Rawngbâwlnaah Thiamna Tihmasâwn Rawh—Tawn Chawpa Thu Hril Tûra Mite Be Hmasain

A Pawimawh Chhan: In tina rawng kan bâwl hian, mi tam tak chu inah an awm ṭhîn lo tih kan hmu fo va. Mahse, anni chu vântlâng veivahna motor kan hman lai te, doctor kan nghah lai te, hnathawhna emaw, school emawa kan chawlh lâwk lai te, leh hmun dangahte chuan kan tawng mai thei a ni. Jehova chuan mi zawng zawngin Lalram thuchah ngaihthlâk theihna hun remchâng an neih chu a duh a. (1 Tim. 2:3, 4) Thu hril thei tûr chuan kan be hmasa ṭhîn tûr a ni.

A Tih Dân Tûr:

Mi chu a nêlawmin, titipui theih a nih hmêl em? Hahdam taka titina neih theihna dinhmun a ni em? Thuchhuahtu ṭhenkhat chuan mi chu nêlawm taka en phawtin, an nuih a. A nuih lêt ve a nih chuan biak ṭan an tum ṭhîn a ni.
Isua’n Samari hmeichhia a biak khân, Lalram chungchâng a sawi nghâl mai lo. (Joh. 4:7) A châng chuan: “I fate hi an fel ngawt mai!” tia fakin i be ṭan thei a. “Ni zâna chanchin thar kha i lo en em?” tih ang zawhna zâwt pawhin i be ṭan thei a ni.
Inbiakna chu tuiawm tak nih chhohtîr rawh. Mi chu hriat châkna nei a, zawhna zawhtîr thei thu bengverh tak i hrilh thei a. Entîr nân, chhûngkaw chungchâng i sawipui ṭan a nih chuan: “Naupang enkawl chungchânga thurâwn rintlâk ṭhenkhat ka hmu a,” tiin i sawi thei a. Chanchin thara târ lan thu engemaw i sawipui a nih chuan: “Tûn hnai mai khân inthlâk thlengna chungchânga chanchin ṭha ṭhenkhat chhiar chu nuam ka ti hle a ni,” tiin i sawi thei bawk. Thu i hrilh theih hmaa inbiakna a tâwp a nih pawhin lunghnual suh ang che.
I ngaih dân mi dangte pawm luihtîr tum angin lang suh. Mi hnêna Bible thu i hmêlhriattîr hmain, zawhna hmangin Pathian thu a ngaihven zâwng hriat tum ang che.

• Ngaihvenna lantîr tuemaw hnêna i pêk theih tûr tract emaw, thu leh hla chhuah dang emaw chu keng ṭhîn ang che.

• Tawn chawpa thu hrilh theih nân chawlhkâr tin vawi khat tal mi biak ṭan tum ang che.