Jehova Nî Atân Inring Rengin Awm Rawh
“Inring rengin awm rawh u, in rin loh hunah Mihring Fapa a lo kal dâwn si a.”—MATTHAIA 24:44.
1. Engvângin nge Jehova ni chungchâng chu kan ngaihsak ang?
CHU mi nî chu indona leh thinurna nî, mangan leh hrehawm nî, thimna leh chhiatna nî a ni. Jehova “ni ropui tak leh râpthlâk tak” chu he khawvêl suaksual tak chungah hian a lo thleng ngei dâwn a ni, Nova hun laia mi suaksualte Tuilêtin a chîmpil vek ang khân. Chu chu pumpelh ngaihna a awm lo rêng rêng a ni. Mahse, “Tupawh LALPA hming lam apiang chu chhanhim an ni ang.” (Joela 2:30-32; Amosa 5:18-20) Pathian chuan a hmêlmate a tiboral ang a, a mite erawh a chhanhim ang. Zâwlnei Zephania chuan, a hmanhmawh thlâkzia hre chungin: “LALPA [“Jehova,” NW] ni ropui tak chu a hnai e, a hnaiin a thleng thuai dâwn a ni,” tiin a puang a ni. (Zephania 1:14) Mahse, engtikah nge chu Pathian rorêlna chu a lo thlen ang?
2, 3. Engvângin nge Jehova nî atâna kan inrin reng chu thil pawimawh tak a nih?
2 “Chu mi nî leh a hun thu chu Pa chauh lo chuan tuman, vâna vântirhkohte pawhin, Fapa pawhin an hre lo” tiin Isua’n a sawi. (Matthaia 24:36) A hun chiah chiah kan hriat loh avângin, kum 2004 atâna kan kum châng: “Ngaihven rawh u . . . Inring rengin awm rawh u,” tih hi kan ngaih pawimawh a ṭûl a ni.—Matthaia 24:42, 44.
3 Mi dangte hnutchhiah an nih laia inring renga awmte chu hmunhima lâksawn an nih thut dân tûr târ langin, Isua chuan: “Chu mi hunah chuan lovah mi pahnih an awm ang a; pakhat chu kal bopuiin a awm ang a, pakhat chu hnutchhiahin a awm ang. Hmeichhe pahnih buh râwt sawmnaah chuan buh râwt sawmin an awm ang a, pakhat chu kal bopuiin a awm ang a, pakhat chu hnutchhiahin a awm ang,” tiin a sawi a ni. (Matthaia 24:40, 41) Chutiang hun khirh takah chuan, kan mi mal dinhmun chu eng nge ni ang le? Kan lo inring ang nge min rawn nangchîng phut zâwk dâwn? Tûna kan awm dânah a innghat thui hle a ni. Jehova ni atâna inring reng tûr chuan, tûn laia rilru put hmang lâr tak eng engemawte pumpelh te, thlarau lam dinhmun engemawa tlahniam lo tûra ṭan lâk te, leh nunphung engemawte hawisan te chu a ngai a ni.
Ngaihngamna Rilru Put Hmang Pumpelh Rawh
4. Eng ang rilru put hmang nge Nova hun laia mite’n an neih?
4 Nova hun lai kha han ngaihtuah teh. “Rinnain Nova chu thil lo la lang lote kawng thu-ah Pathian hrilha lo awmin, Pathian ṭih dêkin, a chhûngte chhandam nân lawng a tu a,” tiin Bible chuan a sawi a. (Hebrai 11:7) Lawng chu danglam tak leh langsâr tak a ni ngei ang. Chu bâkah, Nova chu “felna thu hriltu” a ni. (2 Petera 2:5) Nova lawng tukna emaw, a thuhrilhna emawin a hun laia mite chu a inlamlêttîr lo. Eng nge a chhan? ‘An eiin an bâr a, nupui pasal an inneih ṭhin’ vâng a ni. Mi mal thilah leh nawm chenna lama an buai lutuk avângin, Nova thu hrilhte chuan “tui a lo lêt a, an zaa a lâk bo vek hma loh chuan engmah an hre lo.”—Matthaia 24:38, 39.
5. Lota hun laia Sodom mite rilru put hmang chu eng nge ni?
5 Lota hun laiah pawh chutiang bawk a ni. Pathian Lehkha Thu chuan heti hian min hrilh: “An eiin an bâr a, an leiin an hralh a, an chîngin an sa ṭhîn a; nimahsela Sodom khua ata Lota a chhuah ni chuan vân aṭangin mei leh kât a sûr a, an zain a tihlum ta vek a,” tiin. (Luka 17:28, 29) Vântirhkohvin chhiatna lo thleng tûr chungchâng Lota a hrilh hnuah, Lota chuan a mâkpate hnênah thil lo thleng tûr chanchin chu a hrilh a. Mahse, an tân chuan ani chu “fiamthu sawi ang lek” a ni.—Genesis 19:14.
6. Eng rilru put hmang nge kan pumpelh tûr?
6 “Mihring Fapa lo kal lehna chu” Nova leh Lota hun lai ang bawk a ni dâwn tih Isua’n a sawi a. (Matthaia 24:39; Luka 17:30) Tûn laia mi tam tak chuan ngaihngamna rilru put hmang an lantîr tak zet a ni a. Chutiang rilru put hmangin min thunun loh nân kan invêng tlat tûr a ni. A âwmtâwka eia in chu a pawi rêng rêng lo va. Chutiang bawkin, inneih hi Pathian remruat a ni. Mahse, chu chu kan nuna thil pawimawh ber a nih a, thlarau lam thil kan ngaihthah chuan, Jehova ni ropui leh râpthlâk tak atân kan inring reng a ni ang em?
7. Eng thil pawh kan ûm hmaa kan inzawh tûr zawhna pawimawh tak chu eng nge ni a, engvâng nge?
7 “He khawvêl awm dân hi a boral mêk a nih hi” tiin tirhkoh Paula chuan a sawi a. ‘Tûn achinah chuan nupui neite chu nei lo angin awm rawh se,’ a ti bawk. (1 Korinth 7:29-31) Pathian hna min pêk Lalram thuhrilh rawngbâwlna thawh zawh nân hun tlêm tê chauh kan nei tawh a ni. (Matthaia 24:14) Paula chuan nupate pawh Lalram ngaihtuahna chu dah pawimawh lo zâwk khawpa inngaihsak lutuk lo tûrin a fuih a. Chiang takin, Paula’n nei tûra min duh rilru put hmang chu ngaihngamna nên a inep chiah a ni. Isua chuan: “A ram leh [Pathian] felna chu zawng hmasa zâwk rawh u,” a ti. (Matthaia 6:33) Thutâwp engpawh kan siam hma emaw, eng thil pawh kan ûm hma emawa zawhna i inzawh tûr pawimawh tak chu, ‘Engtin nge hei hian ka nuna Lalram hmakhua ka dah hmasak berna chu a nghawng ang?’ tih a ni.
8. Nî tin thiltihte chu kan thil ngaih pawimawh ber a nih chuan, engtin nge kan tih ang?
8 A nih leh, nî tin thiltiha kan inhmanna chuan thlarau lam thiltih a dîp dâl nia kan hriat chuan engtin nge ni ang? Kan nunphung chu Pathian Lehkha Thu hriatna nei lo leh Lalram thupuangtu pawh ni lo, kan ṭhenawmte nunphung nên chuan a inkâr hlat vak lo vem? Chutiang a nih chuan, chu mi chungchângah kan ṭawngṭai a ngai a ni. Jehova chuan rilru put hmang dik nei tûrin min ṭanpui thei a. (Rom 15:5; Philippi 3:15) Ani chuan Lalram hmakhua dah hmasa tûr te, thil dik ti tûr te, leh a laka kan mawhphurhna hlen tûrtein min ṭanpui thei a ni.—Rom 12:2; 2 Korinth 13:7.
Thlarau Lama Mutthlûkna Do Rawh
9. Thu Puan 16:14-16 sawi dânin, engvângin nge thlarau lama mutthlûkna do chu a pawimawh êm êm?
9 Armageddon-a lo thleng tûr, ‘Pathian Engkimtitheia ni ropuia indona’ chungchâng sawina hrilh lâwkna vêk chuan mi ṭhenkhatin an ngaihven loh tûr thu a sawi bawk a. Isua Krista chuan: “Ngai teh, rûkru angin ka lo kal dâwn e; inringa puan veng chu a eng a thâwl e, chutilochuan saruakin a lêng ang a, a zahmawh an hmu dah ang e,” a ti. (Thu Puan 16:14-16) Heta puan tih hian Kristian Jehova Thuhretute kan nihzia târ langtu thil sawina a ni a. Chutah chuan Lalram chanchin puangtu anga kan hna thawh leh kan Kristian nungchang pawh a tel a ni. Muhîl ang maia thilti lova kan awm chuan, Kristian kan nih chhinchhiahna puan chu kan hlîp mai thei a ni. Chutianga tih chu thil zahthlâk tak leh hlauhawm tak a ni a. Thlarau lama mutthlûkna emaw, chauhchhiatna emaw chu kan do ṭâng ṭâng tûr a ni. Engtin nge kan do theih ang?
10. Engvângin nge nî tina Bible chhiarna chuan thlarau lama harhvâng reng tûra min ṭanpui?
10 Bible chuan ngaihven leh inrin reng a pawimawhzia a sawi nawn mawlh mawlh a. Entîr nân, Chanchin Ṭha ziakte chuan: “Ngaihven rawh u” (Matthaia 24:42; 25:13); “inring rengin awm rawh u” (Matthaia 24:44; Marka 13:35, 37; Luka 12:40); “fîmkhur ula, inring renga awmin ṭawngṭai rawh u” (Marka 13:33) tiin min hrilh nawn mawlh mawlh a ni. Jehova nî chu rin loh lai takah a lo thleng dâwn tih a sawi hnuah, tirhkoh Paula chuan a rinpuite chu: “Mi dangte angin i muhîl suh ang u khai, i mengin i ngaihven zâwk ang u,” tiin a fuih a ni. (1 Thessalonika 5:6) Bible bu hnuhnûng berah chuan, chawimawi tawh Isua Krista chuan a lo kal thut dân tûr sawiin: “Ka lo kal thuai dâwn e,” a ti a ni. (Thu Puan 3:11; 22:7, 12, 20) Hebrai zâwlnei tam takte pawhin Jehova rorêlna ni ropui tak lo thleng tûr chu an sawiin an vaukhân bawk a. (Isaia 2:12, 17; Jeremia 30:7; Joela 2:11; Zephania 3:8) Nî tina Pathian Thu, Bible chhiar a, kan chhiarte rilrua chhût ngunna chu thlarau lama harhvâng reng tûrin nasa takin min ṭanpui a ni.
11. Engvângin nge thlarau lama harhvâng tûr chuan mi mala Bible zirna neih a ṭûl?
11 A ni, kan thlarau lama harhvânna chu “bawi rinawm, fing tak” buatsaih Bible ṭanchhan thu leh hla chhuahte hmanga taima taka Bible zirna aṭanga lo awm a ni! (Matthaia 24:45-47) Mahse, mi mal zirna hlâwkpui tak tak tûr chuan zirna ṭhulh lova neih zat zat leh hma sâwn chhoh zêl a ngai a ni. (Hebrai 5:14–6:3) Thlarau lam chaw rum chu kan ei ziah tûr a ni a. Chutiang tih nâna hun neih chu tûn lai chhanah chuan a harsa mai thei. (Ephesi 5:15, 16) Mahse, hun remchâng neih huna Bible leh Bible ṭanchhan thu leh hlate chhiar mai chu a tâwk lo. ‘Rinnaa dik [“hrisêl ṭha,” NW]’ tûr leh harhvâng reng tûr chuan mi mala zirna neih ziah chu a ṭûl a ni.—Tita 1:13, 14.
12. Engtin nge Kristian inkhâwmte leh inkhâwmpuite’n thlarau lama muthlu lo tûra min ṭanpui?
12 Kristian inkhâwmte leh inkhâwmpuite pawhin thlarau lama mutthlûkna do tûrin min ṭanpui thei bawk. Engtin nge min ṭanpui theih? Zirtîrna kan dawnte hmangin. Chutiang inkhâwmnaah chuan, Jehova ni hnaih tawhzia hriatnawntîr kan ni ṭhîn lâwm ni? Chawlhkâr tina Kristian inkhâwmna pawhin “hmangaih leh thil ṭha tiha inchawk tho” tûrin hun remchâng min pe bawk a. Chutianga inchawh thawh chu thlarau lama harhvân nân a ṭangkai a ni. Chuvângin, “ni chu lo hnai telh telha” kan hriat ruala inhmukhâwm ziah tûra thupêk kan ni hi a mak lo.—Hebrai 10:24, 25.
13. Engtin nge Kristian rawngbâwlna chuan thlarau lama harhvâng tûrin min ṭanpui?
13 Kristian rawngbâwlnaa tih tak zeta kan telna pawh hian harhvâng reng tûrin min ṭanpui bawk. Hun chhinchhiahna leh a awmziate rilrua vawn reng theih nân mite hnêna hrilh aia kawng ṭha zâwk eng nge awm thei? Kan Bible zirpuite’n hma an sâwn a, an thu zirte mila an nun ṭan kan hmuh hian, keini pawhin kan hmanhmawh zual phah sawt a ni. Tirhkoh Petera chuan: “In rilru puan vengin ngaihtuah ula” a ti a. (1 Petera 1:13) ‘Lalpa hna ṭhahnemngai taka thawk fova awm’ chu thlarau lama harhvânna ṭha tak a ni.—1 Korinth 15:58.
Thlarau Lam Tichhe Thei Nungphung Hawisan Rawh
14. Luka 21:34-36-a sawi angin, eng nunphung chungchângah nge Isua’n vaukhânna a pêk?
14 A lo awm lehna chhinchhiahna chungchâng a hrilh lâwkna ropui takah, Isua chuan vaukhânna dang pawh a sawi a ni: “Fîmkhur rawh u, chutilochuan ei puar lutuk nên, zu ruih nên, dam chhûng khawsak ngaihtuah nên, in rilru a khat lutuk hlauh ang a, chu mi nî chuan thang âwk angin thâwklehkhatan in chungah a lo thleng phut ang. Chutiang tak chuan lei chung zawng zawnga awmte chungah chuan a thleng ṭheuh dâwn a ni. Chutichuan chûng thil lo thleng tûr zawng zawng chu pumpelh tlâkah leh Mihring Fapa hmaa ding tlâka ruat in nih theihna tûrin, eng lai pawhin ṭawngṭai chungin ngaihven rawh u,” tiin. (Luka 21:34-36) Isua chuan mi tam zâwkte nunphung ûm chu a sawi dik hle: ei puar lutuk te, zu ruih te, leh lungkhamna thlen thei nun kawng te chu.
15. Engvângin a lutuka ei leh in chu kan pumpelh ang?
15 Ei puar lutuk leh in tam lutukte chu Bible dân bulte nên a inmil lo va, hawisan tûr a ni. Bible chuan: “Uain heh mite zîngah leh sa heh mite zîngah tel suh,” a ti a. (Thufingte 23:20) Mahse, thlarau lam tâna hlauhawm tûr chuan ei-in chu a lutuk a nih kher a ngai lo. A lutuk a thlen hma daihah pawh mi mut a tichhuakin, a tithatchhe thei a ni. Bible chuan: “Mi thatchhe rilru chuan thil a duh ṭhîn a, nimahsela engmah a nei chuang lo va,” a ti. (Thufingte 13:4) Chutiang mi chuan Pathian duhzâwng tih a duh pawh a ni thei; mahse, a inthlahdah avângin a puitlin ṭhîn lo.
16. Engtin nge kan chhûngkaw kaihhnawih lungkhamnate hneha awm chu kan pumpelh theih?
16 Isua’n a vaukhân nun lungkhamnate chu engte nge ni? Mi mal veizâwngte, chhûngkaw châwm te, leh chutiang chi thil dangte chu a ni. Chûng thilte hneha awm chu a va âtthlâk tak êm! Isua chuan: “Nangni zîngah lungkham avângin tuinnge mahni dung lam tawng khata tisâng chuang thei?” tiin zawhna a siam a. A thu ngaithlatute chu: “‘Eng nge kan ei ang?’ emaw, ‘Engnge kan in ang?’ emaw, ‘Eng sinin nge kan awm ang?’ emaw tih, lungkham suh u, Jentailten chûng zawng zawng chu an zawng ṭhîn a ni. Chûng zawng zawng chu in mamawh tih in Pa vâna mi’n a hre reng a ni,” tiin a fuih hlawm a. Kan nuna Lalram hmakhua dah hmasakna leh Jehova’n kan mamawh min pe dâwn tih rin tlatna chuan lungkhamna thunun thei tûrin min vêng ang a, harhvâng renga awm tûrin min ṭanpui bawk ang.—Matthaia 6:25-34.
17. Engtin nge hausak ûmna chuan lungkhamna a thlen theih?
17 Hausak ûmna pawhin lungkhamna min thlen thei bawk a ni. Entîr nân, ṭhenkhat chuan an neihin a tlin tâwk bâk thilte an lei a. A dangte chu hausak thutna ang chi thilte leh chân mai hlauhawm tak sum peipunnate bumin an awm bawk. A dang lehte chuan, sum leh pai lama hlawhtlin nân lehkha an zir bawk a ni. Hna hmuh nân engemaw chena lehkha zir chu a ṭangkai ngei ang a. Mahse, a nihna takah chuan thiamna sâng neih tuma an beih hun chhûngin, ṭhenkhat chu thlarau lamah an tlahniam ṭhîn a ni. Jehova ni a hnaih tawh êm avângin chutiang dinhmuna din chu a va hlauhawm êm! Bible chuan heti hian min vaukhân a ni: “Hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn, chûng duhnate chuan chhiatna leh boralnaah chuan mite a tipil ṭhîn,” tiin.—1 Timothea 6:9.
18. Hausak âtchilhna nunphunga kan tlûkluh loh nân, eng theihna nge kan neih ngai?
18 Hausak âtchilhna nun kawnga tlûkluh loh nân, thu tlûkna siam hunah thil dik leh dik lo thliar hran theihna neih a ngai a ni. Chu theihna chu ‘chaw rum, puitlingte ta’ ei ziahna leh ‘hman fo avânga chhia leh ṭha fiah tûra hriat theihnate sawizawina’ hmangin kan nei thei a ni. (Hebrai 5:13, 14) Tin, ngaih pawimawh tûr insiam huna “thil pawimawh zâwkte” fiahna chuan duh thlanna sual siam lo tûrin min humhim ang.—Philippi 1:10, NW.
19. Thlarau lam thil atân hun kan nei tlêm lutuk a ni tih kan hriat chuan, eng nge kan tih ang?
19 Hausak âtchilhna nunphung chuan kan mit a tidel thei a, thlarau lam thil atân hun nei mang lo emaw, nei lo hulhual emawin min siam thei a ni. Engtin nge chutiang nunphunga âwk lo tûrin kan inenfiah a, kan pumpelh theih ang? Kan nun kan tih samkhai theih dân tûr leh a theih chin tûr chu ṭawngṭaiin kan ngaihtuah a ngai a ni. Hmân lai Israel Lal Solomona chuan heti hian a sawi: “Thawkrimtu chu a ei tlêm emaw, a ei tam emaw, a mut a tui ṭhîn a, mi hausa chuan a ngahna chu a muthilh loh phah zâwk ang,” tiin. (Thuhriltu 5:12) Ṭûl lêm lova kan thil neihte enkawlna chuan hun leh tha tam tak a khawh ral em? Kan neih tam poh leh enkawl tûr, chhiat tawh hun atâna pawisa dahkham tûr, leh vênhim tûr a tam ting mai a ni. Chutiang thilte tihralna hmanga kan nun tih samkhai chu kan ṭhatpui tûr a ni thei ang em?
Theihtâwp Chhuahin Inring Rengin Awm Rawh
20, 21. (a) Jehova ni chungchângah eng thutiam nge tirhkoh Petera’n min pêk? (b) Jehova nî atâna inring renga kan awm theih nân eng awm dân leh thiltihte nge kan tih zawm zêl ang?
20 Nova dam laia khawvêl tân hun a tâwp a, tûn lai khawvêl tân pawh a tâwp ngei dâwn a ni. Tirhkoh Petera chuan: “Lalpa nî chu rûkru angin a lo thleng ngei ang, chu mi niah chuan vânte chu nasa taka riin a boral ang a, thil bulte chu meia emralin a awm tawh ang a, lei leh a chhûnga hnathawh awmte hi a kângral ang,” tiin. Entîr nei vânte—sawrkâr suaksualte—emaw, entîr nei lei—Pathian laka inmi hran mihringte—emaw chu Pathian thinurna mei alh sa takah chuan an dam khawchhuak dâwn lo. Chu mi nî atâna inring renga kan awm theih dân târ langin, Petera chuan: “Chûng thilte chu chutianga boral vek tûr a ni tih in hriat avângin Pathian ni lo thlen hun tûr chu beisei leh ṭhahnemngai taka duhin, awm dân thianghlim leh Pathian ngaihsak kawngah chuan mi eng ang nge in nih tûr le?” a ti a ni.—2 Petera 3:10-12.
21 Kristian inkhâwmnaa kan tel ziahna leh chanchin ṭha hrilhnaa kan telna chu Pathian ngaihsakna thiltihah a tel a ni. Hêngte hi, Jehova ni ropui tak chu dawhthei taka kan nghah rualin, Pathian hnêna inpêkna tak tak nên i thawk zêl ang u. “Bawlhhlawh kai lo leh sawisêlbovin, thlamuang taka [kan] awm [Pathianin] a hmuh theih nân . . . taihmâk [i] chhuah,” ang u.—2 Petera 3:14. (w03 12/15)
I Hre Chhuak Em?
• Engvângin nge Jehova nî atâna kan inrin reng ang?
• Nî tin thiltihte chu kan ngaih pawimawh ber a nih chuan, eng nge kan tih ang?
• Thlarau lama mutthlûkna do tûrin engin nge min ṭanpui ang?
• Eng mi tichhe thei tak nunphung nge kan hawisan ang a, engtin nge kan hawisan ang?
[Phêk 26, 27-naa milemte]
Nova hun laia mite chuan rorêlna lo thleng tûr chu an ngaihsak lo—Nang, i ngaisak em?
[Phêk 29-naa milem]
Thlarau lam thil ûm nâna hun i neih tam lehzual nân i nun i ti samkhai thei em?