Mitdelte Chu Jehova Chanchin Zir Tûrin Ṭanpui Rawh
1. Engtin nge Isua’n mitdelte chu khawngaihna a lantîr?
1 Isua thih hun a hnai tawh hle a. Jeriko khua a chhuahsan lai chuan, mitdel kutdawh pahnih hian: “Lalpa, min khawngaih rawh,” tiin an au va. Isua rilru chu nakin lawka a tawh tûr thiltein khat hle mah se, ani chu a ding a, a hnênah kovin, an mit a tihvârsak ta a ni. (Mt. 20:29-34) Mitdelte chunga Isua neih khawngaihna chu engtin nge kan entawn theih?
2. Engtin nge vântlâng hmuna kan tawn mitdel hnênah thu kan hrilh theih?
2 Ṭanpuitu Ṭha Tak Ni Rawh: Mitdel i tawh chuan, vântlâng hmunah pawh ni se, inhmêlhriattîr la, ṭanpui tum rawh. Anni chu mite’n remchânga an lâk ṭhin avângin, a tîrah chuan a ringhlel che mai thei. Nimahsela, i nêlawmna leh i ngaihsak tak zetna chuan rilru hahdam takin a awmtîr thei ang. I hriat reng tûr chu, mitdel dân chin a inang lo va; chuvângin, ṭanpui an ngaih chin pawh a inang lo thei a ni. Ṭanpuina i pêk hnu chuan Bible zirtîrnaah i inhmang tih i hriattîr thei a. Hêng Bible châng, Sâm 146:8, a nih loh leh Isaia 35:5, 6-te hi chhiarsak tum rawh. Mitdel hawrawp a chhiar thei a nih chuan, Bible hre tam lehzual tûra ṭanpui thei Mitdel hawrawpa tihchhuah thu leh hlate a duh leh duh loh zâwt ang che. Tin, jw.org-a hmuh theih thu ngaihthlâk tûrte nei thei tûrin i ṭanpui thei bawk. A computer-ah screen-a thuawmte chhiarsak thei screen render program a awm chuan, jw.org-a lehkhabu pho chhuah, RTF (Rich Text Format) hmanga download theihte pawh neih a duh thei ang.—“Mitdel I Ṭanpui Hunah Chuan . . . ” tih bâwm chhûnga thuziak chu en rawh.
3. Kan thu hrilhna biala mitdelte chu engtin nge kan zawn chhuah theih?
3 Mitdelte Zawng Rawh: Mitdel tam takin hriat ngai loh in lêngte biak an hreh ṭhin avângin, in tin kalnaah mitdel kan tâwk khât hle a. Chuvângin, chutiang mite hnêna thu hril tûr chuan theihtâwp chhuaha kan ‘zawn chhuah’ a ngai a ni. (Mt. 10:11) Mitdel hnathawhpui emaw, school kalpui emaw i nei em? I neih chuan biak pawh tumin hma la ang che. In thu hrilhna bialah mitdelte school a awm chuan, Mitdel Hawrawpa chhuah kan thu leh hla ṭhenkhatte chu school library-a dah atân pêk tum ang che. Mitdel nei chhûngkua hriat i nei em? In thu hrilhna bialah mitdelte ṭanpuitu, a nih loh leh chên khâwmna in petu pâwlte a awm em? A chhûngte hnênah emaw, an chên khâwmna ina khual chhâwntu emaw, a nih loh leh chuta thu neitu director emaw hnênah chuan Jehova Thuhretute’n mitdelte ṭanpui chu an ngaihven hle a, Mitdel Hawrawpa chhuah thu leh hlate leh ngaihthlâk theih thil dangte pêk an duh tih hrilh ang che. Pathianin rei lo têah mitdelna hi chatuanin a nuaibo tawh dâwn tih Bible thutiam chu kawhhmuh bawk ang che. Tin, jw.org-a “Without It, I Would Feel Lost,” tih thupui hmanga Mitdel Hawrawpa tih chhuah Bible aṭanga hlâwkna nei mitdel pa pakhatin a thiltawn a sawina video chu chhuahsak i duh mai thei bawk. I va tlawh chhan i hrilh chuan, chu chuan mitdelte biak pawh theihna kawng a hawng thei ang.
4. Janet-i thiltawn chuan eng nge min zirtîr?
4 Unaunu mitdel Janet-i chuan mitdelte chên khâwmna hmun chu a va tlawh a. Hmeichhe tleirâwl pakhat nên an tîtî ṭan ta a. Janet-i chuan: “Isua chuan mitdel zawng zawngte tâna a tihsak tûrte entîr nân mitdelte mit a tihvârsak a ni,” tiin a hrilh a. An pahnih chuan Thu Puan 21:3, 4 chu chhiarin an ngaihtuah a, Janet-i chuan Pathian Ram hmanga he thutiam hlenchhuah a nih dân tûr chu a hrilh a ni. Hmeichhia chu a ngawi deuh hlek a, tichuan: “Mitdel pakhat thlîr dân aṭangin hetiang thu hi ka la hre ngai lo. Khaw hmu thei a tam zâwkte chuan kan mitdel chhan chu kan thiltih vâng emaw, min thlahtute thiltih vâng emawa del niin an ngai a ni,” a ti a. Janet-i chuan chu hmeichhia chu e-mail aṭanga Bible Zirtîrna bu zawn hmuh theihna a pe a, tûnah chuan chawlhkâr khatah vawi hnih Bible an zîr dûn ṭhîn tawh a ni.
5. Isua angin mitdelte mit tihvârsak thei lo mah ila, mitdelte ngaihsakna kan lantîrna chuan eng malsâwmnate nge a thlen ang?
5 Isua angin mitdelte mit tihvârsak thei lo mah ila, mitdel tak takte pawh tiamin, he khawvêl pathianin an rilru mit a tihdelsak zawng zawngte chu Pathian thutak hre thiam tûrin kan ṭanpui thei a ni. (2 Kor. 4:4) Isua chuan Jeriko khaw kianga mitdel pahnihte chu “a khawngaih êm êm” avângin an mit a tihvârsak a. (Mt. 20:34) Chutiang bawka mitdelte ngaihsakna kan lantîr chuan, mitdelna tibo hlen theitu Jehova chungchâng zir tûrin mi ṭhenkhat chu kan ṭanpui thei ang.