Zirlai 12
Nunna leh Thisen Zahna Lantîr
Engtin nge nunna hi kan thlîr ang? (1) nau tihtlâk hi? (1)
Engtin nge Kristiante’n himna ngaihtuah mi an nihzia an lantîr? (2)
Nungchate tihhlum hi a sual em? (3)
Nunna zahna lantîr lo thiltih ṭhenkhat chu engte nge? (4)
Thisen chungchânga Pathian dân chu eng nge ni? (5)
Hei hian thisen inthunte hi a huam tel em? (6)
1. Jehova chu nunna Hnâr a ni a. Thil nung zawng zawngte chuan an nunna chu Pathian lakah an bâ a ni. (Sâm 36:9) Nunna hi Pathian tân a hlu a. Nu pum chhûnga awm nausên la piang lo nunna pawh Pathian tân chuan a hlu a ni. Tum rêng avânga nu pum chhûnga nausên insiam mêk tihhlum chu Pathian mithmuhah thil sual a ni.—Exodus 21:22, 23; Sâm 127:3.
2. Kristian dikte chu himna ngaihtuah mi an ni a. An lîrtheite leh an inte chu him tûrin an enkawl vek a ni. (Deuteronomy 22:8) Pathian chhiahhlawhte chuan nawmsipbâwl nân emaw, intihphûr nân emaw ṭûl lo takin an nun an thâp ngai lo. Chuvângin, mi dangte tihnat ngai chi tharum thawha infiamnaahte chuan an tel ngai lo. Tharum thawhna awmtîr thei chi intihhlimnate chu an pumpelh a ni.—Sâm 11:5; Johana 13:35.
3. Siamtu tân chuan nungchate nunna pawh a hlu a. Kristian chuan nungchate chu chaw leh silhfên atân emaw, natna leh hlauhawm laka mahni invên nân emaw an tihlum thei a ni. (Genesis 3:21; 9:3; Exodus 21:28) Mahse, râwng taka nungchate sawisak emaw, intihhlim nân leh nawm chen nâna tihhlum mai mai emaw chu a dik lo.—Thufingte 12:10.
4. Zûk leh hmuam tih te, kuvakhâwr ei te, leh nawm chen nâna ruih hlo hman te hi Kristiante tih chi a ni lo. Hêng thil chînte hi a dik lo: (1) a bawia min siam avâng te, (2) kan taksa a tihchhiat avâng te, leh (3) thil thianghlim lo a nih avâng tein. (Rom 6:19; 12:1; 2 Korinth 7:1) Hetiang thil chîn dawklak hi bânsan a harsa hle thei. Mahse, Jehova tihlâwm nân kan bânsan tûr a ni.
5. Thisen pawh hi Pathian mithmuhah chuan a hlu a. Pathian chuan nunna chu thisenah a awm tih a sawi a ni. Chuvângin, thisen ei chu thil dik a ni lo. A thisen ṭha taka tihchhuah loh sa ei pawh thil dik a ni lo bawk. Nungcha chu rehhlum emaw, thanga âwkhlum emaw a nih chuan ei loh tûr a ni. Feia khawh emaw, silaia kah emaw a nih a, ei tûr a nih chuan a thisen tihchhuah nghâl vat tûr a ni.—Genesis 9:3, 4; Leviticus 17:13, 14; Tirhkohte 15:28, 29.
6. Thisen inthun hi a sual em? Jehova chuan thisen laka inthiar fihlîm tûrin min phût tih hre reng rawh. A awmzia chu kan taksaah hian engti kawng mahin mi dang thisen emaw, keimahni thisen ngei dah ṭhat emaw pawh kan thun tûr a ni lo. (Tirhkohte 21:25) Chuvângin, Kristian dikte chuan thisen inthun rêng rêng an remti lo vang. Damdawia inenkawlna chi dang, thisen aṭanga siam ni lo damdawi dangte inthun chu an remti ang. Nun chu an duh a; mahse, Pathian dân bawhchhiain an nunna humhim chu an tum lo vang.—Matthaia 16:25.
[Phêk 25-naa milemte]
Pathian tilâwm tûrin, thisen inthunte, thil chîn thianghlim lote, leh ṭûl lo taka nun thâpte kan pumpelh tûr a ni