A KAWM THU | BIBLE ZIR I DUH ANG EM?

Mi Tinte Tâna Bible Zirna Program

Jehova Thuhretute chuan vântlâng hmaa an thu hrilhna avângin hriat an hlawh hle a. Mahse, khawvêl pum huapah Bible zirtîrna program kan nei bawk tih i lo hria em?

Pa pakhatin a hnathawhna hmuna Bible zirna a neih lai

Kum 2014 khân ram 240-ah Thuhretu 8,000,000 chuangte chuan thla tinin Bible zirna 9,500,000 dâwn lai an nei a.a Ram pakhata mipui awm zât aia kan Bible zirna neih zât a tam zâwkna ram 140 lai a awm a nih chu!

He zirtîrna hna hlen chhuak tûrin, Jehova Thuhretute chuan Bible-te, lehkhabute, magazine-te, leh Bible zirna ṭanpuitu atâna chhuah thil dangte chu kum tinin ṭawng 700-in copy tlûklehdingâwn khat leh a chanve an tichhuak a! Hetianga thu leh hla nasa taka tihchhuahna hian mite chu an mahni ṭawng duhzâwng ngeiin Bible zirna a neihtîr thei a ni.

“School-a lehkha zir hi nuam ka ti ngai miah lo va; mahse, he zirna hi chu nuam ka ti. Ka thil zirte chuan min va thlamuan tak êm!”—Katlego-a, South Africa.

“Zirna chuan ka zawhna neih zawng zawng leh a dangte pawh a chhâng vêk.”—Bertha-i, Mexico.

“Ka remchân hunah ka inah Bible ka zir ṭhîn a. Mamawh dang ka nei lo!”—Eziquiel-a, Brazil.

“Zirna chu ka remchân ang ang a ni mai, a châng chuan minute 15 aṭanga 30 chhûng vêl a ni a, chu aia rei zâwk châng pawh a awm.”—Viniana-i, Australia.

“Zirna man chawi a ngai lo va, a ropui hle!”—Aimé-a, Benin.

“Bible min zirtîrtu chu a dawhtheiin, a zaidam hle a. Inṭhianna ṭha tak kan nei a ni.”—Karen-i, Northern Ireland.

“Mi tam tak chuan Thuhretu ni chuang si lovin Bible an zir.”—Denton-a, England.

BIBLE ZIRNA KAN NEIH DAN CHUNGCHANGA ZAWHNA ZAWH FO ṬHINTE CHHANNA

Zirna chu eng anga kalpui nge a nih?

Bible thuchâng chi hrang hrangte chu la chhuakin, chu mi nêna inkûngkaihna nei Bible chângte kan bih chiang a. Entîr nân, Bible chuan hêng zawhnate hi a chhâng a ni: Pathian chu tu nge ni? Mi eng ang nge a nih? Hming a nei em? Khawiah nge a awm? Kan hnaih thei em? tihte hi. A harsatna lai chu Bible-a a chhânnate zawnna tûr hriat hi a ni.

A chhânnate hmu tûra mite ṭanpui nân, Bible Zirtîrna Dik Tak Chu Eng Nge Ni? tih phêk 224 nei lehkhabu chu kan hmang ṭhîn a.b He lehkhabu hi Bible zirtîrna bul berte hre thiam tûra mite ṭanpui nân bîka siam a ni. Hetah hian Pathian, Isua Krista, mihringte hrehawm tawrhna, thawhlehna, ṭawngṭaina, leh thu dang tam tak a chuang a ni.

Eng hunah leh khawi hmunah nge Bible zirna chu neih theih a nih?

Zirna chu i duh hun leh hmunah neih theih a ni.

Zirna ṭum khat chu eng anga rei nge ni?

Mi tam tak chuan chawlhkâr khata dârkâr khat vêl Bible zir nân hun an insiam a. Mahse, a rei lam chu a siamrem theih a ni. I hun duan mil tûrin kan insiamrem ang. Chawlhkâr khata minute 10 emaw, 15 emawa rei zir pawh an awm a ni.

Zirna atân sum eng zât nge sên ngai ang?

Zirna leh zirna atâna hman lehkhabute chu a thlâwn a ni. Hei hi Isua’n a zirtîrte hnêna kaihhruaina a pêk: “Athlâwnin in hmu a, athlâwnin pe ang che u,” tih nên chuan nên a inrem a ni.—Matthaia 10:8.

Zirna zawh nân engtia rei nge ngai ang?

A reizâwng chu nangmahah a innghat a. Bible Zirtîrna Dik Tak Chu Eng Nge Ni? tih lehkhabu-ah chuan thupui 19 a awm a. A thupui a enga pawh, a nih loh leh a vaiin nangma zai mila zir theih a ni.

Jehova Thuhretu ka nih kher a ngai em?

Ngai lo. Mi tinin an duhzâwng ring tûra an neih dikna chu kan zahsak a. Mahse, Bible hriatna bul berte neitu chuan duh thlanna ṭha a siam thei a ni.

Khawi aṭangin nge ka hriat belh theih ang?

Kan jw.org Web site chuan Jehova Thuhretute rinna leh thiltihte chungchângah chanchin rin tlâk a pe a ni.

Bible zirna engtin nge ka dîl theih ang?

Kan Web site, www.jw.org-ah online-in dîlna theh lût rawh.
He magazine phêk hnihnaa address i hnaihna berah lehkha thawn rawh.
In vênga awm Jehova Thuhretute be pawh rawh. Tualchhûng telephone number ziaknaah “Jehova Thuhretute” number chu i zawng thei ang. (w15-E 04/01)

a Bible zirna chu mi mal emaw, a huho emawa neih a ni tlângpui.

b Jehova Thuhretute tihchhuah a ni a. He lehkhabu hi ṭawng 260 chuangin, copy maktaduai 230 chuang tihchhuah a ni.

CHHUNGKUATE ṬANPUITU

“Ka nupuiin Bible a zir ṭan chuan, inthlâk danglamna lian tham tak a nei tih ka hria a. Kan chhûngkaw nunin hma a sâwn phah a ni. A thil zir chu hriat ka châk avângin, kei pawhin ka zir ve ṭan a. Ka thu zir chuan mi ṭha zâwkah min siam a. Bible zirna chuan kan chhûngkuaa inlaichînna a tiṭha zual a ni.”—Eziquiel-a.

“Bible ka zir hnu chuan, ruihhlo ngaih te, a lutuka zu in te chu ka bânsan a, thinur insûm dân pawh ka zir bawk. Ka in pawh a thianghlimin, a felfai sâwt hle. Ka chhûngkua chu ka ngaihlu lehzualin, anmahni tihlim tûra thiltih chu nuam ka ti a. Tûnah chuan ka hlim tawh zâwk a ni.”—Karen-i.

“Bible ka zir avângin ṭhenkhat chuan min sawisêl a. Mahse, ka pasal chuan ka thu tlûkna siam chu min thlâwp a, heti hian a sawi a ni: ‘Mite chuan eng pawh sawi mai mai rawh se pawi ka ti lo. A ṭha lamin i inthlâkthleng tih ka hria a—chu chu ka tân a pawimawh ber. Zir zawm zêl rawh,’ tiin. Tûn aia chhûngkaw nun ṭha zâwk kan nei ngai lo vang!”—Viniana-i.