I Zirtîrnaah Mite Thlêm Thiam Tak Ni Ang Che
1. Rawngbâwlnaa Pathian Thu fel taka hmannaah eng nge tel?
1 Tirhkoh Paula anga rawngbâwltu hlawhtling takte chuan ‘thutak thu fel taka hmannaah’ chuan, Bible chânga thu awmte sawi chhuah mai aia tam a tel tih an hria a. (2 Tim. 2:15) Pathian Thu hmanga kan zirtîrnaah, engtin nge ‘thlêm thiamna’ kan hman ang?—Tirh. 28:23.
2. Engtin nge mite chu Bible zahna kan neihtîr lehzual theih ang?
2 Pathian Thu Hian Thusawi Rawh Se: A hmasain, Bible-a kan hmuh Pathian finna zahna awmtîr thei tûr zâwngin Bible chângte chu hmêlhriattîr ang che. Pathian Thu kan rin tlatna chuan Bible châng kan chhiar lai ngun taka lo beng khawn tûrin ngaithlatu chu a chêttîr thei ang. (Heb. 4:12) Heti hian i sawi thei ang: “He mi chungchânga Pathian ngaih dân hriat chu a hlâwkthlâk ka ti hle. Bible sawi dân hi lo ngaithla ang che aw,” tiin. A theih hun apiangah, Bible aṭang ngeia chhiarin, Pathian Thu chuan an hnênah thu sawi rawh se.
3. Bible châng chhiar a nih hnuah, ngaithlatuin a awmzia a hriat theih nân eng nge kan tih theih?
3 A pahnihnaah, Bible châng i chhiar chu hrilhfiah rawh. Mi tam tak chuan Bible châng chu vawi khat chhiarnaah hriatthiam mai harsa an ti ṭhîn a. Kan thusawi lai nêna a inkûngkaih dân hriat nân hrilhfiah a ngai tlângpui ṭhîn a ni. (Lk. 24:26, 27) I thusawi lai thlâwptu Bible chânga thu hlâwm awmte chu la hrang rawh. A hriatthiam leh thiam loh chu zawhna zâwtin i fiah thei ang.—Thuf. 20:5; Tirh. 8:30.
4. Zirtîrnaa mite thlêm thiam tûr chuan eng rahbi hnuhnûng ber nge pawimawh?
4 Bible Chângte Chhûtpui Rawh: A pathumnaah, a rilru leh thinlung thlen tum rawh. Bible châng kan chhiarin mi mal taka amah a nghawng dân hmu thiam tûrin in neitu chu ṭanpui rawh. Bible chângte chhûtpuina chuan mi chu a ngaihtuahna thlâk tûrin a thlêm thei a ni. (Tirh. 17:2-4; 19:8) Entîr nân, Sâm 83:18 i chhiar hnuah, mi nêna mi mal inlaichînna neih nâna a hming hriat a pawimawhzia chu kan chhûtpui thei a. Chutah, “Pathian hming i hriatna chuan i ṭawngṭaina awmzia a neihtîr lehzual dâwnin i hria em?” tiin i zâwt thei ang. Hetianga Bible chângte in neitu nun nêna thlun zawmna chuan Bible hlutna chu a târ lang a ni. Chutianga Pathian Thu, Bible hmanga mite thlêmna chuan mi rilru ṭhate chu Pathian dik leh nung awmchhun, Jehova chibai bûk tûrin a hîp ang.—Jer. 10:10.