I Mit A Fîm Em?
1. ‘Mit fîm’ nei tih awmzia chu eng nge ni?
1 Kan thil hmuhte hian kan thiltih a thunun ṭhîn a. Chuvângin, Isua’n: “I mit a fîm chuan i taksa pumin a êng chhuak ang,” tia a sawi hi a va dik tak êm! (Mt. 6:22) Thlarau lama kan mit a “fîm” chuan, thiltum pakhat, Pathian duhzâwng tihnaah chauh a fu ṭhîn a. Lalram kan dah pawimawh ber ṭhîn a, rawngbâwlna tibahlah thei khawvêl thil ṭûl lote emaw, thiltihte emaw chuan kan rilru a la pêng lo.
2. Engin nge kan thil thlîr dân thlâk danglam thei a, mahse engin nge min ṭanpui ang?
2 Mahni Inenfiah A Ngai: Thil fak mawitute fak vâng emaw, mi dangte’n an neih vâng emaw hian kan thil mamawhte kan thlîr dân chu a danglam thei a. Thil engemaw kan tih hma emaw, hun te, sum leh pai te, a nih loh leh tha tam tak sên ngaihna tûr thil kan lei hma emawin, ‘Hei hian Jehova rawng ka bâwlna a tihmasâwn ang nge a tiṭhuanawp zâwk ang?’ tia inzâwtin, ‘a man tûr chin chhût’ phawt chu a ṭha a ni. (Lk. 14:28; Phil. 1:9-11) Tin, rawngbâwlnaa kan inhman lehzual theih nâna kan nun tihsamkhai lehzual dân a khât tâwka ngaihtuah leh ṭhin pawh a finthlâk bawk.—2 Kor. 13:5; Eph. 5:8-10.
3. A nun tisamkhai tûra insiamrem unaunu pakhat hnên aṭangin eng nge kan zir theih?
3 Unaunu pakhat chuan regular pioneer a thawh ṭan chuan hunbi neiin hna thawk pawh ni se a chhûngte a châwm zawh tho laiin, hunbi kima a thawh lai chhunzawm zêl chu a thlang zâwk a. A tâwpah chuan: “Tumahin hotu pahnih rawng an bâwl kawp thei lo. Ka mamawhte phuhru tûrin ka thil duhte chu ka thlauh thlâk a ngai a ni. Kan thil neihte hi a hlui ṭhînin, rei lo te hnuah kan ning leh mai ṭhîn a; ka duhzâwng nia ka hriatte neih ka tum zêl chuan ka chau thlâwn dâwn tih ka hmu chhuak ta,” tiin a sawi. Tichuan, a nun tisamkhai tûr leh a hna thawh thlâk thei tûrin a dinhmunin a zir chho va, pioneer a thawk chhunzawm zêl thei ta a ni.
4. Engvângin nge tûna mit fîm neih reng a pawimawh lehzual?
4 Kan hun hmâwr tawhzia ngaihtuah hian mit fîm neih reng a pawimawh lehzual a. Ni tîn mai hian he kalhmang tâwp hun tûr leh Pathian khawvêl thar lo thlen hun tûr chu kan hnaih tawlh tawlh a ni. (1 Kor. 7:29, 31) Thu hrilh rawngbâwlna chu thawk tlatin, keimahni leh kan thu ngaithlatute kan chhandam thei ang.—1 Tim. 4:16.