Engvângin Nge Mi Dangte Zahna A Tlâk Hniam Tâk?

MI DANGTE ZAH A PAWIMAWH CHHAN

Mi dangte kan zah hian dinhmun chhe zual tûr kan vêng thei.

Bible-a thufing pakhat chuan: “Chhânna nêmin thinur a tikiang ṭhîn a, ṭawng huatthlala erawh chuan thinur a chawk tho ṭhîn,” tiin a sawi. (Thufingte 15:1) Zah lo taka thusawi leh thiltihte chu mei alha khâwnvârtui leih ang a ni a, chhiatna nasa tak a thlen ṭhîn.
Isua chuan: “Thinlunga khat liam chu kâin a sawi ṭhîn,” tiin a sawi a. (Matthaia 12:34, NWT) Zah lo taka thusawina chuan harsatna thûk zâwk—hnam dang te, chi dang te, kan ram mi ni lo te, a nih loh leh khawtlânga an nihnate avânga mite kan thlîr dân dik takte—a târ lang thei a ni.

Tûn hnaia ram 28-a mi 32,000 chuangte ngaih dân lâk khâwmah chuan zaa 65-te chuan tûn ang rênga zahna leh hawihhâwmna a tlâk hniam lai hi an la hmuh ngai loh thu an sawi.

I TIH THEIH CHU

School-ah emaw, hnathawhnaah emaw pawh ni se, an ngaih dân i ṭâwmpui lo a nih pawhin mi zawng zawng zah rawh. In pawm tlân theih thilte hriat tum la. Chu chuan mi khirh tak, a nih loh leh mi sawisêl hmang tak ni lo tûrin a ṭanpui ang che.

“Sawisêl tawh suh u, sawisêla in awm loh nân.”—Matthaia 7:1, NWT.

I chunga an tiha i duh tûr ang bawk chu mi dangte chungah pawh ti rawh. Mi dangte chunga ngilnei leh dik taka thil i tih chuan, i chunga chutianga an tih lêt ve a rinawm hle.

“Miin in chunga an tiha in duh tûr ang chiah chu an chungah pawh ti ve rawh u.”—Luka 6:31, NWT.

Ngaidam rawh. Ngilneihna nei lo taka thusawi leh thiltihte chu en kânin, chutianga titu chuan tihthinrim che a tum angah ngai nghâl mai suh.

“A ngaihruat thiamnain mi a thin a tihnelsak ṭhîn a, bawhchhiatna hai der chu a ropuina a ni.”—Thufingte 19:11.

Kohhran inkhâwm ṭan hmaa Jehova Thuhretute Kingdom Hall chhûng. Kum inang lo tak tak leh mi chi hrang hrangte chu hlim taka inchibaiin an inbia.

KAN THILTIH CHU

Jehova Thuhretute chuan an chênna hmun leh an hnathawhna hmunah mite chungah zahna an lantîr a, chutianga ti ve tûr chuan mite an fuih bawk.

A thlâwna Bible zir tûrin mi zawng zawng kan sâwm a; mahse, kan thurinte emaw, kan ngaih dânte emaw pawm tûrin tu mah kan nawr lui lo. Chu aiin, kan thuchah chu “zaidam tak leh zahna thûk tak nên” mite hnêna hrilhin Bible thurâwn nunpui kan tum zâwk a ni.—1 Petera 3:15, NWT; 2 Timothea 2:24.

Thlei bîk kan nei lo va, Bible zirtîrnate hre duh mi chi hrang hrangte chu kan inkhâwmnaah kan lo lâwm a. Dawhthei tak nih leh “mi zawng zawng chunga zahna lantîr” kan tum tlat a ni.—1 Petera 2:17, New International Version.

Khawiah pawh chêng ila, sawrkâr thuneitute kan zah a. (Rom 13:1) Dân kan zâwm a, chhiahte kan chawi bawk. Politics-ah tualdawih mah ila, politics thila mahnia thu tlûkna siam tûra mi dangte dikna neih chu kan zahsak a ni.