Mi Ṭha Nih Maina Chuan Nakin Hun Muanawm Tak A Neihtîr Thei Tak Tak Che Ang Em?

Kum zabi tam tak chhûng chu, mi tam tak chuan mi ṭha nih leh nungchang ṭha neih chu nakin hun muanawm tak neih theih dân kawng niin an ngai a. Entîr nân, Khawchhak rama mite chuan mi fing leh zirtîrtu ni bawk Confucius-a (B.C.E. 551-479) thusawi: “I chunga an tih atâna i duh loh chu, mi dang chungah pawh ti suh,”a tih hi an ngaisâng hle a ni.

MI TAM TAKTE NUN KAWNG ZAWH

Mi tam tak chuan nungchang ṭha chu nakin hun muanawm tak neih nâna thil pawimawh tak angin an la thlîr reng a. Anni chuan zahawm taka mi dangte cheibâwltu nih te, nungchang ṭha neih te, mahni hmun chan hretu nih te, leh chhia leh ṭha hriatna thiang tak neih rengte an tum a ni. Vietnam rama awm Linh-i chuan, “Mi rinawm leh mi dik ka nih phawt chuan, malsâwmna ka dawng ngei ngei ang tih ka ring,” tiin a sawi.

Chu nu vêk chuan retheite leh chênna tûr nei lote chu ei tûr a pe.

Mi ṭhenkhat chuan an sakhaw thurinte avângin thil ṭha an ti a. Taiwan-a awm Hsu-Yun-a chuan, “Miin a dam laia thil ṭha a tih chuan, a thih hnuah malsâwmna chhiarsên loh a dawng ang a; thil ṭha lo a tih erawh chuan a thih hnuah hrehawm a tuar dâwn nia zirtîr ka ni,” tiin a sawi.

A RAH CHHUAHTE CHU ENG NGE NI?

Chu nu chu tlai lamah a fapa pawmin, a rilru a hrehawmin a chau hle.

Mi dangte chunga thil ṭha kan tih hian kawng tam takin kan hlâwkpui tih chu a dik ngei mai. Mahse, mi dangte chunga rilru dik tak pu-a thil ṭha tih tumtu mi tam tak chuan an beisei angin thil a thleng reng lo tih an hmu a ni. Hong Kong-a awm Shiu Ping-i chuan, “Thil ṭha ti ṭhîntute chu malsâwmin an awm reng lo tih ka hre chiang hle. Ka chhûngte ngaihsak tûr leh an tâna thil ṭha tihsak tûrin theih tâwp ka chhuah a. Mahse, kan inneihna chu a hlawhchham a, ka pasal chuan kei leh kan fapa chu min chhuahsan a ni,” tiin a sawi.

Mi tam tak chuan sakhuain mite chu mi ṭha zâwk a nihtîr reng lo tih an hria a. Japan rama awm Etsuko-i chuan, “Sakhaw thiltihnaahte ka tel ṭhin avângin, ṭhalaite thiltihnaah huaihawttu ka ni chho va. Mahse, ka sakhaw vawnpuite zînga ṭhenkhat chu nungchang bawlhhlawhnaah te, thuneihna inchuhnaah te, leh dik lo taka thawhlâwm hmannaahte an inhnamhnawih tih ka hmuh hian mak ka ti hle,” tiin a sawi.

“Ka chhûngte ngaihsak tûr leh an tâna thil ṭha tihsak tûrin theih tâwp ka chhuah a. Mahse, kan inneihna chu a hlawhchham a, ka pasal chuan kei leh kan fapa chu min chhuahsan a ni.”—SHIU PING-I, HONG KONG

Sakhaw mi tak leh thil ṭha tih tum tlattu mi ṭhenkhat chu an chunga thil ṭha lote a lo thlen hian an lunghnual hle a. Vietnam rama awm Van-i chuan a chungah chutiang chuan a thleng niin a hria. Ani chuan, “Nakin huna malsâwmna tam tak dawn inbeiseiin, thei rah te, pangpâr te, leh ei tûrte leiin, thlahtu thi tawhte maichâmah nî tin ka hlân ṭhîn a. Chutiang chuan kum tam tak chhûng thil ṭhate tiin, sawkhaw serh leh sângte ti ṭhîn mah ila, ka pasal chuan natna râpthlâk tak a vei a. Chu bâkah, ka fanu chuan ram danga lehkha a zir laiin, kum naupang tê niin min boralsan bawk a ni,” tiin a sawi.

MI ṬHA NIH MAI A TAWK LOH CHHAN

Mi ṭha nih chu a pawimawh ngei mai; mahse, chu chu nakin hun muanawm tak neih nân a tâwk mai lo. Engvângin nge? Bible sawite hi lo ngaihtuah teh.

MI TIN HIAN THIL ṬHA TIH AN THLANG VEK LO

“Mi sual pakhatin thil ṭha tam tak a tichhe ṭhîn.”—THUHRILTU 9:18.

Mi ṭha ni tûra theih tâwp i chhuah chung pawhin, mahni hmasial tak mi dangte thiltih avângin i nakin hun chu a derthâwng thei a. Entîr nân, hripui lên chhûng hian, sawrkâr thuneitute kaihhruaina chu zâwmin mi dangte nên inhlat takin i awm ṭhîn a. Mahse, mi ṭhenkhatin chu kaihhruaina chu zâwm ve duh lo ta se, engtin nge ni ang? An awm dân chuan thil dik tih tumtute hrisêlna chu a khawih pawi thei a ni.

MITE CHUAN THIL ṬHA LEH ṬHA LO CHU AN HRE SUAL THEI

“Mi ngaiha kawng dik ni âwm taka lang, a tâwp chu thihna kawng ni si a awm.”—THUFINGTE 14:12.

Mi tam tak chuan thil ṭha nia an ngaihte chu an ti a; mahse, a hnuah, chu chu a lo dik lo tih an hre leh a ni. Thil ṭha ti niin inngai mah se, an thu tlûkna siam sawhkhâwkte chu an tuar tho a ni.

NUN HI SAWI LAWK THEIH A NI LO

“Naktûkah chuan eng nge lo awm dâwn in hre si lo.”—JAKOBA 4:14.

Mi chu engtiang khawpa fel leh ṭha pawh ni se, beisei loh takin a boral thei a ni. Entîr nân, COVID-19 hripui lên chhûng hian, mi dangte ṭanpui tûra mahni inpe mi tam tak chuan an nun an chân a. China rama awm Liting-i thiltawn hi han ngaihtuah teh. Ani chuan: “Hetiang khawpa mi ṭha a boral ta mai hi ka hre thiam thei lo. Ka pa chu mi taima tak, mi inngaitlâwm tak, leh mi rilru dik tak a ni a. Ani chu motor chhûnga chuang zînga an tihhlum awm chhun a ni,” tiin a sawi.

Mi ṭha nihnain nakin hun muanawm tak min neihtîr thei lo a nih chuan, engin nge min neihtîr thei ta ang? Chu zawhna chhâng thei tûr chuan, kan zawhnate chhâng theitu leh nakin hun muanawm tak min neihtîr theitu kaihruaitu rin tlâk kan mamawh a ni. Chutiang kaihruaitu rin tlâk chu khawiah nge kan hmuh theih ang?

a Confucian zirtîrna chungchâng hriat belh nân, online-a www.jw.org-a hmuh theih Jehova Thuhretute tihchhuah Mankind’s Search for God, tih lehkhabu bung 7-na, paragraph 31-35-na chu en rawh.