1921—Kum Za Liam Ta Khan

“KUM 1921, January 1 chhuak Vênnainsâng chuan kumin atân eng hna nge kan beisei theih?” tiin Bible Zirlaite chu a zâwk a. A chhânnaah, Isaia 61:1, 2-a thu chu la chhuakin, an thawh tûr hna chu chanchin ṭha hrilh a ni tih hetianga hriatnawntîr an ni: ‘Thuhnuairawlhte hnênah chanchin ṭha hril tûra LALPAN hriak mi thih avângin, LALPA lungawi kum thu leh kan Pathian phuba lâk nî thu sawi tûrin,’ tiin.

HUAISEN TAKA THUHRILTUTE

Bible Zirlaite chu an mawhphurhna hlen tûr chuan, an huaisen a ngai a. Thuhnuairawlhte hnêna “chanchin ṭha” an hrilh bâkah, mi suaksualte hnênah “phuba lâk nî” chungchâng an sawi a ngai bawk.

Canada rama awm Unau J. H. Hoskin-a chuan dodâlna kârah pawh huaisen takin thu a hril a. Kum 1921 tîr lamah, Methodist rawngbâwltu pakhat a tawng a. Unau Hoskin-a chuan: “Bible chungchâng ṭha takin kan sawi dûn thei a, thil ṭhenkhatah kan ngaih dânte a inang lo a nih pawhin, kan tîtîna chu intihbuaina awm lovin, ṭha takin kan titâwp mai tûr a ni,” tiin a sawi ṭan a. Mahse, chutiang chuan thil a thleng lo. Unau Hoskin-a chuan heti hian a sawi a ni: “Minute rei lote chhûng chauh kan tîtî hman a, ani [chu rawngbâwltu] chuan kawngka dârthlalangte a tla thla ta emaw tihkhawp tûra nâin, a khâr ta chawrh mai a,” tiin a sawi.

Chu rawngbâwltu chuan: “Engati nge Kristian la ni lote hnêna i hrilh loh?” tiin min hrâwk hrep mai a. Unau Hoskin-a chuan engmah chhâng lêt lovin a chhuahsan a, a kal chhuah lai chuan ‘Kristian la ni lo mi pakhat chu ka hrilh der tawh a nih hi!’ tiin a ngaihtuah a ni.

Chu rawngbâwltu chuan a tûkah an biak inah thu a sawi a, Unau Hoskin-a chu a la sawisêl ta cheu va. Unau Hoskin-a’n heti hian a sawi: “Kei hi an khuaa va kal tawh azawnga dâwt sawi hmang ber ka ni a, tihhlum tlâk hial ka nih thu mite a hrilh a,” tiin. Mahse, Unau Hoskin-a chuan hlauhna chhetê mah nei lovin, mi tam tak hnênah thu a hril zawm zêl a. Ani chuan: “Chumi hmuna thu hrilh chu nuam ka ti tak zet a. Mi ṭhenkhat phei chuan, ‘Pathian mi i ni tih ka hria!’ tiin an sawi hial a, eng mah ka tlâkchham loh nâna min ṭanpui an duh thute min hrilh a ni,” tiin a sawi.

MI MAL LEH CHHUNGKUAA INZIRNA

Bible Zirlaite chuan thutak ngaihventute hmasâwn tûra ṭanpui tûrin, kan magazine Awake! bu-ahte chuan Bible zawhna leh chhânnate an tichhuah ziah a. Nu leh pate’n an fate nêna an sawiho theih tûr ṭhalaite tâna Bible zawhnate a awm a. An fate hnênah chûng zawhnate chu zâwtin, Bible-ah a chhânnate zawng hmu tûrin an ṭanpui thei a ni. “Bible-ah hian lehkhabu eng zât nge awm?,” tih ang chi zawhna ṭhenkhat chuan Bible chungchânga thil ho tê tê a zirtîr a. “Kristian dikte chuan tihduhdahna chu an beisei tûr a ni em?,” tih ang chi zawhna dangte chuan ṭhalaite chu thuhriltu huaisen tak ni tûrin a buatsaih a ni.

Chubâkah, Bible hriatna nei tam zâwkte tân pawh Bible zawhnate leh chhânnate a awm bawk a, a chhânnate chu Studies in the Scriptures tih lehkhabu hmasaah hmuh theih a ni. Chhiartu tam takin chûng zawhnate aṭangin thil tam tak an hriat phah a; mahse, chûng zawhnate chu tihchhuah a nih tawh dâwn loh thu puan a ni. Engvângin nge tihchhuah a nih tawh loh?

LEHKHABU THAR!

*The Harp of God* tih lehkhabu

Chhiar tûr chanvo chuanna card

Zawhnate chuanna card

Hma hruaitu unaute chuan mite hian awmze nei taka thutak bulpui an zir a ngai tih an hria a. Chutiang a nih theih nân, kum 1921, November thla-ah The Harp of God tih lehkhabu tihchhuah a ni a. Chu lehkhabu dawng a, ngaihvenna lantîrtute chuan mahnia inzirna an neih theih nân inzirna (course) pawh an zawm bawk. Mahnia inzirna course chuan chhiartute chu Pathianin mihringte hnêna chatuana nunna pêk a tiam thute hre tûrin a ṭanpui a. Inzirna couse chu a hlawhtling em?

Miin chu lehkhabu a dawn rualin, a chhiar tûr phêkte hriattîrtu card pawh a dawng tel bawk a. Chawlhkâr dang lehah chuan, a thu chhiarte ṭanchhanin zawhna ṭhenkhat chuanna card pakhat a dawng leh a. Chu card-ah chuan chawlhkâr lo awm leh tûr atâna a chhiar zawm tûrte târ lan a ni.

Zirlai chuan chawlhkâr 12 chhûngin, chawlhkâr tinin a kiang hnaia kohhran aṭangin card thar a dawng a. Chûng card-te chu kohhrana kum upate, a nih loh leh rawngbâwlnaa kal chhuak thei lote hnêna pêk a ni tlângpui. Entîr nân, U.S.A., Pennsylvania, Millvale khuaa awm Unau Anna K. Gardner-a chuan heti hian a sawi a: “The Harp of God tih lehkhabu tihchhuah a nih chuan, chu lehkhabu chu kea kal thei lo ka u Thayle-i’n a dawng a, zawhnate chuanna card-te pawh chawlhkâr tina a dawn avângin, a thawh theih tûr hna a ngah lehzual a ni,” tiin. Zirlaiin course a zawh chuan, Bible hriatna a neih belh nân, kohhrana unau pakhatin a rawn tlawh a ni.

NAKINA THAWH TUR HNA

Kum khat a liam chuan, Unau J.F. Rutherford-a’n chu inzirnaa tel zawng zawngte hnênah lehkha a thawn a. Heti hian a ziak a ni: “Kumin chhûnga Lalram thu hrilhna chu kum dang zawng aiin, a darh zauvin, a hlawhtling zâwk a ni,” tiin. Chumi hnuah: “Hnathawh tûr tam tak a la awm a. Mi dangte chu he hna ropui taka lo tel ve tûrin fuih ang che u,” tiin a sawi belh bawk. Chutih hun laia Bible Zirlaite chuan chu fuihna chu an zâwm a. Tûn hma zawng aiin, kum 1922 khân, Lalram chanchin chu huaisen takin an puang nasa lehzual a ni.

Ṭhian Huaisente

Bible Zirlaite chuan inṭanpui tawnin unau inhmangaihna an lantîr a. A hnuaia thiltawnin a târ lan angin, anni chu ‘mangan nî atâna piang’ ṭhian huaisente an ni.—Thuf. 17:17.

Kum 1921, May 31, thawhlehnî khân, mi hâng pakhat chu mi ngo hmeichhe pakhat a pawngsual avânga lung ina khung a nih hnuah, U.S.A., Tulsa khawpuiah, hnam insuatna (Tulsa Race Massacre) an tih chu a lo chhuak a. Mi ngo mi 1,000 aia tam leh an aia tlêm zawk mi hânghote inkârah buaina a chhuah chuan, chu buaina chu mi hângho awmna bial Greenwood-ah a thleng ta thuai a, in leh sumdâwnna hmun 1,400 aia tam chu rawk leh hâl a ni a. Sawrkârin thi zât a puan chu mi 36 a ni a; mahse, dik tak chuan, a za têl a nih a rinawm.

Greenwood-a chêng, mi hâng Bible Zirlai Unau Richard J. Hill-a chuan thilthlen dân chu heti hian a sawi a: “Buaina a chhuah zân chuan, kan tih ṭhin angin, Bible zirhona kan nei a. Kan zir zawh chuan, khaw chhûngah inkah thâwmte kan hria a. Zân rei thlengin an inkâp,” tiin. Nilaini, June 1, zîng chuan, dinhmun chu a chhe zual zêl a. “Mi ṭhenkhat chu kan hnênah lo kalin, him kan duh chuan, Convention Hall-a kal nghâl a ṭhat thu min rawn hrilh a.” Chuvângin, Unau Hill-a leh a nupui leh an fa pangate chu Tulsa Convention Hall-ah an tlân ta vat a. Chutah chuan, buaina titâwp tûra sawrkâr tirh sipaite chuan mi hâng mi pa leh hmeichhia 3,000 vêl chu an lo humhim a ni.

Chutih hun lai chuan, mi ngo Unau Arthur Claus-a chuan huaisen takin thu tlûkna a siam a. “Mite’n Greenwood-a inte rawk a, an hâl chiam laiin, chumi hmuna awm ka ṭhian duh tak Unau Hill-a dinhmun hre tûrin kal ka tum ta a ni.”

Unau Arthur Claus-a’n The Harp of God, tih lehkhabu hmangin study class 14-naa naupangte a zirtîr

Unau Hill-a in a va thlen chuan, an ṭhenawm mi ngo pakhat silai keng chu a tâwk a. Unau Hill-a ṭhianpa, chu ṭhenawmpa chuan Arthur-a chu buaina siamtute zînga mi niin a ngai a. “Engvângin nge he ta i lo kal?,” tiin vîn tak hian a lo zâwt a.

Unau Arthur-a chuan: “A duh loh zâwnga ka chhân palh chuan, min kap ngei ang. Mahse, a hnênah chuan, Unau Hill-a ṭhian ka nih thu leh vawi tam tak a ina a kal ṭhin thu ka hrilh a,” tiin a sawi. Unau Arthur-a leh chu a ṭhenawmpa chuan bungruate chu rawktute lakah an vênghim thei ta a ni.

A hnu lawkah, Unau Arthur-a chuan Unau Hill-a leh a chhûngte chu Convention Hall-ah an awm tih a hria a. Unau Arthur-a chuan chuta awm mi hângte chu an officer ber General Barrett-a hming sign tel lo chuan chhuah phal an ni lo tih mite sawi a hria a ni. Unau Arthur-a chuan: “Chu General va hmuh chu thil awlsam lo tak a ni a. Kan thiltumte ka hrilh chuan, ani chuan: ‘Chu chhûngkua leh an mamawhte chu i ngaihsak ang em?’ tiin min zâwt a. Ngaihsak ang, tiin lâwm takin ka chhâng,” tiin a sawi.

Unau Arthur-a chuan General hming sign chu kengin, Convention Hall-ah chuan hmanhmawh takin a lût a. Chuta vêngtu lal pakhat hnênah hming sign chu a han pêk chuan: “E he, General-a hming sign a nih hi! a ti hlawl mai a. Nang hi, he lai hmun aṭanga mite ko chhuak theitu hmasa ber i ni tih i hria em?” tiin a sawi bawk. Unau Arthu-a leh chu vêngtu lal chuan Unau Hill-a leh a chhûngte chu an va hmu ta thuai a. Tichuan, an za vai chuan Unau Arthur-a motor-ah inhnawh lûtin inah an haw thei ta a ni.

Unau Claus-a chuan Unau Hill-a leh a chhûngkua chu him tûrin a ṭanpui a. Unaute hmangaihna avânga huaisenna kawnga a entawn tûr siam chuan mi dangte chungah nghawng ṭha tak a nei a ni. Unau Arthur-a chuan: “Unau Hill-a bungruate vênhimnaa ṭanpuitu a ṭhenawmpa chuan Jehova Thuhretute chu tûnah chuan a ngaina tawh hle a. Mi tam tak pawhin Pathian hnêna inpumpêk mite zîngah hnam inthliarna a awm lovin, kan zain kan intluktlâng vek tih an hmuh avângin, Lalram thuchah chu an ngeihven lehzual,” tiin a sawi.