Ngaithlatu Tuemaw A Awm Em?

Mi ṭhenkhat chuan ṭawngṭaina chu ngaithlatu awm lo, hun khawhralna ang maiin an hria a. Mi dangte chu an ṭawngṭai a, mahse a chhânna hmu lo niin an inhre thung. Pathian awm ring lotu pakhat chuan Pathian nih dân tûr ang chu mitthla dân a nei a, tichuan a hnênah: “Min han hrilhru tal teh,” tiin a hrilh a. Mahse, Pathian chu “a ngawi reng” tih a sawi.

Bible erawh chuan Pathian a awm a, kan ṭawngṭaina a ngaithla tih min hrilh a. Hmân laia mite hnênah: “In au thâwmah chuan ani [Pathian] chuan a khawngaih ngei ngei ang che u a; a hriat veleh a chhâng ang che u,” tiin Bible chuan a ziak a. (Isaia 30:19) Bible châng dang chuan: “Mi ṭha ṭawngṭaina . . . chu a lâwmzâwng a ni,” tiin a sawi bawk.—Thufingte 15:8.

Bible chuan an ṭawngṭaina chhânsakte chanchin a sawi bawk a. Isua chuan “amah chhandam theitu hnênah . . . dîlnate a hlân a,” ‘ngaihthlâka a awm’ thu Bible châng dangin a sawi. (Hebrai 5:7) Entîrna dang chu Daniela 9:21 leh 2 Chronicles 7:1-ah hmuh theih a ni.

A nih chuan, engvângin nge mi ṭhenkhatin an ṭawngṭaina chu chhân ni lo anga an hriat? Chhân ni tûr chuan, pathian dang emaw, thlahtute hnênah emaw ni lovin, Pathian Jehovaa hnênah chauh kan ṭawngṭai tûr a ni. Ani chuan “a duhzâwng”—a pawm zâwng anga kan dîl a duh a. Chutianga kan dîl chuan, ‘min ngaihthlâksak ṭhîn’ tih min tiam a. (1 Johana 5:14) Chuvângin, kan ṭawngṭaina ngaihthlâksak ni tûr chuan, Pathian leh a duhzâwng kan hriat a ngai a ni.

Mi tam tak chuan ṭawngṭaina chu sakhaw thiltih mai a ni lo tih leh Pathianin ṭawngṭaina a ngaithlain, a chhân an ring a. Kenya rama Isaac-a chuan: “Bible hriat thiamna nei tûrin ka ṭawngṭai a. Chu mi hnu lawkah, tuemaw chuan ka mamawh tak ṭanpuina pêk tumin min rawn pan a ni,” tiin a sawi. Philippines rama awm Hilda-i chuan zialzûk bânsan a duh a. Vawi tam tak a hlawhchham hnuah, a pasal chuan, “Engvângin nge Pathian ṭanpuina i dîl loh vang?” tiin thu a râwn a. A thurâwn chu a zâwm a: “Pathian min ṭanpui dân chu mak ka ti hle a. Zûk châkna ka nei lo ta telh telh a. Ka bânsan thei ta,” tiin a sawi a ni.

Pathian chuan a duhzâwng nêna inmil, i harsatnaa ṭanpui che a duh ang em? (wp15-E 10/01)