Chhiartute Zawhna

Rorêlna ina Kristianin Bible chunga kut nghat meuhva thu dik tak sawi tûra chhia a chham chu Bible thu bulte nên a inrem em?

He mi chungchângah hi chuan mi tinin mahni thu tlûkna an siam ṭheuh tûr a ni. (Galatia 6:5) Nimahsela, Bible-in rorêlna ina thu dik sawi tûra chhechham a khap lo.

Chhechham chu hmân aṭanga chîn dân lâr tak a ni tawh a. Entîr nân, hmân laia Grik mite chuan chhia an chhamin an kut vân lamah an phar emaw, maichâm an vuan emaw ṭhîn a. Rom mi chhechhamtu chuan, lung pakhat keng chungin heti hian a chham ṭhîn: “Hre reng chunga dâwt ka sawi chuan, Jupiter [pathian] hian khawpui leh a kulhte chhanhim se la, kei chu he lung ka paih ang hian, ka hnên ata thil ṭha zawng zawng min paih bosak rawh se,” tiin.​—Cyclopedia of Biblical, Theological, and Ecclesiastical Literature, by John McClintock and James Strong, Volume VII, phêk 260.

Chûng thiltihte chu mihringte’n anmahni hmu vektu leh chanchin sawi an batna pathian a awm tih an pawmzia târ langtu a ni. Hmân lai aṭang tawhin, Jehova betu dikte chuan an thu sawi leh thiltihte chu Pathianin a hre vek tih an hria a. (Thufingte 5:21; 15:3) Anni chuan Pathian hmaah chhia an chham a tih theih a, a nih loh leh a ruala thuhretu angin chhia an chham ṭhîn a ni. Entîr nân, Boaza te, Davida te, Solomona te, leh Zedekia te pawhin chutiang chuan chhia an chham a ni. (Ruthi 3:​13; 2 Samuela 3:​35; 1 Lalte 2:​23, 24; Jeremia 38:16) Pathian dik betute chuan mi dangte pawhin an laka chhia an chham chu an pawm bawk ṭhîn. Chu chu Abrahama leh Isua Krista chungah pawh a thleng a ni.​—Genesis 21:​22-24; Matthaia 26:​63, 63.

A châng chuan, Jehova hmaa chhechhamtu chuan zaizir meuhvin a chham ṭhîn a. Abram (Abrahama) chuan Sodom khaw lal hnênah: “Lei leh vân neitu, LALPA, Pathian Chungnungbera lamah chuan [“chhia chhamin,” NW] ka kut ka phar tawh a ni,” a ti a. (Genesis 14:​22, 23) Zâwlnei Daniela betu vântirhkoh pawhin “a kut ding lam leh a kut vei lam vân lama phar chhuakin, . . . nung kumkhuaa chhâlin chhia a chham,” bawk. (Daniela 12:7) Pathian meuh pawh, kut phara chhechham ṭhîn anga sawi a ni.​—Deuteronomy 32:40; Isaia 62:8, 9.

Pathian Lehkha Thuah hian chhechham khapna a awm lo va. Nimahsela, Kristian chuan a thusawi apiang a dikzia fiah nân, chhia a chham zêl a ngai lo. Isua chuan: “In thu sawi chu ‘A ni, a ni,’ ‘Ni lo, ni lo’ ni ngawt rawh se,” a ti. (Matthaia 5:​33-37) Zirtîr Jakoba pawhin chutiang bawk chuan a sawi a ni. Ani chuan, “Chhia chham suh u,” a tih khân, thil ho tak taka chhia chham zêl lo tûrin a vâukhân a ni. (Jakoba 5:12) Isua emaw, Jakoba emaw hian rorêlna ina thutak sawi tûra chhia chham chu sual a ni, tiin an sawi lo ve ve a ni.

A nih leh, rorêlna inah chuan Kristian chu thutak a sawizia chhia chhama sawi tûra phût ni ta se, engtin nge ni ang? Ani chuan chhechham chu a pawiti lo mai thei. A nih loh leh, chhechham hrim hrim hawtu tân chuan dâwt a sawi lohzia inpuanna dang pêk pawh an phalsak mai thei bawk.​—Galatia 1:20.

Rorêlna in chhûnga tih dânah chuan kut phar emaw, Bible chunga kut nghat emaw chunga chhechham a tel pawhin, Kristian chuan a zâwm thei tho va. Ani chuan zaizir chunga chhechham chungchânga Pathian Lehkha Thua entîrnate pawh a ngaihtuah thei a ni. Kristian tân chuan, chhechham laia zaizir mai aia pawimawh zâwk chu, thutak sawi tûrin Pathian hmaah chhia a chham a ni tih a hriat reng chu a ni a. Chutiang chhechham chu thil khûnkhân tak a ni. Kristianin chutiang dinhmuna zawhna an zawh chu chhâng thei leh chhâng tûr nia a inhriat chuan, Kristiante’n engtik lai pawha an sawi duh, thutak sawi tûra chhechhamna hnuaiah a awm a ni tih a inhre reng tûr a ni. (w03 1/15)