Fate’n Inneihna A Tihdanglam Dân

Fa neih chu nupate tân hlimawm tak leh mi chîmbuai thei tak a ni kawp thei a. Nu leh pa thar in nih angin, in fa enkawl nân hun leh tha leh zung tam tak sên a ngaih avângin mak inti hle pawh a ni thei. Mut kham lohna leh rilru lama inthlâk danglamna chuan nupa inkârah harsatna a siam thei a ni. I kawppui nên chuan in fa enkawl tûr leh in inneihna vênghim tûrin insiamremna in neih a ngai ang. Hêng harsatnate hmachhawn tûrin engtin nge Bible thurâwn chuan a ṭanpui theih ang che?

1 FA NEIHNAIN I NUN A THLAK DANGLAM DAN HRE THIAM RAWH

BIBLE SAWI DAN CHUAN: “Hmangaihnain a dawhthei a, ngil a nei bawk ṭhîn.” Tin, hmangaihnain “mahni hma a sial lo va, a thinur duh lo” bawk. (1 Korinth 13:4, 5) Nu thar i nih angin, i fa sên chu i ngaihsak hle ngei ang a. Mahse, i pasal chuan i ngaihsak ta lo riau nia inhriatna a neih theih avângin, ani pawh i ngaihsak a ngai tih hre reng ang che. Dawhtheihna leh ngilneihna nên chuan, i pasal chu i mamawhzia hriattîrin, i fa enkawlna kawngah a ṭanpuina i la thei a ni.

“Nangni paslate u, in nupuite nên in khawsak dânah . . . hre thiam ula.” (1 Petera 3:7) I nupui chuan a chakna zawng zawng deuh thaw chu i fa ngaihsak nân a hmang dâwn tih hre thiam rawh. Mawhphurhna thar a neih avângin, a rilru a hahin, a chau mai thei a, a lunghnual hial thei a ni. A châng phei chuan, i chungah pawh a lungni lo thei a, mahse thinur loh chu tum hrâm ang che, “mi thinnel chu mi chak aiin a ṭha zâwk” si a. (Thufingte 16:32) Finna lantîrin, i nupui mamawh ṭanpuina chu pe ang che.—Thufingte 14:29.

I TIH THEIH CHU:

• Pate: Fa sên enkawlna kawngah i nupui ṭanpui la, zânah pawh ni se, ṭanpui rawh. I nupui leh i fa nêna hun tam zâwk i hman theih nân, thil dang atâna i hun hman ṭhin chu titlêm bawk ang che

• Nute: I pasalin fa enkawlpui che a tum hian lo hnar suh. I duh anga a tih ṭhat theih loh hunah pawh sawisêl lo la, a tih dân tûr chu ṭha takin entîr zâwk ang che

2 IN INLAICHINNA SAWH NGHET RAWH U

BIBLE SAWI DAN CHUAN: “Tisa pum khat an lo ni tawh ang.” (Genesis 2:24) In chhûngkuaah mi thar a lo piang chung pawhin, i kawppui nên chuan “pum khat” in la ni reng tih hria ang che. In inlaichînna sawh ngheh tumin theih tâwp chhuah rawh u.

Nupuite u, i pasalin ṭanpuina a pêk che avângin lâwm rawh u. In lâwmthu sawina ṭawngkam chu “damna” thlentu a ni thei a ni. (Thufingte 12:18) Pasalte u, i nupui i hmangaihzia leh i hlutzia hrilh ang che u. Chhûngkua a enkawl dânah ani chu fak bawk ang che u.—Thufingte 31:10, 28.

“Tupawhin mahni ṭhatna tûr zawng lovin mi dang ṭhatna tûr zawng zâwk rawh se.” (1 Korinth 10:24) I kawppui tâna ṭha tûr chu ti reng rawh. Nupaa inbiak nân, infak tawn nân, leh inngaihthlâk tawn nân hun insiam rawh. Mipat hmeichhiatna kawngah chuan mahni hmasial lo tak ni la, i kawppui mamawh chu ngaihtuah rawh. Bible chuan: “Atua mah intidâwng suh u,” tiin a sawi. (1 Korinth 7:3-5) Chuvângin, hemi chungchâng hi tlang takin sawi dûn ang che u. I dawhtheihna leh hriat thiamna chuan in inlaichînna chu a sawh nghet ang.

I TIH THEIH CHU:

• In pahnih chauhva hun inhman dun theih nâna hun pêk chu theihnghilh suh

• I kawppui i hmangaihzia hriattîrtu lehkha tawi ziah leh thil engemaw tê inpêk ang chite chu ti ṭhîn rawh

3 I FA CHU ZIRTIR RAWH

BIBLE SAWI DAN CHUAN: “Chhandamna hmu khawpa tifing thei che Lehkha Thianghlimte chu i naupan têt ata hre tawh i ni.” (2 Timothea 3:14, 15) I fa zirtîr nâna i tih tum chu rêl fel rawh. Ani chuan a pian chhuah hma aṭang pawhin thil a zir thiam thei si a. Nu pum chhûnga a awm lai pawhin, i fa chuan i aw a hre thei a, i rilru veizâwngte pawh a hre thei a ni. A sên lai aṭangin lehkha chhiarsak rawh. I chhiar lai hre thiam lêm lo mah se, a upat hunah lehkha chhiar tuimi ni tûrin a ṭanpui thei a ni.

Pathian chungchâng i sawi hre tûrin i fa chu a naupang lutuk ngai lo. Jehova hnêna i ṭawngṭai thâwm chu hre rawh se. (Deuteronomy 11:19) I infiampui hunah pawh, Pathian thil siamte chanchin chu sawipui rawh. (Sâm 78:3, 4) I fa a lo upat chhoh chuan, Pathian Jehova i hmangaihzia a hria ang a, ani pawhin hmangaih dân a zir chho vang.

I TIH THEIH CHU:

• I fa zirtîr tûra finna dîlin ṭawngṭai rawh

• A zir ṭan hma theih nân, a hriat atâna i duhna lai thute chu sawi nawn rawh