THIL MAN SANG ZEL HMACHHAWN DAN

Beisei Tlat Rawh

I chênna ramah chuan i hlawh nêna inâwm lo takin thil mante chu a sâng em? Nangmah leh i hmangaih takte tân lungkhamna i nei em? Chutiang a nih chuan, i hma lam hun ngaihtuahin i rilru a hah mai thei a. Mahse, chutiang dinhmun khirh takah pawh, beiseina neih chu thil pawimawh tak a ni.

A PAWIMAWH CHHAN

Beiseina neite chuan thil ṭha thleng tûrin duh thu an sâm mai lo va. Beiseina chuan hma laa an dinhmun chu a ṭha thei ang bera hmachhawn tûrin a chêttîr zâwk a ni. Entîr nân, beiseina neite chuan . . .

chhelna an nei lehzual a
an insiamrem thei lehzualin
hrisêlna ṭha lehzual nei tûra hma lâkna pawh tiamin, an nun dânah thu tlûkna fing an siam tih zir chianna chuan a târ lang a ni.

I TIH THEIH CHU

Pakhatnaah, Bible-in tûna a ṭanpui theih dân che ngaihtuah rawh. Bible-ah chuan thil man a sân huna ṭanpui thei tûr che thurâwn ṭha tam tak a chuang a. Chûng thurâwnte chuan i dinhmun tawh chu inrintâwkna nei taka hmachhawn thei tûr leh, harsatna i la tawh tûrte atâna inbuatsaih lâwk thei tûrin a ṭanpui ang che.

“Remhriatnain a vêng ang chia, hriat thiamnain a enkawl ang che.”—Thufingte 2:11.

Pahnihnaah, hma lam hun chungchânga Bible sawite chu ngaihtuah rawh. Bible-a finna thu chuangte hlutzia i hriat chian chuan, hma lam hun chungchânga a sawite pawh ngaihtuah tûra chêttîrin i awm ang. Entîr nân, Pathianin “hma lam hun atâna beiseina” i neih a duh tih leh, beiseina neihna tûr chhan ṭha tak a pe che tih i hria ang. (Jeremia 29:11, NWT) Chu chhan ṭha tak chu Pathian Ram a ni.

PATHIAN RAM CHU ENG NGE NI A, ENG NGE A HLEN CHHUAH ANG?

Pathian Ram chu khawvêl pum awptu tûr sawrkâr a ni a. (Daniela 2:44; Matthaia 6:10) Vân aṭanga rorêlin hrehawm tawrhna leh retheihnate a ti tâwp ang a. A hnuaia Bible chângte’n an târ lan angin, remna thlenin mihringte mamawh zawng zawng a phuhhrûksak dâwn a ni.

“Lâwm takin i awm ang a, thawvengin i awm bawk ang.”—Sâm 128:2.

“Athlâwnin an [Pathian Rama chêngte chu] thawk rim lo vang.”—Isaia 65:23.

“Leiah . . . hian buh tam tak a awm ang.”—Sâm 72:16.

Mi maktaduai têlte chuan Pathianin ‘dâwt a sawi thei lo” tih ring nghet tlatin, a thutiamte chungah rinna an nei a. (Tita 1:2, NWT) Engvângin nge nangmah ngeiin Bible chu i zir chian loh vang? Bible-a târ lan beiseina chuan sum leh pai lama harsatnate hmachhawn thei tûr leh, inrintâwkna nei taka hma lam hun thlîr thei tûrin chhûngrila chakna a pe thei che a ni.