Bible Zirtîrna Dik Tak Chu Eng Nge Ni? Tih Lehkhabu Chu Hlim Takin Zir Ang Che
1 Bible Zirtîrna Dik Tak Chu Eng Nge Ni? tih lehkhabu Mizo ṭawng ngei maia han neih chu a phûrawm hle mai. Kan thlawhhma rawngbâwlnaah leh a bîk takin in lama mite Bible zirpuinaah he lehkhabu hi kan hmang rim hle a ni. Chuvângin, he lehkhabu thar hi kan hriat chian hle a ngai a. Kum 2012, June 4 chawlhkâr aṭanga Kohhrana Bible Zirnaa kan lo zir ṭan leh tawh dâwn avângin, chutiang chuan kan hre chiang hle thei ang.
2 Kohhrana Bible Zirna kaihruaitu chuan bung tina kamkeuna zawhnate chu a thlûr bing ang a. Tichuan a phêk mawng lama zawhna awmte hmangin zirna chu a kaihruai tûr a ni. Bible châng pawimawhte chu chhiar leh sawiho a ni ang a; bung tâwp apianga “Bible Zirtîrna Chu” tih bâwmah chuan a kamkeuna zawhnate chhânna Bible châng chu a awm avângin chu chu zir tawhte ennawn nân a ṭangkai hle ang. He lehkhabu hian fiah tak, hriatthiam awlsam tak, leh ngaihthlâk nuam taka thil a sawifiah avângin chhânna han pêk vêl chu nuam i ti hle ang.
3 He lehkhabua thu belhnate hian thil hrang hrang a sawifiah a. Bible zirlaiin thu engemaw a hriat belh a ngaih hunah he thu belhna hi kan hmang thei dâwn a ni. Chu thu belhna chu Kohhrana Bible Zirna neih hunah zir tel châng a awm ang a. Bible zirnaa a chhiartu chuan zir tûr chhûnga awm thu belhna zawng zawng chu a chhiar chhuak vek tûr a ni a, thuziak sei deuhte chu ṭhen hran tê têa chhiar leh sawiho tûr a ni ang. Thu belhnaah chuan zawhna chhut chhuahsa a awm lo. Mahse, zirna kaihruaitu chuan thu belhna chhûnga a pawimawh zual laite târ langtu thute chu ṭanchhanin zawhna a siam thei a ni.
4 Kohhrana Bible Zirnaah chuan Bible Zirtîrna lehkhabu chu hmanhmawh deuh hleka zir zung zung a ni ang a. Amaherawhchu, mi dangte kan zirpui hunah chuan chutianga zirpui zung zung tûr a ni lo; kan zirpuite’n Bible hriatna an neih tlêm viau phei chuan zirpui uluk lehzual tûr a ni. (Tirh. 26:28, 29) In lama Bible zirna neih hunah, Bible chângte, milem târ lante, leh thil pawimawh dangte chu kimchang lehzuala kan sawipui a ngai ang. Chuvâng chuan chawlhkâr tina inkhâwm chu tum tlat la, Bible Zirtîrna Dik Tak Chu Eng Nge Ni? tih lehkhabu kan zirnaah chhânna pêk ziah tum ang che.