Hah Chung Pawha Chau Chhe Lo
“LALPA, kâwlkil Siamtu [chuan], . . . chau hnênahte chuan thiltihtheihna a pe ṭhîn a; chakna rêng nei lote chu a tichak ṭhîn.”—ISAIA 40:28, 29.
1, 2. (a) Biakna thianghlim vuan duh zawng zawngte tân eng sâwmna duhawm tak nge awm? (b) Engin nge thlarau lama dinhmun hlauhawm takah min dah thei?
ISUA hnungzuitute kan nih angin, a sâwmna duhawm tak: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. . . . Ka nghâwngkawl chu a nuam a, ka phur pawh a zâng a ni,” tih hi kan hre bel hle a. (Matthaia 11:28:-30) Kristiante chu “Lalpa hnên ata harh hunte” pêk an ni bawk a ni. (Tirhkohte 3:19) Harhna thlentu Bible thutak zirna rah chhuah hahdamthlâk tak i tawng a, nakin hun beiseina hlimawm tak i nei bawk a; tin, Jehova thu bulte i nunpui tawh bawk a ni.
2 Mahse, Jehova betu ṭhenkhat chu rilru lamah an chau hle a ni. A châng chuan lunghnualna tawh hun chhûng hi a rei lo va. Rei tak awh châng pawh a nei thei bawk. Hun a lo kal zêl chuan, ṭhenkhat chuan an Kristian mawhphurhnate chu Isua tiam anga chawlh hahdamna ni lovin, phur ritah an ngai thei a ni. Chutiang ngaihtuahna ṭha lo tak chuan Jehova nêna an inlaichînna chu dinhmun hlauhawm takah a dah thei a ni.
3. Engvângin nge Isua’n Johana 14:1-a kan hmuh fuihna chu a pêk?
3 Man a nih a, thah a nih hma lawk khân, Isua’n a zirtîrte hnênah: “In thinlung mangang suh se; Pathian in ring e, kei pawh mi ring ve rawh u,” a ti a. (Johana 14:1) Isua chuan hêng thute hi tirhkohte’n thilthleng râpthlâk tak an tawh mai dâwn avângin a sawi a ni. Chu chu tihduhdahnain a zui vat ang. Isua chuan a tirhkohte chu nasa taka an lunghnual avângin an tlu thei tih a hria a ni. (Johana 16:1) Thunun a nih loh chuan, an lungngaihna chuan thlarau lamah tichak lovin, Jehova an rinna pawh a tibo thei a. Chu chu tûn laia Kristiante tân pawh thil awm dân a ni. Hun rei tak chhûng lunghnualna chuan min tihrehawm hle thei a, kan thinlung a tichau thei a. (Jeremia 8:18) Chhûngrîlah kan chau thei bawk a ni. He nêksâwrna hnuaiah hian, rilru lam leh thlarau lama zengin Jehova biak duhna pawh kan hloh hial thei a ni.
4. Engin nge kan thinglung a chauh chhiat loh nâna ṭanpui thei?
4 Bible thurâwn: “Thil dang bera aiin i thinlung vêng ṭha rawh, nunna lo chhuahna a ni si a,” tih hi a inâwm hle. (Thufingte 4:23) Bible chuan lunghnualna leh thlarau lama chauhna ata kan thinlung vêng tûra min ṭanpui thei thurâwn chhâwr tlâkte chu min pe a. Mahse, a hmasain, chauhna awmtîrtu chu kan hriat phawt a ngai a ni.
Kristianna Chu Phur Rit A Ni Lo
5. Kristian zirtîr nihnaah eng thu nge inkalh âwm taka lang?
5 Kristian ni tûr chuan nasa taka ṭan lâk a ngai ngei mai a. (Luka 13:24) Isua chuan: “Tupawh mahni [“nghaisakna ban,” NW] pua mi zui lo apiang chu ka zirtîr a ni thei lo vang,” tih a sawi hial a ni. (Luka 14:27) Hêng thute hi Isua’n ka phur a zângin, a hahdamthlâk a ni a tih nên inkalhin a lang mai thei a; mahse, a nihna takah chuan a inkalh lo.
6, 7. Engvângin nge kan Pathian biak dân hi a hahthlâk lo kan tih theih?
6 Tisa lama thawh hah ngai mah se, thil ṭha atâna thawh a nih phawt chuan ṭan laa thawhrimna chuan lungâwina leh hahdamna a siam thei a ni. (Thuhriltu 3:13, 22) A nih leh kan ṭhenawmte hnêna Bible thutak ropui tak hrilh aia thil ṭha zâwk eng nge awm thei ang? Chu bâkah, Pathian nungchang tehna sâng tak mila nung tûra ṭan kan lâkna chu a rah chhuah hlâwkna kan dawnte nêna khaikhin chuan engmah tham a ni lo vang. (Thufingte 2:10-20) Tihduhdah kan nih pawhin, Pathian Ram tâna tuar nih chu chanvo ropui tak angin kan ngai a ni.—1 Petera 4:14.
7 Isua phur chu a hahdamthlâk tak zet a, a bîk takin sakhaw dik lo hngâwngkawl bâttute thlarau lam thimna nêna khaikhin hian a hahdamthlâk zual a ni. Pathianin min hmangaihin, kan chungah âwm lo takin thil min phût lo. Jehova “thupêkte chu a khirh si lo va.” (1 Johana 5:3) Pathian Lehkha Thua târ chhuah Kristianna dik chu phur rit a ni lo. Chiang takin, kan Pathian biak dân hi a hahthlâk lo va, lunghnualna a thlen hek lo.
‘Min Tihnawk Apiang Dah Ṭhat’
8. Thlarau lama chauhna awmtîrtu chu eng nge ni ṭhîn?
8 Thlarau lama chauhna engpawh chu he khawvêl kal hmang chhe takin kan chungah phur rit a belhchhah vâng a ni fo ṭhîn a. “Khawvêl pumhlûm hi mi sual thu thuin a awm” avângin, mi chauhtîr thei leh Kristian inbûk tâwkna min hlohtîr thei thil tam tak hualvêlin kan awm a ni. (1 Johana 5:19) Thil ṭûl lo takte hian min tibuaiin, kan Kristian thiltih kal tluang lai chu a tikhaihlak thei a ni. Hêng phur rit belhchhahte hian min tilungngai theiin, min rapbet hial thei a. Inhmeh takin, Bible chuan ‘min tihnawk apiang dah ṭha’ tûrin min fuih a ni.—Hebrai 12:1-3.
9. Engtin nge hausak ûmna chuan min tihchauh theih?
9 Entîr nân, khawvêl ropuina te, sum leh pai te, intihhlimna te, nawmsip bâwl nâna zin kual te, leh hausak ûmna thil dangte hian kan ngaihtuahnate a thunun thei a ni. (1 Johana 2:15-17) Kum zabi khatnaa hausakna ûmtu Kristian ṭhenkhat chuan an nun chu an tihnawk a ni. Tirhkoh Paula chuan: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn. Tangka sum ngainat hi sual tinrêng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a,” tiin a hrilhfiah a ni.—1 Timothea 6:9, 10.
10. Isua buh chi thehtu thehkhin thu aṭangin hausakna chungchâng eng nge kan zir theih?
10 Pathian rawng kan bâwlnaa kan chauhva, kan lunghnual hian, kan thlarau lam chu hausak ûmnain a hliah khuh vâng a ni thei ang em? Isua buh chi thehtu tehkhin thuin a târ lan angin, chu chu thil ni thei a ni tak zet a ni. Isua chuan “khawvêl lungkhamnate, hausakna bumna te, thil dang châknate” chu kan thinlunga Pathian thu buh chi ‘dîp a, rah lova awmtîrtu’ hnimhlîngnei nên a thehkhin a ni. (Marka 4:18, 19) Chuvângin Bible chuan: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u; amah ngeiin, ‘Engtikah mah ka thlahthlam tawp lo vang chia, kal pawh ka kalsan tawp lo vang che,’ a ti si a,” tiin min fuih a ni.—Hebrai 13:5.
11. Min tichau thei thilte chu engtin nge kan paih bo vang?
11 A chânga kan nun tihnawktu chu thil neih belh tum vâng ni lovin, kan neih tawhte kan hman dân hi a ni. Ṭhenkhat chu hrisêl lohna nasa tak avâng te, an hmangaihte thihnaa an chân avâng te, a nih loh leh buaina nasa tak dang avâng tein rilru lamah an chau ngawih ngawih a. A châng chânga insiamrem an ngai a ni tih an hria a ni. Nupa tuak khat chuan an tuizâwng thiltih ṭhenkhat leh mi mal hna pawimawh vak lo ṭhenkhatte chu an bân san a. An thil neihte pawh enfiah vekin, thil ṭangkai lêm lo zawng zawngte chu an paih bo vek a ni. Kan tuizâwng thiltihte leh kan thilneihte hunbi neia enfiahin, thlarau lama inthlahdah a, kan lo hah loh nâna min tihnawk apiang dah ṭhat chu kan hlâwkpui vek thei a ni.
Nunnêmna leh Inngaihtlâwmna A Pawimawh
12. Kan thilsual tih chungchângah eng nge kan hriat ang?
12 Thil tê tham tak pawh ni se, kan thilsual tih chuan zâwi zâwiin kan nun a tihnawk thei a. Davida thu: “Ka khawlohnate chuan ka lû hi a chîm pil a, phur rit tak ang, ka zawh rual loh hi a ni,” tih hi a dik hle. (Sâm 38:4) Insiamremna chhâwr tlâk kan siam chhe tê pawh chuan kan phur rit min chhâwk ang.
13. Engtin nge nunnêmna chuan kan rawngbâwlna chunga thlîr dân inbûk tâwk nei tûrin min ṭanpui theih?
13 Bible chuan, “finna leh ngaihruat thiamna,” nei tûrin min fuih a. (Thufingte 3:21, 22) ‘Chung lam aṭanga finna lo chhuk chu a nunnêm’ a ti bawk. (Jakoba 3:17) Ṭhenkhat chu Kristian rawngbâwlnaa mi dangte thawh ang zât thawh tumin an rilru a hah mai thei. Mahse, Bible chuan: “Mi tinin mahni thiltih fiah ṭheuh zâwk rawh se, chu mi hunah chuan mi dang chung ni lovin, mahni chung chauhvah chhuan tûr a nei ang. Mi tinin mahni phur an phur ṭheuh dâwn si a,” tiin thurâwn min pe a ni. (Galatia 6:4, 5) Dik takin, Kristianpuite entawn tûr ṭha chuan Jehova rawng phûr taka bâwl tûrin min tichak thei a; mahse, finna leh nunnêmna chuan kan dinhmunte azira thiltum tihhlawhtlin ngei tûr siam tûrin min ṭanpui ang.
14, 15. Kan taksa leh thinlung mamawh kan ngaihsaknaah engtin nge finna kan lantîr theih?
14 Pawimawh vak lova lang thil pawha kan nunnêmna chuan chau lo tûrin min ṭanpui thei a ni. Entîr nân, kan taksa hrisêl nâna ṭha thil chîn inbûk tâwk kan nei em? Jehova Thuhretute branch office pakhata rawngbâwl nupa tuak khatte entawn tûr siam hi ngaihtuah teh. Anni chuan chauhna laka invênhim a finthlâkzia chu a hmu a ni. A nupui chuan: “Engti khawpa hna ngah pawh ni ila, zân tin a hun thlap thlapa mut chu kan tum a. Exercise lain, kan insawizawi ziah bawk. Chu chuan min ṭanpui tak zet a. Kan tlin tâwk kan hria a, chu mi mil chuan thil kan ti ṭhîn. Chakna hman sên loh nei anga langte nêna inkhaikhin loh chu kan tum tlat bawk,” a ti. Ei in tuihnaite kan ei ziahin, taksa mamawh zâtin kan châwlhahdam ziah em? A âwm tâwka kan hrisêlna ngaihsakna chuan rilru lam leh thlarau lama hahna a tinêp thei a ni.
15 Kan zînga ṭhenkhat chuan mamawh dangdai tak an nei a. Entîr nân, Kristian unaunu pakhat chuan dinhmun khirh tak hnuaiah hunbi kimin rawng a bâwl a. Cancer a vei bâkah, hrisêl lohna nasa tak a nei a ni. Engin nge dinhmun khirh tak hmachhawn tûra ṭanpui? Ani chuan: “Mahni chauhva hmun fianrial reh taka awm hun neih chu ka tân a pawimawh a. Ka chauh zual chângin, lehkha chhiar a, ka chawlh theihna hmun fâl reh tak chu ka mamawh lehzual a ni,” a ti. Finna leh ngaihruat thiamna chuan kan mamawhte hria a, phuhru a, thlarau lam chauhna pumpelh tûrin min ṭanpui a ni.
Pathian Jehova’n Min Tichak
16, 17. (a) Engvângin nge kan thlarau lam hrisêlna ngaihsak chu a pawimawh êm êm? (b) Kan ni tin thil tihah hian eng nge kan telh ang?
16 Kan thlarau lam hrisêlna ngaihsak chu a pawimawh hle a. Pathian Jehova nêna inlaichînna hnai tak kan neihin, kan taksa lam chu a chau mai thei; mahse, amah chibai kan bûknaah kan chau ngai lo vang. Jehova chuan “chau hnênahte chuan thiltihtheihna a pe ṭhîn a; chakna rêng rêng nei lote chu a tichak ṭhîn” a ni. (Isaia 40:28, 29) Hêng thute dikzia mahni ngeia tawngtu tirhkoh Paula chuan: “Kan dawl lo va, kan pawn lam mihring hi lo awngrawp telh telh mah sela, kan chhûng lam mihring chu ni tin siam thar zêlin a awm zâwk a ni,” tiin a ziak a ni.—2 Korinth 4:16.
17 “Ni tin” tih ṭawngkam hi lo chhinchhiah rawh. Hei hian ni tina Jehova thil min pêkte dawn a kâwk a ni. Kum 43 chhûng rinawm taka missionary rawngbâwl tawh nu pakhat chuan taksa lama chauhna leh manganna hunte a tâwk a. Mahse, a chau chhe lo. Ani chuan: “Hna dang ṭan hmaa Jehova hnêna ṭawngṭai leh a Thu ka chhiar theih nân zîng ka tho hma ṭhîn a. He tih dân hian tûn thlenga chhel tûrin min ṭanpui a ni,” a ti. Ni e, “ni tin” a hnêna ṭawngṭai a, a mizia ropui tak takte leh a thutiamte kan chhût ziah chuan, Jehova tihchaknaah kan innghat thei tak zet a ni.
18. Tar rinawm emaw, hrisêl lo emawte tân thlamuanna eng nge Bible-in a pêk?
18 Hei hi kum upat avâng leh hrisêl lohna avânga lunghnualte tân a bîk takin a ṭangkai a ni. Chutiang mite chu mi dangte nêna an inkhaikhin vâng ni lovin, tûn hmaa an rawngbâwl ṭhin dân nêna an inkhaikhin avâng zâwkin an beidawng thei a ni. Jehova’n tarte a chawimawi tih hriat chu a va thlamuanthlâk êm! Bible chuan: “Lu ṭuak chu ropuina lallukhum a ni a, felna kawngah hmuh a ni ang,” a ti. (Thufingte 16:31) Jehova chuan kan tlin tâwk a hria a, kan chak lo chunga tih tak zeta chibai kan bûkna chu a hlut hle a ni. Kan thil ṭha tih tawhte chu Pathian hriat rengnaah tihreh theih lohva chhinchhiah tlat a ni bawk. Pathian Lehkha Thu chuan: “In hnathawh leh a hming chunga hmangaihna in lantîr, mi thianghlimte rawng in lo bâwl, tûn thleng pawha in la bâwl cheu chu theihnghilh tûrin Pathian chu mi fel lo a ni si lo,” tih min tiam a ni. (Hebrai 6:10) Kan zîngah kum sâwmbi tam tak chhûng Jehova chunga rinawmna lantîrtute an awm avângin kan va lâwm tak êm!
Tlâwm Suh
19. Engtin nge thil ṭha tiha buai rengna chu kan hlâwkpui theih?
19 Mi tam takin taksa insâwizawi ziahna chuan chauhna a tinêp thei a ni tih an ring a. Chutiang bawkin, thlarau lam thiltih ziahna chuan rilru lam emaw, thlarau lam emawa chauhna engpwh a chhâwk zângkhai thei a ni. Bible chuan: “Thil ṭha tih i ning suh ang u; kan inthlahdah loh zawngin a hun takah chuan kan seng dâwn si a. Chutichuan remchâng hun kan neihzia ang zêlin mi zawng zawng chungah thil ṭha i ti ang u, rinna chhûngte zînga mi chungah i ti deuh ber ang u,” a ti. (Galatia 6:9, 10) He Bible châng hian keimahni lama thiltih a kâwk a. Mi dangte chunga thil ṭha tihna chuan Jehova rawngbâwlnaah chau chhe lo tûrin min ṭanpui thei tak zet a ni.
20. Lunghnualna do tûrin, tute nge kan kawm loh vang?
20 Chu mi nêna khaikhin chuan, Pathian dân ngaihsak lotute nêna inkawm leh thiltih tlân chu phur rit chauhthlâk tak a ni thei a ni. Bible chuan: “Lung hi a rit hle a, ṭiau vaivut pawh hi a khîn hle a; nimahsela mi âin mi an tihbuaina chu, chu mi pahnih ai pawh chuan a rit zâwk,” tiin min vaukhân a ni. (Thufingte 27:3) Lunghnualna leh chauhna tibo tûrin, ngaih dân dik lo neite leh mi dangte dik lohna zawng a, sawisêl ṭhînte nêna inkawm chu kan pumpelh tûr a ni.
21. Engtin nge Kirstian inkhâwmnaah mi dangte fuihtu kan nih theih ang?
21 Kristian inkhâwmnate chu thlarau lama chakna min pe thei Jehova châwmna chi khat a ni a. Chutah chuan mi tihahdam thei zirtîrna leh inkawmna nêna infuih tawn theihna hun remchâng ṭha tak kan nei a ni. (Hebrai 10:25) Kohhrana mi zawng zawngte chuan inkhâwmnaa chhânna pêk hunah emaw, platform aṭanga thu an sawi hunah emaw intihchak tawnna nihtîr chu an tum ṭheuh tûr a ni a. Zirtîrtu anga hmahruaitute chuan mi dangte fuihna kawngah a bîk takin mawhphurhna an nei a ni. (Isaia 32:1, 2) Zilh emaw, hauh emaw a ṭûl a nih pawhin, an tih dân chu hahdamthlâk tak a ni tûr a ni. (Galatia 6:1, 2) Mi dangte kan hmangaihna chuan chau chhe lova Jehova rawngbâwl tûrin min ṭanpui ngei ngei ang.—Sâm 133:1; Johana 13:35.
22. Ṭhat famkim lohna kan nei chung pawhin, engvângin nge kan huai theih?
22 He hun tâwp dâwna Jehova chibai bûknaah hian hnathawh a tel a. Chu bâkah, Kristiante chu rilru hahna te, rilru natna te, leh dinhmun manganthlâk tak tak te lakah an fihlîm bîk lo. Kan mihring ṭha famkim lo piangphung chu, hlum bêl ang maiin a keh awl êm êm a ni. Mahse, Bible chuan, “Thiltihtheihna nasatzia chu keimahni hnêna mi ni lovin, Pathian ta a nih theih zâwkna tûrin chu ro chu hlum bêlahte kan vawng a ni,” a ti. (2 Korinth 4:7) Ni e, kan chau ngei ang; mahse, i chau chhiain, i tlâwm ngai lo vang u. Chu ai chuan, “huai takin, ‘Lalpa chu mi ṭanpuitu a ni,’” i ti zâwk ang u.—Hebrai 13:6. (w04 8/15)
Tâwi Têa Ennawnna
• Eng phur rit ṭhenkhatte nge kan dah ṭhat theih?
• Engtin nge kan Kirstianpuite tâna “thil ṭha” tihna kawngah kan tel theih ang?
• Kan chauhvin emaw, kan lunghnualin emaw engtin nge Jehova’n min tihchak ṭhin?
[Phêk 20-naa milem]
Ṭhenkhat chuan an tuizâwng thiltihte leh mi mal hna pawimawh vak lote an paih bo