Thlarau Lam Thila Inbiaknain Mi A Siam Ṭha
“Thu ṭha lo rêng in kâan chhuak suh se, a ṭûlzia ang zêla siam ṭha tûrin thu ṭha apiang chhuak zâwk rawh se, a ngaithlatute tân khawngaihna a lo nih theih nân.”—EPHESI 4:29.
1, 2. (a) Mihringte ṭawng theihna hi eng ang taka hlu nge ni? (b) Jehova chhiahhlawhte’n an lei chu eng anga hman nge an duh?
“MIHRINGTE ṭawng theihna hi hriatthiam phâk bâk thil a ni a; Pathian thilpêk, thil mak tak a ni,” tiin dictionary siamtu Ludwig Koehler chuan a ziak a. He Pathian thilpêk hlu tak mai hi kan hlut lo pawh a ni thei. (Jakoba 1:17) Mahse, zen thutnain kan hmangaihte ṭawngthei lova a siam meuh chuan ro hlu kan chân nasatzia han ngaihtuah teh. Tûn hnai maia a pasal zeng ta thut Joan chuan: “Inbiak pawhna ṭha tak kan nei ṭhîn a, khâng kan inbiak lai hunte kha ka va ngai ṭhîn tak êm!” a ti.
2 Inbiakna chuan inṭhianna a tinghet a, inhriatthiam lohna a tireh a, lunghnualte a fuih a, rinna a tichak a, nun a tinuam ṭhîn—mahse inbiakna chuan hêng hi a rah chhuak mai ngai lo. Lal fing Solomona chuan heti hian a sawi: “Khandaih chhun anga na taka mi chhun thu sawi an awm a, mi fing lei erawh chu damna a ni,” tiin. (Thufingte 12:18) Jehova chhiahhlawh kan nih angin, kan inbiakna chuan mi dangte a tihnat leh a tihtlûk ai chuan a tihdam a, a siam ṭhat kan duh a ni. Tin, kan lei pawh vântlâng rawngbâwlnaah leh kan mi mal inbiaknaah Jehova fak nâna hman kan duh bawk. Fakna hla phuahtu chu heti hian a zai a ni: “Nilêngin Pathian kan chhuang a, i hming chu kumkhuain kan fak bawk ang,” tiin.—Sâm 44:8.
3, 4. (a) Kan ṭawngkam chhuak chungchângah hian kan zain eng harsatna nge kan tawh ṭheuh? (b) Engvângin nge kan ṭawngkam chhuak chu thil pawimawh tak a nih?
3 Zirtîr Jakoba chuan: “Lei hi tumahin an khawi ngam thei lo,” tiin min vaukhân a. Hetiang hian min hrilhnawn bawk: “Kan zain thil tam tak kan tisual fo ṭhîn. A thusawia tisual ngai lo mi chu, mi puitling a ni a, a taksa pum pawh vêng thei mi a ni,” tiin. (Jakoba 3:2, 8) Tumah hi ṭha famkim kan awm lo va. Chuvângin, kan ṭawng theihna chu ṭha taka hman tum ṭhîn mah ila, kan ṭawngkam chhuak chuan mi dangte a siam ṭha lo emaw, min Siamtu a chawimawi lo emaw fo ṭhîn. Chuvângin, kan thusawiah kan fîmkhur tûr a ni. Chu bâkah, Isua chuan: “Miten thu lawi lo an sawi apiang, chu thu chu rorel niah chuan an sawi fiah a la ṭûl ang. I thu chuan thiam a chantîr ang che a, i thu vêk chuan thiam loh a chantîr bawk dâwn che asin,” tiin a sawi a ni. (Matthaia 12:36, 37) Ni e, Pathian dik chuan kan ṭawngkam chhuakah mawh min phurhtîr tak zet a ni.
4 Ṭawngkam ṭha lo pumpelh dân kawng ṭha ber pakhat chu thlarau lam thila inbiakna neih ṭhin hi a ni. He thuziak hian chutianga kan tih theih dân te, kan sawi tûr thu khawchâng te, mi siam ṭha thei thusawi aṭanga hlâwkna kan hmuh theihte a târ lang ang.
I Thinlunga Thil Awm Chu Hre Rawh
5. Engtin nge thinlung chuan inbiakna mi siam ṭha thei neihna kawngah chanvo pawimawh tak a chan?
5 Mi siam ṭha thei inbiakna nei thei tûr chuan, kan ṭawngkam chhuak chuan kan thinlunga thil awm a târ lang ṭhîn tih kan hriat a ngai a ni. Isua chuan heti hian a sawi: “Thinlunga khat liam chu kain a sawi ṭhin,” tiin. (Matthaia 12:34) A tlângpuiin, kan ngaih pawimawh thilte chu kan sawi duh ṭhîn a. Chuti a nih chuan: ‘Mite ka biakna chuan kan thinlung dinhmun chungchâng eng nge a târ lan? Ka chhûngte emaw, ka rinpuite emaw nêna kan awmho chângin, ka thu sawi duh chu thlarau lam thil a ni nge infiamnate, thawmhnawte, film-te, ei leh inte, ka thil lei tharte, a nih loh leh thil pawimawh lo dang dangte a ni zâwk?’ tih kan inzawh a ngai a ni. Kan hriat hauh lovin, kan nun leh ngaihtuahnate chu thil pawimawh lo zâwkah a innghat tlat thei a ni. Kan thil ngaih pawimawh tûr siam remna chuan kan inbiakna leh kan nun ngei pawh a a tichangkâng ang.—Philippi 1:10, 11.
6. Kan inbiaknaah hian rilrua chhût ngunna hian eng chanvo nge a neih?
6 Awmze nei taka rilrua thil chhût ngunna hi thu ṭha sawina lama hma kan sâwn theih dân kawng dang leh a ni a. Thlarau lam thil ngaihtuah kan tum hrâm hrâm chuan, thlarau lam thila inbiakna kan nei mai ang. Lal Davida chuan he thil pahnih inzawmna hi a hmu chiang hle. Heti hian a zai a ni: “Aw LALPA, . . . ka kâa thu chhuakte leh ka thinlunga ngaihtuahnate hi i mithmuhah lawmtlâk takin awm rawh se,” tiin. (Sâm 19:14) Tin, fakna hla phuahtu Asapha pawhin: “[Pathian] hnathawh zawng zawng kha ka ngaihtuah bawk ang a, i thiltihte pawh kha ka chhût ang e,” a ti bawk. (Sâm 77:12) Pathian Thu thutak mûk taka ngaihtuahtu thinlung leh rilru chu fakna ṭawngkam hlîrin a luangliam mai ang. Jeremia chu Jehova thil zirtîrte sawi lovin a awm thei lo va. (Jeremia 20:9) Keini pawhin thlarau lam thilte kan ngaihtuah ziah chuan, chutiang bawkin kan awm thei a ni.—1 Timothea 4:15.
7, 8. Eng thute nge mi siam ṭha thei inbiakna atâna ṭha?
7 Thlarau lam hun duan ṭha neihna chuan mi siam ṭha thei inbiaknaah sawi tûr tam tak min neihtîr a ni. (Philippi 3:16) Assembly-te, inkhâwmpuite, kohhran inkhâwmte, thu leh hla chhuah tharte, leh ni châng leh a hrilhfiahnate chuan mi dangte hrilh tûr thlarau lam thil hlu tak tak min pe a ni. (Matthaia 13:52) Tin, kan Kristian rawngbâwlnaa kan thiltawnte pawh hian thlarau lamah min va tiphûr thei tak êm!
8 Lal Solomona chu Israel rama a hmuh thingte, ramsate, chunglêng savate, leh sanghate chuan a rilru a la hle a. (1 Lalte 4:33) Pathian thil siamte chanchin sawi chu nuam a ti hle a ni. Keini pawh chutiang chu kan ni ve thei a. Jehova chhiahhlawhte chuan thil chi hrang hrang chanchin sawi chu nuam an ti a; mahse, thlarau lam thil ngaihven mite tân chuan thlarau lam thilte sawi chu a nuam ber ṭhîn a ni.—1 Korinth 2:13.
“Chûng Chu Ngaihtuah Rawh”
9. Eng fuihna nge Paula’n Philippi mite hnênah a pêk?
9 Eng chungchâng pawh sawi ila, Philippi kohhran mite hnêna Paula fuihna thu nêna a inrem phawt chuan, kan inbiakna chuan mi a siam ṭha ang. Heti hian a ziak a ni: “A dik apiang te, a zahawm apiang te, a fel apiang te, a thianghlim apiang te, a duhawm apiang te, a thangmawi apiangte—ṭhatna rêng a awm a, fakna rêng a awm phawt chuan—chûng chu ngaihtuah rawh u,” tiin. (Philippi 4:8) Paula thil sawite hi a pawimawh êm avângin “chûng chu ngaihtuah rawh u” a ti a ni. Chûng thilte chuan kan rilru leh thinlung chu kan tikhat tûr a ni. Chuvângin, hêng Paula thil târ lan pariatte ngaihsaknain inbiakna kawnga min ṭanpui theih dân i lo en ang u.
10. Engtin nge kan inbiaknaah chuan thil dik apiang a tel theih?
10 Thil engemaw chu a dik apiang ni thei tûr chuan thu dik leh dâwtthu tel loh nih mai aia tam a ngai a. Chu chuan thil ṭha leh rin tlâk, Pathian Thu thutak angte hi a kâwk a ni. Chuvângin, mite hnêna kan rilru la zâwng tak Bible thutak te, thusawi mi tihahdam tak te, a nih loh leh Pathian Lehkha Thua fuihna mi ṭanpui thei takte kan sawi hian a dik apiang kan ngaihtuah tihna a ni. A lehlamah chuan “dik lo taka ‘finna’ an vuah,” pâwn lânga dik hmêl taka lang chu kan hnâwl a ni. (1 Timothea 6:20) Tin, inrêlna thu emaw, finfiahna awm thei si lo thiltawn engemaw sawi chhâwn chu kan pumpelh bawk a ni.
11. Eng thil zahawmte nge kan inbiaknaah telh theih a nih?
11 Thil a zahawm apiang chu thil engemaw neuh neuh ni lo, thil lian tham leh ropui tak hi a ni a. Chutah chuan kan Kristian rawngbâwlna chungchâng te, kan tûn lai hun khirh tak chungchâng te, leh nungchang thianghlim neih a ngaihna chungchângte a tel a ni. Chutiang thil zahawm kan sawikhâwm chuan, thlarau lama harhvân kan tumna te, rinawm tlat kan tumna te, leh chanchin ṭha hrilh chhunzawm zêl kan tumnate chu kan tichak a ni. Ni e, kan rawngbâwlnaa thiltawn phûrawm tak takte leh ni hnuhnûnga kan awm tawhzia min hriatnawntîrtu thilthlengte chuan inbiakna phûrawm tak nei tûrin sawi tûr tam tak min pe a ni.—Tirhkohte 14:27; 2 Timothea 3:1-5.
12. A fel apiang leh a thianghlim apiang ngaihtuah tûra Paula fuihna angin, eng nge pumpelh tûr?
12 Fel tih thu mal awmzia chu Pathian mithmuha dik—a tehnate tlin tihna a ni. Thianghlim tih chuan nungchang leh ngaihtuahna lama bawlhhlawh lo tih a kâwk a. Sawichhiatna te, fiamthu bawlhhlawhte, a nih loh leh awmze pahnih nei zahmawh lam ṭawngkamte chu kan hmang tûr a ni lo. (Ephesi 5:3; Kolossa 3:8) Hna thawhna emaw, school emawa inbiaknaah hetiang lam hawi thil a tel ṭan chuan Kristiante chu fing thiam takin an inla hrang daih ṭhîn.
13. Thil duhawm apiang leh a thangmawi apianga innghat inbiakna ṭhenkhat sawi rawh.
13 Paula’n thil duhawm apiang ngaihtuah tûra a fuih hian, mi tilâwm thei leh pawm theih chi emaw, hmangaihna chawk tho thei chi emaw a kâwk a ni; huatna te, khâkna te, a nih loh leh inhnialna awmtîr theite ni lovin. Thil thangmawi apiang tih chuan thu ṭha emaw, chanchin rin tlâk emaw a kâwk a. Chûng thu ṭhaah chuan Vênnainsâng leh Awake! magazine-a kan unau rinawmte nunkawng chanchin chhuah ṭhinte chu a tel a ni. Chûng rinna tichak thei thuziak i chhiarte’n i rilru a khawih dân chu engvângin nge mi dangte i hrilh loh vang ni? Tin, thlarau lam thila mi dangte hlawhtlinnate hriat chu a va phûrawm thei tak êm! Chutiang inbiakna chuan kohhranah hmangaihna leh inlungrualna a thlen ang.
14. (a) Ṭhatna lantîr nân eng nge kan tih ngai? (b) Engtin nge kan ṭawngkamah chuan thil fak tlâkte kan telh theih?
14 Paula chuan “ṭhatna rêng a awm a” a ti a. Ṭhatna chuan nungchang ṭhatna a kâwk a ni. Kan ṭawngkam chhuak hi Pathian Lehkhabu dân bulte’n a kaihruai nân leh felna te, thianghlimna te, leh ṭhatnate aṭanga a pên loh nân kan fîmkhur tûr a ni. Fakna tih awmzia chu “fak tlâk” tihna a ni a. Thusawi ṭha emaw, kohhrana mi rinawm entawn tlâk emaw i hriat chuan fakna thu sawi chhuak rawh—a hnênah leh mi dangte hnênah chuan. Tirhkoh Paula chuan Pathian a biakpuite ṭhatna chu a fak fo ṭhîn a ni. (Rom 16:12; Philippi 2:19-22; Philemona 4-7) Tin, min Siamtu thil siamte pawh a fak tlâk tak zet a. Chûng thil siamahte chuan mi siam ṭha thei inbiakna neihna tûr thu tam tak kan hmu a ni.—Thufingte 6:6-8; 20:12; 26:2.
Mi Siam Ṭha Thei Inbiaknaah Tel Rawh
15. Eng Pathian Lehkha Thu aṭanga thupêkin nge nu leh pate chu an fate nêna mi siam ṭha thei inbiakna ṭha an neih ngei ṭûltîr?
15 Deuteronomy 6:6, 7 chuan heti hian a sawi: “Hêng thu, vawiina ka pêk che u hi in thinlungah a châm reng ang a; in fate ṭhahnemngai takin in zirtîr ang a, in ina in ṭhut lai te, kawnga in ka lai te, in mut lai te, in thawh hun tein in sawi ṭhîn tûr a ni,” tiin. He thupêk zâwm tûr hian nu leh pate chuan an fate nêna mi siam ṭha thei inbiakna ṭha tak an neih a ngai a ni tih a chiang hle.
16, 17. Kristian nu leh pate chuan Jehova leh Abrahama te entawn tûr siam aṭangin eng nge an zir theih?
16 Leia a rawngbâwl dân tûr chungchâng an sawikhâwm laia Isua leh a Pa vâna miin inbiakna an neih rei dân tûr chu kan ngaihtuah thei ang. A zirtîrte hnênah: “Pa mi tîrtu chuan ka sawi tûr leh ka hrilh tûr hi thu mi pe zâwk a ni,” a ti. (Johana 12:49; Deuteronomy 18:18) Thlahtu Abrahama chuan a fapa, Isaaka hnêna Jehova’n anmahni leh an pute mal a sâwm dân hrilhfiah nân dâr kâr tam tak a hmang ngei ang. Chutiang inbiakna chuan Isua leh Isaaka chu inngaitlâwm taka Pathian duhzâwng ti tûrin a ṭanpui a ni.—Genesis 22:7-9; Matthaia 26:39.
17 Kan fate pawhin mi siam ṭha thei inbiakna chu an mamawh ve a. Nu leh pate chuan buai hle mah se, an fate kawm nân hun an insiam tûr a ni. A theih chuan, engvângin nge ni khata vawi khat tal chaw kîlho tûrin ruahmanna insiam loh vang le? Chaw ei chhûng emaw, ei khamah emaw chuan chhûngkaw thlarau lam hrisêlna atâna hlu êm êm tûr mi siam ṭha thei inbiakna hun remchâng a awm thei ang.
18. Nu leh pate leh fate inkâra inzawmna ṭha neih hlâwkzia târ langtu thiltawn pakhat sawi rawh.
18 Kum 20 chho bâwr vêl mi pioneer thawk, Alejandro chuan kum 14 mi a nih laia engemaw rinhelh a neih chu a la hre reng a. Hetiang hian a sawi: “Ka school kalpuite leh zirtîrtute thununna avângin, Pathian a awm leh awm loh chungchâng leh Bible a rin tlâkzia chu ka ringhlel tlat a. Ka nu leh pate chuan dawhthei takin dârkâr tam tak chhûng min hrilhfiah a ni. Chu kan inbiakna chuan chu hun khirh tak chhûnga ka rinhlelhna chu a tihbo mai bâkah, ka nunah thutlûkna ṭha tak siam tûrin min ṭanpui bawk a ni,” tiin. A nih leh tûnah engtin nge a awm zêl? Hetiang hian a sawizawm a: “Tûn thlengin inah ka la khawsa a. Mahse, kan buai êm avângin ka pa nêna a hranga inbiakna hun neih chu a harsa a. Chuvângin, chawlhkâr khatah vawikhat zêl a hna thawhna hmunah chaw kan ei dûn ṭhîn a. Chu chaw ei laia kan inbiaknate chu ka hlut êm êm a ni,” tiin.
19. Engvângin nge kan vai hian thlarau lam thila inbiakna kan mamawh ṭheuh?
19 Kan rinpuite nêna thlarau lam thila inbiakna manhla tak neih theihna hun remchâng kan neih hi kan hlut ve lâwm ni? Hêng hun ṭhate hi inkhâwmnaah te, thlawhhma rawngbâwlnaah te, intihhlimna neih hunah te, leh zin kawngah te kan tawng thei a ni. Paula chuan Rom khuaa Kristiante kawm hlân a nghâkhlel hle a. An hnênah: “Hmuh ka châk hle si che u a; chu chu in rinna leh ka rinnain kan inthlamuan tawn theihna tûr[in],” tiin lehkha a thawn a ni. (Rom 1:11, 12) “Thlarau lam thil sawia kan Kristianpuite nêna inbiakna chuan kan mamawh ber a phuhrûk a. Chûng chuan rilru a tihlim a, kan nî tin phurrit phurh a tizâng bawk. Tarte chu an chanchinte leh anmahni rinawmtîr rengtu thilte min hrilh tûrin ka zâwt ṭhîn. Kum kalta chhûng zawngte khân, mi tam tak ka kâwm a, chûng mite chuan ka nun tihausatu finna leh bengvârna engemaw tak min pe ṭheuh a ni,” tiin Kristian upa pakhat, Johannes chuan a sawi.
20. Mi zakzum tak tuemaw kan biakin eng nge kan tih theih?
20 A nih leh thlarau lam thil i sawi chhuaha tuemawin a tuipui loh che chuan engtin nge ni ang? Chutiang thil sawi chu bân phah suh. A hnuah hun remchâng ṭha zâwk i tawng mai ang. Solomona chuan: “A âwm tak thu sawi hi tangkaraw bâwma rangkachak apple ang a ni,” a ti. (Thufingte 25:11) Mi zakzumte hnênah chuan i hriatthiamzia lantîr ang che. “Remruatna chu mihring thinlungah tui thûk tak ang a ni a; nimahsela hriat thiamna nei chuan a phawrh chhuak ang.”a (Thufingte 20:5) Chu bâkah, mi dangte rilru put hmang chuan i rilru khawihtu thilte i sawichhuahna chu dâltîr suh ang che.
Thlarau Lam Thila Inbiak A Hlâwk
21, 22. Thlarau lam thila inbiakna aṭangin eng hlâwkna nge kan neih theih?
21 Paula chuan: “Thu ṭha lo rêng in kâan chhuak suh se, a ṭûlzia ang zêla siam ṭha tûrin thu ṭha apiang chhuak zâwk rawh se, a ngaithlatute tân khawngaihna a lo nih theih nân,” tiin min fuih a. (Ephesi 4:29; Rom 10:10) Kan inbiakna chu mi siam ṭha thei thil lama kawihher chu a harsa deuh pawh a ni thei; mahse, a hlâwk êm êm a ni. Thlarau lam thila inbiakna chuan kan rinna chu mi dangte min hrilhtîr theiin, kan inunauna a tichak thei a ni.
22 Chuvângin, ṭawng theihna thilpêk kan dawn hi mi dangte siam ṭhat nân leh Pathian chawimâwi nân i hmang ang u. Chutiang inbiakna chu kan tân lungawina min petu leh mi dangte fuihtu a ni ang. Chu mai bâkah, chu chuan Jehova thinlung a tilâwm ang; Jehova chuan kan inbiaknate hi a ngaihthlâk a, kan lei ṭha taka kan hman hunah a hlim ṭhîn avângin. (Sâm 139:4; Thufingte 27:11) Kan inbiaknate hi thlarau lam thil a nih hunah chuan, Jehova’n min theihnghilh dâwn lo tih kan chiang thei a ni. Kan hun laia Jehova rawngbâwltute chungchâng sawiin, Bible chuan: “LALPA ṭihtute chu an inbe tlâng a: LALPA chuan a lo ngaithla a, a lo hria a, LALPA ṭihtute leh a hming ngaihsaktute tân hriat rengna lehkhabu chu a hmâah ziak a ni ta a,” tiin a sawi a ni. (Malakia 3:16; 4:5) Kan inbiaknate chu thlarau lama mi siam ṭha thei a nih chu a va pawimawh êm! (w03 9/15)
[Footnote]
a Israel rama tuichhunchhuah ṭhenkhat chu a thûk hle a. Gibeon-ah chuan thilhlui chanchin zir mite chuan fit 80 vêla thûk tui dahkhâwlna an lai chhuak a ni. Mite’n tui chawi tûra a mawng thlenga an luh theih nân, tuichhunchhuah chhûng lam pangah kalna tûr an siam thla a ni.
Engtin Nge I Chhân Ang?
• Kan inbiakna hian kan chungchâng eng nge a târ lan?
• Mi siam ṭha thei eng thilte nge kan sawi theih?
• Inbiakna hian chhûngkuaah leh kohhranah eng chanvo pawimawh tak nge a neih?
• Mi siam ṭha thei inbiakna hian eng hlâwknate nge a thlen?
[Phêk 22-naa milemte]
Mi siam ṭha thei inbiakna chu . . .
“a dik apiang te”
“a zahawm apiang te”
‘a fakawm apiang te’
“a thangmawi apiang te” sawiah a innghat
[Milem Hawhtîrtute]
Video kâwm, Stalin: U.S. Army photo; Creator bu kâwm, Eagle Nebula: J. Hester and P. Scowen (AZ State Univ.), NASA
[Phêk 23-naa milem]
Chaw ei lai hi thlarau lam thila inbiakna hun remchâng ṭha ber a ni