BIBLE ṬANCHHAN ZAWHNATE CHHANNA
He dam chhûng mai hi em ni awm?
Nun hi a tawi lutuk nia ngaih châng i nei em?
Nunah hian infiam te, hna thawh te, inneih te, fa neih te, leh a hnua tar mai bâk thil dang a awm leh awm loh i ngaihtuah ngai em? (Joba 14:1, 2) Bible chuan mi fing takte pawhin he mi chungchâng hi an ngaihtuah tih a târ lang a ni.—Thuhriltu 2:11 chhiar rawh.
Nun hian awmzia a nei em? A hmasain, Engtin nge nun hi a lo inṭan? tiin kan inzâwt tûr a ni a. Kan thluak leh kan taksa pêng dangte siam dân mak tak an ngaihtuah hnuah, mi tam tak chuan hêng zawng zawngte phênah hian Siamtu fing tak a awm niin thu tâwp an siam a ni. (Sâm 139:14 chhiar rawh.) Chutiang a nih chuan, min siam chhan a awm ngei ang! Chu a chhan zirna chuan kan nun chu awmze thûk tak a neihtîr thei a ni.
Engvângin nge mihringte hi siam an nih?
Pathian chuan mihring nupa hmasa berte chu malsâwmin, mawhphurhna phûrawm tak a pe a. An tâna a thiltum chu chatuana nung a, leilung luahkhata, leilung hi paradis-a siam a ni.—Genesis 1:28, 31 chhiar rawh.
Mihringte helna avângin Pathian thiltum chu tihkhawtlai a ni a. Mahse, Pathian chuan mihringte chungah a beiseina a hloh lo va, a thiltum lah a tidanglam hek lo. Bible chuan Pathianin mi rinawmte chhan chhuah nân hna a thawk tih leh leilung chungchânga a thiltum a tifamkim dâwn tih min tiam a! Pathianin atîra a tum anga nun nuam tak nei tûrin a duh che! (Sâm 37:29 chhiar rawh.) Chuvângin, Pathian thiltumte i hlâwkpui theih dân chu Bible aṭangin zir ang che. (wp15-E 08/01)