Chhûngkuate U, A Kohhran Mi Angin Pathian Fak R’u
“Inkhâwmnaahte [“Mipui kalkhâwmte zîngah,” NW] chuan LALPA chu ka fak ang.”—SAM 26:12
1. In lama zirna leh ṭawngṭaina mai bâkah Pathian chibaibûkna dika pêng pawimawh tak chu eng nge ni?
JEHOVA chibaibûknaah chuan ṭawngṭaina leh in-a Bible zirna mai bâkah Pathian kohhranho zînga mi anga rawngbâwlna a tel a ni. Hmân lai Israelte chu Pathian kawnga an kal theih nâna a dân zir tûrin “Mipuiho ahmei apa, . . . fanau tê tê te, . . . ko khâwm” tûra thu pêk an ni. (Deuteronomy 31:12, 13; Josua 8:35) “Nula leh tlangvâlte” chu Jehova hming fak tûra fuih an ni. (Sâm 148:12, 13) Kristian kohhranah pawh chutiang ruahmanna chu hman a ni. Lei pumpuia Kingdom Hall zawng zawngah chuan, mipa te, hmeichhia te, leh naupang te chuan ngaithlatute telve theihna hunah zalên takin chanvo an nei a, chu chanvo aṭangin mi tam takte chuan hlimna nasa tak an hmu a ni.—Hebrai 10:23-25.
2. (a) Engvângin nge inbuatsaih lâwkna hi naupangte’n inkhâwm an nin lohna tûra ṭanpui nân hmanraw pawimawh tak a nih? (b) Tu entîrna siam nge pawimawh?
2 Naupangte kohhran rawngbâwlna hun ruata ṭha taka tel tûra ṭanpui chu chona a tling ngei ang. Naupang ṭhenkhatte chu an nu leh pate nêna inkhâwmnaah an hlim lo a nih chuan, eng nge an harsatna chu ni ang? Naupang tam zâwkte chuan ngaihtuahna an pe rei thei lo va, an ning hmâ thei hle a ni. Inbuatsaih lâwkna-in he harsatna hi a tiveng thei a ni. Inbuatsaih lâwkna a awm loh chuan naupangte chu inkhâwmnaah awmze nei takin an tel thei lo vang. (Thufingte 15:23) Inbuatsaih lâwkna a awm loh chuan, hlimna min thlen thei thlarau lama hmasâwnna neih a harsa ang. (1 Timothea 4:12, 15) Eng nge a tih theih? A hmasa berin, nu leh pate chu inkhâwmna atân an inpuahchah leh puahchah loh an inzawh a ngai a ni. An entawn tûr siamte chu thununna thiltithei tak a ni. (Luka 6:40) Chhûngkaw zirna fîmkhur taka ruahmanna chu thil pawimawh tak pakhat a ni bawk.
Thinlung Tihpuitlin
3. Chhûngkaw zirna hun chhûngin, thinlung tipuitling tûrin engvângin nge a bîkin beihpui kan thlâk ang a, chu mi ti tûrin eng nge ngai?
3 Chhûngkaw zirna chu hriatnaa thluak hnawhkhah nân chauh ni lovin, thinlung tihpuitlin nân a ni bawk. Chu chuan chhûngkaw zînga mite tawn mêk buaina hriatthiamna leh mi tinte hmangaih taka ngaihsakna a phût a. Jehova chuan ‘thinlung a enfiah ṭhîn’ a ni.—1 Chronicles 29:17.
4. (a) “Hriatna nei lo” tih hi eng nge a awmzia? (b) ‘Finna dawng’ tihah hian eng nge tel ve?
4 Jehova’n kan fate thinlung a enfiahin eng nge a hmuh? A tam zâwkte chuan Jehova kan hmangaih an ti ang; chu chu a fak tlâk a ni. Nimahsela, naupang emaw, Jehova chungchâng zir thar emaw chuan Jehova kawngah thiltawn an la nei tam lo va. Chuvângin, Bible sawi angin “hriatna nei lo” a ni. A ngaih dân zawng zawng chu a sual vek kher lo mai thei a; mahse, Pathian tilâwm tak tak thinlung neihtîr tûr chuan hun a mamawh a ni. Hei hian ṭha famkim lo mihringte tâna a theih chhûng chu ngaihtuahna te, châkna te, ngainatna te, thinlunga vei te, leh nuna thiltum te chu Pathian duh dân nêna inmil tûra siam a huam tel a ni. Tuemawin Pathian duh zâwngin chutiang chhûng lam mize chhûnna a neih chuan, ani chu ‘finna dawng’ a ni.—Thufingte 9:4; 19:8.
5, 6. ‘Finna dawng’ tûrin nu leh pate’n an fate chu engtin nge an ṭanpui theih?
5 Nu leh pate chuan an fate chu ‘finna dawng’ tûrin an ṭanpui thei ang em? Tumahin mi dangte thinlungah thinlung ṭha an dah lût thei lo. Mi tin mai hi duh thlan theihnaa thuam kan ni a, tam tak chu kan thil ngaihtuah chungah a innghat a ni. Amaherawhchu, hriat thiam theihna nên nu leh pate chuan an fate thinlunga awmte leh ṭanpui an ngaihna lai te hre tûrin an fuih fo thei a ni. ‘He thilah hian eng nge i ngaih dân?’ tih leh ‘Eng nge i tih duh tak tak?’ tih zawhnate hmang ang che. Tichuan, dawhthei takin ngaithla la, a lutukin chhâng lêt suh ang che. (Thufingte 20:5) An thinlung thlentîr ngei i duh chuan, ngilneihna, hriatthiamna, leh hmangaihna boruak hi a pawimawh a ni.
6 Ngaihtuahna ṭha thuamnghet tûr chuan thlarau rah chu—a nihna tin nên—sawiho fo ula, chu mi chhawmnung tûrin chhûngkua-in thawkho vang che u. (Galatia 5:22, 23) Jehova leh Isua Krista chu, kan hmangaih tûr a ni ti-a sawi mai lovin, kan hmangaih chhan leh chu hmangaihna kan tihlan theih dân sawihona hmangin tipuitling ang che. (2 Korinth 5:14, 15) A rahchhuah tûr hlâwkna chhûtin thil dik tihchâkna tipung ang che. Ngaihtuahna dik lo te, ṭawngkam ṭha lo te, leh nungchang dik lo te rahchhuah ṭha lo takte sawihona hmangin, chutiang thil hawisan châkna chu tipuitling rawh. (Amosa 5:15; 3 Johana 11) Ngaihtuahna te, ṭawngkam te, leh nungchang te—a ṭha emaw, a ṭha lo emaw—chuan Jehova nêna inlaichînna a nghawng thei a ni.
7. Naupangte chu buaina hmachhawn thei tûr leh Jehova hnaihtîr thei tûr thutlûkna siam thei tûra ṭanpui tûrin eng nge tih theih a nih?
7 Naupangin buaina a nei emaw, thu tihtlûkna pawimawh tak a siam a ṭûlin emaw: ‘Jehova’n hei hi eng angin nge a thlîr i rin? Chutiang sawi tûrin Jehova chungchâng eng nge i hriat? A hnênah ṭawngṭaiin i hrilh tawh em?’ ti te-in kan zawt thei ang. Pathian duh zâwng chian nân leh tih nâna tih tak zeta beih rengna ngai nunphung siam tûrin i fate chu a hmâ thei ang berin ṭanpui ang che. Jehova nên mimal taka inlaichînna bul an lo nei ang a, a kawnga kalnaah chuan hlimna an hmu ang. (Sâm 119:34, 35) Hei hian Pathian dik kohhranho zînga mi nihna chanvo ngaihsânna chu anmahni-ah a siam ang.
Kohhran Inkhâwmna Atâna Inbuatsaih
8. (a) Ngaihsak ngai zawng zawngte chu kan chhûngkaw zirnaa telh thei tûrin engin nge min ṭanpui ang? (b) He zirna hi eng anga pawimawh nge ni?
8 Chhûngkaw zirna hun chhûngah chuan ngaihsak tûr thil tam tak a awm a. Engtin nge chûng zawng zawng chu i tih vek theih ang? Thil engkim a ruala tih theih a ni si lo va. Amaherawhchu, endikna siam chu a ṭangkai a ni tih i hmu chhuak thei ang. (Thufingte 21:5) A châng chângin chûng chu ennawn la, ngaihsak ngai zualte ngaihtuah ang che. Chhûngkuaa mimal tinte hmasâwnna ngaihven hle bawk ang che. He chhûngkaw zirna ruahmanna hi Kristian zirna pêng pawimawh tak pakhat a ni a, tûna nun atân min thuam mai bâkah lo thleng tûr chatuana nunna atân min buatsaih a ni.—1 Timothea 4:8.
9. Chhûngkaw zirna kan neih laiin inkhâwmna atâna inbuatsaihnaa zawi zawi-a i tihpuitlin tûr thiltumte chu eng nge ni?
9 In chhûngkaw zirnaah chuan kohhran inkhâwmna atâna inbuatsaihna a tel em? In zirhovin zawi zawia i tihpuitlin tûr, tih tûr tam tak a awm a. Chûng hlenchhuah nân a ṭhen chuan chawlhkâr tam tak, thla tam tak, a nih loh leh kum tam tak a duh hial mai thei a ni. Hêng thiltumte hi ngaihtuah rawh: (1) chhûngkaw zînga mi tinin kohhran inkhâwmnaah chhâng tûra inbuatsaihna; (2) mi tinin an ir-awm chhuaka chhânna pêkna; (3) chhânnaa Pathian lehkha thu teltîrna; leh (4) mimala zirlai a taka hman theih tûra zirlai chîk taka zirna chungchângte chu. Hêng zawng zawngte hian mi chu thutak a ta nihtîr tûrin a ṭanpui thei a ni.—Sâm 25:4, 5.
10. (a) Kan kohhrana inkhâwmna tin chu engtin nge ngaihsakna kan pêk ang? (b) Engvângin nge hei hi manhla tak a nih?
10 In chhûngkua zirna chu, chu mi chawlhkâr chhûng Vênnainsâng zir tûrah a innghat a nih pawhin, Kohhran Lehkhabu Zirna inkhâwm, Theocratic Rawngbâwlna School, leh Rawngbâwlna Inkhâwm atâna mimal emaw, chhûngkua emawa inbuatsaihna pawimawhna chu ngaihthah suh ang che. Hêngte pawh hi Jehova kawnga kal tûra inzirtîrna pawimawh takte zînga mi a ni. Inkhâwmna atân a châng chângin chhûngkuaa inbuatsaihna i neihpui thei mai thei a ni. In thawhhona chuan zir thiamna a tipung ang a. Inkhâwmna aṭang ngeiin hlâwkna tam zâwk a dawn theihtîr bawk ang. Thil dang zawng aiin, inkhâwmna atâna mumal taka inbuatsaihna hlâwknate leh chu mi atâna hun ruat bîk neih a pawimawhzia sawiho ang che u.—Ephesi 5:15-17.
11, 12. Kohhranaa hla sak tûr inbuatsaihna chuan engtin nge min hlâwktîr a, engtin nge chu chu a tih theih?
11 “Pathian Nunna Kawng” Inkhâwmpuiah chuan kan inkhâwmna hmêlhmang dang atân, inbuatsaih tûra fuih kan ni—zaihona atân chuan. Chu fuihna chu i zâwm em le? Chutianga tihna chuan Bible thutak chu kan rilru-ah leh kan thinlungah chiang takin a nemkai ang a, chu mi rualin kohhran inkhâwmnaa kan hlimna a tipung ang.
12 Hla thlante chhiarna leh a thu awmzia sawihova inbuatsaihna chuan thinlung aṭanga zai tûrin min ṭanpui thei a ni. Hmân lai Israel hun lai khân rimawi bungruate chu Pathian chibai bûk nân an hmang hluar hle a. (1 Chronicles 25:1; Sâm 28:7) In chhûngkuaah rimawi bungrua engemaw tum ṭhîn mi an awm em? Chu rimawi bungrua chu, chu mi chawlhkâr atâna Lalram hla zir nân leh chhûngkuaa zaiho nân engah nge i hman loh vang. A theih dân kawng dang leh chu, hla thunsa hman hi a ni. Ram ṭhenkhatahte chuan kan unaute chu rimawi tel lovin mawi takin an zai a. Kawnga an kalin emaw, an feh kawngah emaw chu mi chawlhkâra kohhran inkhâwmnaa sak tûr hla thlante sa-in an hlim hle ṭhîn a ni.—Ephesi 5:19.
Thlawhhma Rawngbâwlna Atâna Chhûngkaw Inbuatsaihna
13, 14. Thlawhhma rawngbâwlna atâna kan thinlung buatsaih chhûngkaw sawihona chu engvângin nge a hlut êm êm?
13 Jehova leh a thiltumte mi dangte hrilh chu kan nun kawnga pêng pawimawh tak pakhat a ni. (Isaia 43:10-12; Matthaia 24:14) Kan inbuatsaih chuan naupang kan ni emaw, upa kan ni emaw he thiltihnaah hian hlimna nasa zâwk kan hmu ang a, kan thawk ṭha thei zâwk ang. Engtin nge chu chu in chhûngkhurah kan tih ang?
14 Kan biakna kaihhnawih thil zawng zawngte a pawimawh ang bawkin, kan thinlung buatsaih hi a pawimawh a ni. Kan tih tûr chauh sawiho lovin, kan tih chhan pawh kan sawiho tûr a ni. Jehosaphata lal lai khân mipuite chu Pathian dânah inkaihhruaina pêk an ni a; amaherawhchu, Bible chuan “an thinlungah an la nghat (“buatsaih,” NW) . . . lo,” tiin, min hrilh a ni. Hei hian biakna dik ata la pêng thei thlêmnate a pawmzamtîr a ni. (2 Chronicles 20:33; 21:11) Kan tum chu thlawhhma rawngbâwlna report thehluh theih mai a ni lo va, thu leh hla pêk chhuah mai pawh a ni hek lo. Kan rawngbâwlna chu Jehova kan hmangaihna leh nun thlang tûra hun remchâng mamawhte laka kan hmangaihna lantîrna a ni tûr a ni. (Hebrai 13:15) Chu chu “Pathian hnathawhpuite” kan nihna a ni. (1 Korinth 3:9) Chanvo hlu a va ni êm! Rawngbâwlnaa kan telin, vântirhkohte nên kan thawkho a ni. (Thu Puan 14:6, 7) Chawlhkâr tin kan zirnaah emaw, Ni Tina Pathian Lehkha Thute Chhuina (English) aṭanga a inchawih thute kan sawiho hunah emaw pawh ni se, he thil ngaihhlutna tihpun nân chhûngkaw sawihona hun aia hun ṭha zâwk a awm lo vang!
15. Chhûngkua-in engtik hunah nge thlawhma rawngbâwlna atân kan inbuatsaih ang?
15 I chhûngkaw zînga mite chu chawlhkâr chhûng thlawhhma rawngbâwlna atâna inpuahchah tûra ṭanpui nân chhûngkaw zirnaah hun i hmang zauh zauh ṭhîn em? Chutianga tih chu a ṭangkai hle thei a ni. (2 Timothea 2:15) Chu chuan an rawngbâwlna chu awmzia neihtîr tûrin a ṭanpui thei a, a hlawhtlintîr thei bawk a ni. A châng chângin zirna pumhlum chu chutiang inbuatsaihna atân i hnâwl thei a ni. Chu aia zîng zâwkin, chhûngkaw zirna zawhah emaw, chawlhkâr chhûng engtik hunah emaw thlawhhma rawngbâwlna nihphung chungchâng sawihona tawitê i neihpui thei bawk.
16. Paragraph chhûnga târ lan rahbi tinte hlutna sawiho rawh u.
16 Chhûngkaw hun hman chu a hnuaia mi angin rahbi indawtah a innghat tûr a ni a, a rahbite chu: (1) A remchân chuan Bible aṭanga Pathian lehkha thu chhiar tûr nên thusawi dân ṭha taka zir lâwk pakhat neih. (2) A theih hrâm chuan mi tinin thlawhhma rawngbâwlna iptê, Bible, chhinchhiahna lehkhabu, tract, pen emaw, pencil emaw chu neiin, thu leh hlate chu hmêlhmang ṭha takin a nei tih tihchian. Rawngbâwlna iptê chu a to a ngai lo nâ a, a fel fai tûr a ni. (3) Tawnchawp thuhrilhna chu khawi hmuna neih tûr nge ni a, eng anga tih tûr nge tih sawiho, tihte a ni. Thlawhhma rawngbâwlnaa in thawhho chhûngin he kaihhruaina rahbi tinte chu zâwm ang che u. Mi ṭanpui thei tak rawtnate pe la; mahse, zilhna tam tak pe suh ang che.
17, 18. (a) Chhûngkuaa eng ang inbuatsaihna hian nge kan thlawhhma rawngbâwlnaah rah ṭha zâwk chhuah tûrin a ṭanpui theih? (b) Inbuatsaihna eng nge chawlhkâr tinin a tih theih?
17 Isua Krista’n a hnungzuitute tih tûr a pêkte zînga pawimawh ber chu zirtîr siam hi a ni. (Matthaia 28:19, 20) Zirtîr siamna chuan thuhrilh mai aia tam a kaihhnawih a. Chu chuan zirtîrna a huam a ni. I chhûngkaw zirna chuan, chu zirtîr siamnaa hmantlâk tûrin engtin nge a ṭanpui theih?
18 Chhûngkua-in tunge tlawhkîr tlâk ang tih sawiho ang che u. Mi ṭhenkhat chuan thu leh hlate chu an la-in, a ṭhente erawh chuan an lo ngaithla ringawt mai thei a ni. Anni chu in tin kalnaa hmuh tawh emaw, dâwr hmun emaw, school emawa tawnchawp thuhrilhnaa hmuh tawh emaw an ni mai thei. Pathian Thu-in kaihruai che rawh se. (Sâm 25:9, Ezekiela 9:4) Chu mi chawlhkâr chhûnga in tlawhkîr duhte chu tifel ṭheuh vang che u. Eng chungchâng nge sawi tûr? Chhûngkuaa sawihona chuan inbuatsaih tûrin chhûngkaw zînga mi tinte chu a ṭanpui ang. Tuina nei mite entîr tûr Pathian lehkha thu chhinchhiahna siam la, chumi rualin Eng Ti Tûrin nge Pathianin Min Phût? tih brochure emaw, Chatuan Nunnaa Hruaitu Hriatna tih lehkhabu emawa thu inchawihte entîr bawk ang che. Vawi khat tlawhnaah thu tam tak sawi tum suh. In neitu chu tlawh leh huna chhân tûrin zawhna pakhat hnutchhiah bawk ang che. Chu chu chhûngkuaa mi tinte’n an tlawhkîr tûr te, an tlawhkîr hun tûr te, leh tizo tûra an beisei te ruahman nân, chawlhkâr tin chhûngkaw hun duanah engvângin nge kan telh loh vang. Chutianga tihna chuan thlawhhma rawngbâwlnaah rah ṭha zâwk chhuah tûrin chhûngkaw pumhlum chu a ṭanpui ang.
Anni chu Jehova Kawng Zirtîr Zêl Rawh
19. Chhûngkuaa mimal tinte chu Jehova kawnga kal chhunzawm zêl tûr chuan eng nge an tawn ngai a, chutah chuan engin nge ṭanpui ang?
19 He suahsualna khawvêla chhûngkaw lû nihna chu chona a tling a ni. Setana leh a ramhuaite chuan Jehova chhiahhlawhte thlarau lam tihchhiat tumin an bei a. (1 Petera 5:8) Chu bâkah, tûn laia nangni nu leh pate chungah, a bîk takin nangni nu leh pa malte chungah hian nêkna tam tak a awm a ni. I thil tih duh zâwng zâwng tih nân chuan hun hmuh chu a har hle a ni. Mahse, beih manhla tak a ni, vawikhatah rawtna pakhat chauh i zâwm thei a nih pawhin, i chhûngkaw zirna chuan zawi zawiin hmâ a sâwn ang. I ṭhian bul takte Jehova kawnga rinawm nghet taka kal hmuh chu lâwmman hlimawm tak a ni. Jehova kawnga hlawhtling taka kal tûr chuan chhûngkaw zînga mite chuan kohhran inkhâwmnaah leh thlawhhma rawngbâwlnaah hlimna an hmuh a ngai a ni. Chu mi thleng dik tûr chuan, inbuatsaih lâwkna a ṭûl a ni—thinlung tipuitling thei leh mi tinte awmze nei taka tel ve tûra thuam thei inbuatsaihna chu.
20. 3 Johana 4-a a târ lan hlimna ang tawng ve tûrin nu leh pa tam takte chu engin nge ṭanpui thei?
20 Thlarau lama a ṭanpui tawhte chungchâng chu tirhkoh Johana chuan: “Ka fate thutakah an awm tih ka hriat aliama lâwmna nasa zâwk rêng ka nei lo ve,” tiin, a sawi a ni. (3 Johana 4) Thiltum chiang tak nei-a kaihhruai chhûngkaw zirna leh chhûngkaw zînga mi tinte mamawh chu ngilneihna leh ṭanpui duh taka dâwr ṭhîn chhûngkaw lû-te chuan, chhûngkua chu chutiang hlimna neih ve theih nân thil tam tak an tithei a ni. Pathian nunna kawng ngaihsânna chhawmnungin, nu leh pate chuan an chhûngkua chu nun kawng ṭha ber chên tûrin an ṭanpui a ni.—Sâm 19:7-11.
I Hrilhfiah Thei Em?
◻ Engvângin nge inkhâwmna atâna inbuatsaihna chu kan fate tân a pawimawh êm êm?
◻ Nu leh pa te chuan an fate chu ‘finna dawng’ tûrin engtin nge an ṭanpui theih?
◻ Kan chhûngkaw zirna chuan inkhâwmna zawng zawng atâna inbuatsaihnaah engtin nge a ṭanpui theih?
◻ Thlawhhma rawngbâwlna atâna chhûngkuaa inbuatsaihna chuan engtin nge ṭangkai zâwk tûrin min ṭanpui theih?
[Phêk 20-naa milem]
I chhûngkaw zirnaah chuan kohhran inkhâwmna atâna inbuatsaihna a tel thei
[Phêk 21-naa milem]
Inkhâwmnaa hla sak tûr zir lâwk chu a ṭangkai