Inngaitlâwm Tak leh Thuhnuairawlh Takin I Pathian Nên Lêng Dûn Rawh

1. Jehova inngaihtlâwmna chungchângah Davida’n eng nge a sawi?

JEHOVA chu inngaitlâwm tak niin kan sawi thei tak tak em? Sawi thei e. Ṭum khat chu, Davida’n: “Nangin i chhandamna phaw chu mi pe bawk a: I inngaihtlâwmnain mi siam lian ta,” tiin a ziak a ni. (2 Sam. 22:36; Sâm 18:35) Davida chuan nakina Israel lal la ni tûr hriak thih tûra a pa ina zâwlnei Samuela lo kal nî chu a ngaihtuah pawh a ni thei. Ani chu an unau pariat zînga naupang ber ni mah se, Lal Saula aiawha lal tûra Jehova thlan a ni.—1 Sam. 16:1, 10-13.

2. He thuziakah hian eng nge kan sawiho vang?

² Davida’n: “Ani chuan rethei chu vaivut ata a kai tho ṭhîn a, pachhia chu . . . a chawi kâng ṭhîn; mi liante hnêna a awmtîr theihna tûrin,” tia Jehova chungchâng sawitu fakna hla phuahtu rilru put hmang chu a ṭâwmpui ngei ang. (Sâm 113:5-8) He thuziakah hian, inngaihtlâwmna chungchânga zir tûr pawimawh ṭhenkhatte chu Jehova’n he mizia a lantîrna dinhmunte ennawnna hmangin kan ngaihtuah hmasa ang a. Chumi hnuah, thuhnuairawlhna chungchânga Lal Saula, zâwlnei Daniela, leh Isua hnên aṭanga kan zir theihte kan sawiho vang.

JEHOVA ENTAWN TUR SIAM AṬANGIN ENG NGE KAN ZIR THEIH?

3. Engtin nge Jehova’n min cheibâwl a, chu chuan eng nge a târ lan?

³ Jehova chuan amah betu mihring ṭha famkim lote a cheibâwl dân aṭangin inngaitlâwm tak a ni tih a lantîr a. Kan biakna chu a pawm mai ni lovin, a ṭhiante angin min thlîr bawk a ni. (Sâm 25:14) Amah nêna inṭhianna siam thei tûrin, kan sualte thupha chawi nân a Fapa min pein, hma a la hmasa a ni. Kan chunga ngilneihna leh khawngaihna lantîrna a va ni tak êm!

4. Jehova’n eng nge min pêk a, engvângin nge?

⁴ Jehova’n inngaihtlâwmna a lantîrna kawng dang hi han ngaihtuah teh. Siamtu a nih angin, mahnia nun kawng thlan theihna nei lovin min siam thei a. Mahse, chutiang chuan min siam lo. Ama anpuia min siamin, zalên taka duhthlan theihna min pe zâwk a. Amah kan hmangaih avâng leh a thuâwih chu kan ṭhatna tûr a ni tih kan hriat avânga thinlung taka a rawngbâwl tûrin min duh a ni. (Deut. 10:12; Is. 48:17, 18) Jehova’n he inngaihtlâwmna mizia a lantîr avâng hian kan va lâwm tak êm!

5. Engtin nge Jehova’n inngaitlâwm tûra min zirtîr? (A kâwma milem en rawh.)

⁵ Jehova chuan min cheibâwl dân aṭangin inngaihtlâwmna min zirtîr a. Ani chu lei leh vâna Mi fing ber a ni a. Chuti chung pawhin, mi dangte thurâwn chu lâwm takin a pawm a ni. Entîr nân, thil engkim a siamnaah a Fapa ṭanpuina chu a pawm a. (Thuf. 8:27-30; Kol. 1:15, 16) Chu bâkah, Engkimtithei ni mah se, thuneihna ṭhenkhat chu mi dangte a pe a ni. Entîr nân, a Lalrama Lal ni tûrin Isua chu a ruat a, a rorêlpui tûr mihring zîng ata mi 1,44,000 hnênah thuneihna engemaw chen a pe bawk. (Lk. 12:32) Ni e, Jehova chuan Isua chu Lal leh Puithiam Lalber ni tûrin a zirtîr a. (Heb. 5:8, 9) Chu bâkah, Isua rorêlpui tûrte pawh a zirtîr a; mahse, an mawhphurhna an hlen dân tûr chungchângah thunun a tum lo. Chu aiin, a duh zâwng angin thil an ti ang tih a ring tlat zâwk a ni.—Thup. 5:9, 10.

6-7. Mi dangte hnêna thuneihna pêk chungchângah kan Pa vâna mi hnên aṭangin eng nge kan zir theih?

⁶ Tu ṭanpuina mah mamawh lo kan Pa vâna miin mi dangte hnênah thuneihna a pe a nih chuan, kan tân chutianga tih chu a va ngai nasa lehzual dâwn êm! Entîr nân, chhûngkaw lû ber emaw, kohhran upa emaw i ni em? Mi dangte hnêna thuneihna pêkna kawnga Jehova entawn tûr siam chu zui la, an chanvo hlen dân tûrah va thunun tum suh. Jehova i entawn chuan, i hnate chu i hlen thei mai ni lovin, mi dangte chu inrintâwkna nei tûrin i zirtîr a ni bawk ang. (Is. 41:10) Thuneihna engemaw chen neite chuan Jehova hnên aṭangin eng thil dangte nge an la zir theih?

⁷ Bible chuan Jehova’n vântirhkohte ngaih dân pawh a ngai pawimawh hle tih min hrilh a ni. (1 Lal. 22:19-22) Nu leh pate u, engtin nge Jehova entawn tûr siam chu in zui theih? A inâwm hunah, in fate chu hnathawh dân tûr chungchângah an ngaih dânte zâwt ula. A ṭha a nih chuan, an thurâwnte chu zawmsak ang che u.

8. Engtin nge Jehova’n Abrahama leh Sari chu dawhthei taka a cheibâwl?

⁸ Jehova inngaihtlâwmna chu dawhtheihna a lantîrnaah pawh a lang a. Entîr nân, a rawngbâwltute’n a thu tlûkna siam chungchânga zah taka zawhna an siam hunah dawhtheihna a lantîr a ni. Sodom leh Gomorra khuate tiboral tûra a thu tlûkna siam chungchângah Abrahama’n a lungkhamnate a sawi chhuah khân a ngaihthlâksak a. (Gen. 18:22-33) Chu bâkah, Abrahama nupui Sari a cheibâwl dân pawh kha hre reng ang che. A upat hnuah fa a pai dâwn tih Jehova thutiam a hriat avânga Sari a nuih khân, Jehova chu lungni lovin a awm lo va, a thinrim hek lo. (Gen. 18:10-14) Chu aiin, Sari chu zahawm takin a cheibâwl zâwk a ni.

9. Nu leh pate leh kohhran upate chuan Jehova entawn tûr siam aṭangin eng nge an zir theih?

⁹ Nu leh pate leh kohhran upate u, Jehova entawn tûr siam aṭangin eng nge in zir theih? In thuneihna hnuaia awmte’n in thu tlûkna siam chungchânga zawhna an neih huna in chhân lêt dân chu han ngaihtuah teh u. In chhân lêtna hmasa ber chu an dik lo tih hriattîr a ni em? Nge ni a, an thlîr dân chu hriatthiam in tum zâwk? Thuneihna neitute’n Jehova an entawn hian chhûngkua leh kohhranin an hlâwkpui a ni. Tûn thlengin, inngaihtlâwmna kawnga Jehova entawn tûr siam aṭanga kan zir theihte kan sawiho tawh a. Tûnah chuan, thuhnuairawlhna kawnga Bible-a chhinchhiah entawn tûr ṭhate aṭanga kan zir theihte chu i lo enho vang u.

MI DANGTE ENTAWN TUR SIAM AṬANGIN ENG NGE KAN ZIR THEIH?

10. Engtin nge Jehova’n mi dangte entawn tûr siam chu min zirtîr nâna a hman?

¹⁰ “Zirtîrtu Ropui” a nih angin, Jehova chuan a Thu, Bible-a entawn tûrte hmangin min zirtîr a. (Is. 30:20, 21, NW) Thuhnuairawlhna pawh tiamin, Pathian miziate lantîrtu Bible-a mite chanchin chhût ngunna hmangin kan inzir a ni. Chutiang mizia lantîr lotute chunga thilthlengte bih chianna hmangin kan inzir bawk.—Sâm 37:37; 1 Kor. 10:11.

11. Saula siam entawn tûr ṭha lo aṭangin eng nge kan hriat?

¹¹ Lal Saula chunga thilthleng kha han ngaihtuah teh. Ani chu a tîrin mi thuhnuairawlh tak a ni a. A tih theih chin tâwkte a hriat avângin mawhphurhna tam zâwk chelh pawh a hreh hial a ni. (1 Sam. 9:21; 10:20-22) Mahse, a hnuah a lo chapo ṭan a. Chu a mize ṭha lo tak chu lal a nih hnu rei vak lovah a rawn lang a ni. Ṭum khat chu, zâwlnei Samuela a nghah laiin dawhtheihna a hloh va. Mite tâna thil ti tûra thuhnuairawlh taka Jehova rinchhan aiin, a tih loh tûr inthawina chu a hlân ta a. Chumi avâng chuan, Jehova duhsakna leh a tâwpah a lalna pawh a chân ta a ni. (1 Sam. 13:8-14) He entawn tûr ṭha lo hi hre reng a, chapo taka thiltih kan pumpelh chuan kan tân a finthlâk ang.

12. Engtin nge Daniela’n thuhnuairawlhna a lantîr?

¹² Saula siam entawn tûr ṭha lo nêna inang lo takin, zâwlnei Daniela siam entawn tûr ṭha hi han ngaihtuah teh. A dam chhûngin, Pathian chhiahhlawh inngaitlâwm tak leh thuhnuairawlh tak niin, Jehova kaihhruaina chu a zawng reng a. Entîr nân, Nebukadnezzara mumang hrilhfiah tûra Jehova’n a hman khân, chutianga a hrilhfiah theih avângin mahni a inchawimawi lo. Chu aiin, thuhnuairawlh takin, ropuina leh chawimawina zawng zawng chu Jehova hnênah a pe a ni. (Dan. 2:26-28) Kan tânna zir tûr chu eng nge ni? Unaute’n kan thusawi chu ngaihthlâk nuam an ti emaw, rawngbâwlnaah hlawhtlinna engemaw chen kan nei emaw a nih chuan, chawimawina zawng zawng chu Jehova hnênah pêk kan duh a. Chûngte chu Jehova ṭanpuina tel lovin kan ti thei lo tih thuhnuairawlh takin kan pawm tûr a ni. (Phil. 4:13) Chutiang rilru put hmang kan neih chuan, Isua siam entawn tûr ṭha chu kan zui tihna a ni ang. Chu chu engtin nge a nih theih?

13. Johana 5:19, 30-a kan hmuh Isua thusawi aṭangin thuhnuairawlhna chungchâng eng nge kan zir?

¹³ Isua chu Pathian Fapa ṭha famkim ni mah se, a Pa Jehova a rinchhan tlat a. (Johana 5:19, 30 chhiar rawh.) A Pa vâna mi thuneihna chu chhuhsak a tum ngai lo. Philippi 2:6-na chuan Isua’n “Pathian anga awma Pathian tluka awm chu thil thlâkhlelh hleih theihah a ruat lo,” tih min hrilh a. Fapa intulût tak a nih angin, a tih theih chin tâwk a hria a, a Pa thuneihna chu a zah hle a ni.

14. A thuneihna pêla thil ti tûra phût a nih khân, Isua’n engtin nge a chhân lêt?

¹⁴ Zirtîr Jakoba leh Johanate’n an nu ruala Isua hnênah lo kal a, pe tûra thuneihna a neih loh chanvo hlu a dîlsak laia Isua chhân lêt dân kha han ngaihtuah teh. Ani chuan Pathian Rama a ding lam leh vei lama ṭhu tûr chu a Pa vâna mi chauhvin a ruat thei tih hrilhin, hreh miah lovin a chhâng nghâl a. (Mt. 20:20-23) Tih theih chin tâwk a nei tih a lantîr a ni. Mi thuhnuairawlh tak a va ni êm! Jehova thupêk pêlin engmah a ti ngai lo. (Joh. 12:49) Engtin nge Isua entawn tûr ṭha siam chu kan zui theih ang?

15-16. Korinth thawn khat 4:6-a kan hmuh Bible fuihna chu engtin nge kan nunpui theih?

¹⁵ Korinth thawn khat 4:6-a kan hmuh Bible fuihna nunpuiin, thuhnuairawlhna kawnga Isua entawn tûr siam chu kan zui a ni. Chutah chuan: ‘Thu ziakte chu khûm suh u,’ tiin kan chhiar a. Chuvângin, mite’n thurâwn min dîl hunah, kan ngaih dân chawilâr emaw, rilrua lo lang hmasa ber sawi nghâl mai emaw chu kan duh ngai lo vang. Chu aiin, Bible-a kan hmuh kaihhruainate leh Bible ṭanchhan thu leh hla chhuahte chu kan ngaihventîr zâwk ang. Chutiang chuan, tih theih chin tâwk kan nei tih kan pawmzia kan lantîr a ni. Engkimtitheia “thiltih felte” avângin, thuhnuairawlh takin a hnênah chawimawina kan pe a ni.—Thup. 15:3, 4.

¹⁶ Jehova kan chawimawi rualin, thuhnuairawlhna lantîrna tûr chhan dangte pawh kan nei a. Tûnah chuan, inngaihtlâwmna leh thuhnuairawlhnain hlimna min thlen theih dân leh mi dangte nêna inrem taka awm tûra min ṭanpui theih dânte chu i lo enho vang u.

MI INNGAITLAWM TAK LEH THUHNUAIRAWLH TAK NIHNA KAN HLAWKPUK DAN

17. Engvângin nge inngaitlâwm tak leh thuhnuairawlh takte chu mi hlim thei tak an nih?

¹⁷ Inngaitlâwm tak leh thuhnuairawlh tak kan nih hian, hlimna kan nei lehzual a ni. Engvângin nge? Tih theih chin tâwk kan nei tih kan inhriat chuan, mi dang hnên aṭanga kan dawn ṭanpuinate chu lâwm takin kan pawm ngei ang. Entîr nân, Isua’n phâr sâwm a tihdam laia thilthleng kha han ngaihtuah teh. An zînga pakhat chauh chu mahnia tihdam theih ngai loh tûr a natna tenawm tak Isua’n a tihdamsak avângin lâwmthu sawi tûrin a hnênah a lo kîr leh a. Chu mi inngaitlâwm tak leh thuhnuairawlh tak chuan ṭanpuina a dawn avânga a lâwm êm avângin, Pathian a chawimawi ta a ni.—Lk. 17:11-19.

18. Engtin nge inngaihtlâwmna leh thuhnuairawlhna chuan mi dangte nêna inrem taka min awmtîr? (Rom 12:10)

¹⁸ Mi inngaitlâwm tak leh thuhnuairawlh takte tân chuan mi dangte nêna inrem taka awm leh ṭhian ṭhate neih chu a awlsam lehzual a. Engvângin nge? Mi dangte chuan mize ṭha tak takte an nei tih hria a, an rinngam ṭhin vâng a ni. Anni chuan mi dangte’n an chanvo neiha hlawhtlinna an neih apiangin an lâwmpui a, an fakin an chawimawi nghâl ṭhîn a ni.—Rom 12:10 chhiar rawh.

19. Chapona kan pumpelhna tûr chhan ṭhenkhat chu engte nge ni?

¹⁹ Chumi nêna inkalh takin, mi chapote chuan mi dangte fak chu harsa an tiin, fakna dawngtu nih an duh zâwk ṭhîn. Mi dangte nêna inkhaikhin fovin, inelna rilru an awmtîr ṭhîn a ni. Mi dangte zirtîr a, an hnêna thuneihna pêk aiin, anni chuan: “Fel taka thiltih i duh chuan nangmah ngeiin tih rawh,” tiin an sawi ṭhîn a. An tân fel taka ti tih chu an duh zâwng anga tih a ni ṭhîn. Mi chapo chuan thiltum sâng tak leh îtsîkna rilru a nei ṭhîn a. (Gal. 5:26) Chutiang mite chuan ṭhian nghet tak an nei ngai lo. Chapona kan lo nei reng tih kan inhmuh chhuah chuan, chu mize ṭha lo takin kan thinlunga zung a kaih hmain Jehova hnênah ‘rilru thar’ nei tûra ṭanpuina dîlin, ṭhahnemngai takin kan ṭawngṭai tûr a ni.—Rom 12:2.

20. Engvângin nge inngaitlâwm tak leh thuhnuairawlh tak kan nih a ngaih?

²⁰ Jehova entawn tûr siam avângin kan va lâwm tak êm! A inngaihtlâwmna chu a chhiahhlawhte a cheibâwl dânah kan hmu a, amah entawn chu kan duh a ni. Chu bâkah, Pathian nêna lên dun theihna chanvo hlu neitu Bible-a mi thuhnuairawlhte siam entawn tûr ṭhate chu zui kan duh bawk. Jehova hnênah a phû ang chawimawina leh ropuina chu i pe zawm zêl ang u. (Thup. 4:10, 11) Chutianga kan tih chuan, keini pawh inngaitlâwmte leh thuhnuairawlhte hmangaihtu kan Pa vâna mi nên kan lêng dûn thei ang.