I Lo Hre Tawh Em?

Bible hun laia enkawltute hna chu eng nge ni?

BIBLE hun laiin, enkawltu chuan mi dang in, a nih loh leh thil neihte chu a enkawl ṭhîn a. “Enkawltu” tia lehlin Hebrai leh Grik thu mal hian a châng chuan hotu, a nih loh leh in chhûng thil rêlbâwltu a kâwk a ni.

Thlahtu Jakoba fapa Josefa chu Aigupta rama sal a nih laiin, ani chu a pu in enkawltu a ni a. Dik tak chuan, Aigupta mi a pu chuan ‘a neih zawng zawng Josefa kutah a dah ta vek a.’ (Gen. 39:2-6) A hnuah, Josefa chu Aigupta rama thuneitu thiltithei tak a lo nih chuan, ani pawhin a in enkawltu atân mi dang a ruat ve leh a ni.—Gen. 44:4.

Isua hun lai chuan, lo nei mite chu an lo aṭanga hla taka awm khuaahte an awm ṭhîn a. Chuvângin, lo neitute chuan hnathawktute nî tin hnathawh dân huaihawt tûrin enkawltute an ruat a ni.

Enkawltu nihna chelh tûrin tu nge tling? Kum zabi khatnaa Rom lehkha ziaktu Columella-a chuan hotu emaw, enkawltu emaw atâna ruat chhiahhlawh chu “hna thawhnaa tawn hriat nei tawh a ni tûr a ni,” tiin a sawi. Ani chu “mi inthlahdah lo leh a enkawlna hnuaia awm hnathawktute ṭha taka chhawr thiam mi,” a ni tûr a ni. “Thil dang zawng aia a laka beisei chu, a thil hriat loh chu hria anga inngai mi a ni tûr a ni lo va, inzir duhna a nei reng tûr a ni,” tiin a sawi belh.

Pathian Thu chuan Kristian kohhrana thiltih ṭhenkhat târ lan nân enkawltu thiltih dânte chu a hmang a. Entîr nân, tirhkoh Petera chuan Kristiante chu Pathian pêk an theihnate hmanga “Pathian khawngaihna tinrêng enkawltu ṭhate angin, chûng chuan rawng inbâwl tawn ṭheuh” tûrin a fuih a ni.—1 Pet. 4:10.

Luka 16:1-8-a chhinchhiah a tehkhin thu sawi pakhatah, Isua chuan enkawltu thiltih dân a sawi a. Chu bâkah, Lal nia a lo awm lehna chhinchhiahna chungchânga hrilh lâwknaah, ani chuan a hnungzuitute chu “bawi rinawm, fing tak,” a nih loh leh “sum enkawltu rinawm” a ruat dâwn tih a hrilh a. Chu enkawltu tih tûr ber chu hun hnuhnûng chhûnga Krista hnungzuitute hnêna a hun taka thlarau lam chaw pêk a ni ang. (Mt. 24:45-47; Lk. 12:42) Khawvêl puma hmuh theih tûra sum enkawltu rinawm buatsaih, rinna tichak thei tak thu leh hla chhuah dawngtute zînga kan tel avângin kan lâwm hle a ni.