Engtin Nge Hriatrengna Atâna I Inbuatsaih Ang?

Kumin aṭanga inṭanin, Krista thih Hriatrengna atâna inbuatsaihna hun tam lehzual kan nei ang a. Hriatrengna nî chu chawlhkâr chhûnga a tlâk chuan, chumi kâra Nun leh Rawngbâwlna Inkhâwm chu neih a ni lo vang. Chawlhkâr tâwpa a tlâk erawh chuan vântlâng thusawi leh Vênnainsâng Zirna inkhâwm chu a awm lo vang. I hun neih belh chu a ṭha thei ang berin i hmang ang em? Kum zabi khatna ang bawkin, he hun pawimawh tak atân hian ruahmanna ṭha tak siam a ngai a. (Lk. 22:7-13; km 3/15 1) Mahse, hlâwkna tluantling hmu tûrin kan thinlung kan buatsaih tûr a ni. Engtin nge kan buatsaih theih?

• Hriatrengna inkhâwma tel a pawimawh chhan ngaihtuah rawh.—1 Kor. 11:23-26

• Jehova nêna in inlaichînna chu ṭawngṭaina nên bih chiang rawh.—1 Kor. 11:27-29; 2 Kor. 13:5

• Hriatrengna awmzia hrilhfiahtu Bible chângte chhiarin chhût ngun rawh.—Joh. 3:16; 15:13

Thuchhuahtu ṭhenkhat chuan Nî Tina Pathian Lehkha Thu Belh Chianna lehkhabua chuang Hriatrengna atâna Bible châng chhiar tûrte chu chhiarin an chhût ngun a. Mi dangte chuan a hnuaia târ lan chart-a tel Bible chângte chu an chhiar a. Mi dang lehte chuan, Hriatrengna chungchâng leh Jehova leh Isua min hmangaihna târ lanna sawina Vênnainsâng thuziakte chu an ennawn a ni. A enga pawh hmang la, i zirna chuan Jehova leh a Fapa hnaihtîr lehzual che rawh se.