Jehova Thuhretute’n Hmeichhe Rawngbâwltute An Nei Em?

Aw, nei e. Khawvêl pum puia Jehova Thuhretute chuan hmeichhe rawngbâwltu maktaduai tam tak an nei a. Anni chu Pathian Lalram chanchin ṭha puangtute an ni. Sâm 68:11-in chûng rawngbâwltute chungchângah heti hian a sawi lâwk a: “Lalpan thu chu a pe ṭhîn a, chanchin hriltu hmeichhe tam takin an hril darh a,” tiin.

Mahse, Jehova Thuhretute zînga hmeichhiate rawngbâwlna chu sakhaw danga hmeichhiate rawngbâwl dân nêna hriat pawlh tûr a ni lo. Danglamna tam tak a awm a ni. Chûng danglamnate chu eng nge ni?

An rawngbâwlsakate chu a inang lo a ni. A bîk takin, Kristian rama hmeichhe rawngbâwltute chuan an kohhran chhûnga hruaitu nihnate an chelh bâkah, an rawngbâwlsakate chu kohhran chhûnga mi leh sate a ni ṭhîn. Mahse, Jehova Thuhretute zînga hmeichhe rawngbâwltute chuan vântlâng hmunah mite, in tin kal rawngbâwlnaa an mi tawh te, leh hmun danga mite ang chi kohhran pâwna mite hnênah thu an hrilh a ni.

Sakhaw dangte nêna Jehova Thuhretute zînga hmeichhe rawngbâwltute inan lohna dang leh chu kohhran chhûnga an hnathawh dân hi a ni a. Kristiana ram leh sakhaw danga hmeichhe rawngbâwltute chuan an kohhran mi leh sate chungah thuneihnate chelhin kaihhruainate an pe a. Mahse, Jehova Thuhretute zînga hmeichhe rawngbâwltute chuan baptisma chang tawh mipate an awm chuan kohhran chhûngah zirtîrna an pe lo. Zirtîrtu atâna ruat mipate chauhvin an zirtîr a ni.—1 Timothea 3:2; Jakoba 3:1.

Bible chuan mipate chauh chu kohhran enkawl tûra mawhphurhna pêk an nih thu a sawi a. Tirhkoh Paula’n a rawngbâwlpui Tita hnêna lehkha a ziah laia tih dân tûr a sawi hi lo chhinchiah ang che, ani chuan: “Hemi avâng hian Kret thliarkârah khân ka hnutchhiah che a ni, . . . khaw tinah upate i ruatna tûrin,” tiin. Chu bâkah, Paula chuan, chutianga ruata awmte chu “sawisêlbo, nupui pakhat nei” an ni tûr a ni tih a sawi belh bawk. (Tita 1:5, 6) Timothea hnêna a lehkha thawnah pawh chutiang kaihhruaina chu a pe a, ani chuan: “Tu pawh Kohhran hotua ṭan duh chuan hnathawh ṭha a duh a ni, tih hi a dik a ni. Chutichuan Kohhran hotu chu sawisêlbo, nupui pakhat nei, . . . zirtîr thiam,” a ni tûr a ni, tiin.—1 Timothea 3:1, 2.

Engvângin nge kohhrana hotu nihna chu mipate hnênah chauh pêk a nih? Paula chuan: “Hmeichhiain zirtîr zawng ka phal lo, mipa chunga thu neih ka phal hek lo, ngawi reng awm zâwk rawh se. Adama chu siam hmasak a ni a, chu mi hnuah Evi chu siam a ni a,” tiin a sawi. (1 Timothea 2:12, 13) Chuvângin, thil siam dân chuan zirtîrna leh hotu nihna chungchânga Pathian thiltum chu a târ lang a ni.

Jehova rawngbâwltute chuan an Lû ber Isua Krista entawn tûr siam chu an zui a. Zirtîr Luka chuan Isua rawngbâwl dân chu hetiang hian a ziak a ni: “Isuan thu hril leh Pathian ram Chanchin Ṭha thlen chungin khaw lian leh khaw tê te a fang zêl a,” tiin. A hnuah, Isua chuan a hnungzuitute chu chutiang hna thawk ve tûrin a tîr chhuak a: “An kal ta a, khua an fang zêl a, ram tinah Chanchin Ṭha an hril a,” tiin kan chhiar a ni.—Luka 8:1; 9:2-6.

Tûn laia Jehova rawngbâwltu a hmei a pate chuan Isua sawi lâwk: “He Ram Chanchin Ṭha hi hnam zawng zawng hriattîrna tûrin khawvêl zawng zawngah hrilin a awm ang a; chumi zawhah chuan tâwpna chu a lo thleng ang,” tih hna chu ṭhahnemngai takin an thawk a ni.—Matthaia 24:14.