Ringtu Dik Tak leh Khua leh Tui Rinawm Tak Nih Kawp Theih Dân

ISUA rawngbâwl dân chi hnih chu engte nge ni? A hmasain, Isua chuan politics kal hmang thlâkthleng lam ni lovin, mi mal tinte thinlung thlâkthleng chu a tum a ni. Entîr nân, Tlâng Chunga Thusawia Isua sawi uar kha han ngaihtuah teh. Chi leh êng ang kan nih a ṭûlzia a sawi hma chiahin, a thu ngaithlatute hnênah chuan “thlarau lama an pachhiatzia inhriate” chu an chan a ṭha, a nih loh leh an hlim tih a hrilh a. “Thuhnuairawlhte . . . thinlunga thianghlimte . . . remna siamtute chu an chan a ṭha e,” tiin a sawi belh a ni. (Matthaia 5:1-11 C.L. Re-edited) Isua chuan a hnungzuitute chu thil ṭha leh ṭha lo chungchânga Pathian tehna mila an ngaihtuahna leh rilru veizâwngte siamrem a pawimawhzia leh thinlung zawng zawnga Pathian rawngbâwl a pawimawhzia hre tûrin a ṭanpui a ni.

A dawtah, Isua’n mihringte hrehawm tawrhna a hmuhin, a khawngaihna chuan an hrehawmnate tihnêpsak tûrin a chêttîr a. Mahse, an hrehawm tawrhna zawng zawng tihrehsak chu a thiltum a nihtîr lo. (Matthaia 20:30-34) Dam lote chu tidam mah se, natna chu a la awm chhunzawm zêl tho a ni. (Luka 6:17-19) Hnehchhiaha awmte chu ṭanpui mah se, rorêl dik lohna chuan hrehawm tawrhna a la awmtîr zawm zêl a. Rilṭâmte chu hrai puar mah se, ṭâm chuan mihringte a la tihrehawm reng tho a ni.—Marka 6:41-44.

Thinlung Thlâkthlengtîr leh Hrehawm Tawrhna Tihnêpsak

Engvângin nge Isua chuan kal hmang thlâkthleng emaw, manganna tihbo emaw lam aia mite thinlung thlâkthleng leh hrehawm tawrhna tihnêpsak chu a tum zâwk? Isua chuan Pathianin mihring sawrkâr zawng zawng tihbo nân leh hrehawm tawrhna awmtîrtu zawng zawng tihbo nân A Lalram a la hmang dâwn tih a hria a. (Luka 4:43; 8:1) Chuvângin, a zirtîrte’n dam lote tihdam nâna hun tam zâwk pe tûra an ngen pawh khân: “Hmun dangah khaw hnaiahte chuan i kal ang u, chûngahte pawh chuan thu ka hrilh theihna tûrin; chu chu ka rawn chhuah chhan a ni si a,” tiin a chhâng a ni. (Marka 1:32-38) Isua chuan mi tam takte tisa lam hrehawmna chu a tihnêpsak ngei mai; mahse, Pathian thu hrilh leh zirtîr chu a ngai pawimawh zâwk a ni.

Tûn laiah pawh, Jehova Thuhretute chuan an thu hrilhnaah Isua entawn chu an tum tlat a. A mamawhte hnêna ṭanpuina pein, mite hrehawm tawrhna chu an tihnêpsak a ni. Mahse, Thuhretute chuan khawvêla rorêl dik lohna tihbo chu an tum lo. Anni chuan Pathian Ramin hrehawm tawrhna awmtîrtu zawng zawng chu a rawn tibo dâwn tih an ring a ni. (Matthaia 6:10) Isua ang bawkin, politics kal hmang thlâkthleng chu an tum lo va, mite thinlung thlâkthleng an tum zâwk a ni. Chutianga tih chu a âwm hle; mite buaina ber chu politics lam ni lovin, rilru lam thil a nih tlat avângin.

Khua leh Tui Rinawmte

Chutih rual chuan, Jehova Thuhretute chuan khua leh tui rinawm tak nih chu an Kristian mawhphurhna niin an hre tlat a. Chuvângin, sawrkâr hotute chu an chawimawiin, an zah a. An thu leh hla chhuahte leh an thu hrilh rawngbâwlna hmangin an vêngte chu dân zâwm mi ni tûrin an fuih a ni. Mahse, sawrkâr thil phût chu Pathian thupêk nêna a inkalh chuan, Thuhretute chuan chu thupêk chu an zâwm duh lo. Anni chuan ‘mihring thu aiin Pathian thu an zâwm zâwk a ni.’—Tirhkohte 5:29; Rom 13:1-7.

Jehova Thuhretute chuan an vêng chhûnga awm zawng zawngte chu tlawh chhuakin, a thlâwna Bible zir tûrin an sâwm a ni. Chutiang zirna avângin mi maktaduai tam takte thinlung chu a inthlâkthleng tawh a. Kum tinin, mi sâng tam takte chu mei zûk te, zu ruih te, ruihhlo ngaih te, pawisa khelh te, leh mipat hmeichhiatna lama inphalraina te ang chi mi tichhe thei tak an thil chînte bânsan tûra ṭanpui an ni. Chûng mite chuan Bible thu bulte nunpui dân an zir avângin khua leh tui fel leh rinawm an lo ni ta a ni.

Chu mai bâkah, Bible zirtîrna chuan chhûngkaw inkârah—nupa inkârah te, nu leh pa leh fate inkârah te, pianpui unau inkârah te—inzah tawnna thûk tak a awmtîr a, an inzawmna a tiṭha lehzual a ni. Chu chuan chhûngkaw zînga mite inkârah inlaichînna ṭha a awmtîr a. Chhûngkaw inlaichînna ṭha chuan khawtlâng ṭha leh chak a siam lehchhâwng a ni.

Hêng thuziaka târ lan tâk zawng zawngte i ngaihtuah hnu chuan engtin nge i ngaih: Bible chuan sakhuana leh politics chawhpawlhtute chu a pawm em? A chhânna chu a chiang a ni; a pawm lo tih chu. Mahse, Kristiante chu khua leh tui rinawm tak an ni tûr a ni em? Aw, ni e. Engtin nge an nih theih? Lei chi leh khawvêl êng ni tûra Isua thupêk zuina hmangin chutiang chu an ni thei a ni.

Hêng Krista kaihhruaina thu ṭangkai tak zui tumtute chuan an tân leh an chhûngte tân mai bâkah, an chênna khawtlâng tân pawh hlâwkna an thlen ang. Jehova Thuhretute chuan in vêng chhûnga neih mêk Bible zirtîrna program chungchâng kimchang lehzuala hrilh che chu an châk hle ngei ang.a (w12-E 05/01)

[Footnote]

[Phêk 7-naa thu lâk chhuah]

Isua chuan politics kal hmang thlâkthleng lam ni lovin, mite thinlung thlâkthleng chu a tum zâwk

[Phêk 8-naa thu lâk chhuah]

Jehova Thuhretute chuan khua leh tui ṭha leh rinawm tak nih chu an Kristian mawhphurhna niin an ngai