Inpâwng Huatna—Khawvêl Puma Buaina

AMERICA rama piang Korea mi Jonathan-a chuan a naupan laiin hnam avânga mite huat a hlawh a. A lo ṭhan len chuan a hmêl lan dân emaw, hnam hrang a nih vâng emawa amah haw lotute awmna hmun chu a zawng ta a ni. U.S.A-a Alaska hmâr lam khawpui pakhatah medical doctor a rawn ni ta a, chu mi hmuna a dam lo enkawl tam takte nên chuan an lan dân pawh a inang a. Chuvângin, thli vâwt hrehawm tak tlehna hmun Artic Circle-ah chuan hnam avânga inpâwng huatna hrehawm tak chu a awm tawh loh a beisei a ni.

Kum 25 mi hmeichhe pakhat a enkawl hnu chuan chutiang beiseina a neih chu a bo ta vek a. Chu nu chu nikhaw hre lova a awmna ata a rawn harh chhuah a, Jonathan-a hmêl a han hmuh chuan Korea mite hmuhsitna thûk tak a lo neih sa chu lan chhuahtîrin, ânchhia a rawn lawh ta phiar phiar mai a ni. Jonathan-a chuan hmun danga insawn a, inrem taka hnam dangte nêna awmho a tum a. Mahse, chu thil thleng chuan chutianga a thawhrimna zawng zawngin hnam inthliar hranna avânga inpâwng huatna lak ata a tlân botîr thei lo tih a hriattîr a ni.

Jonathan-a thiltawn chuan thil nihna dik tak, duhawm lo tak si chu a târ lang a. Inpâwng huatna chu khawvêl hmun tinah a awm a. Mihring awm tawh phawtnaah chuan inpâwng huatna a awm tih a lang a ni.

Inpâwng huatna chu mi tam takin duh lo mah se, a hluar hle tho va. Hei hi thil inkalh leh mak tak a ni. Engtin nge mite thil duh loh tak chu a darhzau viau theih? Inpâwng huatna duh lotu tam tak chuan an mahni ngei pawhin an nei tih chu an hmuh hmaih ṭhin vâng a ni. Chutiang chu i ni ve em? Engtin nge chu zawhna chu i chhân ang?

MI MAL HARSATNA

Kan hria emaw, hre lo emaw pawh ni se, kan thinlunga inpâwng huatna engemaw awm chu hmuh chhuah a harsa a ni. Chutiang a nih chhan chu Bible chuan: “Thinlung hi thil zawng zawng aiin bumhmang ber a ni,” tia sawiin a hrilhfiah a. (Jeremia 17:9) Chuvângin, mi chi tinte ngaithei nia inhriain mahni kan inbum thei a ni. A nih loh leh hnam engemaw bîkte chu a ṭha lo zâwnga thlîr chhan tûr ṭha tak nei nia inhriain kan inthiamchawp pawh a ni thei bawk.

Inpâwng huatna a rûka kan neih leh neih loh hriat a harsat dân târ lan nân, a hnuaia thil thleng pahnih hi lo mitthla teh: Zân thim takah mahniin kawngah i kal a. I la hmuh ngai loh mipa tleirâwl pahnih chuan i lam an rawn pan a. An chak hmêl hle a, pakhat chuan a kutah thil eng emaw keng niin a lang a ni.

Chûng thleirâwlte chuan beih an tum che niin i ngai em? Tûn hmaa i thiltawnte avâng chuan fîmkhur a ngai tih i hria pawh a ni thei; mahse, i thil lo tawn tawhte chuan chûng tleirâwlte chu i tâna mi hlauhawm angin thutâwp a siamtîr tûr che a ni em? Zawhna chhût ngun ngai tak awm thei chu, Chûng mipate chu eng hnam angin nge i ngaih? tih hi a ni. He zawhna i chhânna aṭang hian thil nih dân chu a lang chiang thei a. Chu chuan engemaw chen chu inpâwng huatna tlêm azâwng i nei ṭan tawh tih a târ lang mai thei a ni.

Dik taka kan inenfiah chuan, kan vai hian hnam inthliar hranna avânga inpâwng huatna engemaw chen kan nei ṭheuh tih kan pawm tûr a ni. “Mihring chuan pawn lama lan dân an en ṭhîn,” tia sawiin Bible ngei pawhin inpâwng huatna a awm tih chu a pawm a. (1 Samuela 16:7) He mihring rilru put hmang—rah ṭha lo tak chhuah fo thîntu—hi kan neih ṭheuh avângin kan nunah hian inpâwng huatna hneh emaw, paih bo emaw kan beisei thei ang em? Khawvêl puma inpâwng huatna a awm loh hun kan hmu ngai ang em? (w13-E 06/01)