng a ngaihtuah hunah ‘mi tin an awm dân ang zêlin’ ro a rêl ang. Jehova chuan a ṭûl hunah khauh takin rorêl mah se, a theih phawt chuan zahngaihna a lantîr ang. Chuvângin, Bible-in chiang taka a târ lanna kan hriat loh chuan tu emaw tân thawhleh beiseina a awm lo tiin kan sawi tûr a ni lo!

“LEI CHUNG ZAWNG ZAWNG RORELTU” CHUAN “FEL TAKIN A TI DAWN”

17. Mitthite chungah eng thil nge thleng ang?

¹⁷ Evi leh Adama chu Setana lamah ṭangin Pathian laka an hel aṭang khân, mihring tlûklehdingâwn tam tak an thi tawh a. Chu “hmêlma,” “thihna” chuan mihring nunna a la nasa hle! (1 Kor. 15:26) Chûng mitthi zawng zawngte chungah eng nge thleng ang? Krista hnungzuitu mi rinawm tlêm tê, mi 1,44,000 te chu vânah thih theih lohna nun changin an tho leh ang a. (Thup. 14:1) Jehova hmangaihtu mi rinawm a hmei a pate chu “mi fel” niin an “ tho” leh ang a, Krista Kum Sâng Rorêl chhûng leh fiahna hnuhnûng ber hnua mi fel an nih reng chuan leiah hian chatuanin an nung ang. (Dan. 12:13; Heb. 12:1) Chu bâkah, Kum Sâng Rorêl chhûng chuan Jehova rawng la bâwl ngai lotute, a nih loh leh “thil sual titute” pawh tiamin mi fel lote chu an nun kawng thlâk danglama mi rinawm nih theihna hun remchâng pêk an ni ang. (Lk. 23:42, 43) Mahse, mi ṭhenkhat chu suaksual tak an ni a, Jehova leh a thil tumte an dodâl tlat avângin, anni chu kaihthawh an ni tawh lo vang.—Lk. 12:4, 5.

18-19. (a) Engvângin nge mitthi tawhte chungchânga Jehova rorêl dân tûrte chu kan rin ngheh tlat theih? (Isaia 55:8, 9) (b) A dawta thuziakah eng nge kan sawiho vang?

¹⁸ Jehova’n mite chunga ro a rêlna zawng zawngah hian engtik lai pawhin thu tlûkna dik a siam tih rinngheh tlatna tûr chhan ṭha kan nei em? Nei e! Abrahama chuan Jehova chu “lei chung zawng zawng Rorêltu” ṭha famkim, finna zawng zawng neitu leh zahngaihna nei tak a ni tih a hria a ni. Pathian Jehova chuan a Fapa chu zirtîrin rorêlna zawng zawng chu a hnênah a hlân a. (Joh. 5:22) Pa leh Fapa chuan mihring thinlunga awmte an hre thei a. (Mt. 9:4) Mi tinte chunga ro an rêl hunah “fel takin” thil an ti ang!

¹⁹ Jehova chuan a ṭha ber tûr a hria tih i ring nghet tlat ang u. Ani chu rorêltu atâna tling ber a ni tih kan hre si a! (Isaia 55:8, 9 chhiar rawh.) Chuvângin, amah leh a rorêl dikna leh zahngaihna ṭha famkima entawntu Lal, A Fapa hnênah rorêlna zawng zawng chu ngaihngam takin kan hlân a ni. (Is. 11:3, 4) A nih leh, Jehova leh Isua’n hrehawm nasa tak chhûnga mite chunga ro an rêl dân tûr chungchângah eng nge kan sawi theih? Eng nge kan hriat loh va, eng nge kan hriat? Chûng zawhnate chu a dawta thuziakah sawiho a ni ang.