Chhan Awm Lova Huat Hlawh

“Annin enga khawlawi lovin mi hua.”​—JOHANA 15:25.

1, 2. (a) Kristiante sawichhiat an nihin, engvângin nge ṭhenkhatin a ngaihna an hriat loh a; mahse, engvângin nge chûng sawichhiatnate chu mak kan tih loh? (b) He thuziakah hian “hua” tih awmzia a eng ber nge kan ngaihtuah dâwn? (Footnote en rawh.)

JEHOVA THUHRETUTE chuan Pathian Thu-a thu bulte mila nun chu an tum tlat a. Chuvângin, ram tam takah hmingṭha an nei a ni. Mahse, a châng chuan dik lo taka sawichhiat an ni a. Entîr nân, Russia ram St. Petersburg khawpuia sawrkâr hotu pakhat chuan: “Jehova Thuhretute chu a rûka din sakhaw veiherh inthup tak leh naupangte tihlum a, mahni inthah chîng pâwl anga hriattîr kan ni a,” a ti. Mahse, khawvêl pumhuap inkhâwmpui neihna tûr chungchânga Jehova Thuhretute nên an indâwr hnuah chuan chu hotu vêk chuan: “Tûnah chuan mi pangngai tak leh nuih duh takte ka hmu ta . . . An inremin an buai lo va, an inhmangaih tawn nasa hle a ni,” a ti a. Heti hian a sawi belh a ni: “Mite’n an chungchâng hetianga dâwtthu an sawi chhan hi ka hrethiam thei thlâwt lo,” tiin.​—1 Petera 3:16.

² Pathian chhiahhlawhte chuan thilsual titu anga sawichhiat nih chu nuam an ti lo va; mahse, mite’n an sawichhiatin mak an ti lo. Isua chuan a hnungzuitute chu: “Khawvêlin a huat che u chuan a huat hma che u pawhin keimah mi hua tih in hria e. . . . An Dân Lehkhabuah, ‘Annin enga khawlawi lovin mi hua,’ tih thu ziak kha a lo thlenna tûrin,” tiin a vaukhân lâwk a ni.a (Johana 15:​18-20, 25; Sâm 35:19; 69:4) Chu mi hma chuan a zirtîrte hnênah: “In neitupa mah ‘Beelzebula,’ an tih chuan, a chhûngte chu an va ti dâwn nasa êm!” tih a lo hrilh tawh bawk a ni. (Matthaia 10:25) Kristiante chuan chutianga hmingchhia put chu Krista hnungzuitu an nih huna an pawm “nghaisakna ban” hmêlhmang pakhat a ni tih an hre thiam a ni.​—Matthaia 16:​24, NW.

3. Eng anga nasain nge betu dikte chu tihduhdah an nih?

³ Pathian betu dikte tihduhdahna chu hmân aṭanga inṭan tawh a ni a, “Abela mi fel tak” thlenga chhui lêt theih a ni. (Matthaia 23:​34, 35) Chu tihduhdahna chu a châng chânga thleng zeuh zeuh mai a ni lo. Isua chuan a hnûngzuitute hnênah ama hming avângin “mi zawng zawng huat in ni ang” a ti. (Matthaia 10:22) Chu bâkah, tirhkoh Paula’n keini zawng zawng pawh tiamin Pathian chhiahhlawh zawng zawngte chuan tihduhdahna an beisei tûr a nih thu a ziak a ni. (2 Timothea 3:12) Engvângin nge?

Pâwngpaw Huatna Bul Ber

4. Engtin nge Bible-in pâwngpaw huatna zawng zawng bul tumtu chu a târ lan?

⁴ Pathian Thu chuan atîr tê aṭangin hmuh theih loh buaina chawk chhuaktu a awm tih a târ lang a. Rinna nei hmasa bertu Abela nunrâwng taka tihhlum a nih dân kha han ngaihtuah teh. Bible chuan a unaupa thattu Kaina chu Diabol-Setana, “mi sual laka mi” niin a sawi a ni. (1 Johana 3:12) Kaina chuan Setana mizia a la a, Diabola chuan a thiltum suaksual tak hlen nân a hmang ta a. Bible chuan Joba leh Isua Krista nasa taka beitu chu Setana a ni tih a târ lang bawk. (Joba 1:12; 2:​6, 7; Johana 8:​37, 44; 13:27) Thu Puan bu chuan Isua hnungzuitute tihduhdahna bul ṭantu chu chiang takin a sawi: “Fiaha in awm theih nân Diabola chuan in zînga mi ṭhenkhat tân inah a khung dâwn che u a ni,” tiin. (Thu Puan 2:10) Ni e, Setana chu Pathian mite pâwngpaw huatna zawng zawng bul tumtu a ni.

5. Setana’n Pathian betu dikte a huat chan chu eng nge ni?

⁵ Setana’n Pathian betu dikte a huat chan chu eng nge ni? Ani chuan nasa taka mahni inngaihhlutna lantîrin, Pathian Jehova, “Lalber chatuana awm,” chu a cho va. (1 Timothea 1:17; 3:6) Pathianin a thil siamte chu âwm lo taka khuahkhirhin an chungah ro a rêl a, chuvângin tumahin rilru thianghlimin Jehova rawng chu an bâwl lo va, mihringte’n an hlâwk nân chauh a rawng an bâwl ṭhîn a ti tlat a ni. Setana chu mihringte a fiah phâlsak a nih phawt chuan, tupawh Pathian rawngbâwlna ata ka la pêng thei tiin a ṭang tlat bawk a ni. (Genesis 3:​1-6; Joba 1:​6-12; 2:​1-7) Jehova chu mi hnuaichhiahtu, dâwtsawi hmang, leh hlawhchham anga sawi chhiain, Setana chuan Pathian kalh lalchungnung bera insiam dân a ngaihtuah a. Chuvângin, Pathian chhiahhlawhte chunga a thinurna chu amah an biak a duhnain a tur vânga lo awm a ni.​—Matthaia 4:​8, 9.

6. (a) Jehova lalchungnunna thu buaiah engtin nge kan tel ṭheuh? (b) Engtin nge chu thu buai hriatthiamna chuan kan rinawmna vawng reng tûra min ṭanpui? (Phêk 12-na, bâwm en rawh.)

⁶ He thu buaiin i nun a nghawng dân i hria em? Jehova chhiahhlawh i nih angin, Pathian duhzâwng tih nân theihtâwp chhuah ngai mah se, tih manhla tak a ni tih i hre tawh mai thei. Mahse, i dinhmunte avângin Jehova dânte leh thu bulte zawm zêl chu thil harsa tak, hrehawm tawrhna hial a nih chuan engtin nge ni ang? Tin, Jehova rawngbâwl chuan hlâwkna rêng nei lo angin lang ta se? A rawngbâwl zêl chu a manhla lo tiin thutâwp i siam mai ang em? Nge, Jehova i hmangaihna leh a mizia ropui takte i ngaihhlutna chuan a kawng zawng zawngte a zawhtîr zâwk dâwn che? (Deuteronomy 10:​12, 13) Setana’n kan chungah harsatna engemaw chen a thlentîr chu phalin, Jehova chuan Setana chona kan chhân theihna hun remchâng min pe ṭheuh a ni.​—Thufingte 27:11.

‘An Sawichhiat Che U Hunah’

7. Jehova lak aṭanga min lâk pên nâna Diabola tih dân hman pakhat chu eng nge ni?

⁷ Tûnah, Setana’n a puhna dikzia finfiah nâna a hman ngamthlêmna pakhat​—dâwtthu hmanga insawichhiatna chu i lo bih chiang ang u. Isua’n Setana chu “dâwt pa” tiin a ko va. (Johana 8:44) Diabola tih hming awmzia “Sawichhetu,” tih chuan ani chu Pathian, a thu ṭangkai tak, leh a hming thianghlim sawichhetu bul ber a ni tih a finfiah a ni. Diabola chuan Jehova lalchungnunna cho nân, ṭawngkam mei nei te, puhna dik lo te, leh dâwt hulhualte a hmang a, Jehova chhiahhlawh rinawmte sawichhiat nân chutiang bawk tih dân chu a hmang a ni. Hêng Thuhretute sawichhiatna hmangin, an tâna tawrh theih aia nasa fiahna a siam thei a ni.

8. Engtin nge Setana’n Joba a sawichhiat a, chu chuan eng nghawng nge a neih?

⁸ Joba hming awmzia chu “Hmêlmâk Hlawh” tihna a ni a, a chunga thilthleng kha han ngaihtuah ta ila. Joba chu a hausakna te, a fate, leh a hrisêlna te chântîr a nih bâkah, Setana chuan thil sual a tih avânga Pathian hremna tuar angah a lantîr a ni. Joba chu mi zahkai tak ni ṭhîn mah se, a chhûngte leh a ṭhian hnaite hmuhsitin a awm hial a ni. (Joba 19:​13-19; 29:​1, 2, 7-11) Chu bâkah, thlamuantu suakte hmangin, Setana chuan ‘thutein Joba chu vuak vual’ a tum a, a hmasain sual khûn tak ti anga sawiin, thiltisualtu anga dem a hlawh a ni. (Joba 4:​6-9; 19:2; 22:​5-10) Joba tân chuan a va beidawnthlâk tak êm!

9. Engtin nge Isua chu thil sual titu anga lang tûra siam a nih?

⁹ Jehova lalchungnunna thiamchantîrtu bul ber a nih avângin, Pathian Fapa chu Setana hmêlma lian ber a lo ni a. Isua leia a lo kal khân, Setana chuan Joba chu thil sual titu anga a lantîr ang chiahin, Isua thlarau lam chu tihhmêlhem a tum a ni. (Isaia 53:​2-4; Johana 9:24) Mite chuan zu ruih hmang leh sa heh mi tia kovin, ‘ramhuai zâwl a ni,’ an ti. (Matthaia 11:​18, 19; Johana 7:20; 8:48; 10:20) Ani chu dik lo taka Pathian sawichhetu nia puh a ni bawk. (Matthaia 9:​2, 3; 26:​63-66; Johana 10:​33-36) Chu chuan a Pa hming a tihchhiat avângin, Isua chu a lungngai hle a. (Luka 22:​41-44) A tâwpah, Isua chu mi sual ber ang maia khenbeh a ni. (Matthaia 27:​38-44) Rinawmna famkim chu vawngin, Isua chuan “mi sualte . . . hnialkalhna” nasa tak chu a tuar a ni.​—Hebrai 12:​1-3.

10. Engtin nge tûn laia hriak thih a la bângte chu Setana tum ber an nih?

¹⁰ Tûn laiah pawh, Krista hnungzuitu hriak thih a la bângte chu Diabola’n a hmêlmâk a. Setana chu “[Krista] unaute hêktu, kan Pathian hmaa achhûn azâna hêk ṭhîntu,” tia târ lan a ni. (Thu Puan 12:​9, 10) Vân aṭanga leia paih thlâk a nih aṭangin, Setana chuan Isua unaute chu mi tlâktlai lo hmuhsit awm tak anga lantîr chu a tum ruh sauh a ni. (1 Korinth 4:13) Ram ṭhenkhatah chuan, kum zabi khatna ang bawkin, sakhaw hlauhawm tak anga sawichhiat an ni a. (Tirhkohte 24:​5, 14; 28:22) Atîr lama kan hriat angin, anni chu dâwta sawichhiat an ni. Mahse, “ropuina leh chawimawi lohnain, hming sawichhiat leh hming sawiṭhatin,” Krista unau hriak thihte chuan an ṭhian “berâm dang” ṭanpuinain, ‘Pathian thu pêkte zâwma Isua hriattîrna thu inngaitlâwm taka pawm’ chu an tum a ni.​—2 Korinth 6:8; Johana 10:16; Thu Puan 12:17.

11, 12. (a) Kristiante tawn sawichhiatna ṭhenkhat thlentîrtu chu eng nge? (b) Eng kawngtein nge Kristianin a rinna avângin dik lo taka a tawrh theih?

¹¹ Mahse, Pathian chhiahhlawhte tawrh sawichhiatna zawng zawng chu ‘felna’ avâng a ni kher lo. (Matthaia 5:10) Harsatna ṭhenkhat chu kan ṭhat famkim loh vânga lo awm pawh a ni thei a. Kan ‘sual a, kut thlâk [kan] tawrhin’ fak hlawh chhan tûr a awm lo. Mahse, Kristianin ‘Pathian hriatna avângin tuar loh tûr tuarin lungngaihna a tuar hrâm hrâm chu Jehova lâwmzâwng’ a ni. (1 Petera 2:​19, 20) Chu chu eng dinhmun hnuaiah nge a thlen theih?

¹² Ṭhenkhat chu Bible kalh mitthi vui dâna an tel duh loh avângin râwng taka cheibâwl an ni. (Deuteronomy 14:1) Thuhretu ṭhalaite chu Jehova nungchâng tehna an vawn avângin sawichhiat reng an ni a. (1 Petera 4:4) Kristian nu leh pa ṭhenkhatte chu an fate tân thisen tel lova inenkawlna an zawn avângin, mi “ngaihsam” emaw, “mi chaltlai” emaw anga dik lo taka puh an ni. (Tirhkohte 15:29) Kristiante chu Jehova chhiahhlawh an lo nih avângin an chhûngte leh an ṭhenawmte’n an hnâwl a ni. (Matthaia 10:​34-37) Chutiang mi zawng zawngte chuan zâwlneite leh Isua ngeiin dik lo taka hrehawm an tawrhna ang chu an tuar ve a ni.​—Matthaia 5:​11, 12; Jakoba 5:10; 1 Petera 2:21.

Sawhchhiatna Chhel Taka Tuarin

13. Sawichhiatna nasa tak kan tawn hunah, thlarau lam inbûk tâwkna nei tûrin engin nge min ṭanpui thei?

¹³ Kan rinna avânga sawichhiatna nasa tak kan tawhin, zâwlnei Jeremia angin kan lunghnualin, Pathian rawngbâwl zui thei tawh lo tûrah kan inngai mai thei a. (Jeremia 20:​7-9) Thlarau lama inbûk tâwk tûrin engin nge min ṭanpui thei? Thil awm dân chu Jehova thlîr dân aṭanga thlîr tum rawh. Ani chuan fiahna hnuaia rinawmte chu tuartu ang ni lovin, hnehtu angin a thlîr a ni. (Rom 8:37) Diabola thlentîr theih mualphona chi hrang hrang tuar chunga Jehova lalchungnunna ṭan tlattu Abela te, Joba te, Isua nu Mari te, leh hmân lai mi rinawn dangte, leh tûn laia kan rawngbâwlpuite chu i mitthlaah hmuh tum rawh. (Hebrai 11:35-37; 12:1) An rinawmna kawng chu chhût ngun rawh. Chûng chhûmpui nasa tak ang mi rinawmte chuan an rinnaa khawvêl ngamtute tâna ruat hnehtu dinhmuna tel ve tûrin min sâwm a ni.​—1 Johana 5:4.

14. Rinawm reng tûrin engtin nge tih tak zeta ṭawngṭaina chuan min tihchak theih?

¹⁴ ‘Rilrua ngaihtuah tam tak kan neih’ chuan, Jehova hnênah tih tak zetin kan ṭawngṭai thei a; ani’n min thlamuanin, min tichak ang. (Sâm 50:15; 94:19) Ani chuan fiahnate tuar thei tûra kan mamawh finna min pein, a chhiahhlawhte chunga chhan awm lova huatna awmtîrtu thu buai lian tak, Jehova lalchungnunna thu buai chu thlîr reng tûrin min ṭanpui ang. (Jakoba 1:5) Jehova chuan “thlamuanna, rilru rêng rênga hriat sên loh” chu min pe thei bawk a ni. (Philippi 4:​6, 7) He Pathian pêk thlamuanna hian lungngaihna nasa tak kan tawh hunah pawh rinhlelhna emaw, hlauhna emaw hnuaia tlâwm lovin, muang tak leh nghet tlata awm thei tûrin min ṭanpui ang. Jehova chuan a thlarau hmangin, kan chunga thleng tûra a phal engpawh tuar thei tûrin min chhawmdâwl thei a ni.​—1 Korinth 10:13.

15. Hrehawm kan tawrh hunah huatna thinlung nei lo tûrin engin nge min ṭanpui thei?

¹⁵ Chhan awm lova min hawtute haw lêt lo tûrin engin nge min ṭanpui ang? Min dotu bul ber chu Setana leh a ramhuaihote an ni tih chu hre reng rawh. (Ephesi 6:12) Mi ṭhenkhat chuan hre reng chung leh duhrêng vânga min tihduhdah laiin, Pathian mite dodâltu tam tak chuan an hriat loh vâng emaw, mi dangte’n vervêk taka an thunun vâng emawa ti an ni ṭhîn. (Daniela 6:​4-16; 1 Timothea 1:​12, 13) Jehova chuan “mi zawng zawng” chu ‘chhandama awmah leh thutak hriat theihna’ hun remchâng neiah a duh a. (1 Timothea 2:4) Dik takin, tûn hmaa min dodâltu ṭhenkhat chu kan nungchang ṭha an hmuh avângin tûnah chuan kan Kristian unaute an lo ni a. (1 Petera 2:12) Chu bâkah, Jakoba fapa, Josefa hnên aṭang hian kan inzir thei a ni. A pa hmun nu hrang unaute avânga nasa taka hrehawm a tuar chung pawhin, anmahni huatna a nei lo. Engvângin nge a neih loh? Chu mi chungchângah chuan Jehova a tel a, A thiltum hlen chhuah nân thil awm dân a kaihruai a ni tih a hriat vâng a ni. (Genesis 45:​4-8) Chutiang bawkin, dik lo taka hrehawm kan tawrhna engpawh chu Jehova chuan a hming chawimawi nân a hmang thei a ni.​—1 Petera 4:16.

16, 17. Engvângin nge dodâltute’n thu hrilhna tihtâwp an tum avângin kan lungngaih loh vang?

¹⁶ Chanchin ṭha hrilhna dan behnaah dodâltute hlawhtling anga an lan hunah pawh kan lungngaih lutuk a ngai lo. Jehova chuan khawvêl puma thu hrilhna hmangin hnamte chu a tinghîng mêk a, a thil duhzâwngte chu a lo lût reng a ni. (Hagaia 2:7) Berâm Vêngtu Ṭha, Krista Isua chuan: “Ka berâmten ka aw an hre ṭhîn, kei pawhin anni chu ka hria, anni chuan mi zui ṭhîn; an hnênah chatuana nunna ka pe a; . . . tuman ka kut ata mi chhuhsak . . . thei lo vang,” tiin a sawi a ni. (Johana 10:​27-29) Vântirhkoh thianghlimte pawh thlarau lam buh sengna hna ropui takah an tel ve a. (Matthaia 13:​39, 41; Thu Puan 14:​6, 7) Chuvângin, dodâltute thu sawi emaw, an thiltih emaw a enga mahin Pathian thiltum a titâwp thei lo.​—Isaia 54:17; Tirhkohte 5:​38, 39.

¹⁷ Dodâltute thiltih chuan an duh lohzâwngin nghawng a nei lêt ṭhîn a. Africa tualchhûng pakhatah chuan, Jehova Thuhretute chungchângah dâwtthu tam tak theh darh a ni a, Diabola betu anga sawi an ni hial a. Chu mi avâng chuan, Thuhretute’n an tlawh apiangin Grace-i chuan a in hnung lamah tlânin, an chhuah hma zawng a bîru ṭhîn a. Ni khat chu an pastor chuan kan thu leh hla chhuah pakhat chu kengin, inkhâwm zawng zawngte hnênah an rinna a kalsantîr theih avânga chhiar lo tûrin a hrilh a ni. Chu chuan Grace-i chu hriat châkna a neihtîr ta tlat a. Thuhretute’n an va tlawh leh chuan, bîru tawh lovin a titipui a, thu leh hla chhuah chu a dawng ve ta a. Bible zirna nei ṭanin, kum 1996-ah baptisma a chang ta a ni. Tûnah chuan Grace-i chuan Jehova Thuhretute chungchâng dik lo taka hriattîrna dawngte zawn chhuah nân a hun chu a hmang a ni.

Tûnah I Rinna Tichak Rawh

18. Fiahna nasa tak a lo then hmain, engvângin nge kan rinna tihchak a ngaih a, engtin nge kan tih theih?

¹⁸ Satana’n engtik lai pawhin chhan awm lova huatnaa min beih theih avângin, tûna kan rinna tihchak chu a pawimawh a ni. Chu chu engtin nge kan tihtheih ang? Jehova mite tihduhdah an nihna ram pakhat aṭanga chanchin kan dawn chuan: “Thil chiang tak pakhat a awm: Thlarau lam chîn dân ṭha neitute leh Bible thutak hlut tak taktute tân fiahna a lo thlen huna ngheh chu a harsa lo. Mahse, ‘hun ṭhaa’ inkhâwm pelhtute, thlawhhma rawngbâwlnaa tel ziah lote, leh thil ho têa phatsantute chu ‘meia’ fiahna hnuaiah an tlu châwk ṭhîn,” a ti. (2 Timothea 4:2) Hmasâwn i ngaihna lai i hriat chuan, rei rial lovin hma la nghâl vat ang che.​—Sâm 119:60.

19. Chhan awm lova huatna tawrh laia Pathian chhiahhlawhte rinawmna chuan eng nge a hlen chhuah?

¹⁹ Setana huatna nasa tak hnuaia Pathian betu dikte rinawmna chu Jehova lalchungnunna dikziate, a phuziate, leh a felziate finfiahna a ni. An rinawmna chuan Pathian thinlung ngei mai chu a tilâwm a. Mihringte’n anni chu sawichhe ṭhîn mah se, a zahawmna lei leh vân aia sâng zâwk chuan “an Pathian tiha awm chu a zak lo.” Chiang takin, chutiang mi rinawm zawng zawngte chungchângah: “Chhûngho tân chuan khawvêl hi awmna tlâk a ni lo,” tih theih a ni.​—Hebrai 11:​16, 38. (w04 8/15)

[Footnote]

I Hrilhfiah Thei Em?

• Pathian betu dikte tawrh chhan awm lova huatna phênah tunge awm?

• Joba leh Isua rinawmna tihchhiat a tumna lamah Setana’n engtin nge sawichhiatna a hman?

• Setana huatna kan hmachhawnnaah nghet tûrin engtin nge Jehova’n min tihchak?

[Phêk 12-naa bâwm/milem]

Thu Buai Dik Tak An Hre Thiam

Lalram thuhrilhna kum 50 chuang khapbehna Ukraine rama Jehova thuhretu pakhat chuan: “Jehova Thuhretute dinhmun chu mite min cheibâwl dân aṭanga chhût tûr a ni lo. . . . Sawrkâr mi lian a tam zâwkte chuan an hna an thawk a ni mai a. Sawrkâr a inthlâk hian mi liante chuan an rinawmna an thlâk mai ṭhîn a, keini erawh kan ngai reng a ni. Harsatna kan tawrhte lo chhuahna bul ber chu Bible-in a târ lang tih kan hria a ni.

“Mi hnehchhiahtute kut tuar satliahah kan inngai lo. Tuar thei tura min tanpuitu chu Eden huana thu buai inṭan, Pathianin mihringte chunga rorel tura dikna a neih leh neih lohvah a innghat a ni. . . . Mahni hamṭhatna atân mai ni lo, lei leh vâna Lalchungnung ber tân thu buai kan hmachhawn a ni a. A kaihhnawih thu buai hriatthiamna sâng zâwk kan nei a ni. Chu chuan min tichak a, tihduhdahna nasa ber kârah pawh kan rinawmna vawng tûrin min ṭanpui a ni,” a ti.

[Milem]

Kum 1970-a manna tâwk Victor Popovych-a

[Phêk 9-naa milem]

Isua tawrh sawichhiatna phênah tunge awm?

[Phêk 11-naa milemte]

Joba te, Mari te, leh tûn laia Pathian chhiahhlawh, Stanley Jones-a ang mite chuan Jehova lalchungnunna an thlâwp