Jehova Chhiahhlawh Chu “Kan Bawhchhiatnate Avângin Hliamin A Awm”

“Ani chu kan bawhchhiatnate avângin hliamin a awm a, kan khawlohnate avângin vuak thitlinin a awm a: . . . a vuakna vualtea tihdamin kan awm ta.”—IS. 53:5.

1. Hriatrengna kan hman hunah eng nge rilrua kan dah reng ang a, chutianga ti tûrin eng hrilh lâwknain nge min ṭanpui ang?

HRIATRENGNA chu Krista thih leh a thawhlehnain a hlen chhuah zawng zawngte hriat chhuah nân kan hmang a. Chu chuan Jehova lalchungnunna thiam chantîrna te, a hming tihthianghlimna te, leh mihringte chhandamna pawh tiama a thiltum hlen chhuahna te chu min hriat chhuahtîr a ni. Isaia 53:3-12-a kan hmuh Krista inthawina leh chu miin a hlen chhuah chungchâng hrilh lâwkna chu a fiah ṭha êm êm a; chu aia fiah zâwk hrilh lâwkna dang chu Bible-ah a chuang lo kan ti thei hial ang. Isaia chuan Chhiahhlawh hrehawm tawrh tûrte chu sawi lâwkin, Krista thih dân tûr leh a thihnain a unau hriak thihte leh a “berâm dang” te tâna malsâwmna a thlen dân chanchin kimchang tak chu a pe bawk a ni.—Joh. 10:16.

2. Isaia hrilh lâwkna chu eng târ lanna nge a nih a, chu chuan kan chungah nghawng eng nge a neih ang?

² Leia Isua a lo pian hma kum zabi sarihah khân, Pathian Jehova chuan A Chhiahhlawh a thlana chu fiahna nasa ber hnuaiah pawh a rinawm dâwn tih hrilh lâwk tûrin Isaia chu a thâwk khum a. Chu chuan Jehova’n a Fapa chu a rinawm dâwn tih a rinzia a târ lang a ni. He hrilh lâwkna hi kan bih chian hian, kan thinlung chu lâwmnain a khat ang a, kan rinna chu a chak zual sauh vang.

“Hmuhsit” leh ‘Ngaihsân Loh’

3. Engvângin nge Judate khân Isua chu lo lâwm tûr an nih a; mahse, ani chu engtin nge an lo dawnsawn?

³ Isaia 53:3 chhiar rawh. Pathian Fapa mal neih chhun tân, a Pa bula hlim taka rawngbâwlna chu kalsan a, sual leh thihna ata mihringte chhan chhuah nâna a nun pe tûra leia a lo kalnain a kaihhnawih telte chu han ngaihtuah teh! (Phil. 2:5-8) A inthâwina chu mihringte hnêna sual ngaihdamna tak tak pêk nân a ni a; chu chu Mosia Dân hnuaia rana inthâwina chuan a lo entîr lâwk a ni. (Heb. 10:1-4) Thutiam Messia lo nghâktu Judate tal khân, ani chu an lo lâwmin, an lo chawimawi tûr a ni lâwm ni? (Joh. 6:14) Chu ai mah chuan, Isaia hrilh lâwk angin Krista chu Judate “hmusitin” leh ‘ngaisân lohvin’ a awm ta zâwk a. Tirhkoh Johana chuan: “Amaha mite hnênah a lo kal a, amaha mite’n an lo lâwm si lo,” tiin a ziak a ni. (Joh. 1:11) Tirhkoh Petera chuan Judate hnênah: “Min thlahtute Pathian chuan a Chhiahhlawh Isua a chawimawi ta a nih hi; ani chu in mantîr a, Pilatan chhuah a tum pawhin a hmaah in lo duh loh kha. Mi thianghlim leh fel tak kha in duh lo,” a ti a ni.—Tirh. 3:13, 14.

4. Engtin nge Isua chu natnate hre mi a lo nih?

⁴ Isaia chuan Isua chu “natna hre mi” a nih tûr thu a lo hrilh lâwk bawk a. A rawngbâwl chhûng khân, Isua chu a hah thei a; mahse, a nat thu târ lanna eng mah a awm lo. (Joh. 4:6) Amaherawhchu, thu a hrilhate natna chu a hria a ni. Anni chu a khawngaihin, mi tam tak a tidam bawk. (Mk. 1:32-34) Chutiang chuan, Isua chuan: “Ani chuan kan natnate phurin, kan lungngaihnate pawh a phur ngei a,” tih hrilh lâwkna chu a tithleng famkim a ni.—Is. 53:4a; Mt. 8:16, 17.

‘Pathian Vuak’ Ang Maiin

5. Juda tam tak chuan Isua thihna chu engtin nge an thlîr a, engvângin nge chu chuan Isua hrehawm tawrhna chu a belhchhah?

⁵ Isaia 53:4b chhiar rawh. Isua dam rualpui mi tam tak chuan, hrehawm a tawrh chhan leh a thih chhan chu an hre thiam lo va. Anni chuan Pathian hremah an ngai a ni. (Mt. 27:38-44) Judate chuan Isua chu Pathian sawichhiaah an puh a. (Mk. 14:61-64; Joh. 10:33) Dik tak chuan, Isua chu mi sual a ni lo va, Pathian sawichhetu lah a ni hek lo. Mahse, a Pa a hmangaihna nasa tak avângin, Pathian sawichhetu anga a thihna tûr chuan Jehova Chhiahhlawh anga a hrehawm tawrhna chu a belhchhah ngei ang. Amaherawhchu, Jehova duhzâwngah châk takin a intulût a ni.—Mt. 26:39.

6, 7. Eng kawngin nge Jehova chuan a Chhiahhlawh rinawm chu a ‘vuak’ a, engvângin nge Pathianin chu chu “a duh”?

⁶ Isaia hrilh lâwknaah mi dangte’n Krista chu ‘Pathian vuak’ angin an ngai tih chhiar chu mak ti lo mah ila, “LALPAN ani chu vuak thitlin a duh rêng a ni,” tih hrilh lâwkna chu mak kan ti hle mai thei. (Is. 53:10) Pathian Jehova pawhin: “Ka chhiahhlawh, . . . ka thlan, ka rilruin a lawm êm êma hi en teh u,” a tih bawk avângin, engtin nge Jehova chuan “vuak thitlin a duh” theih ang? (Is. 42:1) Chu chuan eng kawngin nge Jehova tân hlimna a thlen kan tih theih?

⁷ He hrilh lâwkna hi hre thiam tûrin, Jehova lalchungnunna chonaah, Setana chuan lei leh vâna Pathian chhiahhlawh zawng zawngte rinawmna chungah rinhlelhna a siam vek tih kan hre reng tûr a ni. (Job. 1:9-11; 2:3-5) Thih thlenga rinawm rengin, Isua chuan Setana chona chhânna tûr ṭha famkim chu a pe a. Chuvângin, Pathian Jehova’n Krista chu a hmêlmate tihhlum a phal rualin, a Chhiahhlawh thlan tihhlum a nih lai hmuh chu a tuar ngei ang tih rinhlelh rual a ni lo. Mahse, a Fapa rinawm pumhlûmna a hmuhna chuan Pathian Jehova chu a tilâwm hle a ni. (Thuf. 27:11) Chu bâkah, a Fapa thihna chuan mihring inlam lêtte hnênah hlâwkna a thlen dâwn tih a hriatna chuan Jehova chu a tilâwm hle bawk.—Lk. 15:7.

“Kan Bawhchhiatnate Avângin Hliamin A Awm”

8, 9. (a) Engtin nge Isua chu “kan bawhchhiatnate avângin, hliamin a awm”? (b) Engtin nge Petera’n chu chu a nemngheh?

⁸ Isaia 53:6 chhiar rawh. Berâm bo angin, mihringte chu an vâkvai a, Adama hnên aṭanga an rochun natna leh thihna lak ata chhan chhuahna chu zawngin an vâkvai a ni. (1 Pet. 2:25) Mi ṭha famkim lo an nih angin, Adama thlah tumahin Adama thil chân tâk chu an lei thei lo. (Sâm 49:7) Amaherawhchu, a hmangaihna nasa tak avângin, Pathian Jehova chuan a Fapa leh a Chhiahhlawh thlan duh tak “chungah chuan kan zaa khawlohna chu a nghat ta a.” ‘Kan bawhchhiatnate avânga hliama awm’ leh ‘kan khawlohnate avânga vuak thitlina awm’ rem tiin, Krista chuan banah kan sualnate phurin, kan aiah a thi a ni.

⁹ Tirhkoh Petera chuan: “Krista pawh khân a tuarsak che u avângin hetiang ti tûrin koh in ni asin; a hniaka in zuina tûrin entawn tûr a hnutchhiah che u kha. Sual lamahte thi tawhin felna lamah kan nun theih nân amah ngeiin thingah khân a taksain kan sualte a phur a,” tiin a ziak a. Tichuan, Isaia hrilh lâwkna chu la chhâwngin, Petera chuan: “Amah vuakna vualte chuan tihdamin in awm ta a,” tiin a sawi belh a ni. (1 Pet. 2:21, 24; Is. 53:5) Petera’n: “Pathian hnêna min hruai theih nân Krista chuan sualte avângin vawi khat a tuar bawk si a, mi fel chuan mi fel lo aiin a tuar a,” tia a sawi belh angin, hei hian mi sualte tân Pathian nêna inremna kawng a hawnsak a ni.—1 Pet. 3:18.

‘Berâm No Talh Tûra An Hruaia Ang Maiin’

10. (a) Engtin nge Baptistu Johana chuan Isua chungchâng a sawi? (b) Engtin nge Johana thusawi chu inhmeh tak a nih?

¹⁰ Isaia 53:7, 8 chhiar rawh. Baptistu Johana’n Isua a hnêna lo kal a hmuh khân, ani chuan: “En teh u, Pathian Berâm No, khawvêl sual kalpuitu tûr saw!” a ti a. (Joh. 1:29) Isua chu Berâm No anga a sawi lai khân, Johana rilruah chuan Isaia thu: ‘Ani chu berâm no talh tûra an hruaia ang maiin’ tih chu a awm mai thei a ni. (Is. 53:7) Isaia chuan: “A nunna chu thi khawp hiala a leih buaka . . . a awm avângin,” tiin a hril lâwk a ni. (Is. 53:12) Ngaihvên awm takin, Isua chuan a thih Hriatrengna hman dân tûr a hmêlhriattîr zân khân, a tirhkoh rinawm 11-te hnênah chuan uain no chu pein: “Hei hi ka thisen, sualte ngaihdam nâna mi tam tak tâna chhuak tûr, thuthlunna chu a ni,” a ti a ni.—Mt. 26:28.

11, 12. (a) Engtin nge inthawina atâna Isaaka a inphalna chuan Krista inthawina chu a entîr? (b) Hriatrengna hun kan hman laiin, Abrahama Ropui Zâwk, Jehova chungchâng eng nge rilrua kan dah reng ang?

¹¹ Hmân laia Isaaka angin, Isua chuan atâna Pathian Jehova duhzâwng maichâm chunga inthawina anga inhlan chu a inhuam a ni. (Gen. 22:1, 2, 9-13; Heb. 10:5-10) Isaaka chuan inthawina atâna hlan nih chu a remtih laiin, Abrahama chu inthawina hlan tumtu a ni. (Heb. 11:17) Chutiang bawkin, Isua chuan thih chu inhuam hle mah se, tlanna ruahmanna Siam Chhuaktu chu Jehova a ni a. A Fapa inthawina chu mihringte chunga Pathian hmangaihna nasa tak târ lanna a ni.

¹² Isua ngei chuan: “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân,” tiin a sawi a. (Joh. 3:16) Tirhkoh Paula chuan: “Pathian chuan a mi hmangaihna chu fak tlâkin a lantîr a, mi sualte kan la nih laia Krista kan aia a thih avâng khân,” tiin a ziak a ni. (Rom 5:8) Chuvângin, Krista chu a thih hriat rengna hmanga kan chawimawi rualin, inthawina ruahmanna siamtu, Abrahama Ropui Zâwk, Jehova chu kan theihnghilh ngai tûr a ni lo. Amah chawimawi nân Hriatrengna hun chu kan hmang a ni.

Chhiahhlawh Chuan “Mi Tam Tak Chu Thiam A Chantîr”

13, 14. Engtin nge Pathian Jehova Chhiahhlawh chuan “mi tam tak chu thiam a chantîr”?

¹³ Isaia 53:11, 12 chhiar rawh. Jehova chuan a Chhiahhlawh thlan chungchângah: “Ka chhiahhlawh fel tak chuan . . . mi tam tak chu thiam a chantîr ang,” a ti a. Eng kawngin nge? Châng 12-na tâwp lam chuan a chhânna chu a sihhmuh a ni: “Bawhchhetute tân chuan [chu Chhiahhlawh chuan] a ṭawngṭaisak a,” tiin. Adama thlah zawng zawngte chu suala piang, “bawhchhetute” an ni a, chuvângin “sual man” thihna chu an dawng a ni. (Rom 5:12; 6:23) Jehova leh sual nei mihring inkârah inremna siam chu a lo ngai ta a. Isaia hrilh lâwkna bung 53-na chuan Isua’n sual nei mihringte tâna a “ṭawngṭaisak,” a nih loh leh a dîlsak dân chu: “Kan thlamuanna tûra thununna chu a chungah a tla a; a vuakna vualtea tihdamin kan awm ta,” tiin mawi takin a târ lang a ni.—Is. 53:5.

¹⁴ Kan sualte ama chunga nghatin leh kan tâna thihna temin, Isua chuan “mi tam tak chu thiam a chantîr” a ni. Paula chuan: “Famkimna tinrêng chu amaha [Isuaa] awm reng leh a . . . thisen chuan remna lo siamin, amahah chuan engkim amah nên a inremtîr hi Pa lungnihzâwng tak a ni si a; amah ngeiah chuan leia thil awmte pawh, vâna thil awmte pawh amah nên a inremtîr hi,” tiin a ziak a ni.—Kol. 1:19, 20.

15. (a) Paula sawi “vâna thil awmte” chu tute nge ni? (b) Tute chauhvin nge Hriatrengna entîrna ei a, in thei a, engvângin nge?

¹⁵ Krista thisen hmanga Jehova nêna inrem leh “vâna thil awmte” chu Kristian hriak thih, vâna Krista nêna rorêl tûra kohte an ni a. Kristian “vân kohna chang vete” chu ‘nunna hmuh nân thiam chantîr’ an ni. (Heb. 3:1; Rom 5:1, 18) Tichuan, Jehova chuan anni chu thlarau lama a fate angin a pawm a ni. Thlarau thianghlim chuan anni chu vân lam Lalrama lal leh puithiam ni tûrin “Krista luahpuitute” an nih thu a hriattîr a ni. (Rom 8:15-17; Thup. 5:9, 10) Anni chu thlarau lam Israel, “Pathian Israelte” zînga mi an lo ni a, ‘thuthlung thara’ lâk luh an ni. (Jer. 31:31-34; Gal. 6:16) Thuthlung thar zînga mi an nih angin, anni chuan Isua’n: “He no hi ka thisena thuthlung thar chu a ni, in aia chhuak tûra chu,” tia a sawi, uain no pawh tiamin Hriatrengna entîrnate chu an eiin, an in tûr ani.—Lk. 22:20.

16. “Leia thil awmte” chu tute nge ni a, eng kawngin nge Pathian Jehova hmaah thiam an chan?

¹⁶ “Leia thil awmte” chu Krista berâm dang, leia chatuan nun beiseina neite an ni a. Jehova thlan Chhiahhlawh chuan hêng mite pawh hi Jehova hmaah thiam a chantîr ve tho a ni. Anni chuan Krista tlanna inthawina an rin avângin, “an puante Berâm No thisena suin an tivâr” a, Pathian Jehova chuan a thlarau lam fate ang ni lovin, a ṭhiante angin thiam a chantîr a, ‘hrehawm nasa taka’ dam kawchhuah theih beiseina ropui tak chu a pe a ni. (Thup. 7:9, 10, 14; Jak. 2:23) Thuthlung thara mi an nih lohva vân lam beiseina an neih loh avângin, hêng berâm dangte hian Hriatrengna entîrnate chu an eiin an in lo va; mahse, zah taka thlîrtu angin an tel a ni.

Pathian Jehova leh A Chhiahhlawh A Lawm Em Ema Chunga Lâwmna!

17. Engtin nge Chhiahhlawh chanchin sawina Isaia hrilh lâwknate zirna chuan, Hriatrengna atâna kan rilru buatsaih tûra min ṭanpui?

¹⁷ Chhiahhlawh chanchin sawina Isaia hrilh lâwknate bih chian chu, Krista thih Hriatrengna atâna kan rilru buatsaih dân ṭha tak a ni a. Chu chuan ‘kan rinna siamtu leh tifamkimtu lam chu en tlat’thei tûrin min ṭanpui a ni. (Heb. 12:1, 2) Pathian Fapa chu hel hmang a ni lo tih kan hria a. Setana ang lo takin, ani chuan Pathian Jehova zirtîr nih chu nuam a ti a, ani chu Lal Chungnungber angin a pawm a ni. Isua chuan leia rawng a bâwl chhûng khân, thu a hrilhnate chunga lainatna lantîrin, mi tam tak chu taksa lam leh thlarau lamah a tidam a. Chutiang chuan Messia Lal a nih anga “leiah hian rorêlna [dik] a awmtîr” hun tûr, khawvêl thara a thiltih tûrte chu a târ lang a ni. (Is. 42:4) “Jentailte tiêngtu” anga Lalram thu hrilhnaa a ṭhahnemngaihna chu a hnungzuitute tân khawvêl puma chanchin ṭha ṭhahnemngai taka hrilh a ṭûlzia hriattîrtu a ni.—Is. 42:6, 7.

18. Engvângin nge Isaia hrilh lâwkna chuan kan thinlung chu Pathian Jehova leh a Chhiahhlawh rinawm chunga lâwmnaa a tihkhah?

¹⁸ Isaia hrilh lâwkna chuan a Fapa duh tak leia hrehawm tuar tûr leh kan tâna thi tûra a rawn tirh laia Pathian Jehova inpêkna nasa tak kan hriatthiamna chu a belhchhah bawk a ni. Pathian Jehova chuan a Fapa hrehawm tuar lai a hmuh vâng ni lovin, thih thlenga Isua rinawm tlatna a hmuh avângin, ani chu a lâwm a. Isua’n Setana chu dâwtpa a nihzia finfiah tûr leh Jehova hming tithianghlim tûra a thiltihte zâra Pathian lalchungnunna thiam a chantîr dân zawng zawngte chu pawmin, Pathian Jehova lâwmna chu kan ṭâwmpui tûr a ni. Chu bâkah, Krista chuan kan sualte phurin, kan aiah a thi a. Chutiang chuan, hriak thih a unau pâwl tlêmte leh berâm dangte chu Jehova hmaah thiam a chantîr thei a ni. Hriatrengna atâna kan kal khâwm hian, kan thinlung chu Pathian Jehova leh a Chhiahhlawh rinawm chunga lâwmnain khat tlat rawh se. (w09 1/15)

Ennawn Nân

• Eng kawngin nge Pathian Jehova chuan a Fapa ‘vuak thitlina’ a awm chu a “duh”?

• Engtin nge Isua chu “kan bawhchhiatnate avângin hliamin a awm”?

• Engtin nge Chhiahhlawh chuan “mi tam tak chu thiam a chantîr”?

• Engtin nge Chhiahhlawh chungchânga Isaia hrilh lâwknate zirna chuan Hriatrengna atân kan rilru leh thinlung chu a buatsaih?

[Phêk 26-naa milem]

“Ani chu hmuhsitin a awm a, keini lah chuan ani chu kan ngaisâng si lo”

[Phêk 29-naa milem]

“Berâm dang” te chuan Hriatrengna chu zah taka thlîrtu angin an hmang