Nihna Azira Inthlei Hranna

“INTLUKTLANNA HI MI TIN NEIH TUR CHANPUAL DIK TAK A NI NA A, KHAWVELA TU THUNEIHNA MAHIN A TAKAH A CHANTIR THEI LO.”

Kum zabi 19-naa French thawnthu ziaktu Honoré de Balzac-a sawi a ni. A sawi chu i pawm em? Mi tam tak chuan nihna azira inthlei hranna chu a dik lo tih an hre mai a. Nimahsela, he kum zabi 21-na thleng pawh hian mihringte chu nihna azirin pâwl tam takah an la inṭhen darh ta cheu a ni.

CALVIN COOLIDGE, kum 1923 aṭanga 1929 chhûnga United States President chuan nihna azira inthlei hranna chungchâng hi a lo vei êm êm a, “mi chungnung bîk tihmangna” chungchâng pawh a sawi hial a ni. Nimahsela, Coolidge-a president a nih hnu kum 40 vêlah chuan, hnam inkungkaih dân zir tûra din, Kerner Commission chuan United States chu pâwl pahnih—“inṭhen hrang leh intluktlâng lo, mi hâng leh mi ngo pâwl”—a inṭhen darh mai a hlauhawm thu a sawi a ni. Ṭhenkhat chuan, chu thu sawi lâwk chu a lo thleng famkim tawh a, chu ramah chuan “hausa leh rethei inkâr, leh hnam leh hnam inkâr inhlatna chu a zual tial tial a ni” an ti.

Engvângin nge mihring intluktlânna chu tihhlawhtlin a har êm êm? A har chhan ber chu mihringte pianpui rilru put hmang vâng a ni. Tûn hmaa U.S. congressman lo nih tawh William Randolph Hearst-a chuan, ṭum khat chu: “Mihringte hi kawng khat tala intluktlânga siam kan ni, chu chu mi dang nêna intluktlân kan duh lohna hi a ni,” a ti. Eng a tihna nge ni? Kum zabi 19-naa French lemchan thawnthu ziaktu Henry Becque-a chuan a sawifiah zâwk mahna. Ani chuan: “Intluktlânna tihhlawhtlin a har êm êm chhan chu, kan aia chungnung zâwkte nêna intluktlân chauh kan duh vâng a ni,” a ti. Thu danga sawi chuan, mite chuan an aia nihna sâng zâwkte nêna intluktlân chu an duh a; mahse, an aia hnuaihnung zâwkte nêna an intluktlân theihna tûra an chan ṭhat zâwkna leh an hamṭhatnate chân ṭhen inhuam chu an awm mang lo.

Hmân lai chuan, mite chu mipui mimir zînga mi angte, mi lian angte, a nih loh leh lal chhûngkua angtein an lo piang a. Tûn laiah pawh hmun ṭhenkhatah chuan a la ni zêl a. Amaherawhchu, tûn lai ram tam takah chuan, mi chu mi hnuaihnung nge, mi vântlâng nge, mi chungnung a nih tih chu a sum neih dân azira teh a ni tawh a ni. Mahse, tehna dang a la awm cheu; chûng chu hnam te, zirna te, leh ziak leh chhiar thiamna te a ni. Tin, hmun ṭhenkhatah chuan mipa emaw, hmeichhia emaw nihna chu intluktlân lohna bul ber a ni a, hmeichhiate chu hnuaihnung zâwka thlîr an ni.

Beiseina Chhe Tê Tal A Awm Em?

Mihring chanpual dik tak humhalhtu pâwl chuan nihna azira inthlei hranna ṭhenkhat chu paihbo tûrin a ṭanpui a. United States-ah chuan hnam inthliar khapna dânte siam a ni. South Africa-ah pawh hnam inthliar hranna chu dân pâwna dah a ni. Sal neihna chu la awm cheu mah se, khawvêl hmun tam zâwkah chuan khap a ni bawk. Rorêltu thutâwp siamte chuan ram leilung luah hmasatute ram neih theihna dân chu a pawmpui a; tin, inthlei hranna khapna dânte chuan mi chanhaite chu a ṭanpui a ni.

Chuti a nih chuan, nihna azira inthlei hranna chu a awm tawh lo tihna em ni? Ni chiah lo ve. Nihna azira inthlei hranna ṭhenkhat chu awm tawh lo mah se, inṭhenna dang a lo lang leh hman tawh a. Class Warefare in the Information Age tih lehkhabu chuan: “Tûn laiah, mi hausa leh kut hnathawktu pâwl anga inthlei hran chu thil theih a ni tawh lo; he pâwl lian tak pahnih hi mi thinur pâwl te tak tê têa a inṭhen tâk avângin,” a ti.

A nih leh, nihna azira inthlei hranna chuan mihringte chu a ṭhen darh reng dâwn em ni? Awle, a dawta thuziakin a târ lan angin, dinhmun chu beisei bo khawp a la ni lo ve. (w02 1/1)