THIL MAN SANG ZEL HMACHHAWN DAN
Thilphal Rawh
Thil man a sân avânga sum leh pai lama harsatna i nei a nih chuan, mi dangte chunga thilphalna lantîr chu thil theih loh angin i ngai thei a. Dik tak chuan, mi dangte hnêna phal taka pêk chhuahna chuan sum leh pai lama i harsatnate chu ṭha taka hmachhawn tûrin a ṭanpui thei che a. Sum tam tak sên ngai lova thilphal dân kawng a awm a ni.
A PAWIMAWH CHHAN
Kan pêk chhuah theih chu a beitham a nih pawhin, thilphalna chuan hlimna leh hlu nia inhriatna min neihtîr lehzual a. Dik takin, pêk chhuahna chu kan taksa leh rilru lam hrisêlna atâna a ṭhat thu zir chianna chuan a târ lang a ni. Entîr nân, rilru hahna, lungkhamna, blood pressure leh, taksa nawm lohna hrang hrang a ti tlêmin, tui taka mu thei tûrin min ṭanpui bawk.
Sum a nih loh leh, kawng dang eng emawa mi dangte hnêna kan pêk chhuah hian, kan mamawh huna ṭanpuina dawn chu awlsam kan ti lehzual ṭhîn a. England rama awm Howard-a chuan: “Kan nupain, mi dangte ṭanpui dân kawng leh, an chunga thilphalna lantîr dân kawng kan zawn hian, ṭanpuina kan dawn a ngaih hunah mi dangte chunga phurrit anga inhriatna kan nei tlêm lehzual ṭhîn,” tiin a sawi. Ni e, thinlung taka pe chhuaktu chuan dawn lêt a inbeisei lo ngei mai. Mahse, chutiang mi chuan ṭanpui a ngaih huna inhuam taka ṭanpui duhtu ṭhian ṭha takte a nei ṭhîn.
I TIH THEIH CHU
I thil neihte pe chhuak rawh. I thil neihte chu tlêm hle mah se, ei tûr pângngai tak buatsaih ang chi thil eng emaw pêk chhuah theih i nei a. Entîr nân, Uganda rama chêng Duncan-a leh a chhûngte chu harsa hle mah se, thilphalna an lantîr a. Duncan-a chuan: “Chawlhnîahte hian, kan nupain chaw ei sâwm kan nei ṭhîn a. Mi dangte nêna hun hmanho chu nuam kan ti thei hle,” tiin a sawi.
Ni e, mi dangte hnêna i pêk chhuah hunah a âwm tâwk hriatna i neih a ngai a. Ṭûl lo taka i chhûngte chunga phurrit siam chu i duh lo ngei ang.—Job. 17:5.
Heti hian ti chhin rawh: Chaw ei tûrin emaw, thingpui in tûrin emaw tu emaw sâwm la. Chu bâkah, i mamawh tawh loh thilte a awm chuan, engvângin nge chûngte chu hlâwkpuia ngaihlutu tûr i ṭhiante emaw, i ṭhenawmte emaw hnêna i pêk loh vang?
Kawng dangin pe chhuak rawh. Thilpêk ṭha ber pe tûrin, sum sên kher a ngai lo va. Entîr nân, mi dangte hnêna ṭanpuina ṭangkai tak pein, kan hun leh tha kan hmang thei a. Ṭawngkam ngilnei takte pawh thilpêk ang an ni thei! Chuvângin, mi dangte chu i ngaihhlutzia emaw, hmangaihzia emaw hrilh ang che.
Heti hian ti chhin rawh: Mi dangte chu in chhûng sekrek khawihpui te, in thawmṭhatsak te, a nih loh leh an mamawh leisak ang chi ṭanpuina ṭangkai takte pe la. I ṭhian tu emaw hnênah i ngaihtuahzia lantîr nân chauh pawh ni se, card emaw, text message emaw thawn ang che.
Thilphalna lantîr dân kawng i zawng a nih chuan, i hlim lehzual ngei ang.