Jehova Chuan “Dîltute Chu Thlarau Thianghlim” A Pe
“Nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!”—LUKA 11:13.
1. Eng hunah nge abîk takin thlarau thianghlim ṭanpuina kan mamawh?
‘KEIMAH mai chuan ka tuar thei lo. Thlarau thianghlim min ṭanpui chauhvin he fiahna hi ka tuar chhuak thei ang.’ Chutiang tak chuan i rilru chhûngril chu i sawi chhuak tawh ngai em? Kristian tam takte’n an sawi chhuak tawh ṭhîn a ni. Natna khirh tak i vei tih i hriat hnuah chutiang chuan i sawi chhuak a ni thei a. A nih loh pawhin, i dam chhûng atâna i thlan i kawppuiin a thihsan che hunah i sawi chhuak pawh a ni thei bawk. A nih loh vêk leh, i rilru hlim thei tak kha lungngaihna chhûm thim chhah takin a hliah khuh tâk vâng pawhin a ni thei bawk a ni. Nuna hrehawm nasa tak i tawh lai hian, Jehova thlarau thianghlimin ‘thiltihtheihna nasa tak’ a pêk che avâng chauhvin i dam khawchhuak niin i inhre mai thei a ni.—2 Korinth 4:7-9; Sâm 40:1, 2.
2. (a) Eng chonate nge Kristian dikte’n an tawh? (b) He thuziakah hian eng zawhnate nge kan ngaihtuah dâwn?
2 Kristian dikte chuan tûn lai Pathian ngaihsak lote awmna khawvêl aṭang hian nêksâwrna leh dodâlna an tâwk nasa tial tial a. (1 Johana 5:19) Chu bâkah, Krista zuitute chu Diabol-Setana, “Pathian thupêkte zâwma Isua hriattîrna thu pawmte” nasa taka dotu ngei mai chuan a bei a ni. (Thu Puan 12:12, 17) Chuvâng chuan, Pathian thlarau ṭanpuina chu tûn hma zawng aia kan mamawh lehzual hi thil mak a ni lo. Jehova thlarau thianghlim kan dawn chhunzawm zêl nân eng nge kan tih theih? Jehova’n fiahna kan tawh huna kan mamawh chakna min pêk chu a duh hle tih engtin nge kan hriat chian theih? Hêng zawhnate chhânna hi Isua sawi tehkhin thu pahnihah hian kan hmu a ni.
Ṭawngṭai Ngut Ngut Rawh
3, 4. Eng tehkhin thu nge Isua’n a sawi a, engtin nge chu chu ṭawngṭaina chungchâng sawi nân a hman?
3 Isua zirtîrte zînga pakhat chuan ṭum khat chu: “Lalpa, ṭawngṭai dân min zirtîr ve ta che,” tiin a ngên a. (Luka 11:1) Chu mi chhân nân Isua chuan a zirtîrte hnênah chu mi nêna inkûngkaih tehkhin thu pahnih a hrilh a ni. A pakhatna chu mikhual thlengtu pakhat chungchâng a ni a, a pahnihna chu a fapa thusawi ngaithlatu pa ber chungchâng a ni. He tehkhin thu pahnih hi a mal malin ilo ngaihtuah ang u.
4 Isua chuan heti hian a sawi a: “In zîngan tuin emaw ṭhian nei sela, zan laiah a hnênah kalin, ‘Ṭhiana, chhangpêr pathum mi pûktîr rawh; ka ṭhian zinin mi rawn tlawh a, a hmaa hlui tûr engmah ka nei si lo,’ ti sela; in chhûnga miin, ‘Mi tibuai suh; tûnah zawng kawng khâr a ni a, ka fate pawh ka hnênah khumah an mu tawh a; thovin ka va pe thei lo va che,’ tiin chhâng sela, ka ti a che u, a ṭhian a nih avângin thovin a va pe lo na a, a dîl ngut ngut avângin thovin a duh zât apiang a va pe ang,” tiin. Tichuan Isua chuan: “Chutichuan, ka ti a che u, dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u. Tupawh a dîl apiang chuan an hmu ṭhîn a, tupawh a zawng chuan an hmu ṭhîn a, tupawh a kik chu an hawnsak dâwn a ni,” tia sawiin, chu tehkhin thu chu ṭawngṭai dân chungchâng hrilhfiah nân a hmang a ni.—Luka 11:5-10.
5. Tehkhin thua thil dîl ngut nguttu chuan ṭawngṭai huna kan rilru put hmang tûr eng nge min zirtîr?
5 He tehkhin thu nung takah hian thil dîl ngut nguttu chuan ṭawngṭai huna kan rilru put hmang tûr chu a târ lang a ni. Isua’n “a dîl ngut ngut avângin” a duh zât apiang a hmuh thu a sawi hi chhinchhiah teh. (Luka 11:8) “Dîl ngut ngut” tih ṭawngkam hi Bible-ah vawi khat chiah a lang a. Hei hi Grik thu mal pakhat, a awmzia dik tak chu “zah theih lohna” tih aṭanga lehlin a ni. Zah theih lohna tih chuan mize ṭha lo lam a kâwk fo ṭhîn a. Amaherawhchu, zah theih lohna emaw, tih ngut ngutna emaw hi chhan ṭha neia tih a nih hian mize ṭha fak tlâk tak a ni thei. Hei hi mikhual thlengtu tehkhin thu chungchângah pawh hian a dik a ni. Ani chuan a thil mamawh dîl ngut ngut tûrin a zak miah lo. Isua’n he mikhual thlengtu hi kan tâna entawn tûra a sawi avângin, kan ṭawngṭainaah chutiang tak chuan kan dîl ngut ngut tûr a ni. Jehova chuan ‘dîl reng a, zawng reng a, kik reng’ tûrin min duh a. Chu mi chhân lêt nân, ani chuan ‘dîltute chu thlarau thianghlim a pe dâwn a ni.’
6. Isua hun lai khân khual chhawn thiamna lantîr chu eng anga thlîr nge a nih?
6 Isua chuan ṭawngṭai huna dîl ngut ngut tûr mai ni lovin, kan dîl ngut ngut chhan pawh min hrilh a. Chu zirlai chu hre fiah tûrin, Isua’n thil dîl ngut ngut mikhual thlengtu tehkhin thu a sawi lo ngaithlatute’n khual chhawn thiamna an thlîr dân chu kan ngaihtuah tûr a ni. A bîk takin, Bible hun laia Pathian chhiahhlawhte tân chuan, mikhual chunga ṭhat lo chhuah chu an thil ngaih pawimawh êm êm a nih thu Pathian Lehkhabua thuziak tam tak chuan a târ lang a. (Genesis 18:2-5; Hebrai 13:2) Khual chhawn thiamna lantîr loh chu a mualphothlâk a ni. (Luka 7:36-38, 44-46) Chu chu rilrua vawng rengin, Isua tehkhin thu chu ilo en leh ang u le.
7. Engvângin nge Isua tehkhin thua mikhual thlengtu chuan a ṭhianpa kaih thawh chu a zah loh?
7 Tehkhin thua mikhual thlengtu chuan zan laiah tlawhtu a nei a. Mikhual thlengtu chuan a mikhual pa tân chuan ei tûr chhawpsak ngei chu ngaiin a hria a, mahse “a hmaa hlui tûr engmah [a] nei si lo.” A thlîr dân chuan, hei hi rîkrum thil ang tluk a ni tlat! Eng anga harsa pawh ni se, chhang tlêm tal chu a neih a ngai a ni. Tichuan, a ṭhian pakhat hnênah kalin, zah pawh dâwn lovin a kai tho va. “Ṭhiana, chhangpêr pathum mi pûktîr rawh,” tiin a au va. A thil dîl a hmuh hma loh chuan a dîl ta ngut ngut mai a. Chhang a neih chauhvin ani chu mikhual thlengtu pângngai a ni dâwn a ni.
Mamawh Nasat Poh Leh Dîl Nasa Rawh
8. Engin nge thlarau thianghlim dîla ṭawngṭai ngut ngut tûrin min chêttîr ang?
8 Eng nge he tehkhin thu hian kan ṭawngṭai ngut ngut chhan tûr a târ lan? Tehkhin thua mi hian chhang neih chu mikhual thlengtu nih nâna a thiltih ngai nia a hriat avângin, chhang chu a dîl ngut ngut mai a ni. (Isaia 58:5-7) Chhang tel lo chuan mikhual thlengtu a ni thei dâwn si lo. Chutiang bawk chuan, Kristian dik kan nih anga kan rawngbâwlna kengkawh tûr chuan Pathian thlarau neih a ngaih nasatzia kan hriat avângin, Pathian hnênah chu thlarau chu dîlin kan ṭawngṭai ngut ngut a. (Zakaria 4:6) Chu mi tel lo chuan kan hlawhtling lo vang. (Matthaia 26:41) He tehkhin thu aṭanga thu tâwp pawimawh tak kan siam theih chu i hmu thiam em? Pathian thlarau chu tûn tut tuta kan thil mamawh anga kan thlîr chuan, kan dîl ngut ngut ngei ang.
9, 10. (a) Pathian thlarau kan dîl ngut ngut a ngaih chhan hrilhfiah nân entîrna pe rawh. (b) Eng zawhna nge kan inzawh ang a, engvângin nge?
9 Heta zir tûr hi kan tûn lai hun atân hian lo hmang ta ila, i chhûngkaw zînga pakhat chu zan laiah damlo ta thut angin han mitthla la. Doctor kaithovin, a ṭanpuina i dîl ang em? Tlêma insawisêlna mai a nih chuan i kaitho kher lo vang. Amaherawhchu, lungphu ṭhalo ni ta sela chuan, doctor kaihthawh chu i zak hauh lo vang. Engvângin nge? A chhan chu i dinhmun tawn hi rîkrum thil a nih vâng a ni a. Mi thiam ṭanpuina i mamawh tak zet a ni tih i hria a ni. Ṭanpuina i dîl loh chuan damlo a thih mai a hlauhawm si a. Chutiang chiah chuan, Kristian dikte chuan rîkrum thil a inzawm zatin an tâwk reng a tih theih a ni. Tihah chuan, Setana chu ‘sakeibaknei rûm ṭhîn’ angin a ei theih tûr zawngin a phi ruai reng mai si a. (1 Petera 5:8) Thlarau lama nung tûr chuan Pathian thlarau ṭanpuina kan mamawh tak zet a. A ṭanpuina dîl loh chu kan thihpui thei a ni. Hei vâng hian, Pathian hnênah a thlarau thianghlim chu kan dîl ngut ngut a ni. (Ephesi 3:14-16) Chutianga kan tih chauhvin, ‘a tâwp thlenga tuar’ thei tûra kan mamawh chakna chu kan nei thei ang.—Matthaia 10:22; 24:13.
10 Chuvângin, a châng chânga, ‘Ka ṭawngṭainaah hian eng ang fakauvin nge ka dîl ngut ngut?’ tia kan inzawh chu a pawimawh hle. Pathian ṭanpuina kan mamawh tak zet tih kan hriat hian, thlarau thianghlim dîlin kan ṭawngṭai ngut ngut lehzual ang tih hre reng rawh.
Engin Nge Ring Tlat Chunga Ṭawngṭai Tûrin Min Chêttîr?
11. Engtin nge Isua’n pa leh a fapa tehkhin thu chu ṭawngṭaina chungchângah a hman?
11 Isua tehkhin thua thil dîl ngut ngut mikhual thlengtu chuan, ṭawngṭaitu—ringtu—rilru put hmang chu a târ lang a. A dawta tehkhin thu chuan ṭawngṭaina ngaithlatu—Pathian Jehova—rilru put hmang a târ lang thung a ni. Isua chuan: “Nangniho zînga pa hi, a fapain chhangpêr dîl sela, tunge lung pe ang? a nih leh, sangha dîl sela, tunge sangha aiah rûl pe ang? a nih leh, artui dîl sela, khawmualkaikuang a pe ang em ni?,” tiin zawhna a siam a. Ani chuan: “Chutichuan nangni mi sual mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe dâwn êm!” tiin a hmanna chu a sawi chhunzawm a ni.—Luka 11:11-13.
12. Engtin nge pa a fapa dîlna ngaihthlâksaktu chuan Jehova’n kan ṭawngṭaina ngaihthlâk a inhuamzia a târ lan?
12 Pain a fapa a chhan lêt dân he entîrna hi hmangin, Isua chuan Jehova’n ṭawngṭaia a lam hawitute chunga a rilru put dân chu a târ lang a. (Luka 10:22) A hmasain hêng tehkhin thu pahnihte inan lohna lai hi chhinchhiah rawh. Tehkhin thu hmasa zâwka mi ṭanpui hrehtu ang lo takin, Jehova chu mihring nu leh pa hmangaihna ngah tak, an fate thil dîl tihsak vat duhtu ang hi a ni. (Sâm 50:15) Isua chuan Jehova’n min ṭanpui duhzia chu mihring pate leh Pathian dang lamzia chhûtpuiin a târ lan belh a. Ani chuan sualna rochun avânga sualna nei pa ber, “mi sual” mahin a fate thil ṭha a pêk chuan, kan Pa vâna mi, ngilnei tak chuan amah betute chu thlarau thianghlim a pe dâwn ngei tih a sawi a ni.—Jakoba 1:17.
13. Jehova hnêna kan ṭawngṭai hian eng nge kan chian theih?
13 Kan zir tûr chu eng nge ni ta? Kan Pa vâna mi hnêna thlarau thianghlim dîla kan ṭawngṭai hian, ani chu kan dîlna min pêk a inhuam hle tih kan ring tlat thei tih hi a ni. (1 Johana 5:14) Ṭawngṭaia a hnên lam kan pan tlut tlut ṭhin hian, Jehova chuan: “Mi tibuai suh; tûnah zawng kawng khâr a ni,” min tihkhum ngai lo vang. (Luka 11:7) Chu mi nêna inkalhin, Isua chuan: “Dîl rawh u, tichuan an pe ang che u; zawng rawh u, tichuan in hmu ang; kik rawh u, tichuan an hawnsak ang che u,” tih a sawi zâwk mah a ni. (Luka 11:9, 10) Ni e, Jehova chuan ‘kan koh hunah min chhâng ngei ang.’—Sâm 20:9; 145:18.
14. (a) Eng ngaih dân dik lovin nge fiahna tâwktu ṭhenkhatte chu tibuai thei? (b) Fiahna tawh hunah engvângin nge Jehova ring tlat chungin a hnênah kan ṭawngṭai ang?
14 Isua tehkhin thua pa ber, fate ngaihsak tak chuan mihring nu leh pa tupawh aiin Jehova ṭhatna chu a ropui zâwk tih a sawi uar a. Hei vâng hian, tumahin eng anga fiahna pawh tuar mah ila, chu chu Pathian kan chunga a lungnih loh vângah kan ngai tûr a ni lo rêng rêng. Chutianga ngai tûr chuan kan hmêlma lian ber Setana chuan min duh a ni. (Joba 4:1, 7, 8; Johana 8:44) Chutianga mahni thiam loh inchantîrna chuan Pathian Lehkha Thu ṭanchhan tûr a nei lo. Jehova chuan ‘sualin’ min thlêm lo va. (Jakoba 1:13) Ani chuan rûl leh khawmualkaikuang ang maia fiahna leh hrehawmna thlen thei thilte chu min pe hek lo. Kan Pa vâna mi chuan “a dîltute chu thil ṭha” a pe a ni. (Matthaia 7:11; Luka 11:13) Jehova ṭhatna leh min ṭanpui a inpeihna kan hriat thiam zawh poh leh ring tlat chunga ṭawngṭai tûrin min chêttîr lehzual ang. Chutianga kan tih chuan: “Pathianin mi ngaithla tak tak a; ka ṭawngṭaina thâwm chu a bengkhawn a ni,” tia fakna hla ziaktu rilru ang chu keini pawhin kan sawi chhuak ve thei ang.—Sâm 10:17; 66:19.
Thlarau Thianghlim Chu Min Ṭanpuitu A Nih Dân
15. (a) Thlarau thianghlim chungchângah Isua’n eng nge a tiam? (b) Thlarau thianghlimin min ṭanpui dân kawng khat chu eng nge ni?
15 Isua chuan a thih hma lawk khân, a tehkhin thua thlamuanna a pêk chu a sawi nawn leh a. Thlarau thianghlim chungchâng sawiin, a tirhkohte hnênah: “Pa ka dîl ang a, ani chuan thlamuantu dang a pe ang che u, chatuana in hnêna awm tûrin,” tiin a hrilh a ni. (Johana 14:16) Chutiang chuan, Isua chuan thlamuantu, a nih loh leh thlarau thianghlim chu hun lo la awm tûr, kan hun lai thlengin a hnungzuitute hnênah a awm dâwn tih a tiam a. Tûn huna chutiang ṭanpuina kan dawn dân langsâr tak pakhat chu eng nge ni? Thlarau thianghlim chuan fiahna chi hrang hrangte tuar chhuak thei tûrin min ṭanpui a. Engtin nge min ṭanpui? Amah ngeia fiahna tâwktu tirhkoh Paula chuan Korinth khuaa Kristiante hnêna a lehkha thawnah Pathian thlarau chu amah ṭanpuitu a nih dân a hrilh a. Chu a thuziak chu i han ngaihtuah lawk ang u.
16. Engtin nge kan dinhmun chu Paula dinhmun nên a inan mai theih?
16 A hmasain, Paula chuan a rinpuite hnênah “tisaa hlîng” fiahna chi khat a tawrh thu tlang takin a hrilh phawt a. Tichuan heti hian a sawi a ni: “Mi kiansan theih nân Lalpa [Jehova] chu vawi thum ka dîl a,” tiin. (2 Korinth 12:7, 8) Paula chuan Pathian hnênah a hrehawm tawrhna lâk bosak dîl mah se, lâk bo a ni chuang lo. Tûn laiah pawh chutiang dinhmun chu i tâwk ve pawh a ni thei. Paula angin, Jehova hnênah fiahna i tawhte chu la bo tûrin ring tlat chungin i dîl ngut ngut pawh a ni thei bawk. Amaherawhchu, i dîl ngut ngut chung pawhin, harsatna chu i hmachhawn reng a ni. Chu chu Jehova’n i ṭawngṭaina a chhâng lo tihna leh a thlarauvin a ṭanpui lo che tihna a ni em? Ni lul lo ve! (Sâm 10:1, 17) Tirhkoh Paula’n a dawta a sawi hi lo chhinchhiah teh.
17. Engtin nge Jehova’n Paula ṭawngṭaina chu a chhân?
17 Paula ṭawngṭaina chhângin, Pathian chuan a hnênah: “Ka khawngaihna i tân a tâwk e; ka thiltihtheihna hi chak lohnaah asin tihfamkimin a awm ni,” a ti a. Tichuan, Paula chuan: “Chutichuan, Krista thiltihtheihna chu ka chunga [“puan in kaih anga,” New World Translation] a awm theih nân lâwm êm êmin ka chak lohnate hi ka chhuang tawh zâwk ang,” a ti a ni. (2 Korinth 12:9; Sâm 147:5) Chutichuan, Paula chuan Pathian vênhimna thiltithei tak chu Krista kal tlangin a chunga puan in kaih ang maiin a dawng a ni. Tûn laiah pawh Jehova chuan chutiang bawk chuan kan ṭawngṭaina chu a chhâng a. A chhiahhlawhte tân a vênhminna chu puan in kaih ang mai a ni.
18. Engvângin nge fiahnate chu kan tuar chhuah theih?
18 Puan in chuan ruah sûr tûr emaw, thli tleh tûr emaw chu a dang lo ngei mai; mahse, chûng thilte lak ata vênhimna engemaw tak chu a pe a ni. Chutiang bawk chuan, “Krista thiltihtheihna” min pêk vênhimna chuan kan chunga lo thleng fiahna emaw, harsatna emaw chu a titâwp lo. Mahse, he khawvêla thil hlauhawm takte leh khawvêl awptu Setana beihnate lak ata thlarau lama vênhimna chu a pe ngei a ni. (Thu Puan 7:9, 15, 16) Chuvângin, nangmah “kiansan” thei lo fiahna i tâwk a nih pawhin, Jehova chuan i beih hrâm hrâm dânte a hria a, i ‘au thâwm’ chu a chhâng lêt a ni tih i hre chiang thei a ni. (Isaia 30:19; 2 Korinth 1:3, 4) Paula chuan heti hian a ziak a: “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân chhuahna kawng a siam nghâl zâwk ang,” tiin.—1 Korinth 10:13; Philippi 4:6, 7.
19. Eng nge tih i tum tlat a, engvângin nge?
19 Pathian hre lo he khawvêl ‘ni hnuhnûng’ chu “hun khirh takte” hian a târ lang ngei mai a. (2 Timothea 3:1) Chuti chung pawh chuan, Pathian chhiahhlawhte tân chuan, hêng hunte hi tawrh theih loh a ni lo. Engvângin nge? Jehova’n beidawng duh hauh lo leh ring tlat chunga a hnêna dîl ngut ngut zawng zawngte chu phal tak leh nasa taka thlarau thianghlim ṭanpuina leh vênhimna a pêk vâng a ni. Chuvângin, thlarau thianghlim dîla nî tin ṭawngṭai chu i tum tlat ang u.—Sâm 34:6; 1 Johana 5:14, 15. (w06 12/15)
Engtin Nge I Chhân Ang?
• Pathian thlarau thianghlim dawng tûrin eng nge kan tih ngai?
• Jehova’n thlarau thianghlim dîla kan ṭawngṭaina a chhâng ang tih engvângin nge kan chian theih?
• Engtin nge thlarau thianghlim chuan fiahnate tuar chhuak tûra min ṭanpui?
[Phêk 13-naa milem]
Thil dîl ngut ngut mikhual thlengtu Isua tehkhin thu aṭangin eng nge kan zir theih?
[Phêk 14-naa milem]
Pathian thlarau thianghlim dîlin i ṭawngṭai ngut ngut em?
[Phêk 15-naa milem]
Fate hmangaih tak pa ber tehkhin thu aṭangin Jehova chanchin eng nge kan zir?