Zirlai 10

Pathian Huatzâwng Thiltihte

Pathianin thil ṭha lo a tihte hi eng angin nge i ngaih ang? (1)

Mipat hmeichhiatna lam thiltih engte nge dik lo? (2)

Hêng hi Kristianin engtin nge a ngaih ang? Dâwt sawi te (3) pawisa khelh te (3) rûkrûk te (3) tharum thawhna te (4) thlarau zâwlna te (5) leh, zu ruihna te (6)

Engtin nge miin a thiltih ṭha lote a sim theih ang? (7)

1. Pathian chhiahhlawhte chuan thil ṭha an ngainâ a. Mahse, sual huat dân pawh an zir bawk tûr a ni. (Sâm 97:10) Chu chu Pathian huatzâwng thiltih eng engemawte pumpelh hi a ni. Chûng thiltih ṭhenkhat chu engte nge ni?

2. Inngaihna: Inneih hmaa mipat hmeichhiatna hman te, uirêna te, ran pâwl te, chhûngkaw bul hnai inngaihna te, leh mawngkawhurna te hi Pathian laka sualna nasa takte a ni. (Leviticus 18:6; Rom 1:​26, 27; 1 Korinth 6:​9, 10) Innei lova khawsa dûn nupa tuak chu an inṭhen tûr, a nih loh vêk leh dân angin an innei ṭha tûr a ni.​—⁠Hebrai 13:⁠4.

3. Dâwt Sawi, Pawisa Khelh, Rûkrûk: Pathian Jehova chuan dâwt a sawi thei lo va. (Tita 1:​1, 2) A pawm tlâk nih duhte chuan dâwt sawi an pumpelh tûr a ni. (Thufingte 6:​16-19; Kolossa 3:​9, 10) Pawisa khelhna chi rêng rêng hi duhâmna avânga awm a ni a. Chuvângin, Kristiante chu pawisa khelhna chi rêng rêng, ṭhumvâwrnaah te, sakawr intlânsiaknaah te, leh pawisa thâpa inlehkhadennaah te an tel ve ngai lo a ni. (Ephesi 5:​3-5) Kristiante chuan rûk an ru ngai lo va. Hre reng chungin mi thil rûk an leisak ngai lo va, phalna lovin engmah an lâksak ngai hek lo.​—⁠Exodus 20:15; Ephesi 4:⁠28.

4. Thinurna, Tharum Thawhna: Thinurna thunun loh chuan tharum thawhna a thlen thei a. (Genesis 4:​5-8) Tharum thawh chîng mi chu Pathian ṭhian a ni thei lo. (Sâm 11:5; Thufingte 22:​24, 25) Phuba lâk emaw, mite’n kan chunga thil sual an tih avânga thil sual bawka thungrulh emaw chu a dik lo.​—⁠Thufingte 24:29; Rom 12:​17-21.

5. Dawi Hla Chhamte leh Thlarau Zâwlna: Ṭhenkhat chuan natna tidam tûrin thlarau sualte hnênah thiltihtheihna an ngên ṭhîn a. Ṭhenkhat dangte chuan an hmêlmate tina tûrin emaw, tihlum tûrin emaw dawi hlate an chham bawk ṭhîn. Hêng thiltih zawng zawngte phêna awm hi Setana a ni. Chuvângin, Kristiante chu hêng thil a engah mah hian an tel tûr a ni lo. (Deuteronomy 18:​9-13) Jehova hnaih hi mite’n kan chunga dawi hla an chham laka inhumhimna ṭha ber a ni.​—⁠Thufingte 18:⁠10.

6. Zu Ruihna: Zu lam chi rêng rêng, uain te, beer te, leh a dang dangte tlêm têa in chu a sual lo. (Sâm 104:15; 1 Timothea 5:23) Mahse, a lutuka zu in leh zu ruih hi Pathian mithmuhah thil sual a ni. (1 Korinth 5:​11-13; 1 Timothea 3:⁠8) A lutuka zu in chuan i hrisêlna a tichhiain, i chhûngkua pawh a tikehchhe thei a ni. Chu bâkah, thlêmna dang lakah awlsam têin a tlûktîr thei bawk che a ni.​—⁠Thufingte 23:​20, 21, 29-35.

7. Pathianin thil ṭha lo a tihte titute chuan “Pathian ram an chang lo vang.” (Galatia 5:​19-21) Pathian i hmangaih tak zeta, tihlâwm i duh chuan, hêng thiltihte hi i bânsan thei a ni. (1 Johana 5:⁠3) Pathianin ṭha lo a tihte chu huat dân zir rawh. (Rom 12:⁠9) Pathian duhzâwng titute chu kâwm ṭhîn rawh. (Thufingte 13:20) Kristian mi puitlingte kawm chu ṭanpuina bul a ni thei a ni. (Jakoba 5:14) A pawimawh berah chuan, ṭawngṭaiin Jehova ṭanpuina rinchhan tlat ang che.​—⁠Philippi 4:​6, 7, 13.

[Phêk 20, 21-naa milemte]

Pathianin zu ruih te, rûkrûk te, pawisa khelh te, leh tharum thawh te a hua