Joba’n A Rinawmna A Vawng

NASA taka fiah a nih a, thu âwihnain hlâwkna engmah nei lo anga a lan huna Pathian chunga rinawm reng thei mihring an awm ang em? Chu chu Joba chungchângah zawh a ni a, chhân a ni nghâl bawk a ni.

Israel mite Aigupta rama an awm lai khân, Abrahama chhûng Joba chu tûn laia Arabia ramah hian a khawsa a. Chutih lai chuan, vâna vântirhkohte chu Pathian hmaah an inlan a, an zîngah chuan hel hmang Setana pawh a tel ve a ni. Chu vâna inhmuhkhâwmnaah chuan, Pathian Jehova’n a mi rinawm Joba a rinzia a sawi chhuak a. Ani chuan Joba anga rinawmna vawng mihring tumah an awm lo a ti hial a ni. Mahse Setana chuan Joba’n Pathian rawng a bâwl chhan chu A malsâwmna leh a vênhimna a dawn vâng niin a sawi a. Joba chu a thil neih zawng zawng lâk bosak a nih chuan Pathian a sawichhia ang a ti tlat bawk a ni.

Setana chuan Pathian phalnaa Joba hausakna leh a fate nun a lâksak hnuah a hrisêlna pawh a lâk bosak a. A thiltawna Setana inrawlh dân a hriat loh avângin, Joba chuan Pathianin chûng fiahnate tawhtîr a phal chhan chu a hre thiam thei lo va. Chutichung pawhin, Joba chuan Pathian a sawichhe ngai chuang lo.

Ṭhian der pathumte chu Joba hnênah an lo kal a. Bible-a Joba lehkhabu phêk tam tak awhtu an thusawiah, chûng mite chuan Joba chu a thil sual tihrûkte avânga Pathian hremna tuar nia hmin an tum char char a. Pathianin a chhiahhlawhte a lâwm lo va, a ring zo hek lo, an ti tlat a ni. Joba chuan an ngaihtuah dân dik lo chu a hnâwl a. Rinna nghet tak neiin, a thih thleng pawha a rinawmna vawn tlat a tum thu a sawi chhuak a ni.

Mahse, Joba chuan mahni thiam inchantîr a tum lutuk palh ta hlauh mai a. An thusawi zawng zawng lo ngaithlatu an aia naupang zâwk Elihua chuan thu a sawi ṭan ta. Ani chuan Joba’n mahni thiam inchantîr aia Pathian Jehova lalchungnunna thiam chantîr a pawimawh zâwk hle tih a hriatthiam loh avângin Joba chu a zilhhau va. Joba ṭhian derte pawh nasa takin a zilh bawk a ni.

Tichuan, Pathian Jehova chuan Joba chu biain, a ngaihtuahna a siam ṭhatsak a. Thil siam mak tak takte chu kawhhmuhin, Pathian Jehova chuan Joba chu Pathian ropuizia nêna khaikhina mihringte engmah tham an nih lohzia a ngaihtuahtîr a ni. Joba chuan Pathian zilhna chu inngaitlâwm takin a pawm a. ‘Khawngaihna leh zahngaihnaa a khah’ avângin, Pathian Jehova chuan Joba hrisêlna chu a pe kîr leh a, a hausakna chânte lêt hnih pein, fa sâwm nei tûrin mal a sâwm a ni. (Jakoba 5:11) Fiahna nasa tak hnuaia Pathian Jehova chunga Joba rinawmna chuan, mihringte hi fiah an nih chuan Pathian lakah an rinawm lo vang, tih Setana puhna dik lohzia chu hlawhtling takin a chhâng ta a ni.

—Joba bu a ṭanchhan.