Jehova Lal Chungnunna leh Pathian Ram

“Aw LALPA, ropuina te, thiltihtheihna te, chawimawina te, hnehna te, lalna te hi i ta a ni a; . . . Aw LALPA, ram chu i ta a ni.​—⁠1 CHRONICLES 29:⁠11.

1. Engvângin nge Jehova chuan lei leh vâna Rorêltu Chungnungber ni tûra dikna a neih?

“LALPA chuan a lalṭhutphah chu vânahte khian a tinghet a; a ram chuan engkim chungah ro a rêl a.” (Sâm 103:19) Hêng thute hmang hian fakna hla phuahtu chuan rorêlna nihphung dik tak chu a sawi lang a ni. Siamtu a nih angin Pathian Jehova chuan lei leh vâna Rorêltu Chungnungber ni tûrin dikna a nei a ni.

2. Engtin nge Daniela chuan Jehova thlarau lam ram chungchâng a sawi?

² Rorêltuin a lal chungnunna a kengkawh theih nân chuan a hnuaia awm khua leh tui a neih a ngai a. Jehova chuan a thlarau thil siamte​—⁠a hmasain a Fapa neih chhun leh chu mi hnuah vântirhkohte​—⁠chu a awp hmasa a ni. (Kolossa 1:​15-17) He vân lama thil awm dân hi a hnu daihah zâwlnei Daniela hnênah hmuhtîr a ni a. Ani chuan heti hian a sawi: “Lalṭhutthlêngte an han hûn chhuaha, mi pakhat Hmakhawsânga a ṭhut thlengin ka en reng a . . . a sânga sângin rawng an bâwlsak a, a hmâah chuan sîng hmun sîng an ding a,” tiin. (Daniela 7:​9, 10) Jehova, “Hmakhawsânga” chuan a ‘rawngbâwltu’ tam tak leh fel taka ruahman a thlarau lam fate chu kum tam tak chhûng a lo awp tawh a ni.​—⁠Sâm 103:​20, 21.

3. Engtin nge Jehova lal chungnunna chu lei leh vânte chunga zauh a nih?

³ A tâwpah, Jehova chuan a rorêlna chu lei ngei pawh huam telin, mita hmuh theih vânlâwt zau tak leh chipchiar takah chuan a zauh ta a. (Joba 38:​4, 7) Lei aṭanga lo thlîrtute tân chuan vân lam thilte chuan fel tak leh a nih tûr ang taka hna a thawh avângin, kaihhruai leh thunun pawh an ngaih hmêl lo. Mahse, fakna hla phuahtu chuan: “[Jehova] chuan thu a pe a, siamin an lo awm ta si a. Ani chuan chûngho chu kumkhaw tlaitluan atân a tinghet a: thu, boral lo tûr chu, a ruat a,” tiin a puang chhuak a ni. (Sâm 148:​5, 6) Jehova chuan a lal chungnunna chu a thlarau thil siamte leh mita hmuh theih lei leh vânte hnathawh dân tûr kaihhruai nân te, thunun nân te, leh awp nân te a hmang reng a ni.​—⁠Nehemia 9:⁠6.

4. Engtin nge Jehova chuan mihringte chungah a lal chungnunna a hman?

⁴ Mihring nupa kawp hmasa ber siam a nih aṭangin Pathian chuan a lal chungnunna chu kawng dangin a hmang leh a. Jehova chuan mihringte chu nun awmze nei leh lungawithlâk nei tûra an mamawh zawng zawngte a pêk bâkah, leia thil siam hnuaihnung zâwkte chunga thuneihna a pe a​—⁠chu chu thuneihna inhlan chhâwnna a ni. (Genesis 1:​26-28; 2:​8, 9) Chuvângin Pathian rorêlna chu a dikin, ngil a nei mai a ni lo, a khua leh tuite a chawimawiin, zahawmna a pe tel bawk a ni. Adama leh Evi chuan Jehova lal chungnunna hnuaia an intukluh chhûng chuan, an lei paradis ina chatuana nun beiseina an nei a ni.​—⁠Genesis 2:​15-17.

5. Jehova’n a lal chungnunna a hman dân eng nge kan sawi theih?

⁵ Hêng zawng zawngte aṭang hian eng thutâwp nge kan siam theih? A hmasain, Jehova chuan a lal chungnunna chu a thil siam zawng zawngte chungah engtik lai pawhin a lantîr reng tih a ni a. A pahnihnaah chuan, Pathian rorêlna chu a dikin, a khua leh tuite chungah zahawmna a pe tih a ni bawk a. Tin, a tawp berah chuan, Pathian rorêlna hnuaia kan intukluhna leh a rorêlna kan thlâwpna chuan chatuan malsâwmna a thlen ang, tih thutâwpte kan siam thei a ni. Hmân lai Israel Lal Davida chu: “Aw, LALPA, ropuina te, thiltihtheihna te, chawimawina te, hnehna te, lalna te hi i ta a ni a, lei leh vâna awm zawng zawng hi i ta a ni si a; aw LALPA, ram chu i ta a ni a, mi zawng zawnga chungnung ber i ni,” tia sawi tûra chêttîra a awm pawh hi a mak lêm lo.​—⁠1 Chronicles 29:⁠11.

Engvângin Nge Pathian Ram Chu Mamawh A Nih?

6. Pathian lal chungnunna leh a Ram inkûngkaihna chu eng nge ni?

⁶ Lei leh Vâna Lal Chungnung Ber, Jehova chuan a thiltihtheihna leh a chakna chu a hmang reng a nih chuan engvângin nge Pathian Ram chu a ngaih? Lal chungnung ber chuan a thuneihna chu a khua leh tuite chunga hotua ruatte kaltlangin a kengkawh tlângpui a. Chuvângin, Pathian Ram chu Pathianin a thil siamte chunga a rorêlna kenkawh nâna a thil hman hi a ni.

7. Engvângin nge Jehova chuan a lal chungnunna chu kawng thara a târ lan?

⁷ Jehova chuan a lal chungnunna chu hun chi hrang hrangah kawng hrang hrangin a târ lang a. Dinhmun inher chhuak ang mil zêlin a lal chungnunna chu kawng tharin a târ lang a ni. Chutiang chu Pathian thlarau lam fa, Setana a hel a, Jehova rorêlna kalha hel tûra Adama leh Evi a hmin khân a lo ti tawh a. Chu helna chu Pathian lal chungnunna chona a lo ni ta a ni. Eng kawngin nge? Setana chuan Evi hnênah thei ei loh tûr a ei chuan a ‘thi hauh lo vang’ tia hrilhin, Jehova chu thudik lo sawi leh rin tlâk lovah a chhuah a. Setana chuan Evi hnênah heti hian a sawi chhunzawm a: “In ei nî apang chuan in mit a lo vâr ang a, a chhia leh a ṭha hriain Pathian ang in lo ni dâwn tih Pathianin a hre reng a nih chu,” tiin. Setana’n Adama leh Evi chu Pathian thupêk ngaihthah a, anmahni duh dân anga kal chu an ṭhatpui zâwk dâwn tih a sih hmuh a ni. (Genesis 3:​1-6) Chu chu Pathianin rorêl tûra dikna a neih chona a ni chiang hle. Eng nge Jehova’n a tih dâwn?

8, 9. (a) Engtin nge mihring lal chuan a bial chhûnga helna chu a chinfel ang? (b) Eden huana helna chhâng lêt tûrin, Jehova’n eng nge a tih?

⁸ A ram chhûngah ngei chuan helna chhuak ta se, rorêltu chuan eng nge a tih kan beisei ṭhin? Thilthleng chanchin hriate chuan chutiang thilthleng ṭhenkhat chu an hre chhuak thei ang. Thil awm dân chu ngaihthah ngawt lovin, lalber​—⁠rorêltu dik leh ngilnei tak​—⁠pawhin helho chungah chuan ro a rêl ang a, phatsantu angin thiam loh a chantîr ngei ang. Tichuan, rorêltu chuan tuemaw chu helhote hneh tûr leh remna siam tûrin a ruat dâwn a ni. Chutiang chiah chuan, Jehova chuan hma a lâk nghâl vatna leh helho chunga rorêlna thu a puanna khân engkim chu a thununna hnuaiah a awm vek tih a târ lang a. Adama leh Evi chu chatuana nunna nei tlâk lova puangin, Eden huan ata a hnawt chhuak a ni.​—⁠Genesis 3:​16-19, 22-24.

⁹ Jehova chuan Setana chunga a rorêlna thu chu puangin, a lal chungnunna târ lanna thar chu a lailang a, chu mi hmang chuan a lalna huam chhûng zawng zawngah remna leh ruahmanna fel a awmtîr leh dâwn a ni. Pathian chuan Setana hnênah: “Nang leh hmeichhia hi ka indotîr ang che u a, i thlahte leh a thlahte pawh ka la indotîr bawk ang: chu mi chuan i lû a la tithitling ang a, nangin a ke artui i la tithitling ang,” a ti. (Genesis 3:15) Chutiang chuan, Jehova chuan Setana leh a sipaite tiboral tûr leh A lal chungnunna dikzia finfiah tûr “thlah” awmtîr a tum thu a târ lang a ni.​—⁠Sâm 2:​7-9; 110:​1, 2.

10. (a) “Thlah” chu tunge a lo nih tâk? (b) Hrilh lâwkna hmasa ber thlen famkimna chungchângah Paula’n eng nge a sawi?

¹⁰ Chu “thlah” chu Isua Krista leh a ruala rorêltu pâwl danglam bîk tak a lo ni ta a. An vai chuan Pathian Messia Lalram an din a ni. (Daniela 7:​13, 14, 27; Matthaia 19:28; Luka 12:32; 22:​28-30) Amaherawhchu, hêng zawng zawngte hi puan chhuah nghâl vek a ni lo. Dik takin, hrilh lâwkna hmasa thlen famkimna chu ‘thurûk chatuan ata inthup ṭhîn’ a la ni reng a. (Rom 16:25) Kum zabi tam tak chhûng chu mi rinawmte chuan chu “thurûk” laihlan a nih hun tûr leh Jehova lal chungnunna chawimawi nâna hrilh lâwkna hmasa ber a thlen famkim hun tûr chu an nghâkhlel hle a ni.​—⁠Rom 8:​19-21.

Zawi Zawia Laih Lan “Thurûk” Chu

11. Jehova’n Abrahama hnênah eng nge a hriattîr?

¹¹ Hun a han ral zêl chuan Jehova chuan “Pathian ram thurûk” pêng hrang hrangte chu zawi zawiin a târ lang chho zêl a. (Marka 4:11) Jehova’n a târ lannate zîngah chuan “Pathian ṭhian” tia koh Abrahama a tel a ni. (Jakoba 2:23) Jehova chuan Abrahama hnênah ‘chi tam taka’ siam A tiam a. A hnuah Pathian chuan Abrahama hnênah: “Nangmah aṭang chuan lalte an lo chhuak,” ang a, “i thlahah chuan khawvêla chi tin an la thawveng ang,” tih a hriattîr a ni.​—⁠Genesis 12:​2, 3; 17:6; 22:​17, 18.

12. Engtin nge Tuilêt hnuah Setana thlah chu a lo lan?

¹² Abrahama hun lai khân mihringte’n rorêl tumna leh mi dangte awpbeh tumna an lo nei daih tawh a ni. Entîr nân, Nova tupa Nimroda chungchângah Bible chuan heti hian a sawi: “Ani chu leia mi chak tak a lo ni ṭan ta a. LALPA hmaah chuan sa pêl mi chak tak a ni,” tiin. (Genesis 10:​8, 9) Nimroda leh rorêltua inruat chawp mi dangte chu Setana’n a duh duha a pawh phar theih an ni tih a chiang hle. Chûng mite leh an lama ṭangte chu Setana thlah zînga mi an lo ni ta a ni.​—⁠1 Johana 5:⁠19.

13. Jehova’n Jakoba kaltlangin eng nge a târ lan lâwk?

¹³ Setana chuan mihring rorêltute siam chu tum ruh hle mah se, Jehova thiltum chuan hma a sâwn zêl a. Abrahama tupa Jakoba kaltlangin Jehova chuan: “Lal tiang chu Juda lakah a bo lo vang a, rorêltu tiang chu a ke kâr ata a bo hek lo vang, Silova lo kal hma loh chuan; hnam tinin ama thu an âwih ang,” tih a lailang a ni. (Genesis 49:10) “Silova” tih awmzia chu “A Neitu; A Neitu Tak” tihna a ni. Chuvângin, hêng hrilh lâwk thute hian “lal tiang” a nih loh leh lal chungnunna neitu dik tak leh ‘hnam tin,’ a nih loh leh mihring zawng zawngte chunga “rorêltu tiang” a nih loh leh rorêlna neitu dik tak chu a lo kal dâwn tih a lantîr a ni. Chu mi chu tunge ni ang le?

“Silova Lo Kal Hma Loh Chuan”

14. Jehova chuan Davida chu eng thu nge a thlunpui?

¹⁴ Jehova’n a mite chunga lal tûra Juda thlah zînga a thlan hmasak ber chu Jesaia fapa berâm vêngtu Davida a ni.a (1 Samuela 16:​1-13) Davida chuan sualna leh khaw lohnate a nei chung pawhin, Jehova lal chungnunna laka a rinawm avângin ani chuan Jehova lawm a hlawh a ni. Eden huana hrilh lâwkna chu tichiang lehzualin Jehova chuan Davida chu thu a thlunpui a: “I hnua i thlah, i rîla rah tûr chu ka tungding ang a, a ram chu ka tinghet ang,” tiin. Chu chuan Davida leh a thlah Solomona lalna chauh a kâwk lo, a chhan chu thuthlung chuan: “A ram lalṭhutthlêng chu kumkhua atân ka tinghet ang” a tih avângin. Chu Davida hnêna thuthlung chuan thutiam Lalram “thlah” chu Davida thlah aṭangin a lo la awm ang tih a nemnghet a ni.​—⁠Samuela 7:​12, 13.

15. Engvângin nge Judai ram chu Pathian Ram entîrna anga ngaih theih a nih?

¹⁵ Davida chuan puithiam lalin hriak thianghlim a thih ṭhin lal thlah kal zêl tûr bul chu a ṭan a ni. Chuvângin hêng lalte hi hriak thih, a nih loh leh messia ang tea sawi theih an ni. (1 Samuela 16:13; 2 Samuela 2:4; 5:3; 1 Lalte 1:39) Jehova lalṭhutthlênga ṭhu a, Jehova tâna lal anga Jerusalema ṭhu anga sawi an ni a. (2 Chronicles 9:⁠8) Chutiang chuan, Judai ram chuan Pathian Ram, Jehova lal chungnunna lantîrtu ai chu a awh a ni.

16. Juda lalte lalna chuan eng nge a rah chhuah?

¹⁶ Lal leh mipuite chu Jehova lalchungnunnaa an intukluh chuan, anni chuan A vênhimna leh a malsâwmna an dawng a. A bîk takin Solomona lal lai chuan muanna leh hausakna nasa tak a awm a, chu chuan Setana thununna tibo vek a, Jehova lal chungnunna thiamchantîr a nih hun tûr, Pathian Ram rorêlna chu a entîr lâwk a ni. (1 Lalte 4:​20, 25) Lungchhiatthlâk takin, Davida thlah kal zêla lalte chuan Jehova thil phûtte chu an tlin pha lo va, mipuite chu milem biaknaah leh nungchang bawlhhlawhnaah an tlu lût a. A tâwpah Jehova chuan ram chu Babulon-in B.C.E. 607-a a tihchhiat chu a phal ta a ni. Jehova lal chungnunna tihchhiatnaah Setana chu a hlawhtling ta niin a lang.

17. Davida ram chu tlâwm tawh mah se, Jehova chuan engkim a thunun tlat reng tho a ni tih engin nge lantîr?

¹⁷ Davida lalram tlâwmna​—⁠leh chu mi hmaa Israel hmar lam lalram tlâwmna​—⁠chuan Jehova lalchungnunna a ṭhat tâwk lohna emaw, a hlawhchhamna emaw lam târ lang lovin, Setana thununna leh mihringte Pathian lak ata an inlâk hranna rah chhuah lungngaihthlâkzia a târ lang zâwk a ni. (Thufingte 16:25; Jeremia 10:23) A lal chungnunna a la kengkawh reng a ni tih tilang tûrin Jehova chuan a zawlnei Ezekiela hmangin: “Hotu lukhum chu paihsak ula, lallukhum chu paihsak rawh u. . . . Ka linglet ang, ka linglet ang, ka linglet ang; hei pawh hi a ngaiin a awm lo vang, a neitu tak tûr a lo kal hma zawng,” tih a puang chhuak a ni. (Ezekiela 21:​26, 27) Chûng thute chuan thutiam “thlah,” “a neitu tak” Tûra chu a lo la kal lo tih a târ lang.

18. Vântirhkoh Gabriela chuan Mari hnênah eng thu nge a puan chhuah?

¹⁸ B.C.E. kum 2-na vêlah i han kai teh ang u. Vântirhkoh Gabriela chu Palestina hmâr lam Galili rama khaw pakhat Nazareth khuaa nula thianghlim Mari hnênah tirh a ni a. Heti hian a puang chhuak a ni: “Ngai rawh, i rai ang a, fapa i hring ang a, a hmingah chuan Isua i sa tûr a ni. Ani chu mi lian a la ni ang a, Chungnungbera Fapa an ti ang; Lal Pathianin a hnênah a thlahtu Davida ṭhutphah chu a pe ang a; Jakoba thlahte chungah chatuanin a lal ang a, ramin kin ni a nei lo vang,” tiin.​—⁠Luka 1:​31-33.

19. Eng hun phûrawm tak nge hnai?

¹⁹ A tâwpah chuan “thurûk” puan chhuah hun a lo hnai ta. Thutiam “thlah” bulpui Ber chu a lo lang thuai dâwn ta a ni. (Galatia 4:4; 1 Timothea 3:16) Setana chuan a ke artui a la tithitling ang. Mahse, chu “thlah” chuan Setana lu chu a la tithitling thung ang a, a lam ṭang zawng zawngte nên lam chuan che thei lovin a siam ang. Ani chuan Pathian Ram hmangin Setana thil tihchhiat tawh zawng zawngte chu ti ṭha leh vek ang a, Jehova lal chungnunna chu thiamchantîr a ni ang tih a hriattîr bawk ang. (Hebrai 2:14; 1 Johana 3:⁠8) Engtin nge Isua chuan hêng hi a tihpuitlin ang? Kan tân entawn tûr eng nge min hnutchhiah? A chhânna chu a dawta thuziakah kan hmu dâwn a ni.

[Footnote]

I Hrilhfiah Thei Em?

• Engin nge Jehova chu lei leh vâna Lal Chungnungber ni tûra dikna neihtîr?

• Engvângin nge Jehova chuan Lalram din a tum?

• Engtin nge Jehova chuan “thurûk” chu zawi zawia a laihlan chhoh zêl?

• Davida ram chu tihtlâwm a ni chung pawhin, Jehova chuan engkim a thunun tlat reng tho a ni tih engin nge târ lang?

[Phêk 5-naa milem]

Eng nge Jehova’n Abrahama kaltlanga a kawhhmuh?

[Phêk 7-naa milem]

Engvângin nge Davida ram tihtlâwmna chu Jehova lalchungnunna a hlawhchham tih finfiahna a nih loh?