August Thla Chu Rawngbâwlnaa Hriat Reng Tlâk A Ni Ang!

1. Lalram pianna kum 100 a tlin hun kan hnaih hian khawvêl pumah eng special campaign nge neih a nih ang?

¹ Pathian Lalram pianna kum 100 a tlin hun kan hnaih tawh hle a. Special campaign hmanga Jehova chawimawi chu a va inâwm tak êm! August thla chhûng hian Khawiah Nge Nuna Zawhna Pawimawh Takte Chhânna Chu Kan Hmuh Theih Ang? tih thupui nei tract thar chu khawvêl pumah kan sem ang. He tract hian chhiartute chu Bible-ah a chhânnate bih tûrin a fuih a, jw.org-in a ṭanpui theih dân a târ lang bawk. Internet chu tûn laiah a lâr ta hle a. In neituin Internet a hmang lo a nih chuan, Mitthite An Nung Leh Thei Tak Tak Ang Em? (T-35) sem la, a nih loh pawhin a inâwm tract dang eng pawh sem ang che.

2. Engtin nge August thla chhûnga nasa taka Jehova chawimawinaah kan tel ve theih ang?

² Nasa Taka Chawimawina: Rawngbâwlna zauh tûra thuchhuahtute ṭanpui nân, August thlaa auxiliary pioneer thawk duh apiangte tân a bîka ruahmanna siam a ni a. Chu mi thla chhûng chuan baptisma chang tawh thuchhuahtute chuan dârkâr 30 hmuin auxiliary pioneer an thawk thei dâwn a ni. August thlaah chuan Zirtâwpni, Inrinni, leh Chawlhni vawi nga ṭheuh a awm avângin, pâwn lama hna thawk leh school kal thuchhuahtu tam takte chuan auxiliary pioneer an thawk thei ang. Thuchhuahtu ni duh Bible zirpui hmasâwn tak emaw, fa emaw i nei a nih chuan upahote râwn khâwmtu hnênah hrilh nghâl ang che. An tân chuan he thla pawimawh tak chhûnga thuchhuahtu anga kan ruala rawngbâwl chu a va phûrawm dâwn êm! Regular pioneer tam tak chuan kum khat chhûnga an dârkâr hmuh tûr an tlin hnuah August thlaah chawlh la ṭhîn mah se, he special campaign-a tel thei tûrin an hun duante chu an siam rem thei ang. Tûn hi chhûngkuate tân August thla chhûnga Jehova chawimawia ‘au dur durna,’ a nih loh leh nasa taka chawimawinaa an tel theih dân sawiho hun a ni.—Ezr. 3:11; Thuf. 15:22.

3. He special campaign chungchângah eng nge beisei a nih?

³ Tûn hma pawhin hetiang campaign-na lo nei tawh ṭhîn mah ila, hei hi chu hriat reng tlâk tak a nih kan beisei. August thla chu dârkâr neih zâtah te, thuchhuahtu awm zâtah te, leh auxiliary pioneer thawk zâtahte chuan kan tawn sân ber ṭum kan nihtîr thei ang em? Kum 2014 rawngbâwl kum a tâwp rual hian, Jehova chuan August thla chu thu hrilhna ropui ber neihna thla nihtîr tûra khawvêl puma a mite thawhrimna chu malsâwm lul rawh se!—Mt. 24:14.